Menu

Ташкенттеги кыргыз элчилигинде жайгашкан № 9025 шайлоо участкасында добуш берүү башталды

«Кыргыз Республикасынын Конституциясы жөнүндө» Кыргыз Республикасынын Мыйзамынын долбоору боюнча Кыргыз Республикасынын референдумунун (жалпы элдик добуш берүүнүн) алкагында 2021-жылдын 11-апрелинде, жергиликтүү убакыт боюнча саат 08.00 дө Ташкент шаары, Ниёзбек юли көчөсү, 30 дареги боюнча Кыргыз Республикасынын Өзбекстан Республикасындагы Элчилигинин алдындагы № 9025 шайлоо участкасында добуш берүү башталды.

Шайлоо участкасы жергиликтүү убакыт боюнча саат 20.00гө чейин иштейт.

Кыргыз Республикасынын Ташкент шаарындагы шайлоо участкасынын шайлоочулар тизмесинде 2450 Кыргыз Республикасынын жараны бар.

Баткен облусунда бардык шайлоо участкалары ачылып, шайлоо өнөктүгү башталды

Кыргыз Республикасынын жергиликтүү кеңештеринин депутаттарын шайлоо жана референдум өнөктүгүн өткөрүү үчүн Баткен облусунда референдумга карата 218 шайлоо участкалары, ал эми  жергиликтүү кеңештердин депутаттарын шайлоосуна 201 шайлоо участкалары ачылып,  өз ишмердүүлүктөрүн башташты.Бул тууралу Өкмөттүн Баткен облусундагы ыйгарым укуктуу өкүлүнүн басма сөз кызматы билдирет.

Облус боюнча референдумга шайлоочулардын саны 300500, ал эми жергиликтүү кеңештердин депутаттарын шайлоосуна 279875 шайлоочу, добуш берүүчүлөрдүн тизмесин түзөт.

Облуста  27 айылдык, 6 шаардык кеңештерге шайлоолор өтүүдө.

Шаардык кеңештин депутаттыгына 166 мандатка  56 партия жана айылдык кеңештин депутаттыгына 577 мандатка 1633 талапкерлер  ат салышууда.

Эпидемиологиялык кырдаалга байланыштуу бардык шайлоо участкаларында санитардык талаптарга ылайык шарттар түзүлгөн.

Бул күнү коомдук коопсуздукту камсыздоого жалпысынан 882 ички иштер органдарынын кызматкерлери тартылган.

Роза Отунбаева 2010-жылдагы июнь окуяларынын күнөөкөрлөрү кайра иликтенсе Садыр Жапаров менен Камчыбек Ташиевге да каршы көп фактылар ачылып кетет деп коркутту

“2010-жылдагы июнь окуяларын кайра иликтөө боюнча Садыр Жапаров укук коргоо органдарына тапшырма бериптир. Албетте ал улут аралык окуялар чоң трагедия болгон. Тилекке каршы бул окуялар ар 10 же 20 жылдан кийин кайталанып жатат. Азыр деле биз ал жакта андай окуялардын алдын алып, тамырын кесип салдык деп айтканга ооз барбайт”, – деп билдирди 8-апрелде 2010-жылдагы Убактылуу өкмөттүн төрайымы Роза Отунбаева “Супер ТВ” каналына берген маегинде.

“Ош окуясына келгенде мен айтат элем: Ош милициясында канча өзбек иштейт? Күч структуралары көп нерсени чечип коюп жатпайбы. Мейли таможняда, мейли налоговыйда, мейли прокуратурада, ушундай чечүүчү органдарда 13% өзбектер иштеш керек да, анткени өзбектер Кыргызстандын калкынын 13%ын түзөт да. Анан булар “өзбектер армияга барбайт” дешет. Эми армияга барбаса да башка жактарына барыш керек да… Келечекте тынч жашайбыз, урушпайбыз десек, мына ушундай кадамдарды жасашыбыз керек да. Эми болсо Улуттар аралык мамиле боюнча агенттикти Маданият министрлигине кошуп салышыптыр. Ал агенттикте көп проекттер бар эле, алар токтоп калды. Ошон үчүн мен айтат элем: 2010-жылдагы окуялар боюнча кайра карашсын, көрсүн, бирок биздин да айта турган сөздөрүбүз бар. Көп сөздөрүбүз бар. Ошол сөздөрүбүз ачылып кетсе, анан кийин кандай болот экен, аны ким билет экен? Мен мисалы каалайт элем, аларга ушундай кеңеш берет элем, мейли Садыр Жапаров, мейли Камчыбек Ташиев болсун: ачпагыла ал “кара жащикти”! Мен ошону ойлойт элем, биздин Убактылуу өкмөт абдан чоң аракет жасап, аягында мен өзүм да калдым, ошол маселе менен, эл аралык коомчулуктун абдан зор салымы менен биз муну жапканбыз. Анткени бизди “кыргыздар геноцид жасады, аскерий кылмыштарды жасады” деп күнөөлөп баштаган болучу. Биз анын баары андай эмес деп айтып бердик. ООН да бул маселени карайт болчу, биз баарын ачык кылгандан кийин алар бизге ишеништи. Биз эл аралык комиссияны да киргиздик, ошондо биздин жакынкы партнёрлор “киргизбегиле!” деп жатышты. Биз киргиздик. Буга чейин СНГда эч ким киргизе элек эле. Биз ошол комиссияны киргизгенден кийин бул маселени жаптык да. Анан бүгүн кыргыздар кайсы жерибиз кычышып жатат? Кайсы жерибиз мындай тынчыбай жатат? Биз коомду консолидацияга алып келбейлиби. Биз ушунун үстүндө иштешибиз керек да. Мына, кыргыз жана башка улуттар, кыргыздын ичинде байлар жана кедейлер, шаардыктар менен айылдыктар, толуп жатат да мына ушундайлар… Биз эмнеге тынчыбайбыз? Ким кайсы өчүн алайын деп жатат? Кимдин кайсы кеги калыптыр? Ошондой кектер бар болсо, биздин да айта турган толо сөздөрүбүз бар. Толуп жаткан фактыларыбыз бар! Биз ошонун баарын ачып туруп, мына сага деп олтурсак, ошону менен биз баарыбыз өсөбүз, өнүгөбүзбү? Кимдин кайсы жери кычышып жатат? Бул деген саясый реваншизм, өч алмай да”, – деди Роза Отунбаева.

Тасмадан текстин жазган KyrgyzToday.kg

Фото - Кыргыз дипломаттары ишембилик өткөрүшүп, ийне жалбырактуу көчөттөрдү отургузушту

Бүгүн, 10-апрелде Кыргыз Республикасынын Тышкы иштер министрлигинин жетекчилиги, кызматкерлери жана Кыргыз Республикасынын дипломатиялык кызматынын ардагерлери Бишкек шаарын көрктөндүрүү, санитардык тазалоо жана жашылдандыруу боюнча жарыяланган жалпы шаардык үч айлыктын алкагында КР ТИМ Дипломатиялык академиясынын аймагында кезектеги ишембилик өткөрүштү.
Кыргыз Республикасынын тышкы иштер министри Р.Казакбаев КР дипломатиялык кызматынын ардагерлери менен биргеликте КР ТИМ Дипломатиялык академиясынын имаратынын аймагына ийне жалбырактуу көчөттөрдү отургузушту.

УКМК: Опузалап пара алуу боюнча Аламүдүн ИИБ тергөөчүсү кармалды

Кечээ, 9-апрелде Кыргыз Республикасынын УКМК Чүй облусунун укук коргоо системасындагы коррупцияны жоюу боюнча ыкчам-издөө иш-чараларынын алкагында, КР ИИМ ички иликтөө кызматы менен биргеликте, мурда алынган каражатты пара катарында кайтарып жаткан жеринен Аламүдүн РИИБдин тергөөчүсү милициянын ага лейтенанты «Д.Б» кармалды. Бул тууралуу УКМКнын басма сөз кызматы билдирди.

Такталгандай, тергөө органдары тарабынан Кыргыз Республикасынын жараны «М.у.Т»  аттуу адамга карата сотко чейинки иш козголгону туралуу “Д.Б” аттуу тергөөчү моралдык-психологиялык кысым көрсөтүү менен сотко чейинки өндүрүштү токтотуу үчүн тергөөчү «М.у.Т»  аттуу жарандан 2000 доллар алганы аныкталды. 

Андан кийин, опузалап талап кылуу фактылары ачыкталып кетишине жол бербөө үчүн, тергөө органдарынын өкүлдөрү аталган «М.у.Т» жаранга 1500 АКШ долларын кайтарып беришкен. Калган 500 АКШ доллар өлчөмүндөгү каражаттын калган бөлүгүн кайтарып берүү учурунда, милициянын ага лейтенанты «Д.Б.» кармалган.

Аталган материал КР Кылмыш-жаза кодексинин 326-беренесинин 1-бөлүмү (Опузалап пара алуу) фактысы боюнча кылмыштардын жана жоруктардын бирдиктүү реестрине катталды.

Кармалган адам КР УКМК тергөө камак жайынын убактылуу кармоочу жайына киргизилди.

Учурда тиешелүү ыкчам-тергөө иш-чаралар жүргүзүлүүдө.

УКМК: Абхазиядан келген унааларды мыйзамсыз каттоого шектелип Ноокен районундагы "Унаа" мекемесинин регионалдык секторунун башчысы кармалды

Кечээ, 9-апрелде КР УКМК тарабынан Кыргыз Республикасынын Кылмыш-жаза кодексинин 320-беренесинин 2-бөлүмү (Кызмат абалынан кыянаттык менен пайдалануу) боюнча кылмыштардын жана жоруктардын бирдиктүү реестрине катталган сотко чейинки өндүрүштүн алкагында, Абхазия Республикасынан алынып келинген бажы декларациясынан өтпөгөн, мыйзамсыз катталган кымбат баалуу автоунаалардын фактылары боюнча коррупциялык схеманын бети ачылып ага бөгөт коюлду. Бул тууралуу УКМКнын басма сөз кызматы билдирди.

Такталган боюнча, Россия Федерациясынын транзиттик каттоо документтеринин негизинде, Кыргыз Республикасынын техникалык паспорттору жана мамлекеттик номурлары берилген эки «Лексус GX» үлгүсүндөгү унаасы катталганы аныкталды. 

Натыйжада, мамлекетке бажы төлөмдөрүн төлөөдөн качуу менен 3 миллион сомдон ашык чыгым түрүндө зыян келтирилгендиги аныкталды.

Кызматтык абалынан кыянаттык менен пайдалануу фактылары боюнча, Кыргыз Республикасынын Юстиция министрлигинин алдындагы Мамлекеттик каттоо кызматынын “Унаа” мамлекеттик мекемесинин Жалал-Абад облусунун Ноокен районунун регионалдык сектор башчысы «О.М.А» кармалды.

Кыргыз Республикасынын УКМК тарабынан иштин бардык жагдайларын жана бул ишке тиешеси бар адамдарды аныктоого багытталган тиешелүү ыкчам-тергөө иш-чаралар жүргүзүлүүдө.

ИИМ: Милиция 5-апрелден баштап күчөтүлгөн тартипте кызматы өтөөнү улантууда

2021-жылдын 11-апрелинде Кыргыз Республикасынын жергиликтүү  кеңештердин депутаттарын шайлоо жана референдум өтөт. Ушуга байланыштуу, Кыргыз  Республикасынын Ички иштер министрлиги алдыда өтө турган окуянын маанилүүлүгүн эске алуу менен шайлоону өткөрүү жана даярдануу маалында коомдук тартипти жана коопсуздукту жогорку деңгээлде камсыздоого багытталган бир катар чараларды көрдү. Бул тууралуу ИИМдин басма сөз кызматы билдирет.

Ички иштер министрлиги жалпыга маалымдоо каражаттарында, интернет тармагында Кыргыз Республикасынын аймагында коомчулукту тынчсыздандырган жалган маалыматтарды аныктоо  үчүн күнү-түнү мониторинг жүргүзүүдө.  Коомдук тартипти жана коопсуздукту бузуу үчүн коркунучтарды алып келген жалган маалыматтарды тараткандарга жана коомдук тарнтипти бузгандарга карата тиешелүү чаралар көрүлөт.

Ушуга байланыштуу ички иштер министрлиги жарандарга кайрылып,  айрым адамдар тарабынан социалдык тармактарда тараткан чагымчыл маалыматтарга ишенбөөгө чакырат.

Ушундай фактылар боюнча ички иштер органдарына -102 кызматы аркылуу маалымдап коюңуздарды суранат.

Кыргыз Республикасынын Мыйзамын билбегендик жарандарды кылмыш жоопкерчилигинен бошотпойт.

Кара-Сууда 7 жаштагы кызды зордуктоого шектелип 26 жаштагы жигит кармалды

Кара-Суу районунда жети жаштагы кызды зордуктоого шектүү адам кармалды. Бул тууралуу Ош облусунун Ички иштер башкармалыгынын басма сөз кызматы билдирди.

Маалыматка ылайык, башкармалыктын нөөмөт бөлүмүнө кечээ, 9-апрель күнү саат 20:00 чамасында Кара-Суу районунун Кайрагач айылынын 7 жаштагы тургуну Н.А. талаа аркылуу үйүнө кайтып келе жатканда аны 16-17 жаштар чамасындагы азиат улутундагы жигит зордуктаганы тууралуу билдирүү түшкөн. Денесинен алган жаракаттарынан улам, өспүрүм кыз оор абалда Ош облустук төрөт үйүнө жеткирилген.

Аталган факт Жазык кодексинин 161-беренеси («Зордуктоо») менен Кылмыштардын жана жоруктардын бирдиктүү реестрине катталып, шектүүнү издөө иштери башталган.

Тинтүү учурунда ыкчам кызматкерлери тарабынан Кыргыз-Чек айылынын 26 жаштагы тургуну Н.уулу А. кармалып, шектүү күнөөсүн мойнуна алып, убактылуу кармоочу жайга киргизилген. Керектүү экспертизалар дайындалды. Ошондой эле жети жаштагы кызды таенеси багып жатканы белгилүү болду. Анын апасы Россияда иштеп жүрөт.

