Кечээ, 5-июлда Жалал-Абад облусунун Ала-Бука районунда катуу жааган жамгырдан улам сел жүрүп, жергиликтүү тургундардын бирин агызып кеткен. Бүгүн, ал адамдын жансыз денеси Өзбекстандын аймагынан табылды. Бул тууралуу Мамлекеттик чек ара кызматынан кабарлашты.

Маалыматка караганда, селге аккан адамды чек ара кызматкерлери менен жергиликтүү тургундар издеп, Кыргызстандын аймагынан табылбагандан кийин өзбек чек арачыларын жардам берүүгө чакырышкан. Натыйжада сел агызып кеткен адамдын жансыз денеси Өзбекстандын аймагынан табылган. Учурда маркумдун денесин Кыргызстанга алып келүү боюнча иштер жүргүзүлүп жатат.

Алмазбек Атамбаевдин кызы Алия Шагиева атасынын гитара менен ырдаганын кубаттап, атайын кат жибергенин соцтармактагы баракчасында билдирди. Бирок, катта эмне жазылганын сыр кылып, айткан эмес. Төмөндө Алиянын фейсбуктагы жазганын өзгөртүүсүз беребиз:

«Нарисовала для папы открытку. Не покажу, что написала внутри, потому что о самых трепетных вещах не говорят громко. Люблю, люблю, люблю и поздравляю с выпуском гитарных песен. Так счастлива видеть, что он занялся делом души, залечивающим нервы, вытаскивающим улыбку, прибавляющим к жизни время. Я всегда воспринимала его как творческого человека и неспроста – он с юности сочинял музыку, писал стихи и, представляете, рисовал! Да, рисовал и причём много – листала недавно его альбом, который заполнялся приблизительно в моем возрасте. Склонность к искусству передалась ко мне именно от него. Спасибо, спасибо! И мне всегда было неважно, что о нем говорят – в политике я не разбираюсь абсолютно. В отличие от посторонних людей я знаю его изнутри. Знаю его взгляд, когда он думает о чем-то в расслабленной обстановке, знаю его лицо, когда мысли заставляют его просыпаться среди ночи. И никакие слова никаких людей не заставят меня усомниться в том, что он лучший. Обнимаю!».

2016-жылдын 1-июлунда Кыргыз Республикасынын Жогорку сотуна караштуу Сот департаменти Кыргыз Республикасынын Жогорку сотунун судьяларынын 5 бош кызмат орундарына сынактык тандоого арыздарды жана документтерди кабыл алууну аяктады. Бул тууралу КР Жогорку Сотунун басма сөз катчысы Айнура Токтошева билдирди.

Эскерте кетсек, Кыргыз Республикасынын Судьяларын тандоо боюнча кеңеши «Кыргыз Республикасынын судьяларынын статусу жөнүндө» Кыргыз Республикасынын конституциялык Мыйзамынын 15-беренесине ылайык Жогорку соттун 5 бош кызмат ордуна сынактык тандоо жарыялаган. Сынактык тандоого арыздар жана документтер 2016-жылдын 21-июнунан 1-июлуна чейин кабыл алынган.

Шанхай кызматташтык уюмунун Ташкенде өткөн саммитинде Алмазбек Атамбаевдин артында отуруп, жосунсуз жоруктарды жасаган жигит казакстандык дипломат экени буга чейин маалым болгон. Кечээ, Казакстандын тышкы иштер министри Ерлан Идирисов журналисттердин суроолоруна жооп берип жатып, өз кызматкеринин мындай осол кылыгы үчүн Атамбаевден кечирим сурады.

“Бул жигитти мен жакшы билем, жумушка да өзүм алгам. Ишин мыкты билет. Саммит учурунда камералар тартып жатканын унутуп калса керек. Баардык эле адам адашат да. Ал үчүн аны күнөөлөп, эки элдин мамилесине доо кетире турган сөздөрдү айтуунун кереги жок. Кеткен катачылыктар үчүн кечирим сураймын”, – деди Идирисов.

Кечээ, 5-июль күнү Жети-Өгүз районундагы “Кумтөр” алтын кен казуучу ишканасында өрт чыгып, анын кесепетинен 1978-жылы туулган Асылбек Асанов аттуу жергиликтүү тургун 2-даражадагы күйүк жаракат алды. Бул тууралуу Өзгөчө кырдаалдар министрлигинин басма сөз кызматы билдирди.

Маалыматка караганда, учурда колу, бети жана мойну күйгөн жаран Ысык-Көл облустук ооруканасына жеткирилип, дарыланып жатат. Өрттүн келип чыгуу себептери аныкталып жатат.

Алмазбек Атамбаев кыргызстандыктарды Орозо айт майрамы менен куттуктоосунда динчилерди саясатка аралашпоого чакырды.  Ал азыркы ааламдашуу доорунда прогресс менен кошо бөтөн маданияттарды, жүрүм-турум образдарын, керек болсо кийимдерден бери таңуулоого жол ачылганын, диний ишеним менен улуттук маданиятты, салттарды карама-каршы коюунун айынан бир улут ичинде, атүгүл бир үй-бүлөдө карама-каршылыктар күчөгөнүн жана бул нерселер мамлекеттердин коопсуздугуна, улуттук биримдик менен ынтымакка доо кетип жатканын айтты.

“Тилекке каршы, бул көрүнүштөн Кыргызстан да четте калган жок. Динди күчтөп таӊуулоо, башка ишенимдеги же атеист мекендештирибизди кемсинтүүлөр, коркутуулар болуп жатат. Акыркы кезде диний ишенимге байланыштуу чатактар ырбап, саясый түскө ээ боло баштаганы кабатыр кылат. Динчилер саясатка киришкенде эмне болоорун азыркы күндө бир топ араб өлкөлөрүнөн көрүп жатабыз. Кыргызстан калкынын басымдуу көпчүлүгү мусулмандар экени талашсыз. Ислам – тынчтыкка, ынтымакка данакер дин. Бул дин таңуулоого муктаж эмес. Болгону ар ким ишенимге өз жолу менен келиши, Кудайды өз ыктыяры менен таанышы керек деп эсептейм”, – деп айтылат президенттин куттуктоосунда.

6-чакырылыштын депутаттары келери менен эле артыкчылыктарынан баш тартууга камынганы баарыбызга эле маалым. Деген менен арадан 9 ай өтсө да, ага караманча каршы болгон эле өкүлдөрү аз эмес. Айрымдары алар үчүн түзүлгөн шарттарды депутаттык артыкчылык деп айтканга да оозу барбастыгын так айтат. “Бейтарап” программасы бул чыгарылышында депутаттык артыкчылыктын күнгөй-тескейи тууралуу сүйлөшүп, “Баш тартуу керекпи?” деген суроонун алкагында аталган мыйзамдын ээлери болгон “Республика-Ата Журт” фракциясынын депутаты Таабалды Тиллаев жана КСДП фракциясынын депутаты Карамат Орозова менен биргеликте талкуу уюштурдук.

– Карамат айым, сиз бул мыйзам долбооруна башынан эле каршы болуп келе жатасыз. Сиздин пикириңизде депутаттык артыкчылыкка кандайдыр бир чектөө болушу керекпи?

Орозова: -Алгач “депутаттык артыкчылык” дегенди жакшылап түшүнүп алышыбыз керек. Депутат мамлекеттин эсебинен жеп, мамлекеттин эсебинен жашап, дарыланса, ошонун баары депутаттык артыкчылык болот. Азыркы депутаттык статус жөнүндө сунушталып жаткан долбоор артыкчылыкка жатпайт. Себеп дегенде учурдагы депутаттар кызматтык үйдө убактылуу жашап, мөөнөтү бүткөндө бошотуп берет. 1-2-3-чакырылыштын депутаттарында аябагандай чоң артыкчылыктары бар болчу. Ошол убакта мыйзамдуу түрдө, токтомдун бекитилүүсү менен эл өкүлдөрүнө үйлөр менчиктештирилип берилген. 2008-жылы 4-чакырылыштын депутаттары депутаттык статус жөнүндө мыйзам кабыл алып, менчиктештирип алуудан баш тарткан. Биз депутат деген кызматты салыштырмалуу билишибиз керек. Кызматтардын улуктуулугу боюнча атайын мыйзам бар. Эгер артыкчылык деп атап, андан баш тарта турган болсок, өкмөттүн башка тузүмдөрүндө да кеңешчи, жардамчылары жана башка артыкчылыктары бар. Анда алардан да баш тартыш керек болот. Ошол себептүү мен бул долбоорду туура эмес деп эсептейм.

– Мыйзам долбоор буга чейин да көтөрүлгөн. Азыр сунушталып жаткандын мурдагыдан кандай өзгөчөлүктөрү, айырмачылыктары бар?

Тиллаев: – Жуурканга карап бутту сун деген кыргызда жакшы макал бар. Бюджетти 24 млрд менен кабыл алып отурабыз. Негизи 40 млрд болушу керек эле. Мындай абалда эл өкүлү болгон соң алардан артыкчылыктуу болбойлу деп жатабыз. Биз азыркы учурда кызматтык жардамчыдан жана унаадан баш тартабыз. Анткени бул экөөнөн баш тартуу депутаттык ишмердүүлүккө татаалдык туудурбайт.

– Сиз айткан артыкчылыктардан баш тартсак, биздин бюджетке канчалык пайда түшөт?

Тиллаев: – Биздин эсеп боюнча 100 млн сомдон көп пайда түшөт. Иш башкармалыгынын 6 айлык жумуш боюнча берген отчетунда 60 млн сом үнөмдөлгөнү маалым болду. Мен ойлойм, бул суммага эки мектеп курулат.

– Бул аракеттер киреше булагы болуп бере алабы же жөн гана популизмдик кадамдарбы?

