Сузак районунун акими жарандарды Сирияга барууга үндөйбү? Же аймактагы көйгөйлөрдү чечүүнүн жолун, арыздангандарды Сирияга жөнөтүү менен жолго койобу? Мындай акимдин Сузак эли үчүн кереги барбы? Мындай нараазычылык пикирди Таш-Булак айылынын тургуну Майрам Алтыбаева айтып чыкты. Ал бир топ убакыттан бери чечилбей жаткан жер участокторуна байланыштуу, Сузак райондук мамлекеттик администрациясынын башчысы Абдумуктар Маматовго кайрылганын, өз кезегинде район башчысы ага орой мамиле кылганын маалымдоодо. Мындан сырткары, жетекчи мырза арызадануучунун Сирияга барышын кенеш бергенин Алтыбаева диктофонго жазып алган.
https://www.youtube.com/watch?v=OtHDn7si-Hw
Булак: 7 канал

Бул тууралуу Жогорку Кеӊештин «Ата Мекен» фракциясынын кезектеги жыйынында «Сырткы видеобайкоо жөнүндө» мыйзамды жүзөгө ашыруу боюнча «Ата Мекен» фракциясынын 2016-жылдын 22-январындагы чечиминин аткарылышынын жүрүшү тууралуу маалымат угулуп жатканда белгилүү болду

Ички иштер министри Курсан Асановдун айтымында, мыйзамга ылайык, Бишкек шаарындагы 7 миӊ 900 объектиге 24 миӊ видеобайкоо камерасы орнотулууга тийиш. «Биз дагы мыйзамдын толук аткарылышына абдан кызыкдарбыз. Ал кылмыштын алдыналууга, жарандардын коопсуздугунун корголушуна түрткү берет. Ушул жылдын январь айында эле ордо калаадагы 93 объектиге 1865 камера орнотулду. Азыр алардын саны 9605 видеокамерага жеткени тууралуу маалымат алдык», – дейт ал.

Андан сырткары, Курсан Асанов Ош шаарында 16 объектиге 73 камера орнотулганын, дагы 56 объектиге жок дегенде 3-4 камерадан орнотуу зарылдын белгиледи. Ал мыйзамды аткарбаган жактардын жоопкерчилиги кароо үчүн Административдик кодекске өзгөртүү киргизүү чарасы мерчемделип жатканын кошумчалады.

Фракция мүчөлөрү Бишкек жана Ош шаарларынын жетекчилигине, Ички иштер министрлигине мыйзамдын аткарылышын ыкчамдатып, аларды көзөмөлгө алуу тапшырмасы берилди.

Алдын ала алынган маалыматтар боюнча 2016-жылдын 31-марты күнү саат 21:30 чамасында Ош облусунун Кара-Кулжа районундагы Ылай-Тала айылында  катуу жааган жамгырдын кесепетинен арыктардан суу ашып, болжол менен  26 турак жайдын короолоруна кирген, анын ичинен Кой-Сары чегинде 1 турак жайынын жер төлөөсүнө суу толуп, 1 турак жайдын ичине суу кирип, пайдубалын тешип чыккан (авариялык абалда). Ошондой эле жамгырдын кесепетинен 13 баш жылкы Кой-Сары участкасынын Чоң-Бет чегинде учуп өлгөн. Өлгөн жылкылардын болжолдуу баасы 780 000 сом.

Адам өмүрүнө зыян келтирилген жок. Жарандык коргоонун  комиссиясы жеринде көрүп, тактоо иштерин улантып жатат.  

Кыргыз Республикасынын Президенти А.Ш.Атамбаевге,
Кыргыз Республикасынын Жогорку Кеңешинин төрагасы А.Ш.Жээнбековго,
Кыргыз Республикасынын Башкы прокурору И.Ы.Жолдубаевага,
Кыргыз Республикасынын Жогорку Кеңешинин депутаты, Ата-Мекен фракциясынын лидери Ө.Ч.Текебаевге
ТАЛАП
Урматтуу бийлик өкүлдөрү! Революция болгону быйыл туура алты жылдын жүзү болду, өкүнүчтүүсү мамлекетибизде ич жылытаарлык эч кандай жылыштар болбоду, кан төгүлдү, кырчындай болгон жигиттерибизден ажырадык, кыргыз элинин келечеги бүдөмүк, биз кимдерди ээрчип, каяка бара жатабыз? деген суроо туулат. Ата-Бейиттен, курман болушкан баатырлардын алдында көзүңөргө толтура жаш алып берген анттыңардан тайдыңарбы, эстеп көргүлөчү кандай ант бергениңерди, “кыргыз элин жыргатабыз, электр энергиясына болгон баалар көтөрүлбөйт, керек болсо бекер беришибиз керек, коррупцияны түп тамырынан бери жулабыз, Акаев, Бакиевтердин бир дагы кадрларын кызматка жолотпойбуз, аларды түрмөгө чиритебиз”, койчу деги кайсы бирин айталы, кана ошол берген убадалар. Азыр КТРКны көрүп отурсаң, жалаң эле баягы эле элдин эсебинен байыган коррупционерлер толуп алган. Колуңардан иш келбесе элди эзбей, өзүңөр дагы эзилбей, өз эркиңер менен кызматыңардан эле кетип калсаңар абдан туура болмок, эми Кыргызстанды алты жылда оңдобогонуңар, эми алты айда эмнени кыйратканы жатасыңар? Күн алыс улам бирөөңөр “экономикабыз укмуш оңолуп жатат, коңшу мамлекеттерден алда канча алдыга чыгып кеттик” деп айткандан уялсаңар боло, туура балким өзүңөрдөн үй-бүлөөлүк бюджетиңер, чөнтөгүңөр толуп, өнүгуп-өсүп жаткандыр… Дагы бир жолу баса айтсак, колуңардан иш келбесе, бийликти оппозициягабы же иштеген адамдарга өткөрүп берүүңөрдү талап кылабыз. Ал эми кыргыз элим, жерим деген биздин жердешибиз -патриот жигиттерибиздин бири Кубанычбек Кадыровду мыйзамсыз камакка алып, саясий куугунтук кылганыңарды ТОКТОТУУНУ ТАЛАП КЫЛАБЫЗ!!! Керек болсо так ушул Кубанычбек, Атамбаевди бийлике алып келгендердин бири, так ушул Кубанычбек, далай жолу бакиевтердин “провокаторлорунан” биргеликте куткарып жүргөн, Ал эми 2009-жылы Текебаевди бакиевтер Ак-Суудан РОВДнын алдынан, “таш бараңга алып өлтүрөбүз” деп жатканда, биз забордон секиртип, бир кашарга алып барып, аман алып калбадык беле, кана ошол күндөр, бүгүн болсо биз абдан урматтап сыйлаган Өмүрбек Чиркешович “лям” деп оозун ачпай отурганына жол болсун демекчибиз, унутуп калса биз эскертип коелу деп жатабыз.
Текебаев калыстыктан тайды, андан кайрат качты, ал сынды, бийликтин курмандыгы болду. Азыр болсо булар “кайдан көрдүм, кара эшекти” деген ойдо болуп жатышса керек, андай болбойт. “Элдин көзү көрөгөч” деп коет кыргызда. Ал эми Баш прокурор И.Жолдубаевадан мыйзамдуулукту ТАЛАП КЫЛАБЫЗ. А.Жээнбековдон эл өкүлү болгондон кийин калыстыкты, эл үчүн кызмат кылуусун ТАЛАП КЫЛАБЫЗ. бийлик өкүлдөрү! Эртеңки келечегиңерди ойлогула!
Кубанычбек Кадыровду мыйзамсыз камакка алып, саясий куугунтук кылганыңарды ТОКТОТУУНУ ТАЛАП КЫЛАБЫЗ!!! Арты жакшылык менен бүтпөөрүн эскертип айтып коюу биздин атуулдук милдет.
Ысык-Көл облсунун Ак –Суу районун жаштарынын атынан,
Кайырбек Э, А.Акматов, Т.Коңурбаев, А.Усубалиев, А.Намазбаев, У.Бадаев, А.Жайыков, А.Усубалиева, М.Мырзабаев, Б.Дүйшөбаев