Ыкчам-издөө иш-чараларынын натыйжасында, кылмышка шектүү делип Кара-Суу районунун Мады айыл аймагынын Кыргыз-Чек айылынын 26 жаштагы тургуну Н.уулу А. ушул эле аймактын Садырбай айылында, туугандарынын үйүнөн кармалган. Ал жогоруда аталган өзгөчө оор кылмыш жасагандыгын толугу менен мойнуна алган. Ал убактылуу кармоочу жайга киргизилген.

ИИМ: Бишкек шаарынын тургуну жарым килограмм гашиш менен кармалды

Бишкек шаарынын тургуну жарым килограмм гашиш менен кармалды. Бул тууралуу бүгүн, 10-апрелде ИИМдин басма сөз кызматы билдирди.

Кыргыз Республикасынын Ички иштер министрлигинин Транспорттогу ички иштер башкармалыгынын баңгизаттарды мыйзамсыз жүгүртүүгө каршы күрөшүү кызматынын кызматкерлери ыкчам иш-аракеттерди жүргүзүү учурунда “Худой” лакап аты бар бангизатка көз каранды адам борбордогу темир жол мекемелеринде гашиш жана синтетикалык баңгизаттарын таркатып жаткандыгы тууралуу маалымат алышкан.

Аталган факт Кыргыз Республикасынын Жазык кодексинин 268 -беренесинин 1-бөлүгү (Баңгизат каражаттарын, психотроптук заттарды жана алардын аналогдорун сатып өткөрүү максатысыз мыйзамсыз даярдоо) менен кылмыштардын жана жоруктардын бирдиктүү реестрине катталган. 2021-жылдын 9-апрелинде ыкчам кызматкерлер тарабынан атайын иш-чаралар жүргүзүлүп, натыйжада шектүүнүн өздүгү аныкталган.  Ал   41 жаштагы Бишкек шаарынын тургуну П.К. болгон. Ыкчам-иликтөө иш-чаралары жүргүзүлүп жаткан учурда, ал адам “Бишкек-2” темир жол станциясынын имаратынын жанында болуп, милиция кызматкерлери менен сүйлөшүүдө өзүн шектүү алып жүргөн. Ушул себептен, анын жеке буюмдарын текшерүү чечими кабыл алынган, текшерүү учурунда андан баштыкка  оролгон жапайы кара куурайдай өзгөчө жыты бар кочкул жашыл түстөгү зат табылган. Көзөмөлдөөчү таразага тартуу учурунда, алынган заттын алдын ала салмагы 550 грамм экендиги аныкталды.

Андан кийин, ИИМдин Оперативдик-криминалисттик борбору тарабынан изилдөө жүргүзүлүп,  жогоруда көрсөтүлгөн баңгизат кара куурай чайыры (гашиш) экендиги аныкталды. Изилдөө учурунда таңгаксыз заттын массасы 530 граммды түзгөн.

Мындан тышкары, Кыргыз Республикасынын Саламаттыкты сактоо министрлигинин Республикалык наркологиялык борборунда жаран П.К.ны  тестирлөө учурунда экспертизанын корутундусуна ылайык, ал баңгизат чеккендиги аныкталган.

Кыргыз Респубикасынын Жазык-процессуалдык кодексинин 98, 99-беренелерине ылайык, кылмышка шектүү катары П.К.  ИИМдин темир жол станциясындагы Ички иштер башкармалыгынын убактылуу кармоочу жайына киргизилди.

Учурда кармалган жарандын күнөөсүн толугу менен ашкерелөөгө жана бул кылмыштын жасалышына тиешеси бар адамдарды аныктоого багытталган тергөө-ыкчам иш-чаралары улантылууда.

Баткен облусунда көчмө урна аркылуу добуш берүү жүрүүдө

Бүгүн 10-апрелде Баткен облусунда  ден соолугуна байланыштуу шайлоо участкасына бара албай турган 883 жаран, көчмө урна аркылуу добуш берүүдө. Бул тууралуу Өкмөттүн Баткен облусундагы ыйгарым укуктуу өкүлүнүн басма сөз кызматы билдирди.

Мүмкүнчүлүгү чектелген жарандар, буга чейин көчмө урна аркылуу добуш берүү үчүн, шайлоо участкасына арыз менен кайрылган. 

Облустагы бардык шайлоо участкалары  Кыргыз Республикасынын жергиликтүү кеңештеринин депутаттарын шайлоо жана референдум өткөрүүгө даяр. 

Баткен облусунда жалпысынан  референдумга карата 218 шайлоо участкалары, ал эми  жергиликтүү кеңештердин депутаттарын шайлоого 201 шайлоо участкалары даярдалды. 

Бүгүнкү күнгө карата жалпы  облус боюнча референдумга катышуучу   шайлоочулардын саны 300500, ал эми жергиликтүү кеңештердин депутаттарын шайлоосуна 279875 шайлоочу добуш берүүчүлөрдүн тизмесин түзөт. 

Эпидемиологиялык кырдаалга байланыштуу шайлоо участкаларында санитардык нормаларды сактоо үчүн коргонуучу жана  дезинфекциялоочу каражаттар менен камсыздалды. 

 

Шайлоо күндөрү коомдук коопсуздукту камсыздоого 882 ички иштер органдарынын кызматкерлери тартылды, анын ичинен 436 кызматкер шайлоо участкаларынын коопсуздугун камсыздайт.  

Кыргызстанда добуш берүүчү жайдан тышкары добуш берүү жүрүүдө

Бүгүн, 10-апрелде, Кыргызстанда добуш берүүчү жайдан тышкары добуш берүү жүрүүдө. Бул тууралуу КР БШК маалыматтык бөлүмү билдирди.

Кыргыз Республикасынын Шайлоо жана референдум өткөрүү боюнча борбордук комиссиясынын маалыматы боюнча 2021-жылдын 11-апрелиндеги жергиликтүү кеңештердин депутаттарын шайлоодо жана Кыргыз Республикасынын референдумунда добуш берүү үчүн жайдан тышкары жерде добуш берүү үчүн 19298 арыз түшкөн.

«Жергиликтүү кеңештердин депутаттарын шайлоо жөнүндө» Кыргыз Республикасынын Мыйзамына ылайык төмөнкү шайлоочулар добуш берүү үчүн жайдан тышкары добуш бере алышат:

  • шайлоочулардын тизмесине киргизилген, бирок ден соолугунун абалы же майыптыгы боюнча добуш берүү үчүн шайлоо участкасына келе албаган шайлоочулар;
  • добуш берүү күнү ооруканаларда, шектүүлөр жана айыпталуучулар кармалган жайларда камалып турган шайлоочулар;
  • алыскы жана жетүүгө кыйын райондордо жайгашкан жерлерде, мал чарбасынын алыскы участкаларында убактылуу жашаган шайлоочулар.

Ошондой эле өзгөчө учурларда тиешелүү аймактык шайлоо комиссиясынын чечим боюнча төмөнкү шайлоочулар өздөрүнүн жайгашкан жери боюнча добуш беришет:

  • калктуу конуштардан алыс обочолонгон жерлерде жайгашкан аскер бөлүктөрүндө шайлоо күнү кызмат өтөп жаткан аскер кызматчылары;
  • шайлоо күнү кызмат өтөп жаткан ички иштер органдарынын кызматкерлери;
  • тизмеси Борбордук шайлоо комиссиясы тарабынан бекитилген иштин үзгүлтүксүз цикли менен ишканаларда иштеген шайлоочулар;
  • вахта ыкмасы менен иштеген шайлоочулар;
  • өзүнүн жайгашкан жери боюнча убактылуу турган жери боюнча шайлоо участкасынын аймагында туруктуу жашаган, үй камагында турган референдумдун катышуучулары.

Участкалык шайлоо комиссиялары мындай шайлоочуларга добуш берүү үчүн жайдан тышкары добуш берүү күнүнө бир календардык күн калганда добуш берүү мүмкүндүгүн камсыз кылууга милдеттүү.

Добуш берүү үчүн жайдан тышкары жерде добуш берүү шайлоо күнүнө чейин бир календардык күн калганда саат 8ден 20.00гө чейинки мезгилде гана жана шайлоочунун добуш берүү үчүн жайдан тышкары жерде добуш берүү мүмкүнчүлүгүн түзүү жөнүндө жазуу жүзүндөгү кайрылуусунун негизинде гана жүргүзүлөт.

Бишкек ШИИББдин начальнигинин м.а. Азамат Ногойбаев өздүк курамга тааныштырылды

Бүгүн, 10-апрелде КР Ички иштер министринин орун басары милициянын полковниги Октябрь Урмамбетов Бишкек ШИИББдин өздүк курамына Бишкек ШИИББдин начальнигинин милдетин убактылуу аткаруучу милициянын полковниги Ногойбаев Азамат Болотбековичти тааныштырды. Бул тууралуу ИИМдин басма сөз кызматы билдирди.

Таныштырган соң, ИИМдин башчысынын орун басары Октябрь Урмамбетов Бишкек ШИИББдин, Биринчи Май, Свердлов, Октябрь, Ленин райондорунун ички иштер башкармалыгынын жетекчилигине коомдук коопсуздукту ккамсыздоо жана кылмыштуулук менен күрөшүү боюнча иштерди жогорку деңгээлде аткарууну талап кылды.

Октябрь Урмамбетов жаңы дайындалган жетекчилерге ийгиликтерди каалап, кызматтык милдеттерине  жоопкерчиликтүү мамиле кылууну тапшырды.

Ногойбаев Азамат Болотбекович – милициянын полковниги.  1980-жылы 12-июль күнү туулган. Кыргызстандын ИИМнин Академиясын  “юриспруденция” адистиги боюнча аяктаган.  Ички иштер органдарында 1997-жылдан баштап кызмат өтөөдө.

Ички иштер органдарындагы кызматын Бишкек шаарынын  Биринчи Май РИИБде кылмыш иликтөөнүн ыкчам ыйгарым укуктуу өкүлү  болуп баштаган. Кызмат учурунда ыкчам ыйгарым укуктуу өкүлү,   улук ыкчам ыйгарым укуктуу өкүлү,  өзгөчө маанилүү иштер боюнча улук ыкчам ыйгарым укуктуу өкүлү болуп иштеген.

Жетекчилик курамдагы кызматтарда иштеген: Бишкек шаарынын Ленин РИИБдин Кылмыш иликтөөнүн бөлүмүнүн начальнигинин орун басары, Чүй облусунун Жайыл РИИБдин начальнигинин орун басары, Кыргыз Республикасынын ИИМдин Уюшкан кылмыштуулук жана коррупция менен күрөшүү  башкы башкармалыгынын бөлүм начальниги, ИИМдин Уюшкан кылмыштуулук менен күрөшүү  башкы
башкармалыгынын начальнигинин орун басары, ИИМдин Экстремизмге жана мыйзамсыз миграцияга каршы аракеттенүү боюнча кызматынын  начальнигинин орун басары, Чүй облусунун Сокулук РИИБдин начальниги, ИИМдин КМКнын Үчүнчү башкармалыгынын бөлүм начальниги.

Кыргыз Республикасынын ИИОнун кызмат учурунда түзүмдүк медалдар менен сыйланган.

Алайда кар көчкү алдында калган 14 жаштагы баланын жансыз денеси табылды

Бүгүн, 10-апрелде Ош облусунун Алай районунда 2-апрель күнү Белекбаев айыл аймагындагы Терек айылында кар көчкүнүн алдында калган 2007-ж.т. Э. уулу Б. аттуу баланын жансыз денеси табылды. Бул тууралуу ӨКМдин басма сөз кызматы билдирди.
Бүгүн жерине издөө иш-чараларын улантылып, КР ӨКМнин Алай районунун бөлүм башчысы, жергиликтүү тургундардан 20 адам, “Ош-Пирим-Транс” ЖЧКдан 1 экскаватор тартылган.
Саат 09:20да баланын жансыз денеси кар көчкүнүн астынан табылып туугандарына өткөрүлүп берилди.

Кыргызстанда дагы 208 адамдан коронавирус жана пневмония табылып, 3 бейтап каза болду

Бүгүн, 10-апрелге карата өлкөдө коронавирус жана пневмония илдетинин жаңы 208 учуру аныкталды. Бул тууралуу коронавируска каршы күрөшүү боюнча республикалык штаб билдирди.

Жаңы учурлар: Бишкек шаарынан – 128, Ош шаарынан – 1, Чүй облусунан – 66, Ош облусунан – 2, Нарын облусунан – 2, Ысык-Көл облусунан – 8, Баткен облусунан – 1. Ошентип, өлкөдө жалпысынан 90 019 адам ооруга чалдыккан.

Өткөн сутка ичинде 105 адам оорудан айыгып ооруканадан чыгарылган. Алардын жалпы саны 85 824кө жетти.

Оорудан айыккандар: Бишкек шаарынан – 55, Ош шаарынан – 2, Чүй облусунан – 40, Нарын облусунан – 1, Ысык-Көл облусунан – 7.

Акыркы бир сутка ичинде коронавирустан каза болгондор: Бишкек шаарынан – 2, Чүй облусунан – 1. Илдеттен каза болгондордун жалпы саны 1519га жетти.

Таласка турист катары келген режиссер Чыңгыз Айтматов жана анын кичи мекени жөнүндө документалдык фильм тартат

Биздин жерибизге,  элибиздин меймандостугуна суктанбаган жан  жок. Чет өлкөдөн туристтер келген сайын улуттук  тамактарыбызга,  оюм-чийимдерибизге  өзгөчө  баа  беришет. Жакында  Россия  мамлекетинин   Санк-Петербург шаарынан  атайын  коноктор  келишкен.  Алардын  келген  максатын  кененирээк чагылдырып  берүүнү  туура  көрдүм.