Орозова: – Бул чындап эле популизм. Биз мындай киреше булагын башка жактан да издеп тапсак болмок. Бул чакырылыштагы партиялар келерден мурун киреше табуу боюнча көп пландарын айтып келишкен. Ошолорду ишке ашырып, завод-фабрикаларды куруу менен тапсак да болмок. Мыйзам сунуштоодо эки жагын тең караш керек. Ал адамдардын жашоо турмушун татаалдаштырбашы шарт. Алсак, биз 60 млн сомду үнөмдөгөнүбүз менен 120 жардамчы жана 120 айдоочуну жумушсуз калтырдык. Алар башка жумушка орноштубу, аларга компенсация төлөндүбү, бул боюнча эч ким ойлонгон жок. Совет учурунда комсомолдук жаштар комитети болуп, кадрларды даярдап чыгарат болчу. Кийин ал жоюлуп, кадр маселеси курчуду. Ошол үчүн депутаттардын жардамчылары 5 жыл мыйзам менен иштеп, даяр кадр болуп чыгуусуна жол ачылган эле. Бул жагынан алып каранда да мыйзамда мүчүлүштүктөр бар экени байкалат.

– Унаа менен атайын кызматтан баш тартуу, депутаттардын ишмердүүлүгүнө канчалык таасирин тийгизет?

Орозова:  – Демилгечилер аны да эсептеп чыгыш керек эле. Депутаттык кызмат ары түйшүктүү, ары жоопкерчиликтүү жумуш. Мурда эл өкүлдөрү округдар менен иштешсе, азыр бүткүл өлкөнү кыдырууга туура келет. Азыр кеңешчи жардамчынын ролун аткарып калды. Мыйзамды депутат өзү жалгыз иштейт. Аталган эки нерседен баш тартуу менен жумуштагы эффективдүүлүк азаят. Бул да менчиктештирүү сыяктуу бир эки жылда өз таасирин берет. Өнүккөн өлкөлөрдү карасаңыз мыйзам иштеп чыгуучу чоң институттар бар. А, ЖКда экспертиза бөлүмүндө болгону беш эле кызматкер иштейт. Учурда Кыргызстанда көптөгөн тармактарда реформалоо жүрүп жаткандыктан, бардык органдар мыйзамдарды өзгөртүүдө, иштеп чыгаарда анализдеш керек. Муну кыскартуу менен айрым фракцияларга кошумча берилип калды. Ошентип орун алмашууда сумма өзгөрбөй келет.

Тиллаев: – Бизге берилген мүмкүнчүлүктөн эл үчүн баш тартсак популизмге кирбейт. 120 айдоочу жана кызматчынын жумуш орду жоюлуп кетти дегенге каршымын. Анткени бир чакырылыштын мөөнөтү бүтсө, айдоочусу да, кызматчысы да штаттан чыгарылат. Жаңы келгендер өзүлөрүнүн адамдары менен келет. Бюджет тартыш болуп жатканда эл өкүлү катары депутаттар биринчи өзүбүздөн башташыбыз керек. Андыктан, бир кеңешчи менен деле иштесе болот.

Орозова: – Депутаттын кеңешчиси мыйзамдар менен иштейт. Ал эми жардамчы региондордон келген каттарга жооп берип, элдер менен жолугушуу өткөрөт. Шайлоо учурунда кабыл алууну уюштурат. Кызматчы кетсе кеңешчиге оор болуп калат. Депутат бир эле учурда айдоочулук милдетти да, өз кызматын да аткара албайт. өзгөчө кырдаалдарда эл менен чукул жыйналчу болсо, депутат бара албай калышы мүмкүн. Ошондуктан киреше булагын башка жактан издесек болчудай.

– 5-чыгарылышта депутаттардын муктаждыктары үчүн 12 миң сом бөлүнсө, 6-чакырылышта 40 миң бөлүнгөнүн экс-депутат Улукбек Кочкоров айткан. Жардамчы менен унаадан баш тартканы менен жалпы чыгаша эл өкүлдөрүнө берилип калган дегендер да болгон. Сиз буга кандай карайсыз?

Орозова: – Ар чакырылышта түрдүү социалдык абалдагы депутаттар шайланат. Мүмкүнчүлүгү болгондор өзүлөрү эле артыкчылыктан баш тартып койсо болмок. Ач курсакты ток билбейт дегендей, кесиптештериме өз палатасында мүмкүнчүлүгү чектелгендерди да эсепке алуусун айтаар элем.

– Таабалды мырза, мыйзам долбоорун даярдап жатып, депутаттык артыкчылыкка муктаж болгондордун шарты эске алындыбы?

Тиллаев: – Албетте эске алынган. ЖКнын 30 батирлүү үйүн калтырганга макул болдук. Турак жайы жок экенин тастыктаган документ көрсөтсө үй берилет. Депутаттын мугалимден, доктордон эч айырмасы жок. Эгер артыкчылык алгыбыз келсе, аларга да ижарага үй алып берели. Учурдагы шартка карап эл өкүлү катары баш тартканыбыз оң. Өнүккөн өлкөлөрдө деле унаасы, кызматчысы жок эле жүргөн депутаттар бар. Андыктан биз да эл менен болуп, аралашып көнүшүбүз керек.

– Бул чакырылышта олигархтар келди деп жатабыз. Артыкчылыкка муктаж болгондор канчалык?

Тиллаев: – Мен ага кошулбайм, себеби ар тараптан келишти. Мугалими да, айыл өкмөттө иштегени да бар. Эл үчүн чоң күч жумшаган, бизге жумуш ордун түзүп, салык төлөгөн бизнесмендерди душман кылып көрсөткөнүбуз туура эмес.

– Андан сырткары эл өкүлдөрүнүн бекер дарылануу, бала бакчаларда арзандатуу сыяктуу артыкчыларына өзгөртүү кирдиби же такыр алынып салындыбы?

Тиллаев: – ЖКнын депутаттык статусу боюнча 5 беренеге өзгөртүү киргиздик. Алар: ЖК депутатын турак-жай менен камсыз кылуу, траспорттук тейлөө, мейманканага кезексиз жайгашуу, эмгек укуктарына кепилдиктер жана эл өкүлүн медициналык турмуш-тиричилик менен пенсиялык жактан камсыз кылуу укуктарын карадык. Андан сырткары, санаторий маселеси депутаттар арасында талаш болуп жатат.

– Карамат айым, сиз жогоруда аталган артыкчылыктардан баш тартууга кандай карайсыз?

Орозова: – Бекер дарылануу деген туура эмес. Керектүү дарылардын баарын сатып алабыз. Эл арасында бекер дарыланабыз дегенибиз туура эмес. Кан тапшыруудан тарта диагноз коюга чейин баарына акча төлөйбүз. Эми пансионат маселесине келсек, ал да артыкчылыкка кирбейт. Анткени ага да колунда барлар гана барбаса, мүмкүнчүлүгү чектелгендер бара албайт. Бери дегенде эле 35 миңдей каражат керектелет. Кошумчалай кетчү нерсе, биз мурда менчиктештирүү боюнча мыйзамды куруп алып, Кыргызстан кайра артка кеткенбиз. Биз бир катар бала бакчаларды, аскер кызматынын үйлөрүн менчиктештирген соң, эми минтип жаңыдан кура албай жатабыз. Мүлктү менчиктештирүүгө каршымын, себеби өлкө толук мамлекеттик кызматчыларды кызматтык үй менен камсыз кыла элек. Мурда аймактардан келген адистер кызматтык үй менен камсыз болсо, азыр андай эмес. Ошондуктан учурда түрдүү тармактагы жүздөн ашуун кызматтык орун бош. Мурдагы катачылыкты эми түшүнүп, ипотекалык комитет түзүлдү. Андыктан мамлекеттик мүлктү менчиктештирүүдөн алыс болгонубуз оң. Анткени, биз азыр менчиктештирип алсак, кийинки келгендерге үй куруп берүүгө туура келет.

Угарман: Баткен районунда дарыгерлердин орточо айлыгы 8 миң, ал эми депутаттардын маянасы 80 миң болуп жатат. Сиздин оюңузча адилеттүү элеби?

Орозова: – Салыштырмалуу туура айттыңыз. Мыйзам чыга электе, өзүбүздүн кызматтык унаага эмгек акысына 10 миң сомдон транспортко жана бензинге кетчү эле. Ал эми, ар бир иш сапары үчүн 7 000 бөлүнчү. Ошол учурларга салыштырганда бүгүнкү күндөгү айлык акыбыз депутаттык ишмердүүлүүккө жетпейт. Айдоочуң жок болсо, чакырылган жерге өз убагында бара албайсың. Мындан сырткары техникалык каражаттар; ксерокөчүрмө, компьютер дегендер да бар. Көзгө чоң сумма көрүнгөнү менен, депутаттын иш сапарларын эске алганда ишмердүүлүк үчүн жетпейт.

Угарман: Депутаттар кол тийбестиктен баш тарта алабы?

Орозова: – Ооба, эл өкүлү болгондуктан кол тийбестиктин деле кереги жок.

Тиллаев: – Сөзсүз баш тарта алабыз, бирок Баш мыйзам ага жол бербейт экен.

– Карамат айым, сиздин фракцияңыздар ишти жаңы баштаганда кагаз иретинде болбосо да, оозеки түрдө мыйзамды колдоорун билдирген. Кийин эмне болду?

Орозова: – Депутаттык артыкчылыктан баш тартуу жөнүндөгү мыйзам өкүлдөр жаңы ишке кирээрде көтөрүлгөн. Бул кызматтын жоопкерчилигин практика жүзүндө көрө элек депутаттар дароо эле артыкчылыктан баш тартышкан. Мен башында эле айткам, шашылыш чечим кабыл албайлы, иштеп көргөндө анан билесиңер деген ой-пикиримди айткам. Азыр эми практика жүзүндө көрүштү. Каршы чыккандардын санынын көбөйгөнү да ошондон.

– Равшан Жээнбеков президентке жылына 350 миллион сом бөлүнөөрүн айткан. Эгер бюджетти толтуруу максатында артыкчылыктардан баш тартып жатсак, өлкө башчынын да чыгашаларына чектөө коюлар…

Тиллаев: –  Сөзсүз, буга барышыбыз керек. Ошондуктан алгач өзүбүздөн баштап жатабыз. Жалаң эле акча үнөмдөө эле эмес, бүт реформа болсун деген максат бар. Анткени казынанын 60 %ы аткаминерлерди багыш үчүн маянага, тейлөөгө кетип жатат. Кыргызстан парламенттик өлкө болгондуктан, биз баш тартсак, анан калган органдар да ошондой кадамга барат. Учурда артыкчылыктардан баш тартуу токтом катары иштеп жатат, эми мыйзам түрүндө кабыл алсак өкмөткө, андан ары жергиликтүү кеңешке чейин түшүш керек.