Бишкек шаардык Жол көзөмөлдөө кызматынын башчысы Зумрат Жанабаева Октябрь райондук прокуратурасы тарабынан камакка алынып, №1 СИЗОго жеткирилген. Көп өтпөй анын абалы оорлоп Улуттук госпиталга жаткырылды. Бирок катуу кайтарууга алынган. Депрессияга кабылган Жана­баева учурда өзүн кимдер сатканына башы жетпей ойлонуп жатыптыр.

Аял кишини салып берип коюп, өзү коёндой жашырынгандар кимдер болду экен деп турубуз. Зумрат айым коркунучтуу кылмышкер болбогондон кийин, аял киши болгондуктан үй камагына эле чыгарып коюшса болмок экен. Пара менен кармалса да бир жөн эле. Болгону документти арткы мөөнөт менен жасады деп гана шектелүүдө. Ага карата мамиле мынчалык катуу кетип камакка алынганына караганда Зумрат айым кайсы жыландын куйругун басты болду экен ыя?

Учурда аны орунбасары Молдогазиев саткан деген кептер айтылууда. Эгер андай болсо абал мынчалык оор болмок эмес. Баамыбызда бийликтеги «киттердин» биринин куйругун баскан го деп турубуз…айтор аял кишини «подстава» кылганга кимдин колу барды экен?

Булак: “Ачык саясат”

Аксылык жигит Шекербек Камчыбек уулун «оппозицияга эмнеге кошуласың» дешип СНБнын кызматкерлери эсин чыгарып жатыптыр. Баягы Акаев менен эле Бакиевдин заманынан эч айырмасы жок болуп калды бул бийликтин. Оппозиция менен иштешсе эмне болуптур десеңиз.

Бийликтин жаса­ган кадамдары жакпаса ар жаран өз пикирин ачык билдирүүгө укуктуу да. Шекербек өзү Аксынын эң активдүү жигиттеринин бири болот. Эгер ага карата сурак күчөй берсе аны да колдоп чыкчулар бардыр. Бийликтегилер Шекербектен башкасын деле тыңдап сурап алышсынчы. Ушул карапайым жигит революция кылып жибермек беле?

Булак: “Ачык саясат”

Өзгөчө кырдаалдар министринин орун басары Равшан Рысбаевди билесиңерби? Ал буга чейин СДПК аркылуу парламенттик шайлоого чыгып, ийгилик көрсөтө албай, кайрадан «эски ордуна» барган. Өзү коммерция менен көтөрүлгөн, мамлекеттик кызматтарда тажрыйбасы жок. Бийликте ким таасирдүү болсо, ошонун артынан ээрчий берип, акырындан телчигип келатат. Өткөн жылы Төрөбай Зулпукаровго таянып алып, Алтынбек Сулаймановго ар кандай сөз ыргытканы жалганбы? Эми андай сөздөрдү гезитке жаза албайсың. Азырынча Төрөбай бийликтин партиясында болуп аткан соң, Р.Рысбаев ага жабышып кал­ганы жаңылык деле эмес дечи. А эртең заман өзгөрүлсө кантет? Мындайлар күн тийген жердин күкүгүнгө айланып, улам бир бийликке жүгүнгөндөн уялбайт экен да.. .
Бекбол Айдаров
Булак: “АЗИЯnews”
 
 

Мыйзам жазууга тиши өтпөгөндөр, элдин таламын талашуу менен өкмөттүн катачылыктарын көтөрүүгө акылдары жетпеген депутаттар таксист болуп, элди ташып жүргөндөрү кандай? Аларга көпчүлүк катмар көчүгү менен күлүүдө. Ошол таксист болгондор көрүнгөн партияларга эптеп жармашып, ар кандай айла-амалдар менен депутат болуп келишкенин байкадык.

Кыскасы, «Депутат – таксист» деген атка жамынышып, пас популизм аркылуу элди иренжитүүдө. Жеткен акылдары ошол болсо, башка эмне кепти айтмак элек? Буга чейин Сайдулла Нышанов, Узар Жылкыбаев, Махабат Мавлянова, Дастан Жумабеков, Лунара Мамытова ж.б. кыйратып иш кылбаган депутаттар таксовать этип, тескери жорук жасашкан. Качаңкыга чейин?..

