Menu

УКМК: Бирөөнүн $135 000 акчасын алдап алып, издөөгө алынган Бишкектин Октябрь райондук милицияынын кызматкери кармалды

КР УКМК тарабынан мамлекеттик органдар системасында, өзгөчө укук коргоо системасында мыйзамсыз көрүнүштөрдүн алдын алуу жана бөгөт коюу боюнча системалуу иштер улантылууда.

Мурда маалымдалгандай, УКМКга Кыргыз Республикасынын жараны “О.А.” Бишкек шаарынын Октябрь райондук ички иштер башкармалыгынын кызматкери “С.Р” кызматтык абалынан пайдаланып алдоо жолу менен, анын 135 000 АКШ доллары өлчөмүндөгү акча каражатын ээлеп алып, ар кандай шылтоолор менен кайтарып бербей жаткандыгы тууралуу арыз менен кайрылган.

Бул факты боюнча КР УКМК тарабынан КР Кылмыш-жаза кодексинин 209-беренесинин 4-бөлүгүнүн 1-пункту жана 4-пункту (Кызматтык абалынан пайдаланып, өзгөчө ири өлчөмдө жасалган алдамчылык) менен сотко чейинки өндүрүш иши башталган.

Аталган “С.Р.” издөөгө алынып, Бишкек шаарынын Биринчи Май райондук соту тарабынан камакка алуу түрүндөгү баш коргоо чарасы (сыртынан) тандалган.

2021-жылдын 12-декабрында КР УКМК тарабынан ыкчам-издөө иш-чарасынын жүрүшүндө, издөөдө жүргөн жарандын жашаган жери аныкталып, Чүй облусунун Аламүдүн районунун Беш-Күңгөй айылынан тергөө органдарынан жашырынып жүргөн Бишкек шаарынын Октябрь районунун ИИБнын КМКнын кызматкери “Р.С.” табылып кармалды.

Азыркы учурда С.Р. аталган иш боюнча тиешелүү ыкчам-тергөө амалдарын жүргүзүү үчүн КР Жазык-процесстик кодексинин 96-беренесине ылайык КР УКМК тергөө камак жайына киргизилди.

УКМК “С.Р.” аракетинен жапа чеккендерди (0312) 66-04-75 нөөмөт кызматынын телефону, 0702233243 WhatsApp номери аркылуу байланышууну өтүнөт.

КР УКМК мамлекеттик органдар системасындагы, өзгөчө, укук коргоо системасындагы мыйзамсыз көрүнүштөрдүн алдын алуу жана бөгөт коюу боюнча системалуу иштерди улантат.

“Башталгыч, жалпы негизги жана орто жалпы билим алууга балдардын конституциялык укуктарын камсыз кылуу боюнча кечиктирилгис чаралар жөнүндө” Жарлыкка кол коюлду

Кыргыз Республикасынын Президенти Садыр Жапаров “Башталгыч, жалпы негизги жана орто жалпы билим алууга балдардын конституциялык укуктарын камсыз кылуу боюнча кечиктирилгис чаралар жөнүндө” Жарлыкка кол койду.

Жарлык Кыргыз Республикасынын жарандарынын билим алууга конституциялык укугун ишке ашыруу жана башталгыч, жалпы негизги жана жалпы орто билим берүүнү камсыз кылуу, жалпы билим берүү мекемелеринин биринчи класстарына кабыл алынуучу окуучулардын контингентин сарамжалдуу пландаштыруу үчүн зарыл шарттарды түзүү, окубаган балдарды аныктоо жана алардын билим алуусу боюнча чараларды көрүү максатында иштелип чыккан.