– Депутаттардын артыкчылыгы алынып, лидерлерге кандай шарттар түзүлдү? Анткени артыкчылык алынып жатканы менен лидерлерге артыкчылык көп берилди дегендер бар.

Тиллаев: – Лидерлер деле депутат катары каралган, эч кандай кошумча артыкчылык берилген эмес. Партиянын ичинде катчылыкты күчөтүп коюшту. Ал өзү жетишет, дегеним жардамчы боюнча чочулабаш керек.

– Карамат айым, концепция туура болсо, анда эмнелерди өзгөртүш керек?

Орозова: – Булар айтып жатат, кыскартуу менен мемлекетке киреше алып келебиз деп. ЖКда мыйзамды кайра иштеп чыгаруу боюнча институт түзүлсө, ошол мыйзамды колдосок болот эле. Мыйзам сапаттуу, элдин турмушун жеңилдетип, жадакалса аткаруу бийлигине да жардам бере турган таасирдүү болушу зарыл. Шашпай, бир-эки жыл иштеп, институтту түзгөн соң бул демилгени көтөрсөк болмок.

Тиллаев: – Өзүнөр билгендей көптөгөн талаштар бар. Аталган мыйзам экинчи окууга киргенде айкын болот. ЖКнын карамагындагы 30 батирди калтыралы деген пландар бар. Үйү жок өкүлдөр тескөөчү органдын аныктамасы менен келип жашайт да, депутаттык мөөнөтү бүткөндө кезектеги өкүлгө өткөрүп берет. Мамлекеттин атынан жашаганды токтотушубуз керек. Жардам катары арзан кредиттерден пайдалануу мүмкүнчүлүгүн түзсөк жакшы болот.

– Карамат айым, эгер мыйзам үч окууда тең кабыл алынса, сизлердин кийинки кадамыңар кандай болот?

Орозова: – Анда мыйзамдан чыкпай иштейбиз. Эл өкүлү катары баш ийем. Биз артыкчылыктан баш тартуу мыйзамынан мурда коомчулукту кызыктырган, көйгөйүн чечкен долбоорду колго алсак дагы да элге жакыныраак болмокпуз. Биринчи кезекте элди ойлосок деген ойду айтаар элем.

Тиллаев: -7 %дык мыйзам долбоорун биринчи окууга киргиздик. Баардык эле мыйзамдар кабыл алынып жатат. Учурда артыкчылыктан баш тартуу токтом катары аткарылып келе жатат. Буйруса депутаттар колдойт, парламенттик өлкө болгондуктан аткаминерлердин саны азаят. Мамлекет оптимизацияга жана реформага барыш керек.

Булак: maralfm.kg

– Садыр Нуркожоевич, «Ата Мекен» фракциясы «Кумтөрдү» улутташтыруу маселесин кайрадан көтөрүштү. Ал тургай, фракциянын чечимин да кабыл алышты. Ушул маселени ийне-жибине чейин билген адис катары айтыңызчы, улутташтыруу туурабы же туура эмеспи? Жаңылышпасак, сиз улутташтыруу туура эмес деп жүрдүңүз эле? 

– Ооба, улутташтыруу туура эмес. Денонсация кылышыбыз керек. Экөөнүн айырмасын жөнөкөй тил менен чечмелеп, түшүндүрүп бергенге аракет кылайын.

“Улутташтыруу” деген бул кимдир бирөөнүн менчик мүлкүн мамлекетке алып жатсаң, анда ал мүлкүн базар баасында баалап, ага акчасын төлөп бересиң. Бул жерде “Кумтөр” канадалыктардын менчик мүлкү эмес да. Алардын ал жерде бир долларлык мүлкү жок. Фабрика, техника, запастык бөлүктөр жана башка баардык мүлктөр Кыргыз тарапка тиешелүү акчанын эсебинен сатылып алынган. Эң башында эле “Кумтөрдө” жактан алтындын запасын күрөөгө коюуп, 476 миллион доллар кредит алышып, анын жарымына техника сатып алышып, фабриканы курушуп, калган жарым акчаны ошол мезгилде эле жеп кетишкен экен. Баарын документалдуу фактылар менен тастыктадык. 1997-жылдан баштап алтын чыга баштаганда баягы 476 миллион доллар кредитти толугу менен алтындын эсебинен кайра төлөп коюшкан. Бүгүнкү күнгө чейинки сатылып алынган техника жана башкалар Кыргызстандын үлүшүнүн эсебинен сатылып алынып келе жаткан экен. Бул жерде професионалдуу финансит же экономист болуштун кажети жок. Баары сокурга деле көрүнүп турат. Инвестиция катары мамлекетибизге бир доллар сырттан келген эмес. Тескерисинче, 25 жылдан бери бүгүнкү күнгө чейин жылда 20-24 тонна алтын (1 миллард доллар) сыртка чыгып кетип турат экен. Демек, “Кумтөр” толугу менен 100 % Кыргыз элиники.

Ооба, кагаз жүзүндө канадалык ишкерлердин 67 пайыз акциясы бар. Бул акцияга биздин чиновниктер менен бирге алар коррупциялык, алдамчылык жол менен ээ болушканын толук далилдеп чыкпадыкпы. Дагы эмне керек? Анан ушул өзүбүздүн менчик мүлкүбүз болгон “Кумтөрдү” улутташтырып, кайдагы бирөөлөрдү “кожоюн” деп таанып, аларга үч миллиард доллар акча төлөп берели дегендин өзү маңкуртчулук. Маалымат каражаттарынан окуп калдым, айрым саясатчылар айтып жатат “улутташтырабыз дагы, биздин экологиябызга келтирген зыян менен баланс кылып эсептешип коёбуз” деп.

Эмнеге биз өзүбүздү өзүбүз туңгуюк жолго алып барышыбыз керек? Эртең алар эл аралык сотко беришсе, эл аралык сот сурайт да, “чын эле улутташтырып алдыңарбы?” деп. Биз “ооба” дейбиз. Анда эл аралык сот “үч миллиард доллар төлөп бергиле” дейт. Анда эмне дейбиз? Эч нерсе дей албайбыз. Себеби, биз улутташтыруу менен өзүбүз “Кумтөр” алардын менчик мүлкү экенин тааныган болобуз. Ошентип, өзүбүздү өзүбүз туңгуюк жолго такап коюп жатпайбызбы. Эмне үчүн өз байлыгыбыз үчүн башкаларга акча төлөп беришибиз керек экен? Эч түшүнбөйм. Ортодо тиги тарап менен сүйлөшүп алышып, дагы деле кезектеги афера болуп жатса керек деп ойлойм.

Ал эми экологияга келтирген зыянды болсо, биз эч кандай балансы жок эле түздөн-түз төлөтүп алышыбыз керек. Бул  Кыргыз мамлекетинин толук укугу жана милдети! Экологиябызга келтиришкен зыяндын көлөмү бир эмес, он “Кумтөрдүн” баасы болот.

Эми, “денонсацияга” келели. Бул деген сөз – баштапкы болобу, эң акыркы болобу, баардык келишимдерди канадалык ишкерлер аткарган эмес. Экологиябызды талкалап салышкан. Коррупциялашып кеткен. Үлүшүбүздү толук берген эмес. Алтындардын көпчүлүк бөлүгүн официалдуу түрдө каттабастан, түздөн-түз уурдап чыгып кетишкен. Булардын баарын тастыктаган жүздөгөн документалдуу фактыларды таап чыкканбыз. Баары көзгө сайгандай көрүнүп турат. Мына ушулардын негизинде эле келишимди бир тараптуу “денонсация” кылып, алып коюшубуз керек. Баардык келишимдерде кыянаттык жолго барышса, биздин мыйзамдарды бузса, келишимден баш тартып “Кумтөрдү” мамлекетке алып коёбуз деген пункттар турат. Тилекке каршы, бийлик башчыларыбыз өздөрү крыша болушуп, тигилерди коргоп келе жатышкандыктарынын кесепетинен алты жылдан бери ала албай келе жатабыз. Алты жылда мамлекетибиз 100 тоннадан ашуун алтындан (беш миллиард доллардан) куру жалак калдык. Эгер, бийлик башындагылар жеке кызыкчылыгынан баш тартып, напсисин тыйып, беш жыл мурда эле алып койгондо, эң жок дегенде мамлекетибиздин сырткы карызыбыздан кутулуп калат элек.

Мага айрым жарандарыбыз “эмне үчүн мурдагы бийликтегилердин убагында эмес, дал ушул бийликтин убагында “Кумтөрдү” ачып чыктыңыз?” деп суроо беришет. Биринчи себеби, мурда текшерип көргөн эмесмин. Экинчи, бул бийлик апрель окуясындагы 90 баланын, Ош окуясындагы 500 адамдын каны менен келген бийлик болчу. Ошолордун арбагынан коркуп, таза иштешет болсо керек, мамлекетке алганга каршы болбосо керек деген таза ой менен ачыкка алып чыккам. Тилекке каршы, катуу жаңылыпмын. Мына, өзүңүздөр күбө болуп тургандай беш жылдан бери бир эле “Кумтөр” эмес, канчалаган мамлекетти багып кете турган мекемелерди ит бекерге сатып, алардан үлүш алып, төшүн тосуп коргоп келе жатышат. Кыскасы, айта берсек арман көп дегендей кеп.

Айзирек Эгембердиева

Тилек Алтымышев тууралуу алгач коомдук активист Марат Абдраев социалдык түйүндөрдө жазып чыккан. Андан соң айрым телеканал, сайттар коомчулукка маалымат таратышкан. Тилек эки эжеси жана атасы болуп Чүй айылында жашайт, ата-энеси беш жыл мурда ажырашып кетишкен. Атасы да 2-топтогу майып.