 Булак: “АЗИЯnews”

Соңку убакта айрым интернет сайттарда, гезиттерде «Кыргызстан» фракциясынын лидери Канатбек Исаевди жалган негизде каралоо иши байкала баштады. Буга чейин мындай «көө жабуу»жагын «Өмүрбек Бабановго тиешелүү» делген ЖМКлар ишке ашырып жүрсө, бу саам өкмөттүн маалымат саясатын тейлеген Назира Ахмедова эстафетаны илип алганбы? Акча таратуу менен К.Кедейкановичти каралатып атабы?..

Эмесе, маселенин өзөгү түшүнүктүү болуш үчүн артка кылчаялык. 2015-жылдын октябрь айында Балыкчы-Корумду жолун оңдоо боюнча тендер өткөрүлгөндө, мыйзамды одоно бузуу боюнча фактылар аныкталган. Ал боюнча Жогорку Кеңеш тарабынан комиссия түзүүгө Канатбек Исаев демилгечи болгонун билебиз. Аныгында, тендерди юсти­ция органынан каттоодон өтпөгөн, лицензиясы жок ком­пания утканы, ортодон «миллиондор ойногону» боюнча катуу талкуу башталган. (Кылгылыкты кылышкандан ки­йин «мыйзамдаштырганы» күлкүнү келтирүүдө.) Ошентип, эл аралык деңгээлдеги жолду лицензиясы жок кытай фирмасы курууга киришкен эле. А атамекендик фирмалар 1 миллиард 200 миллион сомго арзан баада жол курууну сунуш кылганына карабастан, береги кытай фирмасын мыйзамсыз түрдө ашыкча чыгымдар менен тендердик комиссияны «утту» деген чечим кабыл алышкан. Мына, коррупция бекен?

Премьер-министр Темир Сариевдин дал ушундай кылмышка шектүү ишин Канатбек Исаев Жогорку Кеңештин трибунасынан ашкере кылган. Бирок, өкмөттүн терс кылыгы үчүн укук коргоо органдары канчалык деңгээлде реакция кылышканы али күнгө чейин бизге белгисиз. «Шибегени капка ката албайсың» дейт. Ансыңарындай, бийликте туруп, мыйзамсыз тендер жүргүзүү канчалык жашырган күндө деле коомчулук билип калды. Т.Сариевдин отставкасына лицензиясы жок тендер жүргүзүү иши, ортодон 1 миллиард 200 миллион сомдун чыгашасы себепчи болобу?

Кызыгы, өкмөттүн астындагы дал ушундай аферага, мыйзам бузууга К.Исаев каршы чыкса, ага карата суу кечпеген сөздөр менен атака башталды. Айрым сайттарда жүргөн көлдүк жарандардын билдирүүсү боюнча, К.И­саев жол курууга каршы чыгып, тим эле кыянаттык кылып аткан имиш. Таппасаң сыйпалап кал! Мынчалык пас деңгээлде көз будамайлоону акыл-эси жайында адамдар түшүнүп, Т.Сариевдин кылыгына нааразы эле болуп аты­шат. Бет тырмарлыктын чеги болбойбу? Качанкыга че­йин «жең ичинен» пул жасап, мамлекеттин эсебинен байый беребиз?..

Кыскасы, Назира Ахмедова бүгүнкү кылыгы үчүн уялбайбы? Ошол сайттарда иштеген биздин кесиптештер менен кандай «алака» кыльш атканы сөз болууда… «Кыргызстан» фракциясынын лидерине жалган каралоосун күчөтө берсе, эртең кыйналып калбайбы?… А текиреңдегенТемике аз кундө кетет…

Нарбек БУЛАТОВ

Булак: “АЗИЯnews”

31-мартта Ош облусунун казысы Самидин кары Атабаев Кара-Суу районундагы “Курманжан-Датка кыздар медресесиндеги иш аракеттер менен таанышты. Аталган иш-чарага казыяттын кызматкерлери жана медресе мүдүрү Балтабаев Сайпидин катышышты. Иш-чаранын жүрүшүндө медреседеги окуу программасы жана окуучуларга түзүлгөн шарттар текшерилди. Бул тууралуу Ош облусунун мусулмандар казыятынын маалымат кызматы билдирди.

Жыйынтыгында медреседе кошумча светтик кыргыз тили, адабия, тарых, орус тили сабактары жана тикмечилик менен ашпозчулукка үйрөтүү багыты жолго коюлгандыгы жогорку баага татыды. Окуучулар сабактан сырткаркы бош мезгилдеринде кондитердик азыктарды даярдоону жана кийимдердин моделдик түрлөрүн тигүүнү үйрөнүшөөрү белгилүү болду. Мындай жыйынтыкка ыраазы болгон облус казысы медресени дайыма үлгүлүү окуу жай катары сактап өнүктүрүү тапшырмасын берди.

Эскерте кетсек, “Курманжан-Датка” кыздар медресесине диний илим алууга кызыккадар үчүн сырттан келип, күнүнө 2 сааттан сабак алып кетүүгө шарттар түзүлгөн.

Балыкчы-Чолпон-Ата-Корумду жолун салууда эле эмес, Бишкек менен “Манас” аэропортунун ортосундагы 23 километр жолун курууда да мыйзам бузуулар болгону айтылып жатат.

Бул эки жолдун курулушун көзөмөлгө алуу функциясын “Кыргыз трек” ишканасы тендерден утуп алган. Ишкананы түптөгөн беш кишинин экөө Алмаз Тургунбаев менен Руслан Сатыбалдиев мурдагы өкмөт башчы Жантөрө Сатыбалдиевдин туугандары болуп чыкты. Жантөрө Жолдошевичтин агасынын баласы Руслан бир эле учурда Транспорт министрлигинин алдындагы Инвестициялык долбоорлорду ишке ашыруу бөлүмүндө иштейт.

Ал эл өкүлдөрү шекшип жаткан министрлик имаратынын 6-кабатында отурат. “Кыргыз трек” жолду кандай куруш керектигин кытайларга үйрөткөнү үчүн жана жолдун сапатын текшергени үчүн 40 млн. сомдон ашык акча табаары айтылууда.