Россия  мамлекетинен  келген конокторубуздун  негизги  максаты  залкар  жазуучу Чыңгыз  Айтматовдун  туулуп  өскөн  мекени,  Кыргыз  жери менен  таанышуу  болгон.  Талас  жергеси  менен  кенен-кесири  таанышкан  сон  режиссер Наталия  Фентисова  атайын  документалдуу  фильм тартууну  максат  кылган.  Алгач Талас  облусунун ыйгарым  укуктуу өкүлү Бакыт  Нарбековдун дайындоосу  боюнча  Талас  облусунун  социалдык  мониторинг  жана  өнүгүү   бөлүмүнүн  башкы  адиси Төлөгөн  Наралиев  конокторубузду Кара-Буура  районундагы  Шекер  айылынын “Күркүрөө”  маданият  үйүнүн  директору  Самат  Рыспаев  менен бирге залкар  жазуучу  Чыңгыз  Айтматовдун   мекени  менен  тааныштырганын айтты.  Конокторубузду  “Беш-Таш”  эс  алуу  паркында, “Кен-Кол” өрөөнүндө,  “Манас-Ордо”  улуттук  комплексинде,  Чыңгыз Айтматовдун  ачык  асман  музейинде, “Күркүрөө”  суусунда,  “Бетме-бет”  чыгармасындагы  Ысмайылдын  үнкүрүндө,  бир кылымдан  ашкан  Шекер айылынын  ак  үйүндө,  Эчкилүү  тоосунда  болушуп  жалпысынан  Шекер  айылында  тогуз  күндөй   конокто  жүрүштү.  Келген  конокторубуз аскасы  асман  тиреген  тоолорубузга,  шар  аккан   сууларыбызга суктанышып,  эсте каларлык  жазгы  эс  алуу  болгонун   айтышкан.  Наталия Фентисова менен  телефон  аркылуу  сүйлөшүп, кыргыз  жеринин  кооздугу  боюнча  сурагандыгыбызда  “Кыргыз жери   өзгөчө  жакты.  Өзүбүздүн  тамырыбыз  Ыссык-Көл  облусунун  Каракол шаарынан  болот. Атам   Ыссык-Көлдүк,  ал  жакта   эжелерим  бар,  беш-алты  жылда   бир  конокко  келип  турабыз.  Кыргызстандан,  Германиядан  билим  алдым.  Режиссердук  боюнча  окудум. Талас элине  биринчи келишим.  Бизди  мынчалык  жогорку  денгээлде  тосуп  алат  деп  ойлогон  эмеспиз. Боорсок,  бешбармак   жедик.  Эн кызыгы  кыргыздын  тоюна да,  катыштык. Унутулгус  өзгөчө  сезимдер  болду. Эми  менин   негизги   максатым   кино-фильм   тартуу  болгондуктан,  жакшы бир  фильм  тартсам  деген   кыялымды   ишке  ашырам.  Бул  документалдуу  кино  болот. Мына  ошол  кинону   Талас  жергесинен  тартабыз. Ошондо  дагы   Талас  жергесинин  ажайып  кооз  жерлерине,  Суусамыр  өрөөнүнө  барабыз   деген   аруу  тилегим  бар”,-деди  режиссер  Наталия Фентисова

 Жогоруда  айтып  өткөндөй, “ Күркүрөө” маданият   үйүнүн  директору   Самат  Рыспаев   конокторду  өз  үйүндө  коноктоп,   сый  көрсөтүп,  кыргыздын   каада-салты  боюнча   кийит-кече кийгизип    конокторду узатты.

Замира   Манасбекова, журналист.

Бишкек ШИИББнын жана Биринчи Май РИИБнын жетекчилик курамы дайындалды

Милициянын полковниги Азамат Ногойбаев Бишкек ШИИББнын начальнигинин кызматтык милдеттерин убактылуу аткарууга дайындалды. Бул тууралуу ИИМдин басма сөз кызматы билдирди.

Ал  буга  чейин Кыргыз Республикасынын ИИМдин Криминалдык милиция кызматынын Үчүнчү башкармалыгынын (Уюшкан кылмыштуулукка каршы күрөшүү боюнча башкармалыгы)  Жазаларды аткаруу мамлекеттик кызматы менен өз ара аракеттешүү бөлүмүнүн начальниги болуп иштеген.

Милициянын полковниги Т. Тюкебаев Бишкек ШИИББдин начальнигинин орун басарынын кызматтык милдеттерин убактылуу аткарууга дайындалды. Ал буга  чейин Ысык-Көл облусунун Жети-Өгүз РИИБдин начальниги болуп иштеп келген.

Милициянын полковниги К. Курманалиева, Бишкек ШИИББнын Тергөө кызматынын начальниги кызматына дайындалды. Ал буга чейин Бишкек ШИИББнын Тергөө кызматынын начальнигинин орун басары кызматында иштеп келген. Милициянын полковниги  М.Ниязалиев Бишкек шаарынын Биринчи Май РИИБнын начальниги кызматына дайындалды. Ал буга чейин ИИМдин Баңгизаттарды мыйзамсыз жүгүртүүгө каршы күрөшүү кызматынын  начальнигинин орун басары кызматында иштеп келген.

Милициянын подполковниги У.Орозалиев Бишкек ШИИББнын Криминалдык милиция кызматынын начальнигинин орун басары кызматынан бошотулуп, ошол эле шаардын Биринчи Май РИИБнын начальнигинин ыкчам иштери боюнча орун басары кызматына дайындалды.

Милициянын подполковниги Р. Бердибаев, Бишкек шаарынын Октябрь РИИБнын начальнигинин сотко чейинки өндүрүш  боюнча орун басары кызматынан бошотулуп, ошол эле шаардын Биринчи Май РИИБнын начальнигинин сотко чейинки өндүрүш боюнча орун басары кызматына дайындалды.

Милициянын полковниги Ж.Шералиев, Бишкек ШИИББнын коомдук коопсуздук кызматынын начальнигинин орун басары кызматынан бошотулуп, ошол эле шаардын Биринчи Май РИИБнын начальнигинин орун басары, ал эле коомдук коопсуздук кызматынын начальниги кызматына дайындалды.

Милициянын майору Б. Турапова Кыргыз Республикасынын ИИМдин Тергөө кызматынын өзгөчө маанилүү иштерди тергөө боюнча башкармалыгынын начальнигинин орун басары кызматынан бошотулуп, Бишкек шаарынын Октябрь РИИБнын начальнигинин сотко чейинки өндүрүш  боюнча орун басары кызматына дайындалды.

Бишкекте дайынсыз болуп жаткан 14 жаштагы Айбийке Мамбеталиева изделүүдө

Бишкек шаарында дайынсыз болуп жаткан 14 жаштагы Айбийке Мамбеталиева изделип жатат. Бул тууралуу Ленин райондук ички иштер башкармалыгынын басма сөз кызматы билдирет.

Маалым болгондой, 8-апрелде милицияга борбор калаанын тургуну Ж.А арыз менен кайрылып, дайынсыз болуп жаткан 2006-жылы 18-майда туулган кызы Мамбеталиева Айбийке Талантбековнаны табууга жардам сураган.

Апасынын айтымында, Айбийке 7-апрелде саат 10:30 чамасында Ак-Өргө жаңы конушунан үйдөн чыгып кеткен бойдон кайтып келген эмес. Ушул убакка чейин жоголгон кыздын дайыны белгисиз. Бул факт КЖБРге катталып, издөө иштери жүрүүдө.

Кыздын белгилери: бою болжол менен 145-150 см, денеси толмоч, чачы узун, көздөрү жашыл.

Кийген кийимдери: кара жазгы куртка, кара шым, кара бут кийим, жанында рюкзагы бар.

Дайынсыз болуп жаткан Айбийке Мамбеталиева тууралуу кандайдыр бир маалымат болсо төмөндөгү телефон номурларга  кабарлап коюуңуздарды суранабыз.

Байланыш тел.: 0312 35 26 05, 0312 44 44 57, 0312 35 26 32, 0553 10 28 80, 0703 40 16 00, 0707 30 47 53 жана 102.

Видео - Бишкектеги "Кудайберген" базарында 32 жаштагы адам бычакталып каза болду

Бишкек шаарындагы “Кудайберген” базарында жаран бычакталып каза болду. Бул тууралуу маркумдун туугандары журналисттерге кабарлады.

Маалыматка ылайык, 3-апрелде саат 15:39да А.Б. бычакталып, алган жаракатынан улам адам ошол жерден көз жумган.

А.Б. “Кудайберген” базарында иштечү. Окуя болгон күнү ага үч досу келген. Алардын ортосунда уруш чыккан. А.Б. аларды щетка менен урса, досу ага бычак шилтеген.

Милиция окуя болгон жерге дароо келген. Жанындагы 2 адам кармалып, алар күбө болушкандыктан бошотулган. А.Б.га бычак сайган жаран кармала элек.

Бишкек ШИИБнен кабарлашкандай, киши өлтүрүүгө шектүү А.Н. аттуу жаранды издөө иштери жүрүп жатат.

Факты Биринчи Май РИИБинде Кылмыштардын жана жоруктардын бирдиктүү реестрине 130-берене (адам өлтүрүү) менен катталып, иликтөө иштери башталган. Кылмыш орун алган жерди кароодо бычактын кыны алынып, видео көзөмөлгө түшүп калган видео далил катары алынган.

Маркум 32 жашта эле. Анын артында 6 жашар баласы жана кош бойлуу аялы калды.

Бишкекте Кыргызстандын дзюдо академиясы ачылды

Кечээ, 9-апрелде, Бишкек шаарында Кыргызстандын дзюдо академиясынын салтанаттуу ачылыш аземи өттү. Бул тууралуу Жаштар иштери, дене тарбия жана спорт агенттиги билдирет.
Иш-чарага Эл аралык дзюдо федерациясынын президенти Мариус Визер, Азия дзюдо союзунун президенти Обейд Аль Анзи, Кыргыз Республикасынын дзюдо федерациясынын президенти Жолдошбек Колбаев, Кыргыз Республикасынын Улуттук олимпиада комитетинин башкы катчысы Саламат Эргешов жана Спорттун олимпиадалык түрлөрү боюнча дирекциясынын директору Жоомарт Шамканов катышты.
Иш-чаранын сыйлуу коноктору Мариус Визер, Обейд Аль Анзи жана Жолдошбек Колбаев кызыл лентаны кесип, Кыргызстандагы биринчи дзюдо акамдемиясынын ачылыш урматына карагай отургузушту.
Саламат Эргешов Мариус Визерди Кыргыз Республикасынын Улуттук олимпиада комитетинин ордени менен сыйлады.
Мариус Визер Жолдошбек Колбаевге дзюдо боюнча Азия жана Океания чемпионатын бийик деңгээлде уюштуруп, өткөргөндүгү үчүн ыраазычылык билдирди жана академиянын ачылышы менен куттуктады. Ошондой эле Улуттук олимпиада комитетине көрсөтүлгөн сый үчүн ыраазычылык билдирди.
Обейд Аль Анзи өзүнүн куттуктоо сөзүндө Кыргызстанда дзюдо академиясынын ачылышы бүткүл Азия дзюдо союзу үчүн чоң сыймык жана кубанычтуу иш-чара болуп саналат деп белгиледи: «Бул академиядан дзюдо боюнча Азия жана Дүйнө чемпиондору чыгат деп ишенебиз. Мен ачылыш аземге өзүм катышып, кыргыз дзюдосунун тарыхындагы маанилүү окуянын катышуучусу болгонума кубанычтамын».
Ошондой эле иш-чаранын алкагында Мариус Визер мырза жана Обейд Аль Анзи мырза жаш дзюдочулар менен жолугушуп, аларга талыкпай машыгып, татаминин үстүндө да, жашоодо да ийгиликтерди багынтууну каалашты.
Белгилей кетсек, академия Кыргызстандын дзюдо федерациясы тарабынан курулду. Аянты 3700 метр квадратка барабар академияда 8 татами комплектиси орноштурулуп, улуттук курама команда жана дзюдо менен машыгууну каалагандар үчүн бардык шарттар түзүлгөн.

ИИМ: Айзаданын өлүмү боюнча Бишкек милициясынын начальниги Бакыт Матмусаев кызматынан алынды, 43 милиционер жазаланды

Кыргыз Республикасынын ИИМдин Ички иликтөө кызматы тарабынан жүргүзүлүп жаткан кызматтык иликтөөнүн жыйынтыгы менен милиция кызматкерлеринин жана алардын жетекчилеринин иш-аракетине баа берилип,  ага ылайык  кечээ  9-апреле ИИМдин буйругу жарык көрдү. Анда өзүнө жүктөлгөн кызматтык милдеттерди так аткарбагандыгынын натыйжасында, Кыргыз Республикасынын “Укук коргоо органдарында кызмат өтөө жөнүндө” Мыйзамынын, Кыргыз Республикасынын Өкмөтүнүн  укук коргоо органдарынын Тартиптик уставынын талаптарын, Кыргыз Республикасынын ИИОнун 2020-жылдын 12 айында аткарган ыкчам-кызматтык ишмердигинин жыйынтыгы менен өткөрүлгөн коллегиянын жана Аппараттык, ыкчам кеңешмелердин жыйынтыгы менен коюлган тапшырмалардын талаптары жана ИИМдин бир катар буйруктарынын талаптары одоно түрдө бузулган. Бул тууралуу ИИМдин Басма сөз кызматы билдирди.

Жогорудагылардын негизинде, Бишкек ШИИББнын начальниги милициянын полковниги Б. Матмусаев, Бишкек ШИИББнын начальнигинин коомдук коопсуздук боюнча орун басары милициянын полковниги Э. Атантаев, Бишкек ШИИББнын Тергөө кызматынын начальниги милициянын полковниги Н.Утемисов, Биринчи Май РИИБнын начальниги милициянын полковниги А.Казакеев, Биринчи Май РИИБнын начальнигинин ыкчам иштери боюнча орун басары милициянын полковниги И. Базаркулов, Биринчи Май РИИБнын начальнигинин сотко чейинки өндүрүш боюнча орун басары милициянын полковниги К. Суранчиев, Биринчи Май РИИБнын начальнигинин коомдук коопсуздук боюнча орун басары милициянын полковниги А. Озубеков, Биринчи Май РИИБнын КККнын нөөмөт бөлүгүнүн ыкчам нөөмөткери милициянын улук лейтенанты Б.Абдиллаев, Биринчи Май РИИБнын КККнын нөөмөт бөлүгүнүн ыкчам нөөмөткери милициянын майору Ж.Тукешов жана Биринчи Май РИИБнын тергөө кызматынын улук тергөөчүсү, милициянын капитаны У.Арыкбаев ээлеген кызматынан бошотулду.