“Дастан Сарыгуловду камакка алуу бул саясый шоу, биз “Кумтөр” алтын кени боюнча ушундай коррупциялык беренелер менен 2014-жылы бир нече кишини камакка алганда “мөөнөтү өтүп кетти” деп бошотуп жиберишкен”, – деп билдирди экс-генпрокурор, азыркы депутат Аида Салянова “Сентябрь” телеканалынын “Ак шам” телеберүүсүнүн суроолоруна жооп берип жатып.

2009-жылдын 26-октябрында Кыргызстандын президенти Курманбек Бакиев  Мамлекеттик башкаруу системасын реформалоо зарылдыгына таянып, КР Наркотикти көзөмөлдөө агенттигин натыйжасыз иштеген орган катары жоюп салат да анын функцияларын КР Ички иштер министрлигине өткөрүп берет.

Алмаз Атамбаев, Роза Отунбаева, Өмүрбек Текебаев баштаган оппозиция ызы-чуу салышат. “Бакиевдер Ооганстандан Россияга, Европага өтчү наркотрафикти көзөмөлгө алган наркомафия менен иштешип жатышат. Ошондуктан алардын наркобизнесине тоскоолдук кылып жаткан КР Наркотикти көзөмөлдөө агенттигин эл аралык наркомафиянын буйрутмасы менен жоюп, алардын функциясын  Ички иштер министрлигине өткөрүп салышты. Ички иштер министрлигинде андай адистер аз, эми биз аркылуу наркотиктин транзити көбөйөт. Бул эң туура эмес иш болду. Мындай иш Бакиевдердин гана колунан келет”, деп ыйлакташса булардын жанына адам чыдап тура алчу эмес.

2010-жылы 7-апрелде Кыргызстанда куралдуу мамлекеттик төңкөрүш болуп,  Алмаз Атамбаев, Роза Отунбаева, Өмүрбек Текебаев баштаган оппозиция бийликти басып алышты.

2010-жылы 17-августта Өткөөл мезгилдин президенти Роза Отунбаеванын указы менен КР Наркотикти көзөмөлдөө мамлекеттик кызматы түзүлөт да биз адилеттүлүктү  орноттук, наркомафияны жеңдик таризинде жар салышат.

2016-жылы 9-июнда КР Жогорку Кеңешинин СДПКчы депутаты Рыскелди Момбеков парламентте “Наркобарондор кайрадан КР Наркотикти көзөмөлдөө мамлекеттик кызматын жойгону жатышыптыр.  Бул өтө керектүү кызмат. Биз наркобарондорго бул кызматты жоюуга жол бербейбиз” деп кыйкырып чыкты.

2016-жылы 4-июлда президент Алмаз Атамбаевдин төрагалыгы астында өткөн  КР Коргоо кеңеши укук коргоо органдарын реформалоо зарылдыгына таянып, КР Наркотикти көзөмөлдөө мамлекеттик кызматын Бакиев сыяктуу эле натыйжасыз иштеген орган катары жоюп, анын функцияларын КР Ички иштер министрлигине өткөрүп берүү чечимин кабыл алып жарыялады.

Эгер депутат Рыскелди Момбековдун айтканы менен болсок анда КР Наркотикти көзөмөлдөө мамлекеттик кызматын жойгону жаткан наркобарондор КР Коргоо кеңешинде олтурган турбайбы. Колунан келсе эми өзү убада кылгандай наркобарондорго бул кызматты жоюуга жол бербей койбойбу.

2016-жылы 4-июлда Коргоо кеңешинин отурумунан кийин маалымат жыйын өткөргөн Коргоо кеңешинин катчысы Темир Жумакадыров “КР Наркотикти көзөмөлдөө мамлекеттик кызматы натыйжасыз иштеп жатат. Былтыр 2015-жылы наркокылмыштардын 80%ын Ички иштер министрлиги ачса, КР Наркотикти көзөмөлдөө мамлекеттик кызматы 18%ын гана ача алды. Ал эми кылмышкерлерден тартып алынган наркозаттардын салмагынын 81,2%ын ИИМ алган болсо, КР Наркотикти көзөмөлдөө мамлекеттик кызматы 17,8%ын гана тартып ала алган.  Кыскасы, КР Наркотикти көзөмөлдөө мамлекеттик кызматы ИИМдин эле ишин кайталап, бирок натыйжасын өтө аз бергендиктен биз бири-бирин кайталаган эки кызматты бириктирип, бул багыттагы баардык иштерди ИИМдин Наркотикти көзөмөлдөө кызматына өткөрүп берүүнү чечтик”, деп билдирди.  2009-жылы Бакиев да ушул эле негизге таянып бул кызматты жойгондо бүгүнкү бийлик теңирден тескери сүйлөгөн болучу. Эми ошону түшүнүү үчүн 6 жыл бийликте олтуруу керек экен да.

Бул тууралу белгилүү юрист Искен Афиджанов минтип билдирди: “Демек, логика боюнча Курманбек Бакиевдин 2009-жылы КР Наркотикти көзөмөлдөө агенттигин өз алдынча орган катары жоюу чечими туура болгон экен да. Бакиевдин өзүнүн жана анын туугандарынын наркомафия менен эч кандай байланышы жок турбайбы. Бакиевдер тууралу бүгүнкү бийлик 6 жылдан бери айтып келаткан сөздөрдүн баары калп чыкпадыбы?”, – дейт.

Эгер Бакиевдер 2009-жылы КР Наркотикти көзөмөлдөө агенттигин жоюу менен наркобизнеске аралашкан болсо анда бүгүнкү Атамбаевдик бийлик да ошол эле жол менен наркобизнеске аралашты. Эгер чын эле Атамбаев менен Бакиев айткандай КР Наркотикти көзөмөлдөө агенттиги натыйжасыз иштеп, ИИМдин функцияларын гана кайталап жатканы чын болсо, эми аларды бириктирүү зарылдыгы келип чыкса анда Атамбаевчилердин Бакиевдерди наркобизнеске аралаштырганы карандай калп болуп калды.

Булак: Кyrgyztoday.kg

Стамбулдагы терактка шектелгендердин арасында Дагестандын, Кыргызстандын жана Тажикстандын жарандары бар экенин Түркия президенти Режеп Тайип Эрдоган билдирди. Бул тууралуу түркиялык Анадолу агенттиги жазып чыкты.

“Акыркы кармоолорду кошкондо бул боюнча камакка алынгандар 30 адамга жетти. Бул кармоолор көп маалыматтарды ачыкка чыгарышы мүмкүн. Кармалгандар арасында Дагестан, Кыргызстан жана Тажикстандын жарандары бар”, – деди Эрдоган Стамбулдагы сапары учурунда.

Шектүүлөрдүн 11и чет өлкөлүк экени кабарланууда.

Ал ошондой эле тергөө мурдагыдай эле терактты “Ислам мамлекети” экстремисттик тобу жасады деп эсептерин кошумчалаган.

Мурдараак расмийлер Раким Булгаров жана Вадим Османов аттуу Орусия жарандары аэропорттогу жардырууну жасашкан деп билдирген. Үчүнчү жанкечтинин тек-жайын жана жарандыгын аныктоо иши жүрүп жатканын айтышкан.

28-июнда Стамбулдагы жардырууда набыт болгондордун саны 45 кишиге жетти. 230дан ашууну жараат алган. Жарадарлардын жыйырма чактысы оор абалда.

Булак: “Борбор Азия жаңылыктар кызматы”

Бисмиллаахир-рахмаанир-рахиим!
Мээримдүү жана ырайымдуу Алла Таалага чексиз мактоолор, алкыш-даңктоолор болсун!

“Урматтуу мусулман бир туугандар, ага-ини, эже-карындаштар!

Сиздерди Ош облусунун мусулмандар казыятынын атынан жана жеке өзүмдүн атыман ыйык Орозо Айт майрамыңыздар менен чын дилимден куттуктайм! Жараткан жалпы момун мусулмандардын туткан орозосун кабыл кылсын!

Алла Таала айтат: “акыйкатта, орозо Мен үчүн кармалат жана ал үчүн Мен соопторду берем, анткени, адам Мен үчүн деп өзүнүн нафси-каалоосун тыят, тамактан баш тартат!”. Орозо кармаган адамды эки кубаныч күтөт: бири – ооз ачаар мезгилде, экинчиси болсо, өзүнүн Роббиси менен жолугушууда. Жана чындыгында орозо кармаган адамдын ооздон чыккан илебинин жыты Алла үчүн аңкыган мускустун жытынан жакшыраак!”

Жалпы баарыбыз Рамазан айы ичинде орозо кармоо менен сабырдуу жана чыдамдуу болууга үйрөнүп, сооптуу жана кайрымдуу иштерди жасоого амал кылуу менен өзүбүздүн ашказан, тил, көз, кулак, кол, бутубузду эле сыноодон өткөрбөстөн, аң-сезимибизди жана жүрөгүбүздү да сыноодон өткөрүп, руханий тазаланууга багыт алып олтурабыз.

Ар бириңиздердин Рамазан айында кылган сооптуу амалдарыңыздар, жасаган кайрымдуулук иштериңиздер кабыл болсун. Ылайым Жараткан Алла Таала баарыбызды ушул орозо айттын алдындагыдай аруу, таза сезим менен, кайрымдуу жана берешендик сапатыбыз менен кийинки Рамазанга жетишибизге насип кылсын!

Орозо айт күнү бардык тилектериңерди  Жаратканыбыз кабыл кылсын. Эч бир мусулмандын башына кайгы-капа жетпесин! Эч качан башыбыздан бакыт, үйүбүздөн тынчтык, коломтобуздан жылуулук, ортобуздан достук, элибизден ынтымак, жерибизден береке кетпесин!

Айтыңыздар маарек болсун, урматтуу мекендештер!

Ош облусунун мусулмандар казысы Атабаев Самидин кары

Бүгүн, 5-июлда Кытай Эл Республикасынын Гуандун провинциясынын губернаторунун орун басары Сюй Жуйшэн жетектеген топ Ош облусуна жумушчу сапары менен келди. Конокторду КР Өкмөтүнүн Ош облусундагы ыйгарым укуктуу өкүлү Таалайбек Сарыбашов кабыл алды. Бул тууралу өкүлдүн басма сөз кызматы билдирет.