Булак: “Фабула”

Украина чыгышында орусиячыл жикчилер менен уруш  2014-жылдын апрелинен бери он миңге жакын адамдын өмүрүн алып кеткенин, алардын 2700дөн ашууну украин аскер кызматкерлери экенин бүгүн президент Петр Порошенко Вашингтондо билдирди.

Анын айтуусунда, Донбасста курман болгондордун саны АКШнын Ооганстандагы 15 жылдагы аскерий жоготууларынан да ашып кетти. УНИАН агенттигинин кабарлашынча, Порошенко мындан сырткары эки миллионго жакын адам бул уруштун айынан өз үй, өлөң төшөгүнөн айрылып, өлкө аймагынын жети пайыздайы баскынчылардын колунда калганын ырастады.

Булак: “Эл деми”

ММКларга ЖКнын 6-чакырылышындагы үй-жайы жок, кызматтык квартирада жашаган депутаттардын тизмесин жарыяланды. Арасында КСДПдан де­путат болгон Тилектеш Исаев дагы жүрөт. Аны көргөндө таң калып, жакабызды кармадык. Анткени бул жигит “Газпромнефть-Аэро-Кыргызстан”, “Асур”, “Интек” компанияларанын башчысы болуп, кара май сатуунун каймагын калпып алып жургөнү баарыбызга маалым. Айталы, 2012- жылы “Газпромнефть Азия” менен “Электр станциялары” ААКсынын ортосундагы келишимге ылайык, Тилектеш Исаевдин “Асур” компаниясы 470 млн. долларга мазут ташууну жалгыз ээлеп алса, анысы аз келгенсип, тоннасын 206 доллардан “Газпромдон” алган бул жеке компания аны мамлекеттик ишканага а дегенде 450, андан кийин 423 доллардан сатып, ортодон оңой эмес акча жасаганын Эсеп палатасы таап чыкканын уккан жайыбыз бар эле. Бирок, бул иштер бийликтеги айрым май бизнесине таасири бар адамдардын аркасы менен жабылып калганбы, ың-жыңсыз болду. Ал эми миллиондорду тегереткен Тилектеш мырза болсо депутат болуп, уялбай кызматтык квартирада жашап жатат. Атайын, көз боемочулук жасап “БОМЖ” көрүнүп…

Булак: “Фабула”

-Равшан мырза, жердеш агаңыз Дастан Сарыгуловдун видеодогу сөздөрүн уктуңуз да. Аксакал айткандай, чын эле Таласта сизди колдоого алчу электоратыңыз жокпу? Кезегинде мамлекеттик мүлк фондусун башкарып турганыңызда өлкөбүздөгү бала- бакчаларды кантип «пайдаланганыңыздан» өйдө айтты. 70 жашка таяган аксакалдын кебине айтаар жообуңуз барбы?

-Эми айтса айткан чыгаар. Мага карата ошондой ойду айтса, ал өзүнүн жеке пикири. Мүмкүн туура, балким туура эместир. Мен ал кишинин антип айткандарына терикпейм деле. Саясатчылар дайыма сүйлөгөндө өздөрүн абдан жогору коюшуп, башка бирөөлөрдүн ролун, маанисин, саясаттагы ордун төмөндөткөнгө аракет кылышат. Бул жалпы саясатчылардын жаратылышына туура келген көрүнүштөр. Мен

ойлойм, бул кептерге кандайдыр бир деңгээлде көңүл бурбашыбыз керек. Мен так би­лем, Дастан байкемдин мага карата жаман айтайын деген деле оюу жок. Айрымдар кээде туруп-туруп бирдемелерди сүйлөп коюшат го. Бул деле ошондой эле көз караш. Ал кишинин мага карата мамилеси жалпысынан жакшы экендигин да билем.

-Оппозициядагы айрым тилектештериңиз сизди Аксыдагы чек ара жаңжалы жүз берген аймакка барып, нааразычылык митингин өткөрүшкөндө аларга каршы пикир айткан жүрүшүңүздү катуу сындап, тар чөйрөдө таарынгандай түр жаратып жатышыптыр го…

-Ар бир саясатчынын өз көз караштары барда. Эгерде кайсы бир саясатчы кандайдыр бир иш жасагысы келсе же ми­тинг өткөрүүнү кааласа, алардын көз караштары менен мен

макул болушум дагы мүмкүн, макул болбошум дагы мүмкүн. Ошондуктан, мен деле өз көз карашымды айттым. Ал пикир бирөөнө жагышы мүмкүн, айрымдарга жакпашы да мүмкүн. Өзгөчө Кыргызстандагы азыркы саясый, социалдык, экономикалык оор абал пайда болуп турганда, биз баары бир кандайдыр бир чектен чыккан нерселерден абайлашыбыз ке­рек. Бийликти жаман көргөнбүз, бийликти сындаганыбыз бизди кандайдыр бир радикалдуу кадамдарга алып барбашы зарыл.

-Оппозициянын соңку кадамдарынан кийин эл булардан түңүлүп, жүз үйрүп ка- лышпадыбы? Айрым лидерлер оппозицияны биротоло тамам кылып, коомчулукка жек көрсөтүп салышты. Айтыңызчы, мындан ары биздин «оппозиционер сымалдарга» эл ишенишеби?

-Мен бир нерсени так билем! Кыргызстандын тарыхында бүгүнкүдөй болуп аткан оппозициялык саясатчыларды, журналисттерди жамандап, аларды чет элдин агенти катары жек көрсөтүү, маселен, мени АКШнын агенти катары, Азимбек Бекназаров менен Эрнест Карыбековду Өзбекстандын агенти катары көрсөткүлөрү келип атышат. Бул буга чейинки биздин тарыхыбызда аябагандай көп болгон. Мындай кадамдардын жыйынтыгы бийликке эч убакта чоң авторитет алып келбейт. Бийликтин азыркы күндөгү курч көйгөйлөрүн чечпейт. Мен бүгун так билем, бийликте аябай чоң көйгөйлөр бар. Бир эле со­циалдык, экономикалык абалды алалычы? Бир аз кундөн ки­йин бийликтин оппозицияны жамандаган шылтоосу бүтүп, ресурсу түгөнөт. Социалдык, экономикалык абал, мамлекетте чече турган көйгөйлөр көп. Элибиз кайра эле ошол маселелерге көңүл бурушка туура келет дагы, оппозицияны бүгүнкүдөй жамандаган нерселер унутула баштайт. Бийликте кыйынчылыктар мындан дагы көбөйөт. Оппозицияны жаманатты кылган менен оппозиция жок болуп кетпейт. Бийликти колдобогондор да жок болуп кетпейт. Тескерисинче, оппозициялык саясатчыларды андан дагы күчтүү, мындан дагы активдүү күрөшкөнгө азыркы бийлик түрткү берип атат.