Документтер белгиленгендей, билим берүү ар бир коомдун жана мамлекеттин тарыхында маанилүү ролду ойнойт. Ар бир өлкөнүн келечеги билим берүүнү өнүктүрүүгө байланыштуу болот. Анын деңгээли инсандын жана улуттардын заманбап дүйнөдөгү социалдык статусун аныктайт. Билим берүү коомду модернизациялоонун объектиси гана эмес, анын субъекти, кубаттуу рычагы жана ички ресурсу болуп эсептелет, себеби ал коомдук өнүгүүнүн процессинде улуттун интеллектуалдык жана руханий дараметин топтоонун жана өнүктүрүүнүн негизги фактору болот.

Балалыктын ыңгайлуу чөйрөсү менен чектелген баланы өнүктүрүү үчүн биринчи кезектеги шарт болуп бардык түрдөгү жана формадагы билим берүү, өзгөчө ар бир баланын жашоосундагы эң узак жана жооптуу этап менен тыгыз байланышкан мектептеги билим берүү эсептелет. Терең социалдык-экономикалык өзгөрүүлөр жүрүп жаткан мезгилде Кыргызстанда балалык үчүн тобокелдиктин факторлору курчуду. Ошол эле учурда мектеп иш жүзүндө балалыкты коргоонун жападан-жалгыз социалдык институту болуп калды. Бирок мектептин, ошондой эле жалпысынан билим берүү системасынын мамлекет жана коом тарабынан өз убагында толукталбаган ресурстук мүмкүнчүлүгүнүн төмөн болушу бул абдан маанилүү социалдык миссияны талаптагыдай деңгээлде аткарууга мүмкүндүк бербей жатат.

Жалпы билим берүү мектептерине барбаган балдардын санынын өсүшү Кыргыз Республикасынын билим берүү системасынын актуалдуу проблемаларынын бири болуп эсептелет. Айылдарда жана шаарлардын райондорунда жашаган мектепке чейинки жана орто мектеп жашындагы көптөгөн балдар мектепке барбайт же дайма барып турбайт. Мектепке таптакыр барбаган же окуусун үзгүлтүккө учураткан, сабактарга катышпаган балдар туш болгон проблемалар азыркы мезгилде кыйла татаал болуп эсептелет жана балдар аларды өздөрү чече албайт.

Алардын айрымдары ата-энесине жардам берүү үчүн иштөөгө аргасыз болсо, айрымдарынын ден соолугунун мүмкүнчүлүгү чектелүү, ал эми кээ бири начар үй-бүлөдө жашайт. Талаада, жайлоодо ата-энесине жардам берүүгө, тамак табуу үчүн иштөөгө, инилерин, карындаштарын, сиңдилерин кароого тийиш болгон үй-бүлөлөрдө жашаган балдар бар. Ата-энелер өздөрү жашы жеткен балдарын мектепке жиберүүнү каалабаган же аларга билим берүүнү милдеттүү деп эсептебеген учурлар көбөйүп жатат.

Алсак, Кыргыз Республикасынын Улуттук статистика комитетинин жана Кыргыз Республикасынын Билим берүү жана илим министрлигинин маалыматы боюнча учурдагы окуу жылынын башында 2,5 миңден ашык бала жалпы билим берүү уюмдарына окууга келген эмес. Түзүлгөн кырдаалдын себептери болуп ата-энелердин материалдык кыйынчылыктары (балдарын кароо жана мектепте окутуу үчүн финансылык каражаттарынын жоктугу), ата-энесине жардам берүү жана иштөө зарылчылыгы, ата-энелердин диний себептер боюнча балдарын мектепке жиберүүдөн баш тартуусу, ата-энесинде балага деген документтердин жок болушу, бир туугандарынын балага көңүл бурбоосу (ата-энеси миграцияга кеткен учурда) эсептелет.

Бул проблемага чара көрүү боюнча максаттуу мамлекеттик саясат балдардын ар кандай категорияларына, анын ичинде майып балдарга, аялуу категориядагы үй-бүлөлөрдөгү балдарга билим алуунун жеткиликтүүлүгүн, демек, жалпысынан сапаттуу билим алуунун жеткиликтүүлүгүн көбөйтүүгө тийиш.