Облус жетекчиси “ Кыргыз-Кытай алакалары 1991-жылдан тарта ар тараптуу өнүгүү жолуна түшүп соода-экономикалык, маданий гуманитардык багытта алакаларыбыз бекемдеп келе жатат. Тышкы саясый мамиледе КЭР менен болгон байланыштар биз үчүн маанилүү. Бүгүнкү күндө сиздердин Гуандун провинциясы экономикалык өсүүсү жана калк санынын көптүгү жагынан алдыңкы орунда турары бизге маалым. Андыктан биздин Ош облусу сиздер менен соода-экономикалык, маданий жана гуманитардык багыттарда кызматташууга кызыктар. Айрыкча биздин облус дыйканчылыкка ыңгайлашкандыктан айыл-чарба багытында иш алып баруу өзгөчө орунда турат. Биздин чөлкөмдө өстүрүлгөн экологиялык таза тоо балын, эт азыктарын жана жер-жемиш түрлөрүн экспорттоого кызыктарбыз. Ошондой эле кайра иштетүү, жеңил өнөр жай тармактарына да инвестиция салса болот. Кыргыз-Кытай чек арасына жакын жайгашкан жалпы баасы 110 млн долларга барабар болгон “Сары-Таш” эл аралык соода борборунун долбоорун ишке ашыруу алдыдагы максаттардан”-деди.

КЭРнын Гуандун провинциясынын губернаторунун орун басары Сюй Жуйшэн да айтылган сунуштарды кубаттап өттү. Бул багытта чоогу жумуш алып баруу, кызматташтыкты арттыруу, ишкерлер ортосундагы байланышты күчөтүү жана Ош облусуна инвестиция салуу боюнча максаттары бар экендигин айтып өттү. Эки тараптуу жолугушуу Ош облусунун жана Ош шаарынын аймагында эмгектенген ишкерлердин катышуусунда өттү. Эки тараптуу кызматташтыктын шарттары макулдашылды. Эки облус жетекчилери Гуандун провинциясы менен Ош облусунун мындан аркы кызматташтыгын арттыруу жана бекемдөө келишимдерине кол коюшту. КЭРнын Гуандун провинциясынын губернаторунун орун басары Сюй Жуйшэн иш-чара соңунда атайын коноктор үчүн ачылган эстелик китебине өз кол тамгасын коюп Кыргыз элине болгон калоо тилектерин жазып калтырды.

Мындан сырткары эки өлкө ишкерлери үчүн бизнес форумда уюштурулган. Ага Ош ЖИАнын өкүлдөрү, Кытай жана Кыргыз ишкерлери катышууда. Мында жаңы долборлордун үстүндө иштөө жана аларды ишке ашыруу багытында келишимдер жана макулдашууларга кол коюлуп сүйлөшүүлөр жүрүүдө.

Бүгүн, 5-июлда Бишкек шаарынын Жеңиш аянтында миңдеген момун мусульмандар катышкан Айт намаз болуп өттү. Айт намазга Кыргызстандын муфтийи Максатбек Токтомушев баштаган дин аалымдары жана премьер-министр Сооронбай Жээнбеков, Бишкек шаарынын мэри Албек Ибраимов, депутат Акылбек Жапаров, министр Кудайберген Базарбаев жана башка инсандар катышышты.

Өткөн жуманын аягында Алмазбек Атамбаев гитаранын коштоосунда  өзүнө таандык делген “Судьбе назло” аттуу ырын ырдап, коомчулукту дүрбөлөңгө салды. Анын ырын ар ким ар кандай кабыл алды. “Жакшы ырдайт экен, өзүн кыйнап саясатта жүрбөй ырчы эле болуп алса жарашат турбайбы” дегендер болду.

Ал эми бүгүн ажонун ошол популярдуу боло баштаган ырына пародия жазышыптыр. Учурда автору ким экенин белгисиз пародия интернетте тарап, кызуу талкуулана баштады.

https://youtu.be/LhND-HEs4P4

Өткөн жумада Ак үйдүн алдында Бакыт Мендешов деген адам Жогорку Кеңештеги “Өнүгүү-Прогресс” фракциясынын депутаты Абдыкапар Султановго нааразычылык билдирип, өзүн өрттөгөнгө аракет жасаганда милиция кармап кеткен эле. Аялы депутат Султановдун тууганына таандык фирмада иштеп, ак жеринен каржылык мыйзам бузууларга барган деген айып менен камалып жатканын айткан Мендешов, бийлик өкүлдөрүнөн иштин акыйкат иликтенүүсү үчүн жардам берүүсүн өтүнгөн. Бирок, анын айткандары боюнча эч кандай чара көрүлбөгөндүктөн, ал бүгүн дагы жакындарын ээрчитип Ак үйдүн алдына келип, өздөрүн өттөгөнгө аракет кылышты. Бирок, бийлик тараптан алардын үнүн уга турган адам чыккан жок. Болгону милиция кызматкерлери менен өрт өчүргүчтөр келип, окуяга көз салып турушту.

Британиянын Daily Mail. басылмасы кадимки качкын Максим Бакиев тууралуу маалымат жарыялады. Анда Максимдин майы качып арыктап калганын, атургай алда немедей сакал койгонун, сапсайган сакалына ак кирип кеткени айтылат. Муну менен чектелбей британиялык бизнесмен Шон Дейли аны сотко бергенин да билдирди.

Анда айтылгандай кайран Максим 300 млн фунт стерлинг (439 млн 919 миң 832 доллар) үчүн тээ 2006-жылы эле анын көзүн тазалатмак болуптур. Ошол мезгилде ресторандан 2 жаштагы баласы менен чыгып баратканда ага кол салышып, аз жерден өлбөй калыптыр. Айтымында самолет менен Британияга чукул жеткирбесе өлүп деле калмак экен. Максимдин ошол огу али да алынбай боорунда жүрүптүр. Ошону менен М.Бакиевге биздин колубуз жетпесе да Британиянын колу жетет окшоп калды.

Булак: “Жаңы агым”

Эртең, 5-июлда Бишкек шаарындагы Жеңиш аянтында Орозо айт намазы окулат. Муфтияттын билдирүүсүнө караганда Айт намазына өкмөт башчы Сооронбай Жээнбеков, Бишкек мэри Албек Ибраимов катышып, куттуктоо сөздөрүн сүйлөшөт.

Маалыматка ылайык, саат 06:00дөн баштап 07:00гө чейин дин аалымдарынын катышуусунда баян болот. Ал эми намаз 07:30да окулат.

Учурдан пайдаланып, Кyrgyztoday сайтынын эмгек жамааты баардык кыргызстандыктарды касиеттүү Орозо айт майрамыңыздар менен куттуктайт. Жалпыңыздардын үй-бүлөңүздөргө тынчтык, Кыргызстаныбызга бакубат жашоо, элибиздин жүрөгүнө бекем ыйман каалайбыз. Жараткан жасаган жакшы иштериңиздерди жана туткан орозоңуздарды кабыл кылган болсун!

Алмазбек Атамбаев АКШ президенти Барак Обаманы Америка Кошмо Штаттарынын көз карандысыздык алгандыгынын 240 жылдыгы менен куттуктады. Бул тууралуу президенттин маалымат кызматы билдирди.

Мамлекет башчысы өз телеграммасында кыргыз-америкалык алака-катыштардын жогорку деӊгээлин жана демократияны, коопсуздукту  чыңдоо чөйрөлөрүндө, экономиканы жана жарандык коомду өнүктүрүүдө өз ара жемиштүү аракеттерди канааттануу менен белгиледи.

«Биздин өлкөлөр ортосунда достук, стратегиялык жана өз ара пайдалуу өнөктөш мамилелер мындан ары да өз ара түшүнүшүү жана конструктивдүү кызматташтык нугунда өнүгө берерине ишенем», – деп белгиленет телеграммада.

Атамбаев Обамага чың ден соолук, мамлекеттик ишине ийгиликтерди каалап, ал эми дос америка элине мындан аркы гүлдөп өнүгүүнү тиледи.

Премьер-министр Сооронбай Жээнбеков юстиция министри Жылдыз Мамбеталиевага карата тагылган милдеттерди тийиштүү түрдө аткара албагандыгы үчүн тартиптик мүнөздөгү чара кабыл алууну тапшырылды. Бул тууралуу өкмөттүн маалымат кызматы билдирди.

Ошондой эле аталган министрликтин статс-катчысы Нуржан Таштановго дагы жумушундагы кемчиликтер үчүн чара көрүү тапшырмасы берилди.

Премьер-министр Сооронбай Жээнбековдун буйругу менен өкмөткө караштуу Мамлекеттик каттоо кызматынын төрагасынын орун басары Күмүшбек Шамкановго тагылган милдеттерди тийиштүү түрдө аткара албагандыгы үчүн сөгүш жарыяланды. Бул тууралуу өкмөттүн маалымат кызматы билдирди.

Чынында, мындай сөгүш Мамкаттоонун төрагасы Тайырбек Сарпашевге дагы берилсе туура болмок. Анткени паспорттогу улут графасын алып салууну ойлоп таап, анысы эл ичинде көптөгөн каршылыкты жаратты. Белгилүү коомдук жана мадания ишмерлер да Сарпашевди кыргыздын душманы катары сыпатташып, улут маселеси менен ойнобой, жөн жүрүүгө чакырган эле.

Өткөн жума соңунда Аксы районунун Сөгөт айылынын карамагындагы 2,5 гектар жерди Өзбекстандын чек арачылары басып алганы тууралуу маалымат тараган. Анда 30-июнь күнү өзбек чек арачылары Кыргызстандын аймагына кирип келип, кыргыз жарандары пайдаланып, тоют чөп өстүргөн жерди ээлеп алышканы айтылган.

Ал эми бул маалыматты Мамлекеттик чек ара кызматы четке кагып, өзбек чек арачылары эч кандай жерди басып албаганын, аймакта абал тынч экенин айткан.

Видео: “Азаттык”

Иштегенине жыл айланбай Жогорку Кеңештеги 5 депутат айым мандатынан ажырады. Алардын кээ бирлери өз каалоосу менен мандатын тапшырганын айтса, кээлерин фракция лидерлери күчкө салып эле Ак үйдөн айдап чыгышканын коомчулук жакшы билет. Кызыгы, ошол мандаттан ажыраган айымдардын ордуна жалаң эркектер келиптир. Буга жаны ачыган депутатат айымдар Ысык-Көлдө  өткөн форумда гендердик маселелерди талкуулашып, эгер Жогорку Кеңештен аял депутат кете турган болсо, анын ордуна келе турган жаңы депутат сөзсүз түрдө айым болушу шарт деген маселени көтөрүштү.

Форумда баяндама жасаган депутат Т.Исакунованын белгилешинче, ЖК депутаттарынын арасындагы айымдардын көрсөткүчү 1995-жылдагы 105 депутаттын арасында бешөө гана аялдар болгонун ачыктады. Ал эми 2000-жылдагы 105 депутаттын 7си айым болгон. Бирок, мындай өсүш көпкө сакталган жок. Ага  2005-жылдагы жалаң мырзалардан турган парламенттин түзүмү далил. 2007-жылы 90 депутаттын 23ү аялдардан турса, 2010- жылы алардын эсеби 28ге жеткен. Бул жакшы жылыш деген менен кайра эле азыркы 2015-жылы шайланып келген парламентте аял-депутаттардын саны 16% болуп төмөндөп кетти.

Ошондуктан, депутат айымдардын форуму мандатын тапшырган айым депутаттардын ордуна келе турган жаңы депутат сөзсүз түрдө айым болушу шарт деген сунуш менен чыгууда.

Жакында Казакстан менен Өзбекстанда бийлик алмашуу болот. Ошондо саясый туруксуздук орун алып, жалпы Борбор Азияга, анын ичинде Кыргызстанга да коркунуч жаралышы мүмкүн.

Мындай пикирди бүгүн 29-июнда “Борбордук Азиянын аймактык коопсуздук көз карашы, негизги коркунучтар жана турукташтыруу мүмкүнчүлүктөрү” аталышындагы жыйында орусиялык изилдөөчү Андрей Русаков билдирди.

Екатеринбургдан келген Русаков Европа-азиялык изилдөөлөр борборунун аткаруучу директору болуп эмгектенет. Бул жыйындын катышуучулары, негизги коркунучтардын катарын маалыматтык коопсуздук, терроризм, диний экстремизм, баңгизат, мыйзамсыз миграция экенин белгилешти. Орусиядан келген эксперт булар менен кошо саясый коркунучтар да алдыда күтүлүп турганын айтты.

«Эртели-кечпи жакында Казакстан менен Өзбекстанда да бийлик алмашат. Ал учур саясый коркунучтарды жаратат. Бардыгы тынч эле өтсүн деген ниеттебиз, бирок Актөбедеги акыркы окуялар эсибизде. Аны Орусия да бир топ талкуулашты. Ошондуктан, эксперттер биргелешип, бул теманы талкууга алып, коркунучтарды алдын алуу керек»,-деди Русаков.

Жыйынга катышкан экс-депутат Бегалы Наргозуев да мындай коркунуч бар экенине кошуларын айтты.

-Кыргызстандагы бийлик алмашууларда да коңшу мамлекеттер кооптонуп, коопсуздугун күчөтүп турушкан. Аталган мамлекеттин бийликтери стабилдүүлүктү кармоого аракет кылып жатышат. Бирок, ал канчалык сакталарын эч ким билбейт. Ошондуктан баарына даяр болуш керек.

Ал эми ЖКнын депутаты Каныбек Иманалиев, бул тармакта кепилдик анан негизгиси биримдик жок экенин айтып, коргоонуунун жолдорун сунуштады.

-Борбор Азиянын өлкөлөрү өз алдынча тышкы коркунучтар менен күрөшүүгө алы жетпейт. Ошондуктан Жааматтык коопсуздук келишим уюму жана Шанхай кызматташтык уюму сыяктуу бирикмелер менен кызматташтык бекемделип жатат. Бирок аларга да кепилдик жок. Себеби Өзбекстан уюмга кирбейт. Бул деген аталган чөлкөмдөгү мамлекеттер бир пикирге келе албай жатат дегенди билдирет. Практика да жок. Ошондуктан Кыргызстан өзүнүн армиясы менен чек араларын бекемдеп, жогорудагы аталган уюдардын ишин жакшыртып, регионалдык биримдик түзүш керек.

Коомдук ишмер Адахан Мадумаров болсо, бардык маселени бийлик, мамлекеттегилер өздөрү жаратаарын айтып, дипломатияны күчтөш керектигине токтолду:

“Бардык көйгөйдү бийликти кармап тургандар өздөрү жаратат. Алардын жоопкерчиликсиздиги да чоң коркунуч. Мына жакында эле Президент Алмазбек Атамбаевдин Өзбекстандын ажосу Ислам Каримов менен жолугуп, жылуу сүйлөшкөнү жакшы жышаан. Мындай аракеттер илгери эле жасалышы керек болчу. Дипломатиялык мамилелерди бекемдөө учурдун талабы. Бул дагы коопсуздукту бекемдөөгө жакшы шарттарды түзөт”, – дейт Мадумаров.

Жыйындын соңунда жакшы жыйынтыктарга жетүү үчүн бул талкуу жана изилдөөлөр дагы уланары белгилүү болду.

Канай Анаркулов

Булак: maralfm

АКШнын президенти Барак Обама Ак үйдө ифтар өткөрдү. Ага жакын санаалаштары менен коомчулук өкүлдөрү катышып, Обама үй-бүлөсү менен келген конокторго өз колдору менен тамак салып берип турушту. Дүйнөдөгү эң чоң державаны башкарган адамдын мындай жөнөкөйлүгүнөн биздин чиновниктер дагы сабак алса жарашчудай.

Эске салсак, жакында биздин президентибиз Алмазбек Атамбаев дагы ооз ачырды. Бирок, ал өзүнүн атынан облустарга чабармандарын жөнөтүп, ошолор аркылуу ифтар өткөрдү. Албетте аны да түшүнсө болот, анткени бирөөнүн чынысына тамак салып берүү биздин башчыларыбыз үчүн өтө уят сезилиши мүмкүн. Ал эми чыныгы демократиялуу өлкөлөрдө эл жарды-кедей, жетекчи-кызматкер, чоң-кичине болуп бөлүнбөй, баары бирдей укукта жашайт эмеспи.

https://youtu.be/qpqQMAP7ynw

Бүгүн, 4-июлда Алмазбек Атамбаевдин төрагалыгы астында Коргоо кеңешинин кезектеги жыйыны болот. Президенттик аппараттын маалымат кызматынын билдирүүсүнө караганда жыйында укук коргоо органдарын реформалоо жана азыркы шарттарда республикада миграциялык процесстерди жөнгө салуу боюнча маселелер каралат.

Жыйын жабык режимде өтөт. Анын жыйынтыктары боюнча Коргоо кеңешинин катчысы Темир Жумакадыров журналисттерге брифинг өткөрөт.

Кыргызгидрометтин берген маалыматына ылайык, бүгүн, 4-июлда өлкө аймагында түнкүсүн айрым жерлерде, күндүз көпчүлүк аймактарда өткүн өтүп, күн күркүрөйт. Батыштан соккон шамалдын ылдамдыгы секундасына 4-9 метрден, кээ бир райондордо 15-20 метрге чейин жетиши күтүлөт.

Бишкек шаарында өткүн өтүп, күндүн күркүрөшү күтүлөт. Батыштан соккон шамалдын ылдамдыгы 4-9 м/с. Абанын температурасы түнкүсүн 18…20 градус, күндүз 26…28 градус жылуу болот. Ош шаарында түнкүсүн жаан-чачын күтүлбөйт, күндүз өткүн өтүп, күн күркүрөйт. Батыштан соккон шамалдын ылдамдыгы 4-9 м/с. Абанын температурасы түнкүсүн 18…20 градус, күндүз 30…32 градус болот. Чүй өрөөнүндө түнкүсүн 15…20, күндүз 26…31, Талас өрөөнүндө түнкүсүн 11…16, күндүз 23…28, Баткен аймагында түнкүсүн 15…20, күндүз 26…31, Жалал-Абад областында түнкүсүн 16…21, күндүз 28…33, Ысык-Көл областында түнкүсүн 10…15, күндүз 20…25, Нарын областында түнкүсүн 7…12, күндүз 22…27 градуска күн жылуу болот.

Жогорку Кеңештеги депутат айымдардын Ысык-Көлдө өтүп жаткан форумунда уюштуруу иштери каралды. Буга чейин аталган форумга төрайымдык кылып келген депутат Ашэра Халикова мандатын тапшырып кеткендигине байланыштуу, бул орунга депутат Эльвира Сурабалдиеванын талапкерлиги көрсөтүлүп, ал бир добуштан шайланды.

Буга чейин деле V чакырылышта парламентарий айымдардын форуму иштеп келген. Андагы жүргүзүлгөн иштердин ыкчам натыйжасына жетишүүдө форумга мүчө болгон депутаттардын  ар бири  тармак-тармак боюнча иш алып барган. Бул жолу деле ошол тартип сакталат.

Депутат айымдардын форумунун иш планын түзүүдө медиа-план иштеп чыгуу сунушун вице-спикер Алтынай Өмүрбекова ортого салды.

Депутат Евгения Строкова болсо гендер маселеси социалдык мүнөзгө ээ болгондуктан, ЖК Социалдык маселелер боюнча комитетинин мүчөлөрү үчүн дагы атайын тренингдерди уюштуруп туруу зарылчылыгын билдирди.

Бул жолку иш чараны өткөрүүдө Кыргызстандагы Эл аралык мамилелердин Улуттук демократиялык институту жакындан колдоо көрсөттү. Аталган институттун директору Алан Лэинг мырза өз сөзүндө депутат айымдар форумунун логотибин иштеп чыгууга, жаштар арасындагы долбоорлорду тажрыйбалоого жардам берерин билдирди. Андан тышкары сот тармагына, бюджетке мүнөздүү болгон жана коррупцияга каршы даярдалган мыйзам долбоорлору боюнча түшүндүрүү иштерин жүргүзүүдө да Улуттук демократиялык институт өнөктөш болууга даяр экендигин ырастады.

Москвада 28-июнь күнү Кыргызстандын жараны, кылмыш дүйнөсүндө “Кара Казбек” деген каймана ат менен белгилүү болгон криминалдык авторитет Казбек Билалов кармалып, бейбашчылык беренеси менен азырынча 30 күнгө абакка алынды. Ал 26-июнь күнү Москванын Тарас Шевченко көчөсүндө бейбаштык кылып “Гелендваген” машинасынан автоматтан ок аткан деп шектелүүдө.  Бул берене менен Казбек Билалов 5 жылга чейин камалып кетиши мүмкүн. Полицияда ал “Москвада тандыр нан (лепешка) сатып тирилик кылам” деп билдирген, бирок минип жүргөн машинасынын Москвадагы баасы 100.000. доллардан ашык.

Кыргызстанда Казбек Билалов 1994-жылы, 1999, 2000, 2006, 2007, 2008, 2009-жылдары КР Кылмыш жаза кодексинин ар түрдүү беренелери боюнча соттолгон.

Казбек Билалов акыркы жылдарда Москвада кыргыз мигранттарынан мыйзамсыз акча талап кылгандыгы жана тоногондугу  менен белгилүү. Базарлардагы кыргыз мигранттарынан 10 миң доллардан акча талап кылып, Москва полициясына колго түшүп, Кыргызстанга аны экстрадиция кылышса да кайра эле бошоп кетип жүргөн. Айрым бир маалыматтарга караганда ал 2013-жылы кыргыз бийлиги мыйзамсыз бошотуп жиберген криминалдык төбөл Азиз Батукаевдин  уюшкан тобуна кирет.  Казбек Билалов да Азиз Батукаев да чечен улутунан болушат.

https://www.youtube.com/watch?v=WU-62nOT7Lw

“Республика-Атажурт” партиясынын лидери Өмүрбек Бабанов Жогорку Кеңештин биринчи сессиясынын аякташы менен өз партиялаштарына жана журналисттерге маалымат жыйынын өткөрүп, “президенттик шайлоого барасызбы?” деген сыяктуу бир нече суроолорго жооп берди.

Алмазбек Атамбаев гитаранын коштоосунда “Тагдырга моюн сунбай” (“Судьбе назло”) аттуу ырды аткарганы интернетке тарап кетти. Айтымында бул ыр ажонун эң алгачкы ырларынан экен. “Бул ыр менин девизим десем болот. Жашоомдо ар кандай кыйынчылык учурлардан чыгууда жардам берип келген”, – дейт Атамбаев.

Курманбек Бакиевдин учурунда президенттин катчылыгында иштеп, жаңы бийлик келгенден кийин “Манас” аэропортуна барып, директорлук кызматка чейин жетип, өткөн жылы КТРКнын башчылыгына келген Илим Карыпбеков башынан катаал турмушту кечиргенин айтып, агынан жарылды. Кечээ, Алмазбек Атамбаев мектепти артыкчылык менен бүтүргөн окуучуларга “Алтын сертификаттарды” тапшырып жатып, көчө шыпырып, пол жууганын айта салды эле, “шефинин” сөзүн дароо Карыпбеков колдоого алып, интернеттен комментарий жазды.

“Алмазбек Шаршенович, сонун сүйлөдүңүз. Айтылган ар бир сөзүңүзгө кошулам. Мен дагы кайсы бир учурда Ош базарында көчө шыпырып, дүкөндө соода кылып жүргөнмүн. Жашоодо ушундай тажрыйба топтогонум үчүн азыр абдан кубанычтамын”, – дейт Карыпбеков.

Албетте, жумуштун уяты жок, ак эмгек менен адал оокат кылганга не жетсин. Бирок, мамлекеттик жогорку кызматтарды мыкчып отурган адамдар көчө шыпырып, дүкөндөп тажрыйба топтобой, билимин өркүндөтүү жагынан тажрыйбасы мол болгону жакшы эмеспи. Ишенген ажобуз дагы учурунда кара курсак деп жүрүп, институтта окуганга убактысы болбогонун моюнга алды. Анан, өзү айтпаса да анын билиминин деңгээли сүйлөгөн сөздөрүнөн эле көрүнүп турбайбы… Бийликке жетүүнүн айлакердиги билим менен гана чектелбей тургандыгы азыр дайын болду.

Ал эми Илим Карыпбековдун өзүнүн тагдырын Атамбаевдин тагдырына окшоштуруп, Атамбаевге кошоматтана калганы анын көзүнө илинейин деп жатканыбы же мураскерликке амбициясы барбы?

Адахан Мадумаров “Борбор Азиядагы аймактык коопсуздуктун  аспектилери, негизги коркунучтар жана аларды жайгаруунун жолдору”  аттуу тегерек үстөлдө коопсуздук жана ички душмандар, ошондой эле алардын зыяны жөнүндө кеп кылыптыр.
Адахан Кимсанбаевич, сиз айткан проблемаларды оңдосо болот.
Андан башка негизги коркунуч, негизги ички көйгөй бар  Адахан Кимсанбаевич!
Биринчиси:
Эң негизги коркунуч жана өлкөбүздүн өнүгүүсүнө өтө чоң кедергисин тийгизип жаткан жагдай, биздин беделдүү саясатчыларыбыздын өз ара тил табышып, биригише албай, өзүнүн жеке МЕН гана деген төш кагууларынан улам күчсүз, кубатсыз араң жандарга айланышы деп эсептейт элем.
Экинчиси:
Кыргыз саясатындагы алдыңкы адамдардын ошондой бири бирине “кергиштеген” мүнөздөрүн сиз айткан “ички коркунуч” жаратуучулар абдан жакшы билип алышкан жана силер менен жалгыздатып эсебиңерди таап келатышат…  Бөлүнгөндү бөрү эле эмес, бөлтүрүктөр эле бөктөрүп кетишип жатышат го…
Үчүнчүсү:
Күн санап убакыттын тарып баратышы…
Аттиң…
Бир күчкө бирикпей “чамгарактап” жүрө берип чаалыгасыңар акыры!
А силердин ордуңарды ийменчээк, ийилчээк, максатына жетүү үчүн улуттун кызыкчылыгын да уруп таштаган, мамлекеттин “слабый зонага” айланмактан жерге кирсе да түйшөлбөгөн “жестокий” “слабактар” ээлеп алышат, мына чыныгы коркунуч!

Шайырбек Абдрахманов, журналист

Өгүнү интернет желесинде Курманбек Бакиевдин иниси Асылбек Салиев Москва шаарындагы мекендештерге агасынын атынан ооз ачтыруу аземин өткөргөнү жарыяланды. Дасторкон үстүндө ар кыл сөздөр айтылып, арасында туңгуч качкын президент Аскар Акаев менен канкор Курманбек Бакиевди элдештирүү маселеси козголуптур. Иш-чараны уюштуруучулардын бири Маматжан Акжолов башында “кылыктанып” аткан Аскар Акаев азыр Бакиев менен “сүйүү ырын ырдаганга” көнгөндөй түр жаратып атканын шыбырап айтса да бизге чейин угулду. Мына кызык тамаша! Россиядагы боордошторубузду ооз ачтырабыз шылтоосу менен уюшулган бул чайлашуунун түпкү максаты көрсө элинен безе качкан канкор, коррупционер ажолорду “баш коштуруу” турбайбы?! Эмне эле Курманбек Салиевичтин Мырзакматов сыяктуу үзөңгүлөштөрү Москвада көзгө чалдыгып калды десе, сырдын түйүнү бу жакта жаткан тура! Ал ортодо, парламенттеги айрым фракция лидерлери, депутаттар тумандуу Албионго барып, Максим Бакиев менен “пайлашып” келгени кабарланганын эстен чыгарбайлы. “Кумтөр” долбоорундагы былыктар чуурулуп чыга баштаганы эзелки душмандар Акаевдер менен Бакиевдер ушинтип “үлпөт тоюна” даярдык көрүүгө жол ачты. Алдыда дагы саясый күрөш күчөөрү турган иш эмеспи. “Бакиевди көрөйүн деген көзүм жок, аны менен бир дасторконго отурбайм” деп безеленген Акаев эми кандайча актанып чыгар экен десең…

Булак: “Ачык саясат”

Элге тоодой убадаларды берип, өлкө тагдырын чечүүчү парламентке отурган депутаттар мыйзамдарга кандай добуш бергени тууралуу видео интернетте тарады. Чындыгында бул тууралуу көп сөз айтуунун деле кажети жоктой. Төмөнкү видеодо сиздер менен биз ишенип шайлаган эл өкүлдөрүнүн добуш берүүдөгү “ишмердүүлүгү” чагылдырылган.

Бүт мыйзам бузууга, калпка, эки жүздүүлүккө негизделген бүгүнкү бийликтин нагыз жүзү ушул. Ушул партиялардын баары Атамбаевдин  батасын алып анан шайлоодон жеңгендер.

https://youtu.be/Uc-1wQYFOgU

Жогорку Кеңеш жыйынында депутаттар Бакыт Төрөбаев, Өмүрбек Текебаев, Тынчтык Шайназаров, Алмамбет Шыкмаматов демилгелеген “Кыргыз Республикасынын референдуму жөнүндө” конституциялык мыйзам долбоорунун концепциясы каралды. Демилгечилердин бири Алмамбет Шыкмаматовдун айтымында, референдум жөнүндөгү аракеттеги мыйзамды Конституцияга шайкеш келтирүү максатында иштелип чыккан. Мыйзам долбоору эл өкүлдөрүнүн ортосунда кызуу талкууну жаратты.

Депутат Камчыбек Жолдошбаев: “Өзүңөргө өзүңөр көр казбагыла, мындай мыйзамдын бизге кереги жок”- десе, Чолпон Жакупова: “Шашпай чыдап тургула, ноябрь айында референдум өтөт, кийинки жылдын февралында парламент таркатылат. Баарына, бийликтин көзөмөлүндө тургандарга да ушундай буйрутма берилди. Анан улуу урматтууңар менен эле өзүңөр каласыңар…” деген пикирин билдирди..

Булак: “Фабула”

Жакында эле Таласка өкмөттүн өкүлү болуп барган Дайыр Кенекеевге премьер-министр Сооронбай Жээнбековдун ичи жылыбай жаткан көрүнөт. Анткени кечээ, өкмөттүн жыйынында башбакан Кенекеев башкарып жаткан облуста кемчиликтер көп болуп жатканын айтып, тез арада чара көрүүнү эскертти.

Премьер белгилегендей, облуста айрым экономикалык көрсөткүчтөр боюнча төмөндөөлөр байкалууда. “Кемчиликтердин катарына электр энергиясы үчүн дебитордук карыздардын көөбөйүүсүн келтирсек болот. Бул багытта тийиштүү чараларды кабыл алуу керек. Мындан сырткары төө буурчакты сатуу боюнча иш жөнгө салынбай жатат, дыйкандар кыйналып жатышат”, – деди Жээнбеков.

Эске салса, буга чейин таластыктар Дайыр Кенекеевдин келиши менен облуста эч кандай өзгөрүү болбосун айтып, эл ичинде ага ишеним жок экенин билдиришкен эле.

Өткөн жумада СДПКчы депутат Кожобек Рыспаевдин Япониядагы Кыргызстанды уят кылган жосунсуз жоруктары тууралу жазган элек.  Ал маалымат жарыяланары менен  ошол убакта Кыргызстандын Япониядагы элчилигинде иштеген кыргыз жараны биз менен байланышка чыгып,  СДПКчы депутаттардын андан да ашып түшкөн  уят иштерин айтып берди.  Анда сөз өз оролу менен кетсин.

Ошентип СДПКчы депутат Кожобек Рыспаев баштаган 3 депутат Япония парламенти уюштурган “Япондук шайлоо системасы” боюнча окууларга барбай 10 күн мейманканадан чыкпай чардашат. Кетерден бир күн мурун гана япон парламентинин спикери берген сый тамакка барышып, СДПКнын “маданиятын” япондорго көрсөтүшүп, кыргыз делегациясын уят кылышат. Эртеси делегация жолго чыгарда алардын мейманканада жасаган дагы бир жоруктары ачыкка чыгып,  билинип калып чоң жаңжал чыгат.

Японияда коомдук жайлардын дээрлик баарында тамеки тартууга болбойт.  Ал үчүн атайын бөлүнгөн  бөлмөлөргө гана барып  тартыш керек. Кыргыз делегациясы жайгашкан 5 жылдыздуу New Otani Tokio Hotel мейманканасынын жатак бөлмөлөрүндө да тамеки тартууга катуу тыюу салынган.  Тартипти бузгандарга чоң айыппул салынат. Тамеки тарткысы келгендер ошол эле кабаттагы атайын жасалган тамеки тартуучулар бөлмөсүнө барып тартып келиш керек.

Биздин СДПКчы депутат баш болгон топ япондорду алдайбыз деп бөлмөлөрдө тамеки тартышып, тамекинин калдыктарын жаткан матрацтарынын алдына катып булгай беришиптир.  Кыргыз делегациясы кетип жатканда бөлмөлөрдү кабыл алып жатышкан мейманкана кызматкерлери муну таап алышып, полиция чакырып, чоң жаңжал чыгат. Төрт депутаттын ар бирине 700 доллардан айыппул салынса булар “акчабыз жок” деп байкуш болушуп, жаңжал чыгарып көгөрүп төлөбөй олтуруп алышат.  Айласы кеткен япон парламентинин өкүлдөрү кыргыз депутаттарынын айыппулдарын өз чөнтөктөрүнөн төлөп беришет да  жолго салышат.  Кызыккандар болсо бул окуяны New Otani Tokio Hotel мейманканасынын администрациясынан, япон парламентинен тактап алышса болот.

Төмөндө кыргыз делегациясы жашап уят болушкан New Otani Tokio Hotel мейманканасынын сүрөттөрүн жарыялайбыз:

Булак: Кyrgyztoday.kg

Бүгүн Ала-Арча резиденциясында мектепти артыкчылык менен бүткөн окуучуларга “Алтын сертификаттарды” тапшырып жатып Атамбаев өткөн күндөрүн эстеп кетти окшойт, окуучулардын алдында бир арманын айтып алды.  Ал институтта окуп жүргөндө окууга убактысы болбогонун, анткени акча табуу үчүн иштөөгө туура келгенин айтып, “Мен да учурунда көчө шыпырып, пол жууп, от жагып, жүк ташып иштегенмин. Жумуштун уяты жок. Ууру министр болгондон көрө көчө шыпырып, пол жууган жакшы”, – деди.

Ал эми Жогорку Кеӊештин төрагасы Чыныбай Турсунбеков болсо  ЖКга жарашыктуу кийинип келген журналист кыздарга суктанса боло тургандыгын божурады.

https://youtu.be/mH9h9bCntjY

Видео: Санжар Калматай

Алмазбек Атамбаевдин төрагалыгы астында 4-июлда Кыргызстандын Коргоо кеңешинин кезектеги жыйыны болот. Бул тууралуу президенттин маалымат кызматы билдирди.

Жыйында укук коргоо органдарын реформалоо жана азыркы шарттарда республикада миграциялык процесстерди жөнгө салуу боюнча маселелер каралат.

Жыйын жабык режимде өтөт. Анын жыйынтыктары боюнча Коргоо кеңешинин катчысы Темир Жумакадыров журналисттерге брифинг өткөрөт.

Аксы районунун Сөгөт айылынын карамагындагы 2,5 гектар жерди Өзбекстандын чек арачылары басып алды. Бул тууралуу Сөгөт айылынын башчысы Замир Баназаров билдирди.

Анын айтымында 30-июнь күнү өзбек чек арачылары Кыргызстандын аймагына кирип келип, тоют чөп өстүрүлгөн жерди ээлеп алышкан.

“Бул жерде 5 жылдан бери малдар жандыктары үчүн тоют чөп өстүрүлгөн. Өзбек чек арачылары мени ал жерден кубалап жиберип, өздөрүнү ээлеп алышты. Мага чейин бул жерди Кыргызстандын жараны иштетип келген”, – деди З.Баназаров.

Ал ошондой эле аталган жер талаштуу делген Чала-Сарт участкасына жакын жайгашканын кошумчалады.

Булак: turmush.kg

Кыргызстандагы  «Россия» медиа борбору, Москвадагы Россиянын саясый изилдөөлөр борбору жана Екатеринбургдагы Европа – азиалык изилдөөлөр борбору 29-июнь күнү Бишкектеги эл аралык “News-Asia» пресс-борборунда кыргыз саясый лөктөрүн чакырып “Борбор Азиядагы аймактык коопсуздуктун  аспектилери, негизги коркунучтар жана аларды жайгаруунун жолдору”  аттуу тегерек үстөл өткөрдү.

Иш чаранын башында Москвадан жана Екатеринбургдан келишкен саясый серепчилер Андрей Русаков менен Вадим Козюлин Борбор Азиядагы аймактык коопсуздук маселелерине арналган билдирүүлөрдү  жасашты. Кыргыз тараптан экс-министр Аликбек Жекшенкулов, экс-спикер Адахан Мадумаров, экс-министр Өмүрбек Суваналиев, генерал Марат Иманкулов, депутат Каныбек Иманалиев жана башкалар чыгып сүйлөп, Борбор Азиядагы жана анын ичинен Кыргызстандагы коопсуздук көйгөйлөрүн талкууга алышты.

“Борбор Азиядагы коопсуздук тууралу кеп кылганда аны камсыз кыла турган келечектүү уюм жок болуп жатат. Ишенгенибиз Жааматтык коопсуздук уюму (ОДКБ) болчу. Бирок, ал да азыр альтернативасы жок болгону менен анчалык ишеним туудурбай калды. Алгач бул Жамааттык коопсуздук уюмун 11 мамлекет уюштурса кийин 3 мамлекет кайра чыгып кетип 8 эле өлкө калды. Калгандарынын ичинен да олку-солку өлкөлөр бар. Ошондуктан ОДКБнын келечегине шектенүү да бар”, – деди Жогорку Кеңештин депутаты Каныбек Иманалиев.

“Сөзүңүзгө аралжы, ОДКБда эч качан 11 мамлекет болгон эмес”, – деп тактады Адахан Мадумаров.

“Тиги Азербайжан, Грузия жана Өзбекстан чыгып кетпеди беле…,” -деп Иманалиев өзүнө да ишенкиребегендей сүйлөдү…

“ОДКБны алгач 6 мамлекет түптөшкөн, Армения, Россия, Казакстан, Кыргызстан, Тажикстан жана Өзбекстан. Кийин Азербайжан, Грузия жана Белорусия кошулуп 9 өлкө болушкан.  Биринчи 5 жылдык мөөнөт бүтүп, кайра 5 жылга келишимге кол коёрдо жаңы келишимге Азербайжан, Грузия жана Өзбекстан кол койбой кайрадан эң башындагыдай 6 мамлекет калышкан”, – деди Адахан Мадумаров, – “ал эми бизде болгон коопсуздук уюмдардын эң эле ишенимдүүсү жана келечектүүсү ушул ОДКБ эле,  башка жок,” – деди.

“Мен деле айтпадымбы ОДКБга альтернатива жок деп”, – деди актана Каныбек Иманалиев.

“Парламенттин Эл аралык иштер комитетинин төрагасы болуп иштеген адамдын ушундай элементардык нерселерди билбегендиги өтө өкүнүчтүү, Кыргызстанда коопсуздукту жарата  турган коркунуч бул бийликтин өзү. Бийлик өзүнүн мыйзамсыз, адилетсиз кадамдары менен нааразычылыктарды жаратып жүрүп олтуруп акыры бейстабилдүүлуктү, коопсуздукту пайда кылат”, – деп Адахан Мадумаров андан ары бийликти катуу сынга алганына карабай  Каныбек Иманалиев бийликти коргой алган жок. Анан шашымыш болуп тегерек үстөл бүтө электе эле кетип калды.

Булак: Кyrgyztoday.kg