Ал эми Бишкек ШИИББнын начальнигинин сотко чейинки өндүрүш боюнча орун басары милициянын полковниги М. Насировге, Бишкек ШИИББнын КККнын начальнигинин орун басары, ошол эле ыкчам чара көрүү борборунун начальниги милициянын полковниги М.Буларкиевге, Бишкек ШИИББнын КМКнын начальнигинин орун басары, ал эле бөлүм начальниги милициянын подполковниги У.Орозалиевге, ЖКККББнын Бишкек ШИИББы боюнча МККБнын полкунун  командиринин орун басары милициянын капитаны У.Саргашкаевке, Бишкек ШИИББнын КККнын нөөмөт бөлүгүнүн инспектор-нөөмөткери милициянын майору С.Байгазиновго, Бишкек ШИИББнын КККнын нөөмөт бөлүгүнүн ыкчам нөөмөткери милициянын капитаны М.Насирдиновго, Бишкек ШИИББнын КККнын нөөмөт бөлүгүнүн ыкчам нөөмөткери милициянын подполковниги М.Карабаевге, Бишкек ШИИББнын КККнын нөөмөт бөлүгүнүн инспектор нөөмөткери милициянын майору М.Турумтаевге, Биринчи Май РИИБнын Тергөө кызматынын начальниги милициянын капитаны Н.Тургуналиевге, Бишкек шаарынын Биринчи Май РИИБнын КМКнын начальниги милициянын подполковниги Э.Укубаевге, Биринчи Май РИИБнын КККнын начальнигинин орун басары, ал эле нөөмөт бөлүгүнүн начальниги  милициянын подполковниги Э.Тыналиевге, Биринчи Май РИИБнын Тергөө кызматынын начальнигинин орун басары милициянын майору Т.Абдукагаровага, Биринчи Май РИИБнын №5 ШМБнын КМКнын ыйгарым укукту оперкызматкери милициянын лейтенанты Н.Емиловго, Биринчи Май РИИБнын КМКнын улук ыйгарым укукту оперкызматкери милициянын майору М.Бейшеналиевге, Биринчи Май РИИБнын №5 ШМБнын КМКнын улук ыйгарым укукту оперкызматкери милициянын капитаны Б.Торгоевге, Биринчи Май РИИБнын КМКнын ыйгарым укуктуу оперкызматкери милициянын капитаны Т. Саткинбаевге, Биринчи Май РИИБнын КМКнын ыйгарым укукту оперкызматкери милициянын лейтенанты  Ч.Толомушовге, Биринчи Май РИИБнын №5 ШМБнын КМКнын ыйгарым укукту оперкызматкери милициянын лейтенанты  Таалайбек уулу Искендерге, Биринчи Май РИИБнын ТКнын тергөөчүсү милициянын улук лейтенанты  Сагынбек уулу Нурсултанга, Биринчи Май РИИБнын ТКнын тергөөчүсү милициянын капитаны А.Каримовго, Биринчи Май РИИБнын №5 ШМБнын начальниги милициянын майору  З. Эргешовго,  Биринчи Май РИИБнын ЖЖБнүн начальниги милициянын капитаны  Эдилбек уулу Бактиярга, Биринчи Май РИИБнын ЖӨИнын начальниги милициянын капитаны М.Адиловго “кызматка толук эмес ылайыктыгы жөнүндө эскертүү” тартиптик жазасы жарыяланды. Ошондой эле Бишкек ШИИББнын КМКнын начальниги милициянын полковниги У.Айтбаевге, Бишкек ШИИББнын СКБнын начальнигинин орун басары, милициянын подполковниги А. Исмаиловго,  Бишкек ШИИББнын КККнын нөөмөт бөлүгүнүн инспектор-нөөмөткери милициянын майору К.Малабаевге, Биринчи Май РИИБнын КККнын нөөмөт бөлүгүнүн ыкчам нөөмөткери милициянын подполковниги А.Тентиевге, “катуу сөгүш” тартиптик жазасы жарыяланды.

Чүй областы боюнча: Чүй ОИИББнын КККнын Нөөмөт Бөлүмүнүн ыкчам нөөмөткери милициянын капитаны Ч.Абыкеев,Чүй ОИИББнын КККнын нөөмөт бөлүмүнүн инспектор-нөөмөтчүсү милициянын подполковниги М.Уметалиевдер ээлеген кызматтарынан бошотулду.

Чүй ОИИББнын начальнигинин сотко чейинки өндүрүш иши боюнча начальниктин орун басары милициянын полковниги А. Савыралиевге, Чүй ОИИББнын КККнын начальнигинин орун басары, ал эле нөөмөт бөлүмдүн начальниги милициянын полковниги Т.Анарбаевге, Чүй ОИИББнын Экстремизмге жана мыйзамсыз миграцияга каршы аракеттенүү боюнча кызматынын бөлүмчөсүнүн начальниги милициянын майору М. Султаналиевге “кызматка толук эмес ылайыктыгы жөнүндө эскертүү” тартиптик жазасы жана Чүй ОИИББнын начальнигинин орун басары, ошол эле КККнын начальниги милициянын полковниги А.Ажыбаевге “катуу сөгүш” тартиптик жазасы жарыяланды.

Кызматтык иликтөөнүн жыйынтыгы менен жалпы жонунан 43 кызматкер тартип жазаларына кириптер болушту.

 

Министр Руслан Казакбаев ТүркПАнын байкоочулар миссиясы менен жолугушту

Кечээ, 9-апрелде Кыргыз Республикасынын Тышкы иштер министрлигинде Тышкы иштер министри Руслан Казакбаевдин менен Түркиянын Улуу Улуттук Жыйынынын депутаты Режеп Шекер жетектеген Түрк тилдүү өлкөлөрдүн Парламенттик ассамблеясынын (ТүркПА) Эл аралык байкоочулар миссиясы менен жолугушуусу болуп өттү. Бул тууралуу ТИМдин басма сөз кызматы билдирди.

Жолугушуунун жүрүшүндɵ ТИМ Башчысы Р.Казакбаев Кыргыз Республикасындагы референдумду даярдоого жана өткөрүүгө белгиленген кызыкчылык жана байкоого катышуу үчүн боордош түрк тилдүү мамлекеттеринен эл аралык байкоочуларга ыраазычылык билдирип өттү.

Учурдагы жолугушуудан пайдаланып, Министр Р.Казакбаев түрк парламентарийи Р.Шекерге 2021-жылдын 19-мартында Бишкек-Стамбул багыты боюнча учуп бара жаткан каттамда наристенин өмүрүн сактап калуу үчүн убагында көрсөтүлгөн алгачкы медициналык жардам менен ырасталган кесипкөйлүгү, кайраттуулугу жана гуманизми үчүн ыраазычылык билдирди. Кыргызстандагы социалдык тармактардын кыргыз сегментинде кеңири жайылган бул жаңылык жарыялангандан кийин, көптөгөн кыргыз жарандары Р.Шекердин кесипкөйлүгүн жогору баалашкандыгы белгиленди.

Ошол эле учурда, Тышкы иштер министри 2021-жылдын 11-апрелинде боло турган Кыргызстандагы маанилүү саясий окуялар жана өлкө жетекчилиги тарабынан таза жана акыйкат шайлоону камсыз кылуу боюнча көрүлүп жаткан аракеттер жөнүндө маалымдады. Эркиндикти сүйгөн кыргыз эли өнүгүүнүн демократиялык жолунан тайбай тургандыгы баса белгиленди.

Ошондой эле Р.Казакбаев 31 мамлекеттин жана 10 эл аралык уюмдардын өкүлдөрү болгон 183 эл аралык байкоочуну, ошондой эле 25 ММК өкүлдөрүн аккредитацилоо боюнча иш жүргүзүлгөндүгү тууралуу маалымдады.

Ушуну менен бирге, Министр Кыргыз Республикасынын Конституциясынын долбоорун даярдоо боюнча Кыргыз Республикасынын Жогорку Кеңешинде, ММКнда жана коомчулукта ачык жана кеңири талкууга коюлган Конституциялык кеңешменин иши жөнүндө маалымат берди. Бул алкакта, Р.Казакбаев ТүркПАнын Миссиясына 15 “макул” жана “каршы” үгүт топтору жөнүндө маалымат берди.

Мындан тышкары, Р.Казакбаев маектештердин Кыргыз Республикасы Венеция комиссиясына жана башка эл аралык эксперттерге Кыргызстандын Конституциясынын долбоору боюнча ачык конструктивдүү талкууларды өткөрүүнү сунуш кылгандыгына көңүлүн бурду.

Өз кезегинде, Миссиянын башчысы Режеп Шекер Кыргызстан элинин келечеги үчүн маанилүү кадамдарды жасап жаткандыгын белгилеп, шайлоону жана референдумду ийгиликтүү өткөрүүнү каалады. Шайлоо процессинин натыйжалары Кыргызстандын мындан аркы өнүгүүсүнө жана гүлдөп-өнүгүшүнө өбөлгө болот деп үмүттөндү.

ТүркПАнын эл аралык байкоочулары шайлоого жана референдумга даярдыктын жогорку деңгээлин, анын ичинде Кыргыз Республикасынын жарандарынын шайлоо укуктарын ишке ашырууда заманбап технологияларды колдонууда жетишкендиктерди белгилешти.

Маалымат үчүн: Түрк тилдүү өлкөлөрдүн Парламенттик ассамблеясы (ТүркПА) – Азербайжан, Казакстан, Кыргызстан жана Түркия парламентарийлерин бириктирген эл аралык уюм. ТүркПАнын негизги милдети – тарыхый, маданий жана тил биримдигинин негизинде мүчө-өлкөлөрдүн ортосундагы парламенттер аралык диалогду өнүктүрүүгө көмөк көрсөтүү.

Адылбек Адранов "Кыргыз темир жолу" ишканасынын жетекчиси болуп дайындалды

Транспорт, архитектура, курулуш жана коммуникациялар министрлигинин алдындагы “Кыргыз темир жолу” Улуттук компания” мамлекеттик ишканасынын башкы директору болуп Адранов Адылбек Укунович дайындалды. Бул тууралуу аталган ишкананын басма сөз кызматынан кабарлашты.

Алардын айтымында, тиешелүү буйрукка кечээ, 8-апрелде премьер-министр Улукбек Марипов кол койду.

59 жаштагы Адылбек Адранов “Кыргыз Темир Жолунда” эмгек жолун 2010-жылы баштаган. Дайындалганга чейин ал жүктөө жана түшүрүү иштерин камсыз кылуу боюнча филиалынын башчысы болгон.

Белгилей кетсек, буга чейин “Кыргыз темир жолу” ишканасын Василий Дашков жетектеп келген.

Камчыбек Ташиев: "Чек ара маселеси боюнча бардык чечимдер мамлекет кызыкчылыгы үчүн кабыл алынууда жана кабыл алынмакчы"

Кыргыз Республикасынын мамлекеттик чек арасын делимитациялоо жана демаркациялоо боюнча өкмөттүк делегациянын башчысы – Кыргыз Республикасынын Улуттук коопсуздук мамлекеттик комитетинин төрагасы Камчыбек Ташиев чек ара маселеси боюнча өкмөттүк комиссиянын кеңешмесин өткөрдү. Күн тартибине ылайык, кыргыз-өзбек мамлекеттик чек арасын делимитациялоо жана демаркациялоо боюнча өкмөттүк делегациялардын жыйынтыгы боюнча үстүбүздөгү жылдын 25-мартында Ташкент шаарында кол коюлган Протокол талкууга алынды. Бул тууралуу өкмөттүн аппаратынын басма сөз кызматы билдирет.

Камчыбек Ташиев белгилегендей, Протоколдо көрсөтүлгөн бардык чечимдер эки өлкөнүн мамлекеттик кызыкчылыктарын эске алуу менен чечилген.

«Бардык чечимдер мамлекеттин, чектеш аймактарда жашаган жарандардын кызыкчылыгы үчүн кабыл алынууда жана мындан ары карай да кабыл алынмакчы. Протоколдун ар бир пункту талашка түшүп, көптөгөн күч-аракеттер аркылуу гана мамлекеттик жерибиздин ар бир метрин жактадык. Учурда эл арасында толук маалыматка ээ болбостон, талдоого албастан мени сынга алгандар болууда. Мен, өкмөттүк делегациянын башчысы катары, өзүмө чоң жоопкерчиликти алдым жана убакыт бардыгын өз ордуна коюп, кезинде бул тарыхый чечим болгондугун айтышат», – деди Камчыбек Ташиев.

Ошондой эле ал кошумчалагандай, мамлекеттик жана жергиликтүү бийлик органдары аталган протокол боюнча маалыматтык-түшүндүрүү кампаниясын күчтөндүрүүсү зарыл.

«Жер-жерлердеги жарандарга так маалымат жетпей жатат. Мен бардык региондорду кыдырып чыктым, бирок бул жетишсиз, ар бир адам менен жолугушуп, жеткиликтүү тил менен протоколдун ар бир пунктун түшүндүрүү керек. Маалымат калкка толук жеткирилгенде гана кабыл алынган чечимдердин акыйкаттыгына шек жаралбайт», – деп билдирди өкмөттүк делегациянын башчысы.

Камчыбек Ташиев белгилегендей, кайсы тилкелер такталгандыгын картадан көрсөтүү керек.

Камчыбек Ташиев кол коюлган Протоколду келечекте ишке ашырууга тартылган мамлекеттик органдардын аткаруучулук тартибин баса белгиледи.

«Бардык тапшырмалар сапаттуу жана өз мөөнөтүндө аткарылышы тийиш. Биринчи кадам жасалды, бирок алдыда чоң жоопкерчиликтүү иштер турат. Мамлекеттик жана жергиликтүү бийлик органдары бул маселени өзгөчө көзөмөлүнө алсын. Чек ара маселеси артыкчылыктуу каралышы кажет», – деп жыйынтыктады Камчыбек Ташиев.

Мамлекеттик жана жергиликтүү бийлик органдарына Протоколдун мындан аркы ишке ашырылышы боюнча, мамлекеттик чек аранын өтүүсүнүн долбоордук линиясын белгилөө боюнча талаа иштерин өткөрүүнү тездетүү тапшырмасы берилди.

УКМК: Баткенде 3 тоннадан ашык лимон контрабандасы кармалды

КР УКМК контрабандага каршы күрөшүү боюнча жүргүзүлгөн иш-чаралардын алкагында, мамлекеттик чек аранын чек ара бөлүктөрүндө контрабанда иш-аракеттеринин алдын алууга жана бөгөт коюуга багытталган тиешелүү ыкчам-издөө иш-чаралары жүргүзүлүп жатат. Бул тууралуу УКМКнын басма сөз кызматы билдирет.

2021-жылдын 8-апрелинде КР УКМК чек ара кызматынын жардамы менен Баткен районунун Ак-Татыр айылында контрабандалык жүктөрдү мыйзамсыз ташуу менен алектенген Ж.Ш.А. аттуу жарандын көзөмөлүндө Mercedes-Benz Sprinter унаасы кармалды.

Такталгандай, жалпы көлөмү 3 тоннадан ашык болгон лимон түрүндөгү контрабандалык продуктулар мамлекеттик чек ара аркылуу
коштомо документтерсиз өткөрүлгөн.

Учурда Баткен бажы органдары жүктүн чыккан өлкөсүн аныктоо, ошондой эле төлөнө турган бажы алымдарын белгилөө боюнча тиешелүү иштерди жүргүзүп жатышат.

Президент Садыр Жапаров Эл аралык дзюдо федерациясынын башчысы Мариус Визер менен жолугушту

Кыргыз Республикасынын Президенти Садыр Жапаров бүгүн, 9-апрелде, Эл аралык дзюдо федерациясынын президенти Мариус Визер жана уюмдун Вице-президенти Обейд Аль Анзини менен жолугушту. Бул тууралуу президенттин аппаратынын басма сөз кызматы билдирет.

Кыргызстан менен Эл аралык дзюдо федерациясынын кызматташуусун активдештирүү, ата мекендик спортту өнүктүрүү пландары жана багыттары талкууланды.

Мамлекет башчысы Федерациянын жетекчилиги ишеним көрсөткөндүгү үчүн ыраазычылык билдирди. Анын натыйжасында Кыргызстанда биринчи жолу эркектер жана аялдар арасында дзюдо боюнча Азия жана Океания чемпионаты болуп өттү.

Садыр Жапаров чемпионат бийик деңгээлде уюштурулуп, жогорку деңгээлде өткөрүлгөнүнө баа берип, ага өзү да кунт коюу менен көз салганын баса белгиледи.

Президент бул кадыр-барктуу спорттук иш-чара өлкөдө артыкчылык берилген жана өнүгүп келе жаткан спорт түрү болгон кыргыз дзюдосу үчүн маанилүү окуя деп атады.

Эл аралык дзюдо федерациясынын президенти Мариус Визер Кыргызстанды дзюдо боюнча Азия жана Океания чемпионатында алган биринчи алтын медалы менен куттуктап, бул жаш муундардын спортко кызыгуусуна түрткү болот деген тилегин билдирди.

Ал өлкөдө дзюдону жайылтуу жана өнүктүрүү боюнча кыргыз тараптын пландарын канааттануу менен белгилеп, Федерация Кыргызстанды бул багытта мындан ары да колдой берерин кошумчалады. Ал республикада дзюдо менен машыгуу шарттарын жакшыртуу үчүн материалдык-техникалык базаны өркүндөтүү боюнча биргелешкен кызматташуу мүмкүнчүлүктөрүн карап чыгууну сунуштады.

Мариус Визердин Эл аралык дзюдо федерациясы планетанын 5 континентинде 204 федерацияны ичине камтыйт жана жыл сайын 30га чейин ири спорттук мелдештерди өткөрүп турат.

Ал мындан ары да жигердүү кызматташууга даярдыгын билдирип, Садыр Жапаровду үстүбүздөгү жылдын июнь айына Будапешт шаарында пландалган дзюдо боюнча Дүйнө чемпионатына келип кетүүгө чакырды.

Президент Садыр Жапаров Эл аралык дзюдо федерациясы менен кызматташуу ийгиликтүү болуп жатканын белгилеп, келечекте өз ара аракеттенүү мындан дагы кеңейе тургандыгына ишенимин билдирди.

Белгилей кетсек, 2021-жылдын 6-апрелинен 9-апрелине чейин Бишкекте дзюдо боюнча аялдар жана эркектер арасында Азия жана Океания чемпионаты болуп, ага 29 мамлекеттин өкүлдөрү катышкан.

Улуу Британиянын ханышасы Елизавета IIнин күйөөсү принц Филипп 100 жашында дүйнө салды

Бүгүн, 9-апрелде Улуу Британиянын ханышасы Елизавета IIнин күйөөсү, Эдинбург герцогу Филипп 100 жашында дүйнө салды. Бул тууралуу чет өлкөлүк ММКлар Букингем сарайына шилтеме берип жазып чыкты.

 “Улуу даражалуу ханыша сүйүктүү күйөөсү, Эдинбург герцогу, принц Филипптин дүйнө салганын билдирди”, – деп айтылат билдирүүдө.

 

Принц Филипп 1921-жылдын 10-июнунда төрөлгөн.

Белгилей кетсек, герцог менен ханыша 1946-жылы баш кошушкан. Алар бирге 74 жыл өмүр сүрүштү.

Билим берүү жана илим министри Алмазбек Бейшеналиев иш сапары менен Таласка барды

Билим берүү жана илим министри Алмазбек Бейшеналиев Таластагы бир күндүк иш сапарын Кара-Буура районунан баштап, оболу окуу корпустарынын бири өрттөнүп кеткен Ак-Жар айылындагы А. Калыбаев атындагы мектепке барды. Министр мектептин педагогикалык жамааты менен пикир алышып, окуучулардын сабактарына катышты. Бул тууралуу ББжИМ басма сөз кызматы билдирди.

Коштошуп жатып, министр бул мектепке 7 комплект компьютер тапшырып, жаңы окуу корпусунун курулушун республикалык бюджеттен каржылана турган объекттердин жылдык титулдук баракчасына киргиздирерин убада кылды. 

Андан чыгып, ошол эле райондогу “Ак Шоокум” бала бакчасына кайрылып, бала бакчага 1 комплект компьютер тапшырды. 

Министр окуу корпусунун курулушу 70 пайызга аяктап, бирок каржылоо маселесине байланыштуу токтоп калган чек арага чукул жайгашкан Кайнар орто мектебине барды. Курулушу бүтпөй жаткан мектептин маселелерин чечүү жолдорун талкуулап, тиешелүү адистерге курулуш иштерин эртелетүү тапшырмасын берди. 

А. Бейшеналиев Кара-Буура районунун Шекер айылындагы Т. Айтматов атындагы мектепке да барып, мугалимдер жана окуучулар менен жолугуп баарлашты.

Министрдин андан аркы сапары Талас шаарында уланды. Мамлекеттик социалдык буйрутма боюнча алгач кыска мөөнөттүү (3 сааттык) болуп ачылып, кийин ата-энелердин суранычы менен кадимки бала бакчалардай иштеп калган Талас шаарындагы №16 бала бакча менен таанышып чыккан министр азыркы убакта кыска мөөнөттүү бала бакчалар керек экендигин баса белгилеп, бул багыттагы иштерди күчөтүү зарыл деп кошумчалады.

Бир күндүк иш сапарынын алкагында министр шаардагы Э. Айылчиев атындагы мектептин да астанасын аттады. Бул мектептин муктаждыгынан кабардар министр анын жетекчилигине 8 комплект компьютер тапшырды. 

Иш сапарынын соңунда министр №90 кесиптик лицейге жана Талас мамлекеттик университетине барып, студенттер менен жолугушту. Жолугушуу маалында жаштарды креативдүү ойлонууга, билимди талыкпастан алууга, келечекке чоң максаттарды коюуга, адамдардын укугун сыйлоого чакырды. 

Баткен облусунун башчысы менен БУУнун өкүлү Айзаданын окуясын коомдун трагедиясы деп баалашты 

Бүгүн, 9-апрелде Өкмөттүн Баткен облусундагы ыйгарым укуктуу өкүлү Омурбек Суваналиев, БУУнун аялдар түзүмүнүн Кыргызстандагы өкүлү Улзийсурен Жамсран менен жолугуп,  7-апрелде ала качуунун курмандыгы болгон Айзада Канатбекованын окуясын талкуулашты. Бул тууралуу  КР Өкмөтүнүн Баткен облусундагы ыйгарым укуктуу өкүлүнүн басма сөз кызматы билдирди.

Кыз ала качуу бул салт эмес – ал кылмыш, зомбулук деген пикирин айткан Омурбек Суваналиев, адам уурдоо менен мажбурлап никеге туруу деген бул жапаайычылык. Мындай зордук зомбулукка чыдабаган кыздарыбыздын окуясы, өлүм менен аяктаганы аябай өкүнүчтүү. Мындай каргашалуу окуялардын кайталанышына жол бербөө боюнча биз алдыда  чукул кадамдарга барышыбыз учур талабы. Ошондуктан биз укук коргоо, жергиликтүү бийлик органдары эл арасында түшүндүрүү иштерин жүргүзүүнү колго алып жатабыз деди. 

Улзийсурен Жамсран айым болсо өз сөзүндө БУУнун аялдар түзүмү, Айзада Канатбекованын жана Бурулай Турдалы кызынын каргашалуу окуясына байланыштуу, Кыргыз Өкмөтүнүн жана коомчулугунун аялдарга карата зордук зомбулукту жоюу аракетин толугу менен колдоого даяр экендигин билдирди.  

Тараптар жолугушууда аялдардын коомдогу орду, алардын укуктары жана мүмкүнчүлүктөрүнүн абалы боюнча пикир алышып, аймактын ар тараптуу өнүгүүсүндө гендердик теңчиликти камсыздоо, светтик өлкө катары, аялдардын активдүү жашоо образын калыптандыруу боюнча демилгелерди ишке ашыруу багыттарын талкуулашты. 

Жергиликтүү кеңештин депутаттарын шайлоо жана референдум маселеси боюнча жарандар call-борборго кайрыла алат

Кыргыз Республикасынын Өкмөтүндө 10-11-апрелде жергиликтүү кеңештин депутаттарын шайлоо жана референдум өткөрүү маселеси боюнча call-борбор иш алып барат. Бул тууралуу өкмөттүн аппаратынын басма сөз кызматы билдирди.

Кыргыз Республикасынын жергиликтүү кеңешинин депутаттарын шайлоо жана референдум өткөрүү боюнча шайлоо комиссияларына уюштуруу-техникалык маселелерди чечүүгө көмөк көрсөтүү боюнча республикалык штабдын call-борбору эки күн, 10 жана 11-апрелде  эртең мененки саат 07:30 дан тартып  иш алып барат.

Белгилей кетсек, Республикалык штабдын милдеттеринин бирине шайлоо комиссияларына уюштуруу-техникалык маселелерди чечүүгө көмөк көрсөтүү, ошондой эле шайлоочуларга санитардык-эпидемиологиялык талаптарды сактоо маселесин түшүндүрүү, шайлоочулардын тизмесин тактоо жана башка маселелер кирет.

Необходимо отметить, что одной из основных задач Республиканского штаба является оказание содействия избирательным комиссиям в решении организационных вопросов и материально-техническом обеспечении проведения, а также разъяснение вопросов соблюдения избирателями санитарно-эпидемиологических норм, уточнения списков избирателей и другие вопросы.

Сall-борбордун иштөө учурунда ар бир шайлоочу «түз байланышка» чыгып, электр энергиясынын, интернеттин жоктугун, шайлоо комиссияларынын мүчөлөрү жана байкоочулар тарабынан санитардык нормаларга ылайык эрежелердин сакталбай жаткандыгы тууралуу жана башка маселелер боюнча кайрыла алышат.

«Түз байланыш» телефондору:

(0312) 66-28-46, 66-40-13 (факс), 96-03-38, 96-02-87

Эскерте кетсек көрсөтүлгөн номурларга телефон чалуулар «Кыргызтелеком» ААК Бишкек шаардык телефон тармагынын стационардык телефондорунан – акысыз түрдө, ал эми аймактардан жана уюлдук байланыш операторлорунан бекитилген тарифтерге ылайык саналат.

УКМК: Жалал-Абад шаардык кеңешинин депутаттыгына талапкердин биринин добуштарды сатып алуу фактысы аныкталды

Жалал-Абад шаардык кеңешинин депутаттыгына талапкердин биринин добуштарды сатып алуу фактысы аныкталды. Бул тууралуу бүгүн, 9-апрелде УКМКнын басма сөз кызматы билдирди.

2021-жылдын 22-мартында КР УКМК Жалал-Абад областтык башкармалыгына Жалал-Абад шаардык кеңешине ат салышып жаткан партиялардын биринин агитаторлору тарабынан шайлоочуларга пара берүү фактылары жөнүндө маалымат келип түшкөн.  

Тергөө иштеринин жүрүшүндө, Жалал-Абад шаарынын тургундары М.З.А., И.М.Т. жана К.Г.К. аркылуу тамак-аш азыктарын таркатуу жолу менен шайлоочуларга пара берүүнү уюштурууга  Жалал-Абад шаардык кеңешинин депутаттыгына талапкер К.С.А. аттуу жарандын катыштыгы бар экендиги жөнүндө маалыматтар тастыкталган.

2021-жылдын 26-мартында аталган факт КР Кылмыш-жаза кодексинин 192-беренесинин 1-бөлүмү (Шайлоочулардын добуштарын сатып алуу) кылмыш белгилери боюнча кылмыштардын жана жоруктардын бирдиктүү реестрине катталган.

2021-жылдын 8-апрелинде КР УКМК өткөрүлгөн жыйындын жыйынтыгында партияга расмий түрдө эскертүү берүү чечилип, Жалал-Абад шаардык шайлоо комиссиясына билдирилген.

Тергөө жүрүп жатат.

Кыргызстандан Японияга органикалык жана экологиялык таза продукция экспорттоо талкууланды

6-апрелде Кыргыз Республикасынын Япониядагы Атайын жана Ыйгарым укуктуу Элчиси Мирлан Арстанбаевдин Тамак-аш медицинасын изилдөө илимий институтунун жетекчиси Канаме Хираянаги жана «DM solutions», «Japan Style» компанияларынын өкүлдөрү менен жолугушуусу болуп өттү. Бул тууралуу ТИМдин басма сөз кызматы билдирди.

Жолугушуунун катышуучулары Кыргыз Республикасынан Японияга органикалык жана экологиялык таза продукцияны экспорттоону талкуулашты. «DM Solutions» компаниясынын өкүлдөрү Кыргызстандан алынып келинген товарлардын жана продукциялардын аталыштарын кеңейтүүгө кызыкдар экендигин билдиришти.

«Japan Style» компаниясы 2020-жылдын аягынан бүгүнкү күнгө чейин Японияга 10 тоннага жакын кыргыз балын импорттоп келген жана өнөктөштөрү менен биргеликте 2021-жылдын ичинде экспорттун көлөмүн 50 тоннага жеткирүүнү пландаштырууда.

Азыркы учурда кыргыз балы Япониянын бир катар супермаркеттеринде жана электрондук соода аянтчаларында сатылууда.

Элчи М.Арстанбаев Япониянын компанияларына эки өлкөнүн ортосундагы соода мамилелерин өнүктүрүүгө жигердүү көмөктөшкөндүгү үчүн, ошондой эле Канаме Хираянагиге илимий макалаларды жарыялоо жана телекөрсөтүүлөр аркылуу Японияда кыргыз балын жайылтуудагы колдоосу үчүн ыраазычылык билдирди.

Улукбек Марипов: "Жергиликтүү кеңешке депутаттарды шайлоо жана референдумдун жогорку деңгээлде өткөрүлүшүн камсыздоо зарыл"

Кыргыз Республикасынын Премьер-министри Улукбек Марипов жергиликтүү кеңештерге депутаттарды шайлоого жана референдумга даярдык көрүү жана аны өткөрүүдө уюштуруу-техникалык маселелерин чечүүдө шайлоо комиссияларына көмөк көрсөтүү боюнча Республикалык штабдын кезектеги кеңешмесин өткөрдү.  Бул тууралуу өкмөттүн аппаратынын басма сөз кызматы билдирди.

«Тийиштүү мамлекеттик органдар, жергиликтүү бийлик органдары Кыргыз Республикасынын шайлоо жана референдум өткөрүү боюнча борбордук комиссиясы менен биргеликте 11-апрелдеги шайлоо процессинин жогорку деңгээлде уюштурулушун жана өткөрүлүшүн камсыздоосу керек. Шайлоо ачык-айкын өтүшү керек. Мурда кетирилген кемчиликтер кайталанбашы тийиш. Ушул күнү коомдук коопсуздук камсыздалып, шайлоо участокторунда электр жарыгы жана интернет өчүрүлбөшү керек. Эпидемиологиялык абалды эске алуу менен санитардык-эпидемиологиялык коопсуздукту камсыздоо, орнотулган эрежелерди жана ченемдерди сактоо боюнча ишти күчтөндүрүүнү өтүнөм. Тийиштүү мамлекеттик органдар мыйзам бузуу фактылары боюнча ыкчам жооп кайтарып, тийиштүү чараларды кабыл алуусу зарыл. Жарандардын добуш берүсү үчүн бардык шарттар түзүлүшү тийиш», – деди Улукбек Марипов жана мамлекеттик жана жергиликтүү бийлик органдарына бир катар тапшырмаларды берди.

Өкмөт башчы баса белгилегендей, мамлекеттик жана муниципалдык органдардын өкүлдөрү шайлоо процессине кийлигишпеши керек, административдик ресурсту пайдаланууга жол берилбеши тийиш.

Премьер-министр Улукбек Марипов мекендештерди 11-апрелде жарандык активдүүлүктү көрсөтүп, аң-сезимдүү тандоо кылууга чакырды.

Элчи Оруджев президент Садыр Жапаровду Азербайжанга келип кетүүгө чакырды

Кыргыз Республикасынын Президенти Садыр Жапаров бүгүн, 9-апрелде, Азербайжан Республикасынын Кыргызстандагы атайын жана толук ыйгарым укуктуу элчиси Гидаят Оруджевди кабыл алды. Бул тууралуу президенттин аппаратынын басма сөз кызматы билдирет.

Эки өлкө ортосундагы саясий-дипломатиялык, соода-экономикалык, социалдык-гуманитардык  жана башка чөйрөлөрдө кызматташуу маселелери боюнча пикир алмашуу болду.

Мамлекет башчысы Кыргызстан Азербайжан менен салттуу достук байланыштарды мындан ары өнүктүрүүгө чоң маани берерин белгиледи.

Садыр Жапаров саясий диалогду жогорку деңгээлде колдоонун маанилүүлүгүнө токтолуп, кыргыз тарап Азербайжан Президенти Ильхам Алиевдин расмий сапар менен келерин күтүп жаткандыгын айтты.

Ал Кыргызстан менен Азербайжандын ортосундагы мамилелерди мындан ары өнүктүрүүнүн негизги багыттарынын бири катары олуттуу, бирок ишке аша элек потенциалга ээ экономикалык кызматташтыкты диверсификациялоону атады.

Кырдаалды оңдоп кетүү үчүн Мамлекет башчысы 2021-жылы Өкмөттөр аралык комиссиянын жыйынын өткөрүү, бизнес коомчулуктун өкүлдөрүнүн иш сапарларын уюштуруу, ошондой эле өз ара пайдалуу экономикалык долбоорлорду ишке ашыруу жолу менен эки өлкө ортосундагы соода- экономикалык кызматташтыкты активдештирүүнү сунуш кылды.

Ошону менен бирге Садыр Жапаров азербайжан тарапка эки долбоорду — Бишкек шаарындагы Кыргызстан-Азербайжан достук паркынын жана Гейдар Алиев атындагы жалпы билим берүүчү мектептин курулушун ишке ашырууга каржылык жардам көрсөткөндүгү үчүн ыраазычылык билдирди. Азербайжан башчысынын Кыргызстанга боло турган алдыдагы иш сапарына карата аталган курулуштар аяктаарын кошумчалады.

Ошондой эле Садыр Жапаров «Баку-Бишкек» түз аба каттамын калыбына келтирүү маселесине токтолуп, бул маселенин оң жагына чечүүнү караштырып, тездетүүнү сунуш кылды.

Элчи Гидаят Оруджев Азербайжандын Президенти Ильхам Алиевдин Садыр Жапаровго жолдогон саламын айтып, анын жетекчилиги астында өлкөлөр ортосундагы достук жана өнөктөштүк мамилелер мындан ары тереңдейт деген бекем ишенимин билдирди.

Ошондой эле ал Азербайжан тараптын Кыргызстанга жаңы инвестицияларды тартууга даяр экендигин маалымдап, экономикалык кызматташтыкты өнүктүрүү үчүн колдонула элек чоң мүмкүнчүлүктөрдү белгиледи.

Гидаят Оруджев Азербайжандын Президент Садыр Жапаров жүргүзүп жаткан реформалар саясатын колдой тургандыгын баса белгилеп, өз мамлекетинин жетекчилигинин атынан Мамлекет башчысын Азербайжанга сапар менен келип кетүүгө чакырды.

Президент Садыр Жапаров дагы Азербайжандын Президенти Ильхам Алиевге саламын жолдоп, Гидаят Оруджевдин дипломатиялык ишмердигине ийгиликтерди каалады.

Тажикстанда жергиликтүү жумушчулардын укуктарын бузган кытайлык компанияга айып пул салынды

Тажикстанда жумушчулардын укуктарын бузганы үчүн акцияларына China Nonferrous Gold Limited (CNG) кытай компаниясы ээлик кылган «Покруд» биргелешкен ишканасына 1500 сомони (133 доллар) өлчөмүндө айып пул салынды.

Февралда «Эркин Европа» радиосу аталган ишкананын жумушчулары андагы катаал карантиндик режимге даттанышканын кабарлаган. Жумушчулардын айтымында, жетекчилик аларды мекемеден чыгарбай, үч айда бир гана жолу үйүнө барууга уруксат берип келген.

Калктын социалдык жактан корголушун көзөмөлдөө боюнча мамлекеттик кызмат текшерүүнүн жүрүшүндө бул факты аныкталганын билдирди. Эмгек кодексине ылайык, мындай тартипте иштеген ишканаларда вахта мөөнөтү 15 күндөн ашпашы керек.

Мекеменин билдирүүсүнө ылайык, мындан тышкары «Покруд» ишканасында нормадан ашык иштеген жумушчуларга кошумча акы төлөнбөгөнү жана жергиликтүү жумушчуларга караганда кытайлык жумушчулар көбүрөөк маяна алып келгени аныкталган.

Бул мыйзам бузуулар үчүн компанияга 1500 сомони (133 доллар) өлчөмүндө айып пул салынып, мүчүлүштүктөрдү үч айдын ичинде жоюуга милдеттендирилди.

«Покруд» («Пакрут») алтын кени Душанбеден 120 чакырым алыстыктагы Вахдат районунда жайгашкан. Ал кытайлык China Nonferrous Gold Limited компаниясына берилген өлкөдөгү алгачкы алтын кени. Тажик бийлигинин маалыматы боюнча анда алтындын 100 тоннадан ашык запасы бар.

Тажикстан инвестициялар жана карыздары үчүн өлкө аймагындагы кендерди кытайлык компаниялардын көзөмөлүнө берип келет. 2019-жылы ноябрда Тажикстандын парламенти Айни районундагы «Жогорку Кумарг» жана «Чыгыш Дуоба» алтын кендерин Кытайдын ТВЕА компаниясына иштетүүгө берүү тууралуу келишимди ратификациялаган. Келишимге ылайык, Кытай тарап «Душанбе-2» жылуулук электр борборунун курулушу үчүн жумшаган каражатты кечип, бул үчүн алтындын 64 тонна запасы бар аталган кендерди иштетүү укугуна ээ болгон.

Өткөн айда Душанбе шаарында тажик өкмөтүнүн жаңы имаратын куруп жаткан «Чиангду» кытай компаниясынын жумушчулары да эмгек шарттарына даттанып, укуктары бузулуп жатканын айтып чыгышкан.

 Булак: “Борбор Азия жаңылыктар кызматы”

ЕККУнун төрайымы Өзбекстанга келет

13-14-апрель күндөрү Өзбекстанга Европадагы коопсуздук жана кызматташтык уюмунун (ЕККУ) төрайымы, Швециянын тышкы иштер министри Анн Кристин Линде келет деп күтүлүүдө. Бул тууралуу Gazeta.uz сайты өзбек президентинин басма сөз катчысы Шерзод Асадовго шилтеме кылып кабарлады.

Анын айтымында, сапардын жүрүшүндө Анн Кристин Линдени өлкө башчысы Шавкат Мирзиёев кабыл алат.

«Өзбекстандын ЕККУ менен кызматташып жатканына 25 жылдан ашты, бул биздин өлкөнүн аталган уюм менен ачык жана динамикалуу иштешип жатканын көрсөтөт. Биз мындан ары да мамлекеттин жана коомдун жашоосундагы бардык тармактар боюнча белгиленген өзгөрүүлөрдү ишке ашырууда ЕККУ менен кызматташтыкты кеңейтүүгө кызыкдарбыз», — деди Асадов.

Ал ошондой эле Анн Кристин Линденин сапары «акыркы жылдары өзгөчө активдешкен» Өзбекстан менен Швециянын ортосундагы кызматташтыкты жаңы деңгээлге чыгарат деген ишенимин билдирди.

2020-жылдын ноябрь айынан быйыл февралга чейин эки өлкө ортосунда бир нече жолу саясий кеңешмелер өткөн.

 Булак: “Борбор Азия жаңылыктар кызматы”

УКМК: «Кадастр» МИ Оштогу филиалынын башчысы кармалды

УКМК КР жерлерди пайдалануу чөйрөсүндөгү коррупциялык схемаларды жоюу боюнча иш-чаралардын жүрүшүндө Жер ресурстары боюнча мамлекеттик агенттигинин “Кадастр” мамлекеттик ишканасынын Ош филиалынын директору «С.И.Б.» тарабынан кызмат абалынан кыянаттык менен пайдалануу фактысы аныкталды жана ага бөгөт коюулду.  Бул тууралуу бүгүн, 9-апрелде УКМКнын басма сөз кызматы билдирди.

Такталгандай, 2020-жылдын август айларында «Ош электро» ЖАК  административдик имаратты сатуу боюнча аукцион өткөрүп, жыйынтыгында 8 миллион сом арзан баада жеке адамга сатылган.

Белгилей кетсек, көрсөтүлгөн аянттагы жер тилкесинин 1 чарчы жердин базар баасы 2,5 миллион сомдон жогору болгон. Ошентип, имараттын жалпы аянты 600 м2 ашуун, 16,65 жер тилкесинде жайгашкан.

Мындан тышкары, «С.И.Б.» белгиленген тартипти бузуп жана кызмат абалынан кыянаттык менен пайдаланып, көрсөтүлгөн жер тилкесине жеке менчик укугу жөнүндө Мамлекеттик Актыны мыйзамсыз чыгарган, ал менчикке бербсетен убактылуу пайдаланууну камсыз кылышы керек болчу. 

2021-жылдын 5-апрелинде кармалган «С.И.Б.» УКМК Ош шаардык жана Ош облустук тергөө камак жайына киргизилди.

Учурда жерди пайдалануу чөйрөсүндөгү башка коррупциялык факторлорду аныктоо боюнча тиешелүү ыкчам-тергөө иш-чаралар жүргүзүлүүдө.

Орусия Фергана облусунда өстүрүлгөн жашылча-жемиштерди киргизүүгө уруксат берди

Орусиянын ветеринардык жана фитосанитардык көзөмөл боюнча федералдык кызматы (Россельхознадзор) Фергана облусунан келген помидор менен калемпирден башка бардык өсүмдүктөрдү киргизүүгө уруксат берди.

Орусия Фергана облусунда өстүрүлгөн помидор менен калемпирди 2020-жылдын 26-ноябрынан бери кабыл албай калган. Буга помидордон вирус табылганы себеп болгон.

Кийин Орусияга жеткирилген кургатылган өрүктөн капр коңузу табылып, 2020-жылы 11-декабрда Фергана облусунда өндүрүлгөн бардык өсүмдүктүн түрүн сатып алууга тыюу салынган.

 Булак: “Борбор Азия жаңылыктар кызматы”

Кытайда 13 жыл түрмөдө отурган Ракыжан Зейнолла Казакстанга кайтып келди

Шинжаңдагы туугандарын Казакстанга кайтарууну талап кылып, узак убакыттан бери нааразылык өткөрүп жүргөн Алматынын тургуну Фарида Кабылбектин күйөөсү Зейнолла Ракыжан 9-апрелде таң эртең менен Кытайдын Чэнду шаарынан Алматыга учуп келди.

Аба майданында аны отузга чукул киши тосуп алды. Бул тууралуу “Эркин Европанын” казак кызматы кабарлады.

– Мекениме келгениме кубанычтамын. Эки элдин достугу өркүндөй берсин. Силердин да туугандарыңар чыгат, аларды азыр вирус кармап турат. Баарыңардын туугандарыңарды жакында бошотушат, – деди ал.

Ракыжан Кытайдагы жагдайы тууралуу айтууга ыкыласын билдирген жок. “Сизге бул жакка келерден мурун Кытай бийлиги кандайдыр бир эскертүү бердиби?” деген суроого “жок” деп жооп узатты.

Рахыжан Зейнолла Кытайга 2004-жылы барып, ошондон бери Казакстанга кайта албай жүргөн.

Маалыматка караганда, 58 жаштагы Ракыжан Зейнолла Кытайдын Боро-Тала-Монгол автоном облусуна караштуу Карабука шаарында туулуп өскөн. 2000-жылы үй-бүлөсү менен Казакстанга жер которуп, Алматы облусуна келип турган. 2004-жылы Шинжаңга барган Ракыжан Зейнолланы полиция кармап, жоопко тарткан. Туугандарынын айтымында, аны кытай бийлиги тыңчылыкка айыптап, 13 жылга соттогон. Түрмөдөн чыккан соң саясий лагерде дагы бир жыл отурган. Кытайда да, Казакстанда да мамлекеттик кызматта иштеген эмес. Майда соода менен алектенген.

Кытайда 1,5 миллионго жакын казак жашайт. Алардын көбү өлкөнүн түндүк-батышындагы Шинжаң аймагына отурукташкан. Бул аймакта уйгурлар, казактар жана кыргыздар сыяктуу жергиликтүү мусулман коомчулугунун жүз миңдеген өкүлү атайын ”лагерлерде” негизсиз кармалып турганы 2017-жылдан бери кабарланып келет. 2018-жылы Бириккен Улуттар Уюму Шинжаңдагы «лагерлерде» бир миллионго жакын уйгур жана башка аз улут өкүлдөрү бар экенин билдирген. Айрым маалыматтар боюнча камактагылар өз дининен, маданиятынан жана тилинен баш тартууга мажбурланышат.

Кытай бийлиги мындай жайларды экстремизмге, терроризмге каршы күрөштүн алкагындагы “тарбиялоочу, кесипке үйрөтүүчү жайлар” катары сыпаттайт жана куугунтук тууралуу дооматтарды четке кагып келет.

 Булак: “Борбор Азия жаңылыктар кызматы”

Жарандык коом милицияны реформалоону талап кылууда

“Реформа жана жыйынтык үчүн” жарандык бирикмеси адегенде уурдалып, анан киши колдуу болгон Айзада Канатбекованын окуясы жалпы тартип жана укук коргоо тармагын реформалоо зарыл экенин көрсөткөнүн айтып чыкты.

Уюм тараткан билдирүүдө милиция кызматкерлери кыздын уурдалганы тууралуу маалыматка өз учурунда реакция кылбай, зомбулуктун курмандыгын коргой албаганы белгиленген.

“2020-жылы 175-берене (“Мажбурлап никеге тургузуу”) менен сотко чейинки өндүрүшкө 215 иш алынган. Сотко болгону 13 иш гана жеткен. Ала качууга туш болгон аялдардын 81% милицияга кайрылган эмес, кайрылгандары да милициянын аракетсиздигине дуушар болгон. Үй-бүлөлүк зомбулук жана кыз-келиндердин уурдалышын – погончон адамдар олуттуу кабыл алышпайт. Толук реформа болмоюнча, система өзгөрбөйт”, деп жазылган маалыматта.

Жарандык бирикме мындан тышкары зомбулуктун алдын алуу иштери кагаз жүзүндө отчет үчүн гана эмес, жаңы окуяларды болтурбоо максатында жүргүзүлүшүн белгилеген. Уюм ички иштер тармагын күч кызматкери эмес, жарандык министр башкарса адам укуктарын коргоо жакшы жолго коюлат деп эсептейт:

“Азыркы учурда ИИМдин күчү жана мүмкүнчүлүктөрү саясий топтордун кызыкчылыгын коргоого багытталган. Кадр саясаты адис кызматкерлерди иштен кетүүгө мажбурлайт. Тармакты аял жетектегени максаттуу”.

27 жаштагы Айзада Канатбекованы 5-апрелде саат 7:30 чамасында үч адам Медеров-Тыныстанов көчөсүнөн өтүп бараткан жерден машинеге каршылык көрсөткөнүнө карабай салып кеткен. Бул ошол жердеги мекеменин видеокамерасына түшүп калган.

Эки күндөн кийин кыздын жана аны уурдаган эркектин сөөгү Бишкектин четиндеги Арашан жана Чокморов айылдарына жакын жердеги талаадагы автоунаадан табылган. Шаардык милиция адам уурдоого шектүү, 36 жаштагы Замирбек Теңизбаев алгач кызды футболка менен муунтуп өлтүрүп, андан кийин өзүнүн күрөө тамырын кыйганын билдирди. Теңизбаев мурда Орусияда ар кандай кылмыштар үчүн үч ирет соттолуп, абакта отуруп чыкканы белгилүү болду. Айзада Канатбекованы уурдоого катышкан деп шек саналган төрт адам кармалды.

Бул окуядан улам коомчулукта милициянын ишине катуу сын айтылып жатат. 8-апрелде Бишкекте жана Ошто ИИМдин жетекчилигинин кызматтан кетишин талап кылган акциялар өттү.

Айзаданын өлүмүнө моралдык жоопкерчилик сезерин ички иштер министри Улан Ниязбеков 8-апрелде парламентте билдирген. Бишкек шаардык ички иштер башкармалыгынын башчысы Бакыт Матмусаев Айзаданын өлүмү үчүн милициянын атынан кечирим сураган.

 Булак: “Борбор Азия жаңылыктар кызматы”

Суваналиев менен Жамсран аялдардын активдүү жашоо образын калыптандырууну сүйлөшүштү

КРнын Өкмөтүнүн Баткен облусундагы ыйгарым укуктуу өкүлү Омурбек Суваналиев, БУУнун аялдар түзүмүнүн өкүлү Улзийсурен Жамсран  баштаган өкүлдөрү менен жолукту. Бул тууралуу  КР Өкмөтүнүн Баткен облусундагы ыйгарым укуктуу өкүлүнүн басма сөз кызматы билдирди.

Тараптар аялдардын коомдогу орду, алардын укуктары жана мүмкүнчүлүктөрүнүн абалы боюнча пикир алышып, аймактын ар тараптуу өнүгүүсүндө гендердик теңчиликти камсыздоо, светтик өлкө катары, аялдардын активдүү жашоо образын калыптандыруу боюнча демилгелерди ишке ашыруу багыттарын талкуулашты. 

Ошондой эле зордук зомбулуктун алдын алуу, аялдардын жакшы жашоого умтулуусун колдоо, пандемия шартында алар ар тараптуу колдоого муктаж экендиги белгиленип, өзгөчө чек аралаш аймактарда аялдарды ар тараптуу колдоого багыталган долбоорлорду ишке ашыруу, аларга моралдык жана материалдык колдоолор зарыл экени айтылды. 

Ыйгарым укуктуу өкүл менен Улзийсурен Жамсран  айым, билимдүү, заман агымына жараша ой жүгүртө алган аялдардын ролу, келечекте татыктуу жаш муунду тарбиялоодо эле эмес, өлкөнүн өнүгүүсүндө зор мааниге ээ экенин белгилешти. 

Ошондуктан аялдар үчүн коопсуз жашоону түзүү, жумушсуздук маселесин жеңилдетүү менен жакырчылыктан арылуу, алардын тең укуктуулугун камсыз кылуу менен коомдук жашоодо, үй-бүлөдө чечим кабыл алууда аялдардын ойун эске алуу зарыл экенин белгилешип, татыктуу жашоого болгон кызыкчылыктарын ишке ашырууну илгерилетүүнү макулдашышты. 

Эмомали Рахмон Ворухка келди

Тажикстандын президенти Эмомали Рахмон бүгүн, 9-апрелде Кыргызстандын аймагындагы тажик анклавы Ворухка келди.

“Эркин Европанын” тажик кызматы маалымдагандай, президент Рахмон стадион менен маданий борбордун ачылышында болуп, айыл чарба азыктарынын жана кол өнөрчүлүк буюмдарынын көргөзмөсүнө катышты. 9-апрелде түштөн кийин ал ворухтук тургундар менен жолугушуп, сөз сүйлөшү күтүлүүдө.

Тажикстандын президенти Эмомали Рахмон курамына Ворух да кирген Согди облусунда 7-апрелден бери жумушчу сапар менен жүрөт.

Тажик президентинин аймакка сапары коңшулаш Кыргызстандын Улуттук коопсуздук боюнча мамлекеттик комитетинин (УКМК) төрагасы Камчыбек Ташиевдин чек ара тууралуу билдирүүлөрүнөн кийин болду. Камчыбек Ташиев чек ара маселелери боюнча сүйлөшүүлөрдө кыргызстандык делегацияны жетектейт. Ал 26-марттагы маалымат жыйынында Кыргызстан Тажикстан менен чек араны чечүү үчүн Ворух анклавын Баткендеги башка аймактан 12 миң гектар жерге алмаштырууга даяр экенин, бул сунуш тажик бийлигине берилгенин маалымдаган.

Ташиевдин билдирүүсүнө расмий Душанбе азырынча жооп кайтара элек. Социалдык тармактарда Ворухту алмаштырууга каршы пикирлер жазылган.

Ворух анклавы Кыргызстандын Баткен облусунун аймагында.

Кыргызстан менен Тажикстандын чек арасы 976 чакырымдан ашуун. Азырынча чек ара сызыгынын 60% гана такталган. Чектеш аймактарда жер, суу, жайыт жана башка маселелерден улам чыр-чатак бат-бат катталып турат. Эки тараптан ок атылып, адам өлүмү болгон учурлар да бар.

 Булак: “Борбор Азия жаңылыктар кызматы”

1-апрелден тарта үй-бүлөлүк дарыгерлердин жана жалпы практикалык дарыгерлердин эмгек акысы эки эсеге жогорулатылды

2021-жылдын 1-апрелинен тарта үй-бүлөлүк дарыгерлердин жана жалпы практикалык дарыгерлердин эмгек акысы эки эсеге жогорулатылды. Кыргыз Республикасынын Өкмөтүнүн аталган чечими Кыргыз Республикасынын Президентинин «Кыргыз Республикасында саламаттык сактоо чөйрөсүн өнүктүрүү жана калкынын жашоосунун жана саламаттыгынын сапатын жакшыртуу боюнча  кечиктирилгис чаралар жөнүндө» Жарлыгына ылайык, саламаттык сактоо тутумунун кызматкерлеринин эмгек акысын жогорулатуу жана өркүндөтүү максатында кабыл алынган. Бул тууралуу өкмөттүн аппаратынын басма сөз кызматы билдирди.

Саламаттык сактоо тутумунун башка категориядагы кызматкерлери үчүн эмгек акысы 2021-жылдын 1-июлунан тарта – 50%га, ал эми техникалык жана кенже тейлөө кызматкерлеринин айлык акысы 40%га жогорулатылат.

Дайынсыз жоголгон Наталья Кудякованы издөө иштери уланууда

Дайынсыз жоголгон Кудякова Наталья Викторовнаны издөө иштери улантылууда. Бул тууралуу Чүй ОИИБнин басма сөз кызматы билдирди.

Алардын айтымында, кечээ, 8-апрель күнү Аламүдүн районунун ИИБнө 38 жаштагы Я.Ю. аттуу жаран арыз менен кайрылып, жакындарынын бири 1981-жылы туулган Кудякова Наталья Викторовна 2021-жылдын 6-апрель күнү таңкы саат 04:30
чамаларында күмүш түстөгү “Хонда-Одиссей” үлгүсүндөгү автоунаасы менен Лебединовка айылынын Мичурина көчөсүндөгү батиринен чыгып кеткен боюнча кайрылып келбегенин билдирип, аны издөө иштерине көмөктөшүүнү суранган.

Бул окуя боюнча дароо Аламүдүн РИИБдүн ыкчам тергөө тобу жогорудагы көрсөтүлгөн дарекке чыгышып, териштирүү иштерин жүргүзүшкөн. Дайынсыз болуп жаткан К.Н. ижарага батир алып жарым айдан бери жашаганы жана 6-апрель күнү таң эрте белгисиз тарапка чыгып кеткени маалым болгон.

Бул факты боюнча Чүй облусунун ички иштер органдарына жана Бишкек шаарынын ички иштер органдарына багыттамалар берилген.

Милиция кызматкерлери тарабынан жүргүзүлгөн ыкчам издөө иш-чараларынын натыйжасында,  6-апрель күнү болжол менен саат 18:35 чамаларында жогорудагы автоунаа Чүй облусу боюнча ЖКККБнын кызматкерлери тарабынан Люксембург айылынан токтотулуп, айдоочу К.Н. ичимдик ичип унаа башкарууга шектелип, медициналык текшерүү учурунда ичимдик ичкени аныкталып, ага карата протокол толтурулуп, автоунаасы айып унаа токтотуучу жайна коюлуп, айдоочу К.Н. коё берилгени маалым болгон.

Учурда Чүй облусунун ички иштер органдары тарабынан жогорудагы жарандын жүргөн жерин аныктоо үчүн ыкчам издөө иш-чаралары жүргүзүлүүдө.

Алмазбек Бейшеналиев: "Кыргызстанда алгачкы жолу Ректорлордун эл аралык форуму өтөт"

Кыргыз Республикасынын Билим берүү жана илим министрлиги 2021-жылдын 5-8-сентябрында Бишкек шаарында «Ковидден кийинки мезгилде дүйнөлүк экономиканы өнүктүрүүдөгү билим берүүнүн ролу» аталышында жогорку окуу жайлардын ректорлорунун эл аралык форумун өткөрөт. Бул тууралуу КР БИМдин басма сөз кызматы билдирди.

Иш-чарада илимий изилдөөлөр жана билим берүү жаатындагы эл аралык кызматташуу маселелерин жана университеттердин өз ара кызматташуусу менен байланышкан маселелерди чечүү үчүн дүйнө жүзүнөн 200дөн ашуун университеттин өкүлдөрүн бириктирери күтүлүүдө.  

Форумдун максаты – дүйнөнүн алдыңкы университеттеринин топ-менеджерлерин жана жогорку окуу жайлардын ректорлорун бир аянтчага чогултуу, эл аралык деңгээлде кызматташуу тууралуу жогорку окуу жайлар аралык макулдашууларга кол коюуну демилгелөө.  

Ушул тапта курамына министрликтин өкүлдөрү жана республиканын алдыңкы жогорку окуу жайларынын ректорлору кирген уюштуруу комитети Форумду даярдоо жана өткөрүү боюнча иш-чаралардын планы бекитилип, Форумдун программасынын долбоору даярдалды жана чет өлкөлүк катышуучулардын тизмесин түзүү боюнча иш жүргүзүлүүдө. 

Равшан Жээнбеков: "Карындашыма коюлуп жаткан айыптар жалган"

Бишкек шаардык сотунун судьясы Мира Жээнбекованын мыйзамсыз баюусу тууралуу маалымат жалган. Бул тууралуу бүгүн, 9-апрелде анын агасы, саясатчы Равшан Жээнбеков маалымат жыйынында билдирди.

Анын айтымында, бийлик ага карындашы аркылуу кысым көрсөтүүгө аракет кылып жатат.

«Мен 20 жылдан бери оппозицияда жүрөм, карындашым судья болуп туруп кантип кандайдыр бир коррупциялык схемаларды уюштура алат? Муну бийликке жакын, саясий буйруктарды аткарган соттор гана жасашат. Менин карындашымдын жети баласы бар, кудалары жана туугандары бар, эми ага жалган жалаа жаап жатышат”, – деди Равшан Жээнбеков.

Адвокаттар УКМКнын билдирүүсүндө кайсы батирлер жөнүндө сөз болгонун айтып беришти.

“Мира Жээнбекованын жолдошу Шадиев курулган көп кабаттуу үйдүн 10%ын алуу шарты менен жер участогун курулуш компаниясына берген. Жер участогу Шадиевге ата-энесинен мурас катары өткөн”, – деди адвокат Марат Дүйшөналиев. 

“Батирлер декларацияда көрсөтүлгөн эмес, анткени курулушчулар батирлерди эксплуатацияга 2020-жылы гана өткөрүп беришкен жана алар ушул жылы декларацияда көрсөтүлүшү керек болчу”, – деп кошумчалады адвокат.

Белгилей кетсек, Бишкек шаардык сотунун судьясы Мира Жээнбекова мыйзамсыз баюуга шектелип жатат, анын 74 элиталык батири, 19 коммерциялык менчиги, 10 автоунаа токтотуучу жайы бар экени аныкталган.

Баткен облусу ТИКА уюму менен кызматташуу пландарын талкуулады

КРнын Өкмөтүнүн Баткен облусундагы ыйгарым укуктуу өкүлүнүн орун басары Эрлан  Сапарбаев, Түркия мамлекетинин ТИКА фондунун Кыргызстандагы өкүлчүлүгүнүн программалык координатору Осмон УСТА менен жолугушту.  Бул тууралуу КР Өкмөтүнүн Баткен облусундагы ыйгарым укуктуу өкүлүнүн басма сөз кызматы билдирди.

Жолугушууда тараптар облустун саламаттыкты сактоо, билим берүү, ишкердикти өнүктүрүү, туризм жаатында кызматташуу пландарын талкуулашты. Өзгөчө чек аралаш аймактардын инфраструктурасын чыңдоо жана аймакты санариптештирүү багытында кызматташуунун маанилүүлүгү белгиленди. 

Эрлан Сапарбаев ТИКА уюмунун өкүлдөрүнө, Баткен облусу үчүн көрсөткөн буга чейинки колдоолору үчүн ыраазычылык билдирди. 

Ошондой эле Баткен облусунда ТИКА уюмунун  атайын өкүлчүлүгүн ачуу, координациялык кеңеш түзүү маселелери каралып, бул багытта иш алып баруучу адистердин Туркия мамлекетинде тажрыйба алмашуусу  макулдашылды. 

Белгилей кетсек ТИКА уюму буга чейин Баткен облустук биргелешкен ооруканасынын жугуштуу оорулар бөлүмү 76миң долларга капиталдык оңдоп түзөөдөн өткөн.  

 

 

  

Премьер-министр Улукбек Марипов Кытайдын Атайын жана Ыйгарым укуктуу Элчиси Ду Дэвэнь менен жолугушту

Кыргыз Республикасынын Премьер-министри Улукбек Марипов Кыргыз Республикасындагы Кытай Эл Республикасынын Атайын жана Ыйгарым укуктуу Элчиси Ду Дэвэнь менен жолугушту. Бул тууралуу өкмөттүн аппаратынын басма сөз кызматы билдирди.

Өкмөт башчы Кытай Өкмөтү тараптан коронавирус инфекциясына каршы 150 миң доза «Sinopharm» вакцинасы түрүндө көрсөтүлгөн көмөгүнө ыраазычылык билдирди.

«Мамлекет башчы Кытай Эл Республикасына кыргыз элине берилген вакцинасы үчүн ыраазычылыгын билдирет. Үстүбүздөгү жылдын 29-мартынан тарта республикада вакцинациялоонун биринчи этабы башталды. Бүгүнкү күндө өлкө боюнча «Sinopharm» вакцинасын 700 ашуун адам алды. Медиктердин айтымында, вакцина алгандардын бардыгынын абалы канааттандыраарлык, кандайдыр-бир олуттуу терс таасирлери байкалган жок. Биз үчүн тобокелдик зонасына кирген жарандарды вакцинациялоо артыкчылыктуу маселе болуп саналат», – деди Улукбек Марипов.

Жолугушуунун жүрүшүндө тараптар транспорт, соода, инвестициялар, өлкөлөр ортосундагы авиакаттамдардын жандандырылышы жаатындагы эки тараптуу кызматташтыктын актуалдуу маселелери, анын катарында «Торугарт» жана «Эркечтам» көзөмөл-өткөрүү пункттарынын иши боюнча маселелер талкууланды.

Улукбек Марипов белгилегендей, көзөмөл-өткөрүү пункттарынын толук кандуу иши тараптардын кызыкчылыгына дал келген жүк ташуулардын көлөмүн жогорулатууга жана мындан ары Кыргыз Республикасы жана Кытай Эл Республикасы ортосундагы өз-ара пайдалуу соода-экономикалык кызматташтыкты кеңейтүүгө өбөлгө түзөт.

КЭР элчиси Ду Дэвэнь саламаттык сактоо жана өзгөчө кырдаалдар жана башка тармактар боюнча техникалык көмөк көрсөтүү жаатындагы гранттык долбоорлорду ишке ашыруу боюнча учурдагы абал тууралуу маалымдады.

Өкмөт башчы Ду Дэвэнге кеңири чөйрөдөгү маселелер боюнча эки тараптуу кызматташтыкты өнүктүрүүдөгү көмөгү үчүн ыраазычылык билдирди, ошондой эле келечекте Кыргыз Республикасы жана Кытай Эл Республикасы ортосундагы эки тараптуу мамилелерди, ар тараптуу стратегиялык өнөктөштүктү чыңдоо үчүн бардык күч-аракетти жумшоого даярдыгын билдирди.

Айзаданын өлүмү: БУУ адам уурдоо фактысына өз убагында чара көрүүгө чакырат

Ала качуунун курмандыгы болгон Айзада Канатбекованын каза болгондугу жөнүндө кабар бул адамгерчиликсиз көрүнүштү токтотуу керектигин эскертип турат. Бул тууралуу Бириккен Улуттар Уюмунун басма сөз кызматы билдирет.

Уюм бардык мамлекеттик органдарды, анын ичинде укук коргоо жана коопсуздук органдарын Кыргыз Республикасынын Кылмыш-жаза кодексинин “Никеге туруу максатында адам уурдоо” беренеси боюнча катталган иштерге өз убагында чараларды көрүүгө жана натыйжалуу иш алып барууга чакырат.

“БУУ аялдарга жана кыздарга карата зомбулуктун ар кандай түрүнө, анын ичинде ала качууга байланыштуу ар кандай аракеттерге тынчсыздануу менен мамиле кылган кыргызстандыктарды колдойт. БУУ аялдар менен кыздарга карата зомбулуктун алдын алууга жана жок кылууга багытталган мыйзамдарды жана мыйзамдык жоболорду тынымсыз кабыл алууга жана аткарууга чакырат», – деп айтылат маалыматта.

Белгилей кетсек, бир үйдүн жалгыз кызы, 27 жаштагы Айзада Канатбекова 5-апрелде уурдалып, изделип жаткан. Аны белгисиз адамдар Медеров-Тыныстанов көчөсүнөн өтүп бараткан жерден күчтөп машинеге салып кеткен.

5-апрелден бери дайынсыз болуп жаткан 27 жаштагы кыздын сөөгү 7-апрелде Бишкектин четиндеги Арашан жана Чокморов айылдарына жакын жердеги талаада автоунаадан табылган.

Шаардык ички иштер башкармалыгы кабарлагандай, аны уурдаган деп шек саналган 31 жаштагы киши кызды муунтуп өлтүрүп, андан кийин өзүнө да бычак сайып каза болгон. Ала качууга шектелгендер: 1992-жылы туулган Р.А., 1989-ж. З.Р. , 26 жаштагы Т.К., 30 жаштагы Н.О. кармалган.

Өлкөдө дагы 151 адамдан коронавирус жана пневмония табылды, илдеттен каза болгондор катталган жок

Бүгүн, 9-апрелге карата өлкөдө коронавирус жана пневмония илдетинин жаңы 151 учуру аныкталды. Бул тууралуу Саламаттык сактоо жана социалдык өнүгүү министрлигинин басма сөз кызматы билдирет.

Жаңы учурлар: Бишкек шаарынан – 74, Ош шаарынан – 6, Чүй облусунан – 47, Нарын облусунан – 7, Ысык-Көл облусунан – 16, Жалал -Абад облусунан – 1. Ошентип, өлкөдө жалпысынан 89 811 адам ооруга чалдыккан.

Өткөн сутка ичинде 112 адам оорудан айыгып ооруканадан чыгарылган. Алардын жалпы саны 85 719га жетти.

Оорудан айыккандар: Бишкек шаарынан – 60, Ош шаарынан – 2, Чүй облусунан – 35, Нарын облусунан – 3, Ысык-Көл облусунан – 10, Жалал-Абад облусунан – 2.

Акыркы бир сутка ичинде коронавирустан каза болгондор катталган жок. Буга чейин илдеттен каза болгондордун жалпы саны 1516га жеткен.

Тажикстанда үй-бүлөлүү келиндин туугандары анын "көңүлдөшүн" сотсуз жазалашты

Согд облусуна караштуу Пенжикент шаарында үй-бүлөлүү келиндин туугандары анын 22 жаштагы “көңүлдөшүн” сабап өлтүрүшкөнү белгилүү болду.

Окуя быйыл февралдын аягында болгон, бул иш боюнча бир киши кармалган.

Маркум Бахтиёр Холовдун атасы Садриддин Холовдун айтымында, уулу үч күн ооруканада жатып, эсине келбей көз жумган.

«Мага 28-февралда чалышып, баламды алардын үйүнөн алып кетүүнү айтышты. Чуркап келсем, Бахтиёр эс-учун жоготкон абалда жатыптыр. Ал жерде бир нече эркек жана аял болгон. Мага да кол салууга аракет кылышты», – деди Садриддин Холов.

Пенжикент районунун милициясы бул факты боюнча кылмыш ишин козгогон, бирок иликтөө азыркыга чейин уланууда.

7-апрелде «Эркин Европа» радиосунун райондук милициядагы өз булагы билдиргендей, бул факты боюнча бир киши – келиндин атасы кармалган, ага кылмыш иши козголгон.

Маркум жигиттин туугандары укук коргоо органдарын бул ишти кылдат тергеп, кылмышка шектүү башка адамдарды да жоопко тартууга чакырууда.

Маалыматтарга караганда, келиндин күйөөсү Орусияда иштеп жүргөн. Ал баласы менен кайната-кайненесинин үйүндө жашаган. Кайын-журту келин телефон аркылуу башка бирөө менен сүйлөшүп жүргөнүн байкап калган соң шектүү жигитти жана кудаларын үйгө чакырып, аны чогуу жазалашкан.

 Булак: “Борбор Азия жаңылыктар кызматы”

Меню