Видео – Кубан Мамбеталиев, профессор: “Азаттыктын” мурунку “Ыңгайсыз суроолор” берүүсү азыр “ыңгайлуу суроолорго” айланып калды

“Азаттык” радиосу 2002-2005-жылдары аябай жакшы, үлгүлүү иштеген. Ошондо “Азаттык” журналисттер кандай иштеш керек экенин көрсөткөн. Анда бийлик журналисттердин микрофонун, видеокамерасын тартып алышып, өздөрүн тиякка-биякка сүйрөп, ал эми Аксы окуясында ок жеп каза болгон жарандардын денесинен окту чыгарып, далилди жок кылыш үчүн бычак менен чукулап, “булар октон өлгөн жок” деп жарыялашкан. Ошондо чындыктын баарын “Азаттык” Прагадан дүйнөгө таратып жиберген. Англис тилине да которуп, Аксы тууралу чындыкты таратышкан. Анан гана ал чындык бизге да жеткен”, – деп билдирди кечээ, 9-сентябрда Ош шаарында өткөн республикалык “Ийгиликке кадам” аттуу медиафорумда форумдун спикери, публицист, филология илимдеринин доктору, элчи Кубан Мамбеталиев.
“Азыр болсо “Азаттыктын” “Ыңгайсыз суроолор” берүүсүн алалы, башында ушул берүүнүн идеясын мен Кубат Оторбаевге айттым эле, ал берүү ошондо башталган. “Азыр болсо ал “Ыңгайсыз суроолор” деген жок, “ыңгайлуу суроолор” болуп калды бул “Азаттык” радиосу. Эми “Азаттык” радиосу таптакыр эле жабылып калса деле эч нерсе болбойт. Бизде азыр бардык база түзүлгөн. Аларсыз деле күн көрөбүз. Алдыңкы басылма болбой калды, каяктан алдыңкы болмок эле, кызматтан куулган президент менен премьер-министрлердин пресс-секретарларын “Азаттык” Бишкек бюросуна жетекчи кылып алып жатса. Ал эми бийлик “Азаттыкта” иштеген журналисттерге “Маданиятка эмгек сиңирген ишмер” деген сыйлыктарды берип жатса. Бул эмне деген шумдук? Эмне деген ыңгайсыздык? “Биздин коомдогу эң ийгиликтүү, эң баалуу тармак – бул журналистика. “Демократия аралчасы” деген ат бизге мына ушул сөз эркиндиги үчүн берилген. Конституцияга “президент бир эле мөөнөткө шайланат” деген норма мына ушул журналисттердин күчү менен, укук коргоочулардын жана оппозициячыл саясатчылардын колдоосу менен кирип калган…”, – деди профессор Кубан Мамбеталиев.
Булак: KyrgyzToday.kg

Ой-пикир жок

Жооп калтыруу

Сиздин электрондук почтаңыз жарыяланбайт. Милдеттүү талаалар белгиленген *