-Атаңыз, экс-чиновник Бабырбек Жээнбеков азыр кайда? Эмне иштер менен алагды болууда? Же саясаттан би­ротоло тыныгуу алып, калган өмүрүн неберелери менен өткөрүүнүсамап жатабы?

-Атам азыр өзүнүн адвокаттык жеке иштери жана үйүндөгү чарбачылык тиричилиги ме­нен алектенип жүрөт. Мен ой­лойм, атам саясаттан азырынча кетпейт деле болуш керек. Саясатка бир кирген адам оңой менен кете албайт эмеспи.

Калыгул Бейшекеев

Булак: “АЗИЯnews”

Ошентип, кечээ көптөн күткөндөй  эле Пре­зидент Алмазбек Атамбаев өкмөт башчы Темир Сариевдин бир жума мурун жазган отставкага кетүү боюнча арызын кабыл алды. Демек, өкмөт толугу менен алмашып, ордуна жадыраган жаны кадрлар келип отурмакчы. Бирок, бул айрым Өкмөттүн өзгөрүшүн күткөндөр үчүн кыялдыр. Биз болсо бул жаңылыкты бүгүн  1-апрель – эл аралык күлкү күнүн урматына окурмандарыбызды бир жылмайтып алалы деп, тамаша иретинде жазып койдук. Кайгырбай кабагыңарды ачып, жүрөгүңөргө жакын кабыл албай узак өмүр сүргүлө!
Булак: “Фабула”

Былтыр ырчы Бек Борбиев «Супер инфо» гезитинин айрым ички ырчылар менен жасаган «кылыктарын» ачып иштешпей калганын айткан эле. Биздин гезиттин аброюна көө жаптың деген мааниде гезит ырчыны сотко берген. Бул тууралуу Бек Борбиев өзү “Ырчылар менен оокатын кылып акчасын таап жаткандан кийин гезит акча албашы керек. Сулуулар сынагында таптакыр башка кыздын акчасын алып биз тандаган кызды эмес, башка кызга таажыны берип койгондо башталган чыр ушуга алып келди. Булардын соодасы бүтпөйт. Ошондуктан бетин ачып коёюн дедим”- дейт. Гезит менен ырчынын соту эмне менен бүтөт, кимиси жеңишке жетишет, мезгил көрсөтөт.

Булак: “Жаңы ОРДО”

Бекназар Айталиев деген ак­тивист 30-мартта көпчүлүктүн оозун ачырды. Ап “Биз келечек учун ушундай ишке барып жатабыз. Мындан ары ушундай иштер болбосу үчүн өзүбүздүн  эркиндигибиз менен, ден-соолугубузду тобокелге салып бардык. Биз өзүбүздүн ата-бабаларыбыздын салты менен жашаган жокпуз. Буга чейин кармап келген кыргыз эли­нин таалим-тарбиясы менен жа­шаган жокпуз. Жөөттөрдүн жазып берген мыйзамы менен жашап жатабыз. Жөөттүн мыйзамы менен сен элдин, улуттун кызыкчылыгын коргогон инсан болсон да, сен “көчүгүн” саткандардын алдында ылдый болуп каласың. Улуттук баалуулуктар боюнча иштерди жүргүзүп жатабыз. Керек болсо Жогорку Кеңеште депутаттардын арасында “гей” депутаттар бар экен. Аппаратта олтурушат” деди. Азыр 120 депутаттын кисими “гей” деген талкуу жүрүп жатат.

Булак: “Жаңы ОРДО”

Жогорку Кеңештин депутаты Кожобек Рыспаев “Электр энергиясынын тарифи тууралуу суроомо, өкмөт жомок жазып жибериптир» деп чыкты. “Жогорку Кеңештин өткөн чакырылышынын мөөнөтү аяктаары менен, өкмөт электр энергиясынын тарифин көтөрүп салды. Бул маселе парламенттин тармактык комитетинде каралып, өкмөткө бир катар тапшырмаларды бергенбиз. Ал азыркыга чейин аткарыла элек, Тармактык комитет Отун-энергетикалык комплекс боюнча мамлекеттик агенттикке электр энер­гиясынын тарифин 1 сом 82 тыйынга ттөмөндөтүү тууралуу тапшырма берген. Алар аны эске албай, электр энергиясын импорттоо көлөмү төмөндөгөн темендеген учурда эмнегедир тарифти 2 сом 16 тыйынга чейин көтөрүп салышты. Муну түшүндүрүп берүү өтүнүчү менен кайрылсам, ага жооп катары кайдагы бир жомокту жазып жибериптир. Өкмө бул багытта тезинен чара көрушү керек” деди депутат.

Булак: “Жаңы ОРДО”

Кербен шаарынын жашоочусу, коомдук активист Камчыбек уулу Шекербекти элдин муктаждыгын айтканы үчүн бийлик тараптан кысымга алып жатканы маалым болду. Шекербек кысым болуп жатканын, “Кагат” каймана аты бар Ал­маз деген келип “өлөсүң, жок болуп кетесиң”,-деп коркутканын, муну райондун акими Медетбек Айдаралиев, райондук милициянын мачальниги М. Добулбековдун кылган иши деп билерин, “Кагаттын” кишилеринин арасында милиция кызматкерлери да жарандык форма кийип жүргөнүн “Fakt.kg” маалымат сайтына ачыктаган. Ал “кылмышкерлер менен милициялар чогуу жүрушөт. Бийлик мына ушуга чейин барып атат” деген. Кызыл формачандарга карата күнөө айтылып жаткан соң, ИИМ министр райондук милиция начальнигин суракка алып койсо ашыкча болбойт.

Булак: “Жаңы ОРДО”

Азимбек Бекназаров баштаган “Эл үнү” кыймылы 24-март күнү Ош шаарында элдик курултай өткөрүүнү жарыялап, ага президент баш кылып бийлик өкүлдөрүн, оппозицияда жүргөн саясатчылардын баарын чакырган. 18-март күнү коңшу өзбек тарап чек ара маселесин жараткандан кийин оппозиция 22-мартта курултайдын биринчи этабын Аксыда өткөзүшкөн. 24-марттагы Ош шаарында өтө турган курултай чек ара маселесине байланыштуу башка күнгө жылдырылган. 26-март күнү өзбек тарап аскерлерин толук алып чыгып кеткенден ки­йин бийлик өкүлдөрү Бээжинди чаап келгендей шерденип, оппозицияны ойрон кылдык дешип эрдемсингенин кантип жашырабыз? Чек ара чуусу чыгып жатканда чээнге кирип кеткен бийликтин тыңчыкмалары, өзбек тарап кеткенден кийин эле оппози­цияны мурунку ыкма менен КТРКдан боктогонго өттү. Алгач УОК лидерлери Кубанычбек Кадыров менен Бектур Асановду бийликти күч менен басып алууну пландаштырган деген шылтоо менен 2 айга камакка алды. Анын артынан эле Э.Карыбеков темир тор артына кетти. Аны Өзбекстандын атайын кызматы менен иштешкен деген маалыматты биздин коомдук каналыбыз жарыялады. Дастан Сарыгулов үй камагына алынды. Азимбек Бекназаровдун иш бөлмөсүнөн үн жаздыруучу аппарат табылды. Оппозиция дагы жөн жатып бербейт да. Алар да бийлик менен күрөшун уланта турганын билдиришүүдө. Бийлик буга чейин оппозиция өкүлдөрун камоо, коркутуу ыкмасын колдонуп келген. Бирок, ал ыкма натыйжалуу болбой,тескерисинче абал­ды курчутуп жиберерине күбө болгонбуз. 2010-жылы да бүгүнкү президентибиз баш болгон саясатчылар камак­ка алынып, эртеси эл көтөрүлгөн. Азыр да абал ошол өңуткө бара жаткандай. Саясий тирешүү чыңала берсе, оюндан от чыккандай эле болгону турат.

Булак: “Жаңы ОРДО”

Өкмөттүн маалымат кызматы интернетте тарап кеткен Унгар-Тоо боюнча премьер-министр Сариевдин колу коюл­ган протоколду жасалма документ деп атап, аны Бекназаровдун жасалма документ™ таратып жаткан провокациясы деп жар салды. Бекназаров өкмөт мүчөлөрүн жыйнап алып жыйын өткөрүп, ал жыйынга өзүнүн эмес, Сариевдин колун коюп, Өкмөттүн мөөрү менен штампын баскан тура. Андан кийин Аксыга Сариевдин ордуна өзү барып, Кербен шаары­нын жергиликтүү депутаттарын шашылыш чогултуп “Ушул протоколду колдоп койгула” деген тапшырма да берсе керек. Маалымат кызматы муну да кошуп коюшса жакшы болмок. Муну менен Өкмөттүн маалымат кызматы бийлик Сариевде эмей эле Бекназаровдо дегендей түр көрсөтүп жатышат го. Бирок, жергиликтүү кеңештин төрагасы ал протокол Өкмөттүн маалымат кызматы тараткандай жасалма эмес экенин, ал документ Өкмөт тараптан келгенин ырастап койду. Мурун бийлик баарын Бакиев жасап жатат деп айтчу эле, азыр Бакиев деген фамилия Бекназаровго алмашкандай.
 
Булак: “Жаңы ОРДО”

Жогорку Кеңештин депутаты Жылдыз Мусабекова кечээ Сокулук районунун Новопавловка айылында каза болгондорго жай 25 миң сомдон сатылып жатканын айтып чыкты. Жакында эле Бишкек шаарынын Чүй проспектиси менен Турусбеков көчөлөрүнүн кесилишиндеги дарак кулап, жолдон өтүп бараткан авто унааны басып калып, айдоочу ошол жерден эле жан берген окуя катталган. Каза болгон айдоочу Ак-Өргө конушунун тургуну болгон. Мусабе­кова ошол айдоочунун сөөгүн коюуга жер табылбай кыйынчылык жаралганына токтолду. Новопавловка айылында каза болгондорго жай 25 миң сом­дон сатылып жаткандыгын, бул мүрзө убагында 2000-жылдары Ак-Өргө,Ак-Ордо жана Ала-Тоо жана Сокулук эли үчүн бөлүнгөндүгүн, ал кезде жай 3000 миң сом болгондугун кошумчалады. Азыр 25 миң сом акча таппай калсаң,  сөөктү жерге бере албай калган кез тура.

Булак: “Жаңы ОРДО”

Унгар-Тоо Өзбекстанга тийиштүү аймак делип Темир Сариевдин колу коюлган протоколдун чуусу Өкмөттү алып түшө турган болуп калды. Президент Алмазбек Атамбаев да журналисттердин суроосуна жооп берип жатып “Ошондой боло турган болсо Сариевдин башы кетет” деп айткан жайы бар. Оппозиция өкүлдөрү да Сариевге кылмыш иши ачылыш керек деген пикирде.

Эгер Сариев кызмат менен кош айтыша турган болсо, кийинки өкмөттү ким жетектейт деген суроого кептердун аты аталып жүрөт. СДПК фракциясынын лидери Чыныбай Турсунбековду, “Кыргызстандын” лидери Канат Исаевди кудалагандар да бар. Бирок, ак  үйдүн билермандары “Бир Бол” партиясынан  депутат болуп, Жогорку Кеңештин каржы комитетин жетектеп жаткан Аскарбек Шадиевге токтолуп жатканы сөз болууда. Андыктан колдоочулары күч болуп жаткан сон Шадиевдин өкмөт башчы болууга “шансы” көбүрөөктөй. Мындан сырткары азыр өлкөнү Шадиевдин баткенчи аке-укелери башкарып жатпайбы.

Булак: “Жаңы ОРДО”

Жогорку Кеңеш акыркы күндөрү элди дүрбөлөңгө салган чек ара маселесин карай турган болуп, жыйынга тийиштүү адамдарды чакырып, бирок маселени жабык эшик артында талкуулады. Депутаттардын бул чечими көпчүлүктү нааразы калтырды.

Эл ишенип депутат кылып шайлагандан кийин элден эмнени жашырат дегендер чыгууда. Керек болсо ошол жерде жашаган адамдардын, Унгар-Тоо маселесин караган Кербен шаарынын депутаттарынын катышуусунда маселени ачык карап, түз эфир аркылуу бүтүндөй элге көрсөтсө болмок да. Эл өкулү болгондон соң элдин пикирин да депутаттар эске алуусу керек болчу. Эл­ден жашыруун маселени чече берсе, элдин толкуну болуп, качаар жери саманканага айланып калышы бат эле

Булак: “Жаңы ОРДО”

Бала саясатчы Жанар Акаев өткөн жылы Жогорку Кеңештин трибунасынан “Жалил Атамбаевге эч кимдин алы жетпейби? Азыр заман өзгөрдү. Керек болсо Атамбаевдин “крышасын” таап камаш керек” деп катуу опурулган. Андан бери бир топ ай убакыт өттү. Акаев Атамбаев­дин “крышасын” издеп таба албай жатабы деген сөздөр да айтылды. Эл арасында “Жанар Акаевди фракция лидери Чыныбай Турсунбеков менен Жогорку Кеңештин төрагасы чакырып алып “Сен Атамбаевге көп асыла бербе. Ал деген СДПКны, сени шайлоодо Ош облусунда колдогон. Бул жагын түшүндүңн да” деп оозун жаап коюшуптур” деген сөз айтылып жүрөт. Шамал болбосо теректин башы кыймылдабайт да.

Булак: “Жаңы ОРДО”

Аксы районунун акими Медет Айдаралиевдин да акимдик ишине Унгар-Тоонун тегерегиндеги ызы-чуу чекит коюшу толук мүмкүн. Кербен шаардык кеңештин депутаттарынын кезексиз жыйынында Өкмөттүн  Унгар-Тоону Өзбекстандын жери деп тааныган протоколун колдоп берүүсүн Айдаралиев да өтүнгөн. Анын өтунүчүн шаардык кеңештин депутаттары четке каккандан бери, жергиликтуу кеңештин депутаттары акимдин районду башкарууга моралдык укугу барбы деген маселени көтөрүп чыкмай болуп жатышыптыр. Медет Айдаралиев чоңдордун көңүлүн ыр менен алганды жакшы өздөштүргөнүн билгендер арбын экен. Кана Меке, бир созуп койчу?-деген сөздү укканда эле Айдаралиев ордунан тура калып, Бек Борбиевдин ырларынан созолонтуп кирет экен. Аны бир топ кесиптештери, облусту башкарган губернаторлор “ырчы аким” деп тамалашап да коюшчу тура. Кээ бир адамдар “Аксыдан чыккан Жеңижок, айтышарга теңи жок” деген сөздү, “Аксыдан чыккан Медет, ыр менен кепке жетет” деп өзгөртүп да алышыптыр.

Булак: “Жаңы ОРДО”

Акыркы күндөрү бийлик “юпигейт” оорусуна кайра чалдыгып, кантип жазылганы белгисиз аудиожазыламарды элге таратып, опозицияны бийлик эңсеген эл душманы катары көрсөтүүдө. Бул аудиожазмалар боюнча кээ бир инсандар бүгүн тергөөдө сурак берип жатышат. Суракка келгендерге Б.Асанов менен К.Кадыровдун, биздин артыбызда  Ө.Текебаев турат деп айткан аудиожазмасын тергөөчүлөр угузуп жатыптыр деген сөз бүгүн элге тарады. Карга карганын көзүн чукубайт болуп, бул  аудиожазманы элге толук угузгандын ордуна бүгүн бийлик Текебаедин бул кылыгын  А.Бекназаровго жуктоого далалат кылып жатат, өзүнүн каражащиктеринен Бекназаровду эле кайра, кайра элге жамандатып каралоодо. Б.Асанов менен К.Кадыров өткөргөн жыйындардынын бирөөнө да А. Бекназаров катышпаганына карабай, андан сырткары, К.Кадыров «биз А.Бекназаровду кошпошубуз керек» деп аудиожазмада так айтып жатса да, бийликтин каражащиктери Бекназаровдун  сүрөтүн Асанов менен Кадыровдун катарына  илип алып, мунун башында А. Бекназаров турат деген пикирди элге таңуулап жатат. Ошондуктан бул «юпигейтин» артында  Атамбаевдин эле өзү турганы байкалып калды. Буга Асанов менен Кадыровдун биздин  артыбызда Текебаев турат деген аудиожазмадагы сөздөрү, бийликтин каражащиктеринин Бекназаровду тынбай каралап жаткандары так күбө боло алышат.
Эмне үчүн бийлик бүгүн Ө.Текебаевди калкалап,
анын ордуна А.Бекназаровду радио телевидение  аркалуу кайра, кайра каралатып жатат? Анын жүйөөлүү себеби бар. Бийлик кулатканга бизде Бекназаров эле жарайт деген элде ишенич бар. Бекназаров жетектеген «Эл үнү» коомдук саясый кыймылы акыркы учурда өз  ишин кичине эле жандантып койсо, бийликтин жүрөгү болкулдап, Бекназаровду жамандоого, каралоого өттү. Текебаевден бийлик коркпойт, себеби анын мойнуна  морадер деген ишти илип, бирок сотко жеткирбей  токтотуп койгон. Текебаев бийликке кичине эле каршы сүйлөсө, мородерлук боюнча анын иши ошол эле күнү сотко өтөт.
Эмне үчүн бүгүн бийлик Бекназаровду катуу каралап жатат?
Анын себеби билип коюңуздар. Бекназаров бүгүн өкмөт башчыбыз Т.Сариевдин кыргыздын Аксы жергесинде жайгашкан Үңкүр-Тоону “Өзбекстандын территориясы” деп кол койгон документтин кармап алып, ким жана качан Үңкүр-Тоону өзбектерге берип салганын тактоо боюнча эл менен ачык айкын иш кылып жатат. Үңкүр-Тоо Кокон доорунда да, Совет доорунда да, биздин бүгүнкү доордо да кыргыздын эле жери болгон. Ошондуктан Сариевдин Үңкүр-Тоону өзбектердин жери деп атоого укугу да, негизи да жок жана ушул кылыгы үчүн ал жоопко тартылыш керек.
Үңкүр-Тоону өзбектерге бийликтен башка эч ким бере алмак эмес. Ошондуктан А. Бекназаровдун Үңкүр-Тоо боюнча жасап жаткан иши, бийликтин былыгын ачуу менен эле барабар. Акаев Үзөңгү-Кууштун айынан өлкөбүздөн качып кетүүгө мажбур болгондой, эгер А.Бекназаров токтоп калбаса, эртеби, кечпи бүгүнкү бийлик да акаевдин кейпин кийгени турат. Ошондуктан бийлик бүгүн Ө.Текебаевдин тымызын элди козутуп жатканын А.Бекназаровго жүктөөгө аракет кылып, элге жасалма аудиожазмаларды угузуп, Бекназаровду камоону эңсеп жатат.
Буга биз жол бербейли, Урматтуу боордоштор, Бекназаров бүгүн бийликтин чекесине чыккан чыйканга кайра айланды. Үңкүр-Тоо өзбектерге өтүп кетпесин деген инсандар, Бекназаровду катуу колдойлу жана аны коргоону да унутпайлы.  Себеби ыйык жерин сактабаган бийликтен баарын күтсө болот.
Кыргызстандын партиот күчтөрүнүн координациялык кеңешинин мүчөсү  М.Абылов

31-мартта өткөн жыйынындагы “КР Өкмөтүнүн инвестицияларды тартуу жана коргоо, ишкердикти өнүктүрүү, товарларды өндүрүү жана тышкы рынокко чыгаруу боюнча саясаты” темасындагы “өкмөттүк күндө” Өкмөттүн маалыматы угулду. Жыйынга премьер-министр Темир Сариев баштаган өкмөт мүчөлөрү, мамлекеттик органдар менен мекемелердин жетекчилери катышты.

Премьер-министр Темир Сариев бүгүнкү иш-чара чет өлкөлүк инвестици тартуу, ишкердикти өнүктүрүү, ишкерлердин укуктарын коргоо, товар өндүрүү жана аларды тышкы рынокко чыгаруу, ишкердик иш-аракетти жүзөгө ашыруудагы административдик тоскоолдуктарды жоюу, мамлекеттик органдардын жана алардын кызмат адамдарынын мыйзамдарды бузуу жоопкерчилигин жогорулатууга жолтоо болуп жаткан көйгөйлөрдү ачып берүү жаатында көмөкчү болорун белгиледи.

Өкмөт башы бүткүл дүйнөдөгү, анын ичинде ЕАЭБ өлкөлөрүндөгү экономикалык каатчылык өзгөчөлүктөрүн эске алынуу менен, экономикадагы абалды турукташтыруу жаатында чаралар көрүлүп жатканын билдирди. «Экономикалык каатчылык бизге да терс таасирин тийгизди. Ошого карабастан, бизде өткөн жылы бир аз болсо дагы өсүштү камсыз кылынды. Эӊ башкысы, экономикалык каатчылыктан пайда таап калуу аракетинен аз болсо дагы майнап чыгара алдык», – деди ал.

Премьер-министр 2015-жылы экономиканын номиналдуу өсүшү 103,5 пайызды түзгөнүн, ал эми 2016-жылдын өткөн эки айынын жыйынтыгында бюджеттин кирше бөлүгү толугу менен аткарылганын айтты. Ал ишкердик чөйрөгө жагымдуу шарттарды түзүү аракеттери жасалып жатканын, айыл чарба өнүмдөрүн кайра иштетүү өнөр жайына каралган жеӊилдиктер сакталып каларын, сатыктан алынчу салык түрү алынып салынганын, текшерүүлөрдүн саны кыскартылып жатканын билдирди.

Жыйын жүрүшүндө камсыздандыруу төлөмдөрүн чогултуу Социалдык фонддон Салык кызматына өткөрүлүп берилгени, инвесторлор үчүн 10 жылдык мөөнөткө турукташтыруу режими киргизилгени белгилүү болду. Андан сырткары, жакынкы аралыкта төмөнкүдөй иш-чаралар пландалууда: ишкерлерди санитардык-эпидемиологиялык текшерүү 1 күнгө чейин кыскартылат; курулуш обьекттерин инженердик түйүндөргө кошуу мөөнөтү кыскартылып, жолжоболор кыйла жөнөкөйлөштүрүлөт; насыяларды алууда мамлекеттик кепилдик фондун түзүлөт.

Талкуу учурунда Өкмөттүн экономикалык каатчылыктан чыгуу аракетин кубаттоо менен бирге, андан чыгуунун алгылыктуу жолдорун иштеп чыгуу, өнөр жайдын өнүгүшүнө өзгөчө көӊүл буруу, айыл чарабасын жеӊилдетилген насыя менен камсыз кылуу чараларын жакшыртуу, кызмат адамдарынын жоопкерчилигин күчөтүү сындуу бир катар алгылыктуу сунуштар берилди.

Жыйынтыгында депутаттар тарабынан берилген сунуштар эске алынуу менен, Жогорку Кеӊештин токтому кабыл алынды. КР Өкмөтүнө инвестици тартуу, ишкердикти өнүктүрүү, ишкерлердин укугун коргоо, аргандай тоскоолдуктарды жоюу, мамлекеттик органдардын жоопкерчилигин жогорулатуу жаатындагы иш-аракеттерди жандандыруу боюнча тапшырмалар берилди. Анын аткарылуу жүрүмүнө Экономикалык жана фискалдык саясат боюнча комитет көзөмөл кылат.