Кыргыз Республикасынын жарандарынын билим алууга болгон конституциялык укугун ишке ашыруу жана башталгыч, жалпы негизги жана орто жалпы билим берүүнү камсыз кылуу, жалпы билим берүү мекемелериндеги биринчи класска кабыл алынууга тийиш болгон окуучулардын контингентин сарамжалдуу пландоо, окубаган балдарды табуу жана аларды окутуу үчүн чараларды көрүү максатында, Кыргыз Республикасынын Конституциясынын 27, 46, 66, 71-беренелерине ылайык токтом кылынат:

 

  1. Кыргыз Республикасынын жергиликтүү мамлекеттик администрациялары жана жергиликтүү өз алдынча башкаруунун аткаруу органдары Кыргыз Республикасынын Билим берүү жана илим министрлигинин аймактык бөлүмдөрү менен бирдикте эки жумалык мөөнөттө:

– жалпы билим берүү мектептерине киргизилбеген, окууга келбеген же окууну токтоткон мектеп жашындагы балдардын эсебин алсын;

– жалпы билим берүү мектептерине киргизилбеген, окууга келбеген же окууну токтоткон балдарды жалпы билим берүү мектептерине киргизүү боюнча зарыл чараларды көрсүн.

  1. Кыргыз Республикасынын Эмгек, социалдык камсыздоо жана миграция министрлиги жергиликтүү өз алдынча башкаруунун аткаруу органдары менен бирдикте бир айлык мөөнөттө турмуштук оор кырдаалда калган (балдарын кароо жана мектепте окутуу үчүн финансылык каражаттары жок) аз камсыз болгон үй-бүлөлөрдү жана балдарды тапсын жана зарыл болгон кийимдерди, мектеп формасын жана мектептик окуу-буюмдарын сатып алууда аларга жардам көрсөтсүн.
  2. Ушул Жарлыктын 1, 5-пункттарынын аткарылышы үчүн жеке жоопкерчилик Кыргыз Республикасынын Президентинин облустардагы ыйгарым укуктуу өкүлдөрүнө жүктөлсүн.
  3. Кыргыз Республикасынын Министрлер Кабинети белгиленген тартипте:

– эки айлык мөөнөттө баланын башталгыч, жалпы негизги жана орто жалпы билим алуусу үчүн зарыл чараларды көрбөгөн же чектеген ата-энелердин, балдардын мыйзамдуу өкүлдөрүнүн жоопкерчилигин караган мыйзамдын долбоорун иштеп чыксын жана аны Кыргыз Республикасынын Жогорку Кеңешине кароого киргизсин;

– Кыргыз Республикасынын Өкмөтүнүн 2017-жылдын

19-июнундагы № 388 “Мектеп курагындагы жана мектепке баруучу курактагы балдарды каттоого алуунун тартиби жөнүндө нускаманы бекитүү тууралуу” токтомунун аткарылышы жөнүндө Кыргыз Республикасынын Президентинин облустардагы ыйгарым укуктуу өкүлдөрүнүн, Бишкек жана Ош шаарларынын мэрлеринин отчетторун жыл сайын 1-июлга чейин карап турсун;

– ушул Жарлыктан келип чыгуучу финансылык, уюштуруучулук жана башка маселелерди чечсин.

  1. Кыргыз Республикасынын жергиликтүү мамлекеттик администрацияларынын, жергиликтүү өз алдынча башкаруунун аткаруу органдарынын башчылары жана жалпы билим берүү мектептеринин директорлору жалпы билим берүү мектептерине балдардын баруусун системалуу түрдө талаптагыдай контролдоону камсыз кылсын.
  2. Кыргыз Республикасынын Башкы прокуратурасы башталгыч, жалпы негизги жана орто жалпы билим алууга балдардын конституциялык укуктарынын камсыз кылынышына жана билим берүү чөйрөсүндөгү Кыргыз Республикасынын мыйзамдарынын талаптарынын сакталышына туруктуу негизде көзөмөл жүргүзсүн.

