Борбордук шайлоо комиссиясынын жаңы курамы шайланып, иштей баштады. 27-июнда анын алгачкы жыйыны болуп, төрага, эки орун басары шайланды. Төрага болуп Нуржан Шайлдабекова, орун басарлары болуп Абдыжапар Бекматов менен Атыр Абдрахматова шайланды.

Төраганын кесиби юрист, буга чейин ал президенттик аппарат башчынын орун басары болуп иштеп келген. Булардан сырткары, БШК мүчөлөрү Алмаз Асаналиев, Адилет Сатыгулов, Акылбек Эшимов, Бахтияр Кадыров, Гүлнара Джурабаева, Гүлнара  Баатырова  Елена Жилкичиева, Кайрат Осмоналиев, Назарали Арипов.

Баса, 2011-жылдан бери өзүн өзү билип, өтүгүн “илибой” жерге илип чалчактап келген Туйгуналы Абдраимов “чийинден сырт” калды. Анткени менен жакшы тоюнуп кетти дешет, маселен, “Кыргызстан” менен “Республика-Ата-журт” партияларынан алчусун “олчойто” алган деген имиш кеп бар.

Баса, 2001-2006-жылдары да БШКнын эки тизгин, бир чылбырын колуна алып, бир топ чакчелекейин чыгарган. Интернет-сайттарда Туй байке тууралуу дагы бир кызык кеп тарады. Көрсө, кадимки “серый кардинал” Икрам Илмянов кезинде анын айдоочусу болгон турбайбы, кийин Атамбаевге “мыкты айдоочу, ишенимдүү жигит” деп дал Туке мырза сунуштаптыр.

Булак: “Багыт kg“

Расмий маалымат боюнча кечээ Стамбулдун Ататүрк аэропортундагы жардыруулардан кеминде 36 адам каза болду. Ал эми бейрасмий кабарларга караганда, набыт болгондордун саны 50гө жетип, 100дөй адам жараат алды.

Кыргызстандын Тышкы иштер министрлиги жабыркагандардын арасында кыргызстандыктар дагы бар болушу мүмкүндүгүн айтууда.

https://youtu.be/FWVYRtWb65E

Казакстандын маданият жана спорт министринин Орусияда эмгектенген кыргыз кыз-келиндери тууралуу айткан пикирине жооп кайтарган мекендештерге Алмазбек Атамбаев ыраазычылык билдирип, акчалай сыйлык жөнөттү. Сыйлыктарды ээлерине Кыргызстандын Орусиядагы элчиси Болот Отунбаев тапшырганын элчиликтен билдиришти.

Буга чейин казак министрине жооп кылып “РИА новости” маалымат агенттигинин Борбордук Азия өлкөлөрү боюнча серепчиси А.Ниязалиева атайын видео ролик тарткан. Анда Орусияда иштеген Р.Карабаева жана Г.Кожоева деген мекендештер ак эмгек менен акча тапкандарга боор ооруган казак министринин сөзүнө жооп беришкен.

Б.Отунбаев жогоруда аталган видеороликтин катышуучуларына президенттин атынан акчалай сыйлык жана белектерди тапшырып, жарандык активдүү көз карашы үчүн ыраазычылык билдирди.

Эске салсак, үстүбүздөгү жылдын май айында Казакстандын маданият жана спорт министри Арыстанбек Мухамедиулы кыргыз кыздарынын Орусияда даараткана тазалап жүргөнү боор ооруй турган иш экенин айткан эле.

https://youtu.be/regeiuPXVk8

Бугүн Борбордук шайлоо комиссиясы Максатбек Эгембердиевге депуттык мандат тапшырды. Ал КСДП фракциясынан Евразия экономикалык биримдигинин сотуна судья болуп Галина Скрипкинанын ордуна келди.

Максатбек Эгембердиев 2012-жылдан ушул күнгө чейин Жалал-Абад шаардык кеңешинин депутаты болуп иштеп келген.

Жогорку Кеңештин бүгүнкү жыйынында Жеңиш Разаков чек ара маселелери боюнча вице-премьер-министр болуп шайланты. Добуш берүүгө катышкан 107 депутаттын баары Разаковдун талапкерлигин жактырышты.

Ошондой эле Айыл чарба, тамак-аш өнөр жайы жана мелиорация министрлигине Турдуназир Бекбоев, Транспорт жана жолдор министрлигине Замирбек Айдаров, Мамлекеттик өнөр жай, энергетика жана кен казынасын пайдалануу комитетинин төрагалыгына Дүйшөнбек Зилалиев жана Мамлекеттик маалыматтык технологиялар жана байланыш комитетинин төрагалыгына Бакыт Шаршенбиевдин талапкерлиги жактырылды.

Эске салсак, премьер-министр Сооронбай Жээнбеков бүгүн Жогорку Кеңештин кароосуна чек ара маселеси боюнча вице-премьер-министрдин кызматына жана жаңы түзүлгөн мамлекеттик органдардын жетекчилигине талапкерлерди сунушган эле.

Премьер-министр Сооронбай Жээнбеков бүгүн, 29-июнда, Жогорку Кеңештин кароосуна чек ара маселеси боюнча вице-премьер-министрдин кызматына жана жаңы түзүлгөн мамлекеттик органдардын жетекчилигине талапкерлерди сунуштады. Учурда депутаттар өкмөт башчыга жана жана сунушталган талапкерлерге суроолорду берип жатышат.

С.Жээнбеков төмөнкү тапкерлерди сунуштады:

– Разаков Жеңиш Парпиевич – чек ара маселелери боюнча вице-премьер-министри кызмат ордуна талапкер;

– Бекбоев Турдуназир Бекбоевич – Айыл чарба, тамак-аш өнөр жайы жана мелиорация министри кызмат ордуна талапкер;

– Айдаров Замирбек Казакбаевич – Транспорт жана жолдор министри кызмат ордуна;

–  Зилалиев Дүйшөнбек Текшербекович – Мамлекеттик өнөр жай, энергетика жана кен казынасын пайдалануу комитетинин төрагасы кызмат ордуна талапкер;

– Шаршенбиев Бакыт Нуржанович – Мамлекеттик маалыматтык технологиялар жана байланыш комитетинин төрагасы кызмат ордуна талапкер.

Түркиянын Стамбул шаарындагы Ататүрк аэропортунда болгон жардыруудан жабыркагандардын арасында кыргызстандыктар болушу ыктымал. Бул тууралуу Кыргызстандын Тышкы иштер министрлиги маалымдады.

Эске салсак, Стамбулдагы 3 жолку жардыруудан каза тапкандардын саны 40тан ашты.

Балыкчы-Корумду жолу бүтпөгөн жомок болуп калды. Мындай пикирин парламенттин бүгүнкү жыйынында башбакан Сооронбай Жээнбеков билдирди. Ал депутаттардын суроолоруна жооп берип жатып, аталган жолго акча табуу кыйынчылык жаратып жатканын айтты.

“Акча маселеси чечилбей туруп башталган бул жол бир топ маселелерди жаратып жатканы чын. Азыр 1 миллиард сом акча таап бердик. “Көчмөндөр оюндары” башталганга чейин бүткөрүүгө аракет кылабыз”, – деди Жээнбеков.

Эске салсак, мурдагы өкмөт башчы Темир Сариевдин убагында башталган Балыкчы-Корумду унаа жолуна “Мегаком” компаниясын сатуудан түшкөн акча жумшала турганы айтылган. Бирок, бүгүнкү күнгө чейин “Мегакомду” ала турган кардар чыга элек. Ал эми жол куруудагы тендер чырынан Т.Сариев өзү кызматтан кетүүгө аргасыз болгон.

Бишкектен “Манас” аэропортуна чейин курулуп жаткан жол сапатсыз болууда. Бул тууралуу Жогорку Кеңештин бүгүнкү жыйынында депутат Өмүрбек Бабанов билдирди. Ал өкмөт башчы Сооронбай Жээнбековго кайрылып, бул маселени жеке көзөмөлүнө алуусун сурады.

“Бул жол өтө эле сапатсыз курулуп жатат. Көп болсо бир, эки жылдын ичинде талкаланат. Жол салуу үчүн тендерди уткан компанияны текшерип, кемчиликтер болсо кылмыш ишин козгош керек. Биздин сырткы карызыбыз 3 миллиард доллардан ашты, ошонун 30 пайызы жолдорго кетет. Биз мынча акчаны кайдан табабыз? Ошондуктан, Сооронбай Шарипович, бул маселени жеке көзөмөлүңүзгө алып, карап чыгыңыз”, – деди Бабанов.

Жогорку Кеңештеги КСДП фракциясынын депутаты Галина Скрипкина Евразия экономикалык биримдигинин сотунун судьясы болуп дайындалганына байланыштуу мандатын тапшырды. Бүгүн, парламент жыйынында төрага Чыныбай Турсунбеков фракциялашы Скрипкинанын ат көтөргүс эмгек жасаганын айтып, жаңы жумушуна ийгиликтерди каалады. Ошондой эле Жогорку Кеңештин атынан белектерди тапшырып, депутаттар Галина айымды кол чабуулар менен узатышты.

28-июндун түнүндө Стамбулдагы Ататүрк аэропортундагы 3 жолку жардыруудан 40тан ашуун адам каза болуп, дагы бир канчасы жараат алды. СNN Turk каналынын маалыматына караганда жардыруулар эл аралык каттамдар терминалында болгон. Түрк бийлиги жардырууну террорист жанкечти жасаган болушу мүмкүндүгүн билдиришти.

Окуядан кийин аэропорт убактылуу жабылды.

Жогорку Кеңештеги КСДП фракциясында ар кайсынын башын кошуп, мыйзам токуганга айбай маш болгон бир “эрке” депутат бар, Кожобек Рыспаев деген. Ошол киши Бишкектеги көп кабаттуу турак үйлөрдө берилип жаткан күнүмдүк мейманканаларды жабуу боюнча мыйзам жазыптыр. Анысын парламенттин экономика жана фискалдык саясат боюнча комитетине алып чыкты эле, депутаттар бир карап көрүп, “мунуң жарабайт, жакшылап иштеп, күзүндө алып кел” деп артка кайтарышты. Кожобек мырзанын айтымында, көп кабаттуу үйлөрдөгү күнүмдүк мейманканалар ал жерде жашаган адамдардын тынчын алып, түн уйкусун бузуп жатыптыр. “Бул жерлерге уктап эс алганы эмес, уйкудан безгендер гана келет экен. Ошондуктан, мындай мейманканалардын кереги жок”, – деди Рыспаев. Ал эми комитет төрагасы Нурлан Макеев аларды жаап салуу менен эле көйгөй чечилип кетпесин айтып, анын башка механизмдерин дагы иштеп чыгыш керектигин билдирди. Ошентип Рыспаевдин чийки мыйзамы күзүндө каралмай болду.

Булак: Кyrgyztoday

Кечээ, 28-июнда Жогорку Кеңештин Эл аралык иштер, коргоо жана коопсуздук боюнча комитетинин жыйынында Кыргыз Республикасынын Швейцария Конфедерациясындагы атайын жана ыйгарым укуктуу элчиси кызмат ордуна Данияр Мукашевдин талапкерлиги каралды.

КР Тышкы иштер министринин орун басары Азамат Үсөнов Кыргызстандын Швейцариядагы элчилик кызматына Д.Мукашевдин талапкерлиги боюнча сунуштама менен тааныштырды.

Аталган комитеттин төрагасынын орун басары Абдывахаб Нурбаев Д.Мукашевдин талапкерлиги эки ай мурун Кыргыз Республикасынын БУУдагы (Женева) еврапалык бөлүмүнө туруктуу өкүл катары каралгандыгын эске салды.

Комитет мүчөлөрү Д.Мукашевди Кыргызстандын Швейцариядагы элчиси кызматына дайындоого макулдук беришти.

Борбордук Азиядагы Америка университетинде Кыргызстанда алгачкы жолу студенттер үчүн Кыргыз Республикасынын Жогорку Кеңешинин ишин чагылдырган “Жогорку Кеңештин модели – 2016” аттуу иш- чара болуп өттү. Иш-чарага Бишкек шаарында билим алып жаткан 80ге жакын студент катышты. Бул тууралу парламенттин басма сөз кызматы билдирет.

Аталган иш- чаранын максаты жаштардын келечекке болгон ой-максаттары, өлкөнүн өнүгүшү жаатындагы сунуш-пикирлери КР Жогорку Кеңешинин ишмердүүлүгүнүн негизинде салыштыруу менен чагылдырып, мамлекеттин жашоо-турмушуна, жаштар саясатын иштеп чыгып, жүзөгө ашырууга катыштыруу болуп, жаштардын консультативдүү – кеңеш берүүчү платформасы жаралды. Жыйын жүрүшүндө “Жогорку Кеңештин модели – 2016” иш-чарасынын депутаттары болгон студенттер мыйзам долбоорлорун демилгелеп, талкуулап, добуш берүү менен кабыл алышты.

Иш-чарага катышкан Жогорку Кеңештин депутаты Дастан Бекешев сөз сүйлөп, мыйзам чыгаруу жаатындагы тажрыйбасы менен бөлүшүп, студенттерге мыйзам жазуу боюнча багыт берди.

Долбоор Эл аралык билим боюнча Америка кеңештеринин  өкүлчүлүгүнүн жетегинде ЕККУнун Бишкектеги борбору тарабынан каржыланып, “Жогорку Кеңештеги тажрыйба алмашуу – 2016” программасынын алкагында ишке ашты.

Бүгүн, 28-июнда КР Жогорку Кеңешинин “Бир бол” фракциясынын депутаты Чолпон Жакупова фейсбуктагы  талкуулардын биринде минтип жазды:

“Шашпай чыдап тургула, ноябрь айында референдум өтөт, кийинки жылдын февралында парламент таркатылат. Баарына, бийликтин көзөмөлүндө тургандарга да ушундай буйрутма берилди. Анан Улуу урматтууңар менен эле өзүңөр каласыңар…”

Чолпон айымдын бул текстинен улам быйылкы жылдын ноябрь айында конституцияны өзгөртүү боюнча референдум өтөрүн, анан конституция өзгөртүлгөндүгүнө байланыштуу 2017-жылдын февраль айында парламент таркай тургандыгын түшүндүк. Мындай тымызын буйрук бийликтин жогорку эшелонунан бийликчил фракцияларга, алтургай калп эле оппозиция болуп, бирок толук бойдон бийликтин көзөмөлүндө турган фракцияларга да келип түшкөнү айтылат. Парламент таркагандан кийин өзүңөр “сүйгөн” президентиңер менен каласыңар деп какшыктайт.

Булак: Kyrgyztoday.kg

“Эл үнү” саясий кыймылынын Аксы райондук бөлүмү, Кыргыз Республикасынын Президенти Алмаз Атамбаевге,  Жогорку Кеңешинин Төрагасы Чыныбай Турсунбековго,  өкмөт башчы Сооронбай Жээнбековго жана жалпы кыргыз элине кайрылуу жолдошту

Урматтуу журт башчылары жана касиеттүү Кыргыз эли!

Сиздерди “Эл үнү”саясий кыймылынын Аксы райондук бөлүмү төмөндөгүдөй көйгөйлөрдү талкуулоо үчүн,  2016-жылдын 12-июль күнү саат 10:00дө Аксы районунун борбору Кербен шаарында  боло турган  тынчтык митингине баарыӊыздарды келип, катышып берүүгө чакырабыз!!!

Митингде төмөндөгү маселелер каралат:

Чечилбеген чек-ара  жана Унгар- Тоо маселеси.

“Кумтөр” алтын кенин улутташтыруу маселеси.

Жарандык паспорттогу “Улуту”деген графанын алынып салышы кыргыз улутун жок кылууга аракет деп баалайбыз!

Токтогул суу сактагычындагы суунун көлөмүнүн кескин түрдө азайып кетиши.

Электр энергиясына болгон баанын төмөндөбөй жатышы жана дагы башка бир топ социалдык көгөйлөр талкууга алынат.

Биздин митинг өткөрүүгө мажбур кылган негизги маселелер жогоруда көрсөтүлдү. Бирок азыркы бийлик бул маселелерди чечкендин ордуна, эми улутка каршы чыгып паспорттогу “улуту”деген графаны алып салмай болууда. Бийликтин бул кадамы кыргыз элине кыянаттык жана чыккынчылык кадам деп эсептейбиз. Ал эми Токтогул суу сактагычындагы суунун көлөмү кескин түрдө азайып жатышы, быйылкы нөшөрлүү жаанга карабай суу кайда кетип жатканы күмөн ойго салууда.

Кен байлыктарыбыз чет элдик инвесторлор тарабынан таланып сыртка ташылып кетип жатканын көрүп, билип туруп, чара колдонбогон бийлик башындагылар элди иренжитүүдө. Ал эми өздөрүн оппозиция эсептеген айрым  саясатчылар борбордо жатып алып ар кандай  интервью берүү менен эле чектелбей элдин алдына келип арай-көз чарай сүйлөшүүгө чакырабыз!!!

Ошондуктан Атамбаев баштаган бийлик өкүлдөрүн жана оппозиция лидерлерин митингкке келип мамлекеттин эртенки тагдырына кайдыгер карабай  бирге талкуулоого   чакырабыз!!!

Келгиле ийри отуруп түз сүйлөшөлү!

Кыргыз мамлекетинин эртеңки келечегине кайдыгер карабаган баардык мекенчил жарандарды ушул митингке келип катышууга чакырабыз!!!

Урматтоо менен “Эл үнү”саясий кыймылынын Аксы райондук бөлүмү.

Бүгүн, 28-июнда Бишкек шаарындагы “Гранд” мейманканасында “Таза коом” элдик партиясынын демилгеси менен “Жаштар –коомду өзгөртүүдө зор күч”- деген темада Кереге кеңеш болуп өттү. Кеңешмеге  улуттук –мекенчил багыттагы  жаштар уюмдарынын жетекчилери, жигердүү жаштар, журналисттер катышты. Жыйындын соңунда  Кыргызстандын элине, жаштарына жана мамлекеттик жогорку бийлик  кызматындагы адамдарга  КАЙРЫЛУУ кабыл алышты.

Урматтуу Мекендештер!    Адамзат цивилизациясы менен катар Кыргызстан да, өнүгүүнүн өзгөчө  баскычын башынан кечирүүдө. Доордун өзгөрүү багыты бүткүл дүйнө элдеринин ортосунда интеграцияны күчөтүүдө.  Дүйнөлөшүү  процесси  жалпы адамзаттын тагдырын  улутуна, мамлекетине карабастан кыйма-чийме жолдор аркылуу өтмө катар  байланыштырып, жараткыч да, кыйраткыч да мүнөздө өжөр өктөмүн жүргүзүүдө.

Азаттыктын жылдарында батыштык баалуулуктарга негизделген ачык либералдык  демократиялык коомду түптөө аракетин жасадык. Бирок да ал багыт  түпбашаттан келе жаткан кыргыз элинин нарктуу  жолуна альтернатива боло албады. Сырткы күчтөрдүн таасири аркасында салттуу жолубуздан тайдырууга болгон аракет улуттук деградацияга чейин жеткиргени менен жоокер мүнөз, сабырдуу кыргыз элинин эркин  биротоло ээликтеп алууга чамасы жеткен жок. Анын ачык далили акыркы жылдары Кыргызстанда  эки жолу революция­  болуп, элибиз өз жолуна кайтуу аракетин тайманбастан жүргүзүп келүүдө.

Мамлекеттүүлүгүбүздү бекемдеп,  дүйнөлүк коомчулукта өзүбүздүн татыктуу ордубузду ээлеп, улуттук жүзүбүздү, элдүүлүгүбүздү сактоо үчүн бүткүл аракетибизди бир нукка багыттоо менен өлкөдө жүрүп жаткан туташ саясий, экономикалык, руханий кризистен  чыгууда колдо болгон мүмкүнчүлүктөрдү бир максатка – өнүгүүнүн Улуттук жолуна буруу  заман талабына айланды.

Андыктан, тез аранын ичинде  батышчыл үлгүдөгү Конституциябызды кыргыз элинин улуттук табиятына ылайык кайрадан иштеп чыгып, элдик талкуудан өткөрүп, жаңыдан кабыл алуу мезгилдин өктөм талабы деп эсептейбиз. Чачылган элди жыйнап, жумуш менен камсыздоо; экономиканы көтөрүү үчүн өндүрүшкө маани берүү; билим-тарбия тармагын дүйнөлүк алдыңкы тажырыйбаларды эске алуу менен  этнопедагогиканын негизинде улуттук менталитетке төп келтирип иштеп чыгуу жана адам таануу, кыргыз таануу предметтерин окуу стандартына киргизүү; заманбап кадрларды даярдоо; жаштарды ар тараптан колдоо; илимий-техникалык ачылыштарды  өндүрүшкө киргизүү; маданиятты өнүктүрүү; кыргыз тилинин мамлекеттик статусун бекемдөө; руханий баалуулуктарга, сергек жашоого  басым жасоо иштери улуттук иделогиянын өзөктүү негиздерин түзүшү зарыл.

Бизде азыр түптүү, келечектүү маселелерге маани берилбей элди алагды кылып, ыркын бузган  паспортту, машиналардын номерин алмаштыруу сыяктуу арты күмөндүү бизнес жыттанган иштер үстөмдүк кылууда. Кеп оролу келгенде айта кетели, Кыргызстандын жарандыгын аныктаган  негизги документ болгон паспортто  атуулдардын улуту так көрсөтүлүшүн талап кылабыз.

Мамлекеттик коопсуздук тутумдарына- так айтканда, чек ара, коргонуу, миграция, азык-түлүк, маалыматтык ж.б маселелерге жетишерлик маани берилбей жатат

Урматтуу жогорку мамлекеттик кызмат адамдары!  Эл ишенип убактылуу берген ыйгарым-укуктарыңыздарды жеке кызыкчылыкка пайдаланбай, элдин  кызыкчылыгы үчүн бекем туруу, ак кызмат өтөө сиздердин башкы милдет деп эсептейбиз! Элдин бийликке болгон ишениминин төмөндүгү- коомдо коррупция күчөп, мамлекеттин  мүлкү тонолуп, жерлер сатылып, калыстыктын, адилеттиктин  жоктугунан улам болууда.

Урматтуу жаштар!  Мекен, Улут, Мамлекет деген бөлүнгүс үч ыйыктыкты туу тутуп, коомдо саясий туруктуулуктун, адилеттиктин орношуна салым кошолу. Кыргызстан ар тараптан өнүккөн, кубаттуу өлкөгө айланышы үчүн ынтымак жана жигердүүлүк менен  иш алып баралы. Жаштар –коомду өзгөртүүчү зор күч! Биздин күчүбүз – терең билимге таянган улуу биримдикте!

Бүгүн, 28-июнда “7-апрель баатырлары” Кыргыз Республикасынын Жогорку Сотунунун имаратына күч менен басып кирүүгө  аракет кылышты.

“7-апрель баатырлары”  КР Аскердик сотунун 7-апрель окуялары боюнча “Альфа” отрядынын жоокерлерин толук актап чыкканына жана 7-апрель окуялары боюнча камакта жаткан офицерлер менен чиновниктердин аминистия менен эркиндикке чыгып жатканына нааразы болушту.

Аскердик сот  “Альфа” отрядын 6 жылдан бери соттоп жүрүп жакында эле толук актап чыккан. Анткени 7-апрелде каза болгондордун денесинен табылган октор “Альфа” отрядынын жоокерлеринин куралдарына таандык болгон эмес. Баллистикалык, соттук-техникалык эспертизалар ал октор башка белгисиз куралдардан атылганын далилдешкен.

Ал эми 7-апрель күнү элди артынан атып жатып колго түшкөн чет элдик снайперлер тууралу Убактылуу Өкмөттүн мүчөлөрү Алмаз Атамбаев менен Азимбек Бекназаров  телеканалдар аркылуу  расмий билдиришкени менен алигиче эмне үчүн аларды эркиндикке коюп жиберишкенин  түшүндүрүшө элек.

Видеотасманы Ютубга жүктөгөн: K-News

Мен түшүнөмүн, Тайырбек (Сарпашев) сенин айткан аргументтериңе, а сен түшүнөөр бекенсиң менин айткан ойлорума?! Эгерде сен бийликте туруп өзүң каалабасаң да айтууга мажбур болуп жатсаң, а мени да мажбурлап жатышат айттырууга – Кыргыз деп жалындаган жүрөгүм, Мекен деп жашаган ой тилегим, Кыргыз элим, журтум мени мажбурлап жатат. Кыргызды өчүрүүгө болгон оюндан кайткының, сага мисал, Кыргызды өчүрөм дешип өтө көп аракеттерди көрүштү, кордошту, зордошту, өлтүрүштү, бирок Кыргыз багынып берген жок, кайра туруп келип баарын жер менен жексен кылды, бийлигин да, байлыгын да, сепаратисттин да. Сага эстетип коёюн, сен дагы ошолордун кейпин кийип калба, улутка келгенде, Кыргызга келгенде өтө этият мамиле жаса, тамашалаша көрбө, а калган менин аргументтеримди уккуң келсе КТРге чакыр, дебатка, ошол жерден угасың! Кыргызга тие көрбө!!!

Камчыбек Ташиевдин фейсбуктагы баракчасынан

Өзгөчө кырдаалдар министринин орун басары Равшанбек Рысбаев Токтогул районунда барып, 27-июнь күнү саат 19:30дар чамасында Үч-Терек айыл аймагындагы Үч-Терек, Саргата, Кызыл-Ураан айылдарында жааган жамгырдан колоттордон келген сел суулары автожолдорго шагал-таштарды агызып, жол каттамга кыйынчылыктарды жаратып жана турак жайларга кооптуу абал жаралган жерлерди калыбына келтирүү иштери менен жеринен таанышты. Бул тууралуу ӨКМнын басма сөз кызматы билдирди.
Маалыматка караганда, Саргата айылында 3 кожолуктун турак үйүнүн ичине жана 40ка жакын кожолуктун там арка огороддоруна сел суулары кирип, 2 даана ички чарбалык көпүрөө жараксыз абалга келип, 3 чакырымга жакын ички чарбалык жолду сел каптап кеткен. Учурда аталган аймакта айылаймактар тарабынан 1 автопогрузчик тартылып, тазалоо жумуштары аткарылууда. Андан сырткары, райондук жана айыл аймактык жарандык коргонуу коммисиялары тактоо иштерин жүргүзүп жатышат.

Абалды жеринен көргөн министрдин орун басары Токтогул райондук мамлекеттик администрациясынын башчысы-акими Майорбек Сатымкуловго кырсыктын кесепетин жоюуга зарыл болгон товардык-материалдык баалуулуктарды жана техникаларды аныктап, тез арада сунуш берүүсү керектигин айтты. “Бизде азыр кырсыктын кесепеттерин жоюуга күч жана каражаттар жетиштүү, жергиликтүү бийлик өзүнүн мүмкүнчүлүгүн карап көрүп, мыйзам чегинде керектүү жардамдарды тиешелүү документтери менен сураса, күйүүчү-майлоочу майлардан, техникалардан жардам беребиз”- деди Р. Рысбаев.

Урматтуу мекендештер!

2010-жылдагы кандуу Ош коогалаңы тууралуу өзүнүн пикирин жарыялап, Убактылуу өкмөттү сынга алып, анын себебинен бүгүнкү күндө куугунтукка алынып, доого жыгылган журналист Дайырбек Орунбеков камакка алынуу алдында турат. Убактылуу өкмөттү сынга алган макаласынан кийин Орунбековду президент А.Атамбаев “кадыр баркыма шек келтирди” деп сотко берип, сот 2 000 000 сом доо өндүрүү чечимин чыгарган.
Бүгүнкү күндө андай чоң суммадагы каражатты төлөөгө бир да журналисттин чамасы жок. Сот аткаруучулар “Орунбеков соттун чечимин аткарбай жатат”, – деп журналисти камакка алынсын деген сунуш менен жакында ИИМге кайрылды.
Ошол себептүү, чындык үчүн күрөшкөн ар бир журналисти коргоо биздин милдетибиз. Анын ичинде Дайырбек Орунбековду коргоп, келгиле мекендештер ага каржылык колдоо көрсөтөлү.
Көп түкүрсө көл болот, андыктан карап турбай жакындан жардам кылып өз салымыбызды кошолу.

Сиздерди терең урматтоо менен Жылдыз Жолдошова

Экологиялык-техинкалык коопсуздук боюнча мамлекеттик инспекциянын өкүлдөрү Кара-Балта шаарында жайгашкан “Дан” мамлекеттик ишканасында иштеген жумушчулардын жамааттык негизде жазылган арызын текшерүүгө алышты. Бул тууралуу аталган мекеменин басма сөз кызматы билдирди.

Арызда, “Дан” ишканасы кызматкерлерине айлык акыларын бир нече айдан бери бербей жатканы белгиленген. Текшерүүнүн алкагында айтылгандар чын экени аныкталып, Мамэкотехинспекциянын Кара-Балта шаары, Жайыл, Москва жана Панфилов райондору боюнча башкы инспектору Нурлан Тойчубеков тарабынан жеринде ишкана ээлерине айлык акыларды берүү боюнча акт түзүлүп, бир айлык эскертүү берилген. Андан көп өтпөй “Дан” мамлекеттик ишканасы бир миллион жүз жыйырма бир миң үч жүз жыйырма бир сом 53 тыйын өлчөмүндө акча каражатын кызматкерлердин эсебине которуп, айлык акылар толук ээлерине берилди. 

Жалал-Абад шаарында көпчүлүк учурда ыктыярдуу патент менен 2-3 жерден соода жайын ачып, бирок бир эле патенттин салыгын төлөп жүрүшкөн ишкерлер аныкталды. Бул тууралуу Жалал-Абад шаарынын мэриясынын алдындагы жергиликтүү салыктар жана төлөмдөр боюнча башкармалыгынын башчысы Абида Кочкорова билдирди.

Анын айтымында өткөн жыл ичинде жергиликтүү салыкчылар үймө-үй кыдырып, ишкерлердин учётторун тактоо иштерин алып барышкан. Тогуз айдын ичинде бир топ тактоо иштери жүргүзүлүп, салык кызматынан катоодон өтпөй, салык төлөмдөрүн өз учурунда төлөбөй жүргөн ишкерлер аныкталган.

“Мисалы, ушул мезгил ичинде 2245 салык төлөөчү аныкталды. Алардын ичинен ыктыярдуу патент менен иш жүргүзгөн 1395 ишкер, милдеттүү патент менен иш жүргүзгөн 177 ишкер, жер салыгын 3 жылдан бери төлөбөй келген 362 кожолук, үлүш жерлерин иштетишип, бирок салык кызматына катоодон өтпөй, жер салыгына төлөм жүргүзбөй келген 24 үлүш ээси, мүлк салыгынын 3-тайпасы боюнча 10 жаран, айыл чарба эмес багытындагы жер салыгынан да бир катар ишкерлер аныкталган”, – дейт Кочкорова.

Салыкчылар шаар аймагындагы 11448 кожолукту кыдырып чыгышып, жыйынтыгында 4626 кожолуктан 2 миллион 573,9 миң сом салык өндүрүшкөн.

Бүгүн, 28-июнда, Бишкек шаарынын Биринчи май райондук соту Башкы прокуратуранын тергөө башкармалыгынын мурдагы башчысы Кылычбек Арпачиевге карата жазык ишин карады. Бул тууралуу Жогорку соттун басма сөз кызматы билдирди.

Соттун өкүмү менен Кылычбек Арпачиев “Опузалап пара талап кылуу” беренеси боюнча күнөөлүү деп табылып, мүлкүн конфискациялоо менен он төрт жылга эркиндигинен ажыратылып, үч жылга Башкы прокуратура системасында иш жүргүзүү укугунан ажыратылып, жазасын күчөтүлгөн шарттамдагы түзөтүү абагында өтөөсү белгиленди.

Эске салсак, Арпачиев өз кабинетинде 100 миң доллар өлчөмүндө пара алып жаткан жеринен кармалган.

Араван районунун Тепе-Коргон жана Нурабад айыл аймактарындагы 11 дүкөндөн 6255 сомдук тамак-аш азыктары сатууга тыюу салынды. Бул тууралуу Кыргыз Республикасынын Өкмөтүнүн Ош облусундагы ыйгарым укуктуу өкүлүнүн алдындагы Райондор аралык керектөөчүлөрдүн укугун жана жарандардын саламаттыгын коргоо кызматынын пресс-катчысы Жаркынай Кочкорбаева билдирди.

“15- июнда биздин мекемеге Ж.Калмурзаев аттуу жаран кайрылып, Араван районундагы “Тепе-Коргон айылындагы соода-түйүндөрдө сертификаты жок, даярдалган күнү көрсөтүлбөгөн, жарамдуулук мөөнөтү өтүп кеткен азык түлүктөр сатылып жатканын кабарлаган эле. Текшере келгенде ал фактылар тастыкталды”, – дейт Ж.Кочкорбаева.

Орусиянын Екатеринбург облусунда кыргызстандык жаранга тиешелүү баңги заты табылды. Бул тууралуу “Екатеринбург online” басылмасы жазып чыкты.

Баңги затын Свердлов облусуна жеткирүү үчүн контрабандисттер жергиликтүү транспорт компаниясынан жүк ташуучу унааны жалдап, ага салынган жүктүн арасына 17,5 кг героинди катышкан. Ал эми айдоочулар баңги затын алып бара жатканын өздөрү дагы билишкен эмес.

Орус полициясы жүктү тосуп алуу үчүн келген Ибрагим аттуу кыргызстандык жаранды колго түшүрүшкөн. Текшерүүдөн кийин баңги заты Кыргызстандан алынып барганы белгилүү болгон. Учурда аталган жаран камакка алынып, кылмыш иши козголду.

Өткөн жумада КТРКнын “Ой ордо” берүүсүндө паспортто жарандардын улутун көрсөтпөө боюнча маселе талкууланып, ал коомчулук арасында ар кандай пикирлерди жаратты. Бул боюнча бүгүн экс-депутат, “Ата-Журт” мекенчил партиясынын төрагасы Камчыбек Ташиев да интернетте өз оюн билдирди.

“Кыргыз” деген атты өчүрүүгө аракет жасагандарга наалат! Мени ошол берүүгө чакырганыңарда баарыңарды жай жайыңарга коймокмун. “Кыргыз” деген атты укканда кыжыры келгендердин чырагына май тамызып жатасыңар. Мен Кыргыз үчүн өмүрүмдү тобокелге салууга дагы макулмун. Өчүрө көрбөгүлө Кыргызды, эч жерден өчүрбөгүлө!, – дейт Ташиев.

Ары жок бийлик! Элинин жартысы жакыр, орто айлык акысы 10000 сом, медицина, билим берүү, коопсуздук тармагы талкаланган, киши башына ИДП 900$, гепатит, рак, туберкулез, инфекциялык оорулар мамлекетти каптаган. Дүйнөдөгү эң жакыр мамлекет…

Ушул бийлик “Көчмөндөр оюнун” өткөрүүгө милиарддаган акчаларды чачууда! Каражатты туура эмес пайдаланууда! Эффективсиз, акылсыз башкаруу.

Жогорку Кеӊештин эл аралык иштер, коргоо жана коопсуздук боюнча комитет премьер-министр тарабынан чек ара маселелерин тейлеген вице-премьер-министр кызмат ордуна сунуш кылынган Жеӊиш Разаковдун талапкерлигин жактырды. Бул тууралуу ЖКнын басма сөз кызматы билдирди.

Өкмөттүн Жогорку Кеӊештеги өкүлү Ашырбек Темирбаев Жеӊиш Разаков буга чейин өкмөттүн чек ара маселелери курчуп турган Баткен облусундагы өкүлү болуп иштегенин, ал чек ара маселелерин чечүүгө түздөн-түз катышып келгенин, көйгөйлүү маселелерди жеринен жакшы билерин билдирди.

Тармактык комитеттин төрагасынын орун басары Абдывахап Нурбаев Жеӊиш Разаковго чоӊ ишеним артылып атканын белгилеп, комитет мүчөлөрүнүн атынан анын ишинде ийгиликтерди каалады.

Эске салсак, 2016-жылдын 22-июнунда Жогорку Кеӊеш премьер-министрдин сунушу боюнча өкмөттүн түзүмүн өзгөртүү жөнүндө токтом кабыл алган. Анда өкмөт башчыга өлкөнүн күч түзүмдөрүнүн ишин координациялай турган вице-премьер-министрлик кызмат ордун ачуу сунушу берилген.

Жалал-Абад шаарында жаңыдан наамга ээ болгон көп балалуу энелеге мамлекеттик сыйлыктар тапшырылды. Бул тууралуу шаардын вице-мэри Турдалы Темирбаев билдирди.

Анын айтымында, өлкө президентинин жарлыгы менен май айында Жалал-Абаддагы 27 көп балалуу энеге “Баатыр эне” наамы, ошондой эле дагы 7 энеге “Эне даңкы” медалы ыйгарылган. Бүгүн шаар мэриясында шаар жетекчилеринин, мэриянын аппаратынын жана сыйлыкка ээ болгон көп балалуу энелердин жакындары катышкан салтанат болуп, энелерге мамлекеттик сыйлыктар тапшырылды.

Т. Темирбаев 27 энеге “Баатыр эне” наамын күбөлөгөн ордендерди жана күбөлүктөрдү, 7 энеге “Эне даңкы” медалдарын тапшырып, аларды куттуктоо менен жакшы каалоолорун билдирди. “Кыргызстандын өсүп-өнүшүгү үчүн сиздер төрөп-тарбиялаган балдарыңыздар бүгүнкү күндө өздөрүнүн салымдарын кошуп жатышат. Алардын ар бир ийгилиги – сиздердин ийгилик, Кыргызстандын ар бир жетишкендиги – сиздердин жетишкендик. Бар болуңуздар, апалар!” – деди Т. Темирбаев куттуктоо сөзүндө.

Кечээ Ысык-Көл районуна караштуу Садыр Аке жана Кашат айылдарынын жаштары арасында мушташ чыгып, милиция кызматкерлеринин кийлигишүүсү менен басылды. Бул тууралуу окуянын күбөлөрү билдиришти.

Маалыматка караганда, мушташ спирт ичимдиктеринин айынан болгон. Мас абалындагы эки айылдын балдарынын ортосунда чыр-чыгып, аягы мушташка айланган. Урушту токтотуу үчүн милиция кызматкерлери көздөн жаш агызуучу граната колдонууга аргасыз болушкан.

Жакында коомдук ишмер Жыпар Жекшеев, Хоменюктун жазган каты боюнча интервью берди. Анда Хоменюктун, Кумтөрдүн тегерегиндеги бардык көмүскө болуп жаткан иштердин чекесин гана кылтыйтып койду. Анын мындай кадамын коркутуу, же саясый кадам деп эсептесек болот. Көрсө “Кумтөрдүн” жана “Кыргызалтындын” жетекчилери мурун эле, кылмыш иштерди жаап, жашырып жүргөн экен.

Дастан Сарыгуловдун үстүнөн кылмыш ишин тергей баштаган соң, бул ишти чала бүткөрбөй, кийинки “Кыргызалтындын” жетекчилери, директорлор кеңеши, башкы адистер дагы жоопко тартылышы мыйзам талабы. Бир гана Д.Сарыгуловду кылмыш жообуна тартып, кийинкилер сүттөн ак болуп чыга келбеши керек. Андай болууга тийиш эмес, эгерде жалгыз эле Д.Сарыгулов кылмыш жообуна тартылса, анда бул кадамыңар ага гана тиешелүү саясый буюртма деп эсептейбиз.

К.Кудайбергенов көзү өтүп кетсе дагы уурдалган акчасы балдары, неберелерине калып, катар-катар парламенте отурушат. Башка жетекчилер деле жер карап калган жок, баарынын бизнеси бар. Балдары чет өлкөлөрдө окуп, жашап, шапар тээп жүрүшөт. Жыпар Жекшеев деле директорлор кеңешинде айлык алып иштеп жүргөн, эмне үчүн ошондо бир үн катып койгон жок. Амангелди Муралиев Кумтөрдөн, Макмалдан алтын уурдалып жатканда бир дагы үн каткан жок, кайра өзү көмөк көргөзүп, жаап жашырып жүрдү.

“Кайсы жерден тамак ичсе, ошо жердин күкүгү болгонду” кыргыз саясатчылары адат кылып албадыкбы. Кантип эле ири акчалар ортодо уурдалып жатса, отчётторун көрүп, макулдугуңарды берип жүрдүңөр? Билбей калдым деген суу кечпей калат. Ошондуктан Жыпар Жекшеев, мен сизди сыйлайм, бирок сиз дагы жоопкерчиликтен кача албайсыз, чындыкты жашырбай элге айтып бериңиз. Жанагы дежур эксперт Орозбек Дүйшеев Кумтөрдө жана көмүр кендеринде директорлор кеңешине кирип алып, айлык алып, бардык көмүскө иштерге катышып жүрөт. Кумтөрдүн тегерегиндеги кылмыш иш боюнча Кумтөрдүн жумушчулары дагы президенке кайрылуу жаза коюшуптур. Эгерде Кумтөр токтосо, биз каршылык акциясына чыгабыз деп. Ээ айланайындар, Кумтөрдүн жумушчулары, силердин жеке кызыкчылыгыңар  жалпы кыргыз элинин кызыкчылыгынан артыкпы?. Бул жерде оор кылмыш жасалып жатат, ири каражатты кызмат абалынан пайдаланып уурдап, өздөрүнө ыйгарып алышкан. Мамлекетти ири зыянга учуратканы үчүн жооп бериши керек. Керек болсо Кумтөрдүн ишин токтотуп коюп, юридикалык баа берилиши абзел. Үч миң адамды кызмат менен камсыз кылабыз деп миллиарддаган акчадан кур калабызбы? Же Кумтөрдөгү уурулуктун бетин ачып, экологияны булгап, зыян келтирилгенин айтып коюш силердин түз милдетиңер эмеспи, же ачык айта албайсыңар. Жети-Өгүздүн активистери маселе көтөрсө, силер каршы турбадыңарбы! Силер ушуга чейин жаап, жашырып келгенсиңер. Мен билип эле турам, айлаңар кетип, үй бүлөңөрдү багам деп оозуңар буулуп калган, мойнуңарга алышыңар керек. Атамбаевге жазган кайрылууңарга дагы үстүрттөн буйрук берилген. Бирок элдин үнүнө, бирөөнүн аракетине кыянаттык кылбагыла.

Качкынбек БУЛАТОВ, укук коргоочу

Кыргыз Республикасынын Улуттук илимдер академиясынын Сейсмология институтунун маалыматы боюнча, 2016-жылдын 26-июнунан 28-июнуна чейин Кыргыз, Тажик жана Кытай Эл Республикасынын чек арасында, Алай тоо кыркаларында баардыгы болуп, жалпысынан 28 жолу 3 баллдан 5 баллга чейин жер титирөөлөр кайталанып турду.

Кыйроолор жана жабыркагандар жок.

Жер титирөөнүн күчү Ош облусунун аймагында орточо эсеп менен 4-5 баллга чейин сезилди.

Премьер-министр Сооронбай Жээнбеков 27-июнда, Кытай Элдик Республикасынын Мамлекеттик кеңешинин премьери Ли Кэцян менен жолугушту. Бул тууралуу өкмөттүн маалымат кызматы билдирди.

Жолугушуу Тяньцзинь шаарында «Жайкы Давос-2016» Дүйнөлүк экономикалык форумунун алкагында орун алды. Жолугушууда мурдараак Өзбекстанда эки мамлекет башчысы ортосундагы транспорт коммуникациясы, айыл чарба, өнөр-жай, соода тармагындагы кызматташуу жөнүндө орун алган келишимдерди ишке ашыруу маселеси талкууланды. Ошондой эле жаратылыш кырсыктарынын кесепеттерин жоюу жана терроризмге каршы турууда өз ара аракеттешүү тууралуу пикир алмашуу орун алды.
Өкмөт башчы Сооронбай Жээнбеков Мамлекеттик кеңештин Премьери Ли Кэцянга «Жайкы Давос-2016» форумуна катышууга чакыруусу үчүн ыраазычылык билдирди. «КЭР менен кызматташуу Кыргызстандын тышкы саясатында артыкчылыктуу мүнөзгө ээ. Биз орун алган достук жана коңшулук мамилелерди баалайбыз жана бардык аракетти эки тараптуу мамилелерди тереңдетүүгө жумшоого даярбыз. Биздин өлкөлөр ортосунда мындан аркы эки тараптуу мамилелердин өнүгүүсүнө тоскоолдук келтирүүчү эч кандай саясый пикир келишпестиктер жок», – деп белгиледи Жээнбеков.
Премьер-министр белгилегендей, Кыргызстан КЭР төрагасы Си Цзиньпиндин Жибек Жолу Экономикалык алкагын түзүү жөнүндө демилгесин активдүү колдоого алат. Атап айтканда, «Кытай–Кыргызстан–Өзбекстан» темир жолун куруу боюнча долбоорун Жибек Жолу Экономикалык алкагы демилгесин иш жүзүнө ашыруунун бир бөлүгү катары кароодо.
Сооронбай Жээнбеков биргелешкен долбоорлорду ишке ашырууга тийиштүү өзгөчө көңүлдү кыргыз айыл чарба продукцияларын КЭРге экспорттоо маселесине буруп, эл аралык стандарттарга байланыштуу продукцияны сертификатташтыруу боюнча лабораторияларды түзүү, айыл чарба продукцияларына карата фитосанитардык уруксаат берүү маселесин чечүү максатында кызматташтык зарыл экендигин белгиледи. Ошондой эле Бишкек шаарынын көчө-жол тармагын өнүктүрүү долбоорун ишке ашыруу боюнча келишим тууралуу айтылды.
КЭР Мамлекеттик кеӊешинин премьери Ли Кэцян билдиргендей, Кытай Кыргызстан менен кызматташуу багытында теӊ өнөктөш принциптерин жогору бааларын билдирди.
«Кыргызстан Кытайдын достук мамиледеги коӊшу өлкөсү жана ишенимдүү стратегиялык өнөктөшү болуп саналат. Биз Кыргызстан менен кызматташтыкты активдештирүүгө кызыкдарбыз жана сиздер тараптан айтылган багыттар боюнча колдойбуз», – деди ал.
Жолугушуунун жыйынтыгында Сооронбай Жээнбеков жана Ли Кэцян бүгүнкү жолугушууда көтөрүлгөн маселелер боюнча эки тараптын тийиштүү мамлекеттик орандарына аларды ишке ашыруу тапшырмасы берилерин билдиришти.

Мыйзам долбоорунда кыймылсыз мүлктүн көлөмүнө жараша салыкты жогорулатуу сунушталууда. Аянты 200 чарчы метрден ашкан үйлөргө жана батирлерге төмөнүрөөк, 300 чарчы метрден көп турак-жайларга жогорулатылган салык киргизилет.

Кымбат баалуу автоунааларга салык салууда алардын кыймылдаткыч көлөмү жана чыгарылган жылы эске алынат.

Алдын ала эсептөөлөр боюнча бул мыйзам долбоору кабыл алынса, Кыргызстандын бюджетине кошумча 515 миллион сомго жакын (жети миллион АКШ доллары) акча түшөт.

Булак: “Борбор Азия жаңылыктар кызматы”

Жогорку Кеңештин социалдык маселелер боюнча комитетинин 27-июндагы  жыйынында өлкөдөгү окуу жайларына көп тилдүү билим берүүнү киргизүү тууралуу  маселе каралды. Бул тууралуу ЖКнын басма сөз кызматы билдирди.

Демилгечи депутат Талант Мамытовдун баяндашынча, мамлекет тарабынан үч тилди өнүктүрүүдө көбүнесе декларативдик мүнөздөгү чаралар колдонулуп, күтүлүүчү натыйжалар болбой жатат. Өлкөбүздө майнаптуу тил саясаты ушул күнгө чейин иштелип чыкпагандыгы “Кыргыз Республикасында элдин биримдигин жана этностор аралык мамилелерди чыңдоо” концепциясында баса белгиленген.  Ушул себептен мамлекеттик, расмий жана чет тилин сүйлөй билген муун жарала элек. Мамлекеттик тилдин өлкөбүздөгү бардык улуттардын өкүлдөрү үчүн экономикалык, маданий, кесиптик жана башка мүмкүнчүлүктөрүн кеңейтүүчү, маданияттар аралык баарлашууну бекемдөөчү жана коомду бириктирүүчү негиз катары ролу азырынча жетишсиз.

“Бүгүнкү күндө кыргыз тили эне тили болбогон Кыргызстандын жарандарынын 10 пайызы гана мамлекеттик тилде сүйлөй алат. Өлкөбүздүн калкынын жарымынан азы гана орус тилинде эркин сүйлөйт. Англис тилин кыргызстандыктардын болгону бир пайызга жакыны билет. Маселенин актуалдуулугуна байланыштуу, Кыргыз Республикасында жалпы билим берүү мектептеринин башталгыч класстарынан баштап мамлекеттик, расмий жана бир чет тилин үйрөтүү боюнча Жол картасы форматындагы кеңейтилген, такталган иш планы Өкмөт тарабынан кыска мөөнөттө даярдалып чыгышы абзел”,- дейт депутат Т.Мамытов.

Талкуу жүрүшүндө тармактык комитеттин төрагасы Садык Шер-Нияз башканы коюп, эне тилибизди алалы, анын азыркы абалы Бишкектин көрсөткүчү менен алганда жыргап кеттиби? – деген суроону койду. “Эне тилибиз жоголуп баратат. Баары орусча сүйлөп, келечекте неберелерибиз кыргыз тилин укпай калышы мүмкүн. Балдарыбызга эне тилин үйрөтпөсөк, 100 жылдан кийин улутубуз жок болот. Кана кыпчактар, наймандар? Булар улут катары жоголушкан. Ошондуктан мен тил маселесин Жогорку Кеңеште ар дайым көтөрөм”, – деди Шер-Нияз.

Депутат Евгения Строкова: “Кыргыз тилин үйрөнүүгө каалоо менен муктаждыктан тышкары, окутуунун заманбап усулдары колдонулуш керек”,- дейт. Ошондой эле ал, балдарын мектептерге берүүдө ата-энелердин тандоосу дагы бул жерде көпчүлүгү орус тилиндеги мектептерге ыктап жатышкандыгын көрсөтүүдө,- дейт. “Окутуунун медодикалык шартарына токтолгон Е.Строкова,-“Камчы ыкмасынан пайда чыкпайт, пряник ыкмасы керек. Бирок “пряниктерди” 1990-жылдары жеп коюшкан“, – деп кошумчалады.

Эл өкүлүнүн жогорудагы айткандары кыргыз тилинин келечегин ойлоп, ага кам көрүү сезимин күчөттү. Депутат Рыскелди Момбеков дагы коллегасынын айткандарын кыргыз-орус тилдерин бири-бирине кайчы койгонго барабар, – деп мүнөздөп, Манастын тилин сактап калуу биринчи кезектеги зарылчылык деп атады. Ошондой эле ал депутат Н.Никитенконун кыргыз тилинде мыкты сүйлөөрүн мисалга келтирип, демек каалоо болсо үйрөнө турган киши медотика деп шылтабай эле сопсонун үйрөнүп алаарын белгиледи.

Талкуу соңунда Кыргыз Республикасында  көп тилдүү билим берүү тууралуу  Жогорку Кеңештин токтому тармактык комитеттин жактыруусуна ээ болду. Аны менен катар комитет Бишкек шаарындагы кыргыз тилиндеги мектеп бүтүрүүчүлөрүнүн билим сапатын аныктоо тапшырмасын тиешелүү министрликке табыштап, кыргыз тил жана адабият сабактарын окуткан мугалимдердин айлык акыларын 25%га жогорулатууну сунуштады.

Ош – Долбоор аялдарды жана кыздарды үйдөгү зомбулуктан коргоодо жана алдын алууда жергиликтүү өз алдынча башкаруу органдарынын жана укук коргоо органдарынын ролун жана жоопкерчилигин жогорулатууга түрткү берет. Долбоор тууралуу толугураак маалыматты “ДИА” коомдук фонду атайын боло турган пресс-конференцияда айтып берет, ал 2016-жылдын 28-июнунда, саат 10:30да, “Акипрес-Ош” маалыматтык агенттигинде болот.

“Гендердик теңчилик жана аялдардын укуктары менен мүмкүнчүлүктөрүн кеңейтүү” долбоору USAID жана DFID тарабынан каржылануучу Биргелешип башкаруу программасынын (ББП) колдоосунда ишке ашырылууда.

Долбоордун негизги максаты – ЖӨБ органдарынын, укук коргоо органдарынын жана жергиликтүү институттардын өкүлдөрүнүн кабардар болуусун жогорулатуу жана аялдарды үйдөгү зомбулуктан коргоодо биргелешип аракеттенүү аркылуу жергиликтүү деңгээлде гендердик теңчиликке жетишүү боюнча Иш-аракеттердин улуттук планын (ИУП) ишке ашырууга көмөктөшүү.

“ДИА” долбоорунун директору Авазкан Ормонованын айтуусу боюнча тажрыйба ЖӨБ органдарынын өкүлдөрү “Аялдарды үйдөгү зомбулуктан социалдык-укуктук коргоо жөнүндө” мыйзамда көрсөтүлгөн үйдөгү зомбулуктун алдын алууда ИУПтун негизги багыттарын, өзүнүн ролун жана жоопкерчилигин дайыма биле беришпей тургандыгын көрсөтүп турат. Долбоор Ош облусунун Кара-Кулжа, Кара-Суу жана Ноокат райондорунун тогуз айыл аймагында ишке ашырылмакчы.

Биргелешип башкаруу программасы (ББП) Кыргыз Республикасында өкмөттүн, жарандык коомдун жана менчик сектордун өнөктөштүгүн чыңдоого багытталган. Программа АКШнын Эл аралык өнүгүү боюнча агенттиги (USAID) жана Улуу Британиянын Эл аралык өнүгүү министрлиги (DFID) тарабынан каржыланган жана Ист-Вест Менеджмент Институту (EWMI) тарабынан ишке ашырылууда.

Жогорку Кеӊештин төрагасы Чыныбай Турсунбеков, 27-июнда Америка Кошмо Штаттарынын Кыргызстандагы атайын жана толук ыйгарым укуктуу элчиси Шейла Гуолтнини кабыл алды. Бул тууралуу ЖКнын басма сөз кызматы билдирди.
Тараптар эки тараптуу кызматташтык мамилелерге жана парламенттер аралык байланыштарга тиешелүү маселелерди талкуулашты.
Төрага АКШ менен Кыргызстандын ортосундагы кызматташтыкты бекемдөөгө баардык аракеттер жумшаларын белгиледи. “2010-жылдан кийин кыргыз парламентинин фунциялары кеңейтилди жана күчөтүлдү, парламент өлкөдөгү эң ачык мамлекеттик орган болуп эсептелет. Биз алты жылдык ишибиз менен сыймыктанабыз. Биринчи кезекте – таза жана ачык-айкын өткөрүлгөн шайлоолор. Жарандарыбыз менен дүйнөлүк коомчулук былтыр 4-октябрда өткөн парламенттик шайлоого жогорку баасын берди. Эми алдыдагы президенттик шайлоону таза өткөрүү үчүн бардык күч-аракеттерди жумшашыбыз керек”, – деди Турсунбеков.

Ошондой эле төрага АКШ менен парламенттер аралык байланышты бекемдөөгө кызыктар экенин айтты. Үстүбүздөгү жылдын 2-июнунда «Демократия үчүн өнөктөштүк» комиссиясынын төрагасы Питер Роскам башында турган АКШ Конгрессинин Өкүлчүлүк палатасынын делегациясын кыргызстанга келиши эки тараптуу кызматташууга жаңы жол ачат деп баса белгиледи.
Ал эми Шейла Гуолтни АКШнын Кыргызстан менен ишеним жана өз ара сый-урматка негизденген тыгыз өз ара аракетин улантуу ниети бар экенин тастыктады. АКШ тарап Кыргызстанда жүргүзүлүп жаткан демократиялык реформаларга ар тараптуу көмөк көрсөтүүнү уланта бере турганын белгиледи.

ЮНЕСКО билдиргендей, комитет тогуз жаратылыш, 16 маданий жана төрт аралаш (табигый-маданий) объектинин талапкерлигин карайт. Мындан тышкары сессияда Бүткүл дүйнөлүк мурастар тизмесине кирген 108 жана кыйроо алдында турган дагы 48 объектини абалына талдоо жүргүзүлөт.

Батыш Тянь-Шань тоолорун ЮНЕСКОнун Дүйнөлүк мурастар тизмесине кошууга Казакстан, Кыргызстан жана Өзбекстандан кайрылуу келген.

Бүгүн, 27-июнда Жогорку Кеңештин агрардык саясат, суу ресурстары, экология жана регионалдык өнүгүү боюнча комитетинин жыйынында “Жерди пайдалануу чөйрөсүндөгү” мыйзам долбоору каралды. Бул тууралуу ЖКнын басма сөз кызматы билдирди.

Сунушталган долбоор менен жерди пайдалануу чөйрөсүндө укуктук мамилелерди жөнгө салууга багытталган КР айрым ченемдик укуктук актыларынын бир катар жоболорун тактоо киргизилүүдө. Ошондой эле КР Жер кодексине, «Жер участокторду которуу (трансформациялоо) жөнүндө» мыйзамга баалуулугу кыйла төмөн айыл чарба жерлерин башка категориядагы жерлерге, ошондой эле башка түрдөгү чарба жерлеринин башкасына которуу боюнча жергиликтүү мамлекеттик администрацияларынын ыйгарым укуктарын тактоо жагында тиешелүү өзгөртүүлөрдү киргизүү сунушталган. Долбоордо токой фондусундагы жерлерден чыккан кен байлыктарды трансформация жүргүзбөй туруп казууга мүмкүндүк берүү маселеси киргизилген. Бул аракеттеги кен иштетип жаткан компанияларды текшерүүнүн натыйжасында жаралган маселе.

Талкууда депутат Дастан Жумабеков мыйзам долбоорундагы мындай сунуш токой фондусундагы жерлердеги кен байлыктарды оңой жол менен алып, казууга болгон аракет катары баалап, жаратылыштын арча, карагайларын кыйдырбай сактап калуу зарыл дейт. Арча, карагайлар кыйылып жок болот дегенге каршы оюн билдирген Айлана-чөйрөнү коргоо жана токой чарбасы боюнча мамлекеттик агенттиктин директору Абдыкалык Рустамов кен иштетүүдөн кийин баардык аймак рекультивациялаары мыйзамда белгиленгендигин жооптоду. Ошондой эле бүгүнкү күндө токой баскан аймактарда кен иштетүүгө 127 лицензия берилгендиги маалым болду.

Комитет төрагасы Мирлан Бакиров баштаган бир катар депутаттар табиятты сактап калуу, токой фондусундагы жерлерди сарамжалдуу пайдалануу зарылдыгы боюнча ой-пикирлерин айтып, буга чейин берилип кеткен лицензиялардын мыйзамдуулугун тиешелүү органдарга тапшыруу керек дешет. Ал эми сунушталган мыйзам долбоорундагы токой фондундагы жерлердеги кенди иштетүү боюнча аракеттеги ченем калтырылмай болду.

Бүгүн Экологиялык жана техникалык коопсуздук боюнча мамлекеттик инспекциянын өкүлдөрү кызыл китепке кирген мадылды Ысык-Көл облусуна караштуу Ананьево айылындагы жаныбарларды калыбына келтирүү борборуна жиберүүгө катышты. Бул тууралуу аталган мекеменин басма сөз кызматы билдирди.

Сейрек кездешүүчү бул жаныбарды Мамэкотехинспекциянын штаттан тышкаркы кызматкерлери жана Nabu уюмунун өкүлдөрү Кочкор районунда жергиликтүү тургун тарабынан мыйзамсыз кармалгандыгын аныкташкан. Ага ылайык, адистер тарабынан мадылдын акыбалы начар болгондугу аныкталып, Бишкекке жеткирилген. Борбор калаада аны калыбына келтирүүнү Nabu эл аралык жаныбарларды коргоо уюму колго алып, жаныбарды сактап калышкан. Бүгүн мадыл Ананьеводогу калыбына келтирүү борборуна жөнөтүлдү. Ал жерде ден соолугу калыбына келгенче кармалып, андан соң эркиндике коё берилет.

Нуржан Шайлдабекова Борбордук шайлоо комиссиясынын төрайымы болуп шайланды. Бул тууралуу бүгүн, 27-июнда БШКнын жаңы курамынын алгачкы жыйынында белгилүү болду. Жыйында алгач төраганы шайлоо маселеси каралып, БШК мүчөлөрү бир добуштан Н.Шайлдабекованын талапкерлигин колдоого алышты.