Жыл сайын 1-июлга чейин Кыргыз Республикасынын Президентинин Администрациясына башталгыч, жалпы негизги жана орто жалпы билим алууга балдардын конституциялык укуктарын камсыз кылуу боюнча Кыргыз Республикасынын мыйзамдарынын талаптарынын аткаруу бийлигинин органдары жана жергиликтүү өз алдынча башкаруу органдары тарабынан сакталышы жөнүндө маалыматты берип турсун.

УКМК: "Манас" аэропортунан Түркиянын “С.Д.” аттуу жаранын уурдап, $3 млн талап кылышкандар кармалды

КР УКМК тарабынан КР ИИМдин ички иликтөө кызматы менен биргеликте Түркия Республикасынын жараны “С.Д.” аттуу чет элдик ишкерди уурдоо боюнча жүргүзүлгөн кылмыш ишин тергөө учурунда, 3 млн АКШ доллар акча каражатын талап кылган кылмыштуу топтун мүчөлөрү кармалды, бул иштин арасында КР ИИМ кызматкерлери, биздин жарандар жана чет элдик жарадар да бар.

Көрүлгөн иш-чаралардын натыйжасында, уурдоонун уюштуруучусу “А.Б.” аттуу жаран – аткаруучуларды таап, даярдык иштерин жүргүзгөн түркиялык ишкердин досу жана бизнес өнөктөшү экени аныкталды.

Аталган “С.Д.” Кыргыз Республикасына үстүбүздөгү жылдын 1-декабрында учуп келген. “Манас” аэропортунан ал С.Д. документтерин текшеребиз деген шылтоо менен кармап, аэропорттун милиция бөлүмүнө алып келишкен. Андан соң тапанча менен коркутуп, бардык (акча, саат, телефон, ноутбук ж.б.) баалуу буюмдарын алып, башына баштык кийгизип жеке менчик үйгө алып барып 5 күн кармашкан.

Андан соң уурдагандар (уюштуруучу) “А.Б.”нын катышуусунда сүйлөшүүлөрдү жүргүзүшүп, анын жүрүшүндө сатып алууну 400 миң долларга чейин түшүрүшүп, “С.Д.”ны кое беришип, (жасалма түрдө) “А.Б.”ны барымта катары алып калышкан.

Азыркы учурда кылмышка шектүү катары “Х.А.Д.”, “А.Б.”, “Ж.Б.” жана Чүй облусунун ИИББнин “Манас” аэропортунун аба транспорт башкармалыгынын башчысы “П.Т.” кармалып, КР УКМК тергөө камак жайынын убактылуу кармоочу жайына киргизилди.

УКМК: 7 кг салмактагы баңги заты табылып алынды

УКМК тарабынан КР Кылмыш-жаза кодексинин 267-беренесинин 3-бөлүмү (Баңгизат каражаттарын, психотроптук заттарды жана алардын аналогторун сатып өткөрүү максатында мыйзамсыз даярдоо) боюнча каралган кылмыштын белгилери боюнча катталган сотко чейинки өндүрүштүн алкагында, тийиштүү ыкчам-тергөө иш-чаралары улантылууда. 

2021-жылдын 9-декабрында Баткен облусунун Лейлек районунун Арка айылынын тургуну “К.К.” аттуу жаранга тиешелүү «Опел» үлгүсүндөгү жеңил унаада катылган жеринен болжол менен 7 кг салмактагы баңги заты табылып алынды.

Соттук-химиялык экспертизанын корутундусуна ылайык, табылган баңги заты гашиш (кара куурай) экени аныкталды.

Азыркы учурда тиешелүү ыкчам-тергөө иш-чаралары улантылууда.

Жасалма эмдөө сертификаттарынан улам дарыгерлер иштен алынды

Саламаттык сактоо министрлиги коронавируска каршы вакцина алгандыгы тууралуу жасалма сертификат берилген фактылардан улам бир катар дарыгерлер иштен алынганын билдирди.

Ага ылайык, Бишкектеги №2, №8, №10, №11, №19, 20 медицина борборлорунун жетекчилери, бир медайым иштен алынды. Ошондой эле Ленин райондук үй-бүлөлүк медицина борборлору боюнча бөлүм башчы өзү жазган арыздын негизинде кызматтан кетти.

Чогулган материалдар укук коргоо органдарына өткөрүлүп берилди.

Саламаттык сактоо министри Алымкадыр Бейшеналиев 7-декабрда эмдөө сертификаттарынын сатылышын иликтеген комиссия түзүлгөнүн билдирген. Мунун алдында айрым журналисттер вакцина тууралуу жасалма маалымдамалар берилип жатканын иликтеп чыккан.

Кыргызстанда коронавируска каршы эмдөөнүн жеке QR-код ыйгарылган санарип сертификаттар 2021-жылдын июль айынан тартып берилет. Документти COVID-19га каршы эмделгендер, акыркы 6 айда коронавирус менен ооругандар же ПЦР тесттин үч күнгө жарактуу жыйынтыгы барлар алышат.

Кыргызстанда 18 жаштан өткөндөргө коронавируска каршы эмдөө кампаниясы 2021-жылдын 29-мартында башталган. 18-ноябрдан баштап 16 жашка толгондорго вакцина алууга уруксат берилген. Препараттын кошумча дозалары алынып келингенде 12 жаштан баштап алса болору айтылган.

Өлкөдө COVID-19 инфекциясына каршы алты түрдүү вакцина акысыз сайылууда. Вакцина бир адамга эки дозада берилет, арылыгы 21 күн болууга тийиш. Каалоочулар үчүнчү (бустер) дозаны да алат.

Министр Бекмурзаев Токтогулдан суу сатылбаганын билдирди

Кыргызстандын энергетика министри Доскул Бекмурзаев ЭлТР телеканалына берген комментарийинде Токтогул суу сактагычынан кошумча суу Казакстанга сатылбаганын билдирди.

“Бир тамчы суу дагы сатылган жок. Казакстан менен Кыргызстан, Өзбекстандын ортосунда жазында Улукбек Марипов (мурдагы өкмөт башчы -ред.) менен мурдагы министр товар алмашуу боюнча келишимге кол коюп келген. Муну саясатташтырбаш керек. Бизге керек учурунда кошуналар электр энергияны бекер берди. Биз жайында ошонун үчтөн бир бөлүгүн кайтарып беребиз. 2022-жылы дагы ошондой болот. Эгер абал ушул боюнча кете берсе, 2023-жылы дагы ошондой болот. Ошондуктан муну жөн эле “хайп” кыла бергендин кереги жок. Суу сатылбайт”, – деди министр.

Коңшу өлкөгө Токтогул суу сактагычынан кошумча суу берилгени Министрлер кабинетинин төрагасы Акылбек Жапаров 8-декабрда Нур-Султан шаарында казак премьер-министри Аскар Мамин менен жолугушуу учурунда ачыкка чыккан. Бул маалымат Кыргызстанда талаш-талкуу жаратты. Энергетика министрлиги Казакстанга жай саратан, кургакчылык маалда кошумча сугат суу берилгени тууралуу түшүндүрмө берген. Анда мындай кадам электр энергиясын алышып-беришүү тууралуу макулдашуунун негизинде ишке ашканы айтылат.

Маселе Жогорку Кеңеште дагы көтөрүлгөн. Депутат Дастан Бекешов парламент жыйынында президенттин өкүлүнө кайрылып, “дыйкандарга суу жетпей жатканда, Казакстанга 330 куб суунун агызылганы” боюнча түшүндүрмө талап кылган.

Суу сактагычтагы суунун аздыгынан Кыргызстан соңку жылдардагы эң чоң энергетикалык кризиске туш болду. Ушундан улам Казакстандан, Өзбекстандан жана Түркмөнстандан электр энергиясын импорттоо жана алмашуу боюнча келишимдер түзүлгөн.

Бишкек шаарында кыргыз футболунун 100 жылдыгына карата салтанаттуу иш-чара өттү

Кыргыз Республикасынын Президенти Садыр Жапаров бүгүн, 10-декабрда кыргыз футболунун 100 жылдыгына арналган салтанаттуу иш-чарага катышты. Иш-чаранын жүрүшүндө Мамлекет башчысы Кыргызстандагы футболдун 100 жылдык өнүгүү мезгилин чагылдырган архивдик сүрөттөр камтылган фотокөргөзмө менен таанышты.

Президент Садыр Жапаров өз сөзүндө кыргызстандыктарды жана алдыңкы спортчуларды бул маанилүү дата менен куттуктады. Ал ата мекендик футболчулардын чеберчилигин жана жетишкендиктерин белгилеп, Кыргызстандын дүйнөлүк аренада кадыр-баркын көтөрүү аракети үчүн ыраазычылык билдирди.

Мамлекет башчы өлкөдө спортту өнүктүрүү боюнча мамлекеттик программаны ишке ашыруу зарылдыгын баса белгилеп, футболду мектептен баштап университеттерге жайылтуу Кыргызстанды дени сак улуту бар күчтүү мамлекетке айландырат деген оюн билдирди. Ал өлкөнүн спорт тармагындагы көйгөйлөрдү чечүүгө бардык күч-аракетин жумшоого чакырды.

Иш-чаранын жүрүшүндө Садыр Жапаровго фрунзелик «Алга» клубунун ардагерлеринин кол тамгалары коюлган эстелик топ, ошондой эле кыргыз футболунун тарыхын архивдик сүрөттөр менен камтыган альбом тапшырылды.

Ошондой эле, Президент Садыр Жапаров жаш футболчулар менен учурашып, сүрөткө түштү.

Иш-чаранын жүрүшүндө ФИФАнын Президенти Джанни Инфантино да видеобайланыш аркылуу куттуктоо сөзүн сүйлөдү.

Иш-чара концерттик программа менен уланды.

Сокулук: Зордуктоого шектүүнүн үй-бүлөсү айылдан убактылуу көчүп кетти

Сокулук районунун Исмаил айылындагы бойго жете элек кызды зордуктоого шектүүнүн үй-бүлөсү көчүп кетти. Бул тууралуу Кызыл-Туу айыл өкмөтүндөгү жергиликтүү кеңештин депутаты Мирбек Сүйүналиев билдирди.

Анын айтымында, кылмышка шектүүнүн үй-бүлөсү 7-8-декабрь күндөрү мал-жаны менен кошо көчүп кетишкен, каякка барганы тууралуу кабары жок.

Сокулук районунун прокурору Орозбек Бердибаев аксакалдар кеңешинин чечиминен кийин коопсуздук маселесинен улам кылмышка шектүүнүн үй-бүлөсү убактылуу Бишкек шаарына көчүп кеткенин маалымдады. Ал үй-бүлөнүн Исмаил айылындагы там-ташы жана көчүп барган жердеги үйү укук коргоо органдарынын көзөмөлүндө экенин белгиледи.

7-декабрда Сокулук районунун Исмаил айылындагы аксакалдар өз алдынча бойго жете элек кызды зордуктоого шектүүнүн үй-бүлөсү “кыштактан көчүп кетсин” деген чечим чыгарган.

Кылмыш жасаганы айтылган жарандын жакындары ага макул болбой, чечимдин адилетсиз экенин айтышкан.

Айылдын 31 жаштагы тургуну 16га толо элек кызды зордуктоого шек саналып, 5-декабрда камалган. Милицияга кыздын атасы арыз жазган. Тергөөнүн баштапкы маалыматында “ал кызды Бишкек шаарына жумушка жеткирип коюуга убада кылып, жолдон күч колдонуп зордуктаганы” айтылат.

Чүй облустук Ички иштер башкармалыгы айылдагы абал милициянын көзөмөлүндө экенин билдирди.

Кыргызстандагы айрым юристтер аксакалдардын чечими мыйзамсыздыгын, сотсуз жазалоо улуттук да, эл аралык да нормаларга дал келбестигин, териштирүү жүргүзүү жана жазалоо – укук коргоо органдарынын, соттун милдети экенин белгилеп жатышат.

Шектүүгө карата Жазык кодексинин 154-беренеси (“Зордуктоо”) менен сотко чейинки өндүрүш ачылып, эки айга камалган.

Кыргызстандын мыйзамдарына ылайык, жашы жете электерди зордуктагандар 15 жылдан 20 жылга чейин эркинен ажыратылат.

Тилек Батырканов Президенттин иш башкаруучусу болуп дайындалды

Бүгүн, 9-декабрда Кыргыз Республикасынын Президенти Садыр Жапаров кол койгон Жарлыкка ылайык, Батырканов Тилек Карыбекович Кыргыз Республикасынын Президентинин иш башкаруучусу болуп дайындалды.

Буга чейин, Президент Садыр Жапаров кол койгон тескемеге ылайык, Кыргыз Республикасынын Президентинин иш башкаруучусунун биринчи орун басары Батырканов Тилек Карыбекович ээлеген кызматынан бошотулган.

УКМК: Талас облустук милициясынын тергөөчүсү опузалап, 300 миң сом пара алуу фактысы боюнча кармалды

КР УКМК тарабынан Кыргыз Республикасынын ИИМдин Талас шаары боюнча ИИБнын ИИКнын кызматкерлери менен биргеликте жүргүзүлгөн Кылмыш-жаза кодексинин 326-беренесинде (Опузалап пара алуу) каралган кылмыштын негизинде кылмыштардын жана жоруктардын бирдиктүү реестрине катталган сотко чейинки өндүрүштүн алкагында, Талас ИИБнин тергөө кызматынын ага тергөөчүсү кармалды.

Аталган тергөөчү, КРнын “С.Б.” аттуу жаранынан сотко чейинки өндүрүш ишин токтотуу үчүн 300 миң сом өлчөмүндөгү акча каражатын опузалап талап кылгандыгы аныкталды.

2021-жылдын 7-декабрында жүргүзүлгөн ыкчам-иликтөө иш-чараларынын натыйжасында, 50 миң сом акча каражатын алып жаткан жеринен Талас облусунун ИИБнын тергөө кызматынын ага тергөөчүсү, милициянын капитаны “А.Д.Д.” кармалды.

Кармалган жаран КР УКМКнын тергөө камак жайынын убактылуу кармоочу жайына киргизилди.

Азыркы учурда иликтөө иштери жүргүзүлүүдө.

Бактыбек Кудайбергенов Улуттук статистика комитетинин төрагасы болуп дайындалды

Бүгүн, 9-декабрда Кыргыз Республикасынын Президенти Садыр Жапаров кол койгон Жарлыкка ылайык, Кудайбергенов Бактыбек Жапарович мурда ээлеген кызматынан бошотулуп, Кыргыз Республикасынын Улуттук статистика комитетинин төрагасы болуп дайындалды.

“Манас” эл аралык аэропорту 2021-жылдын 10 айында 3 миллион 240 миң 285 жүргүнчүнү тейлеген

“Манас” эл аралык аэропорту” ААКсы 2021-жылдын жыйынтыгын чыгарды. Башкармалыктын Төрагасы – “МЭА” ААКнын Генералдык директору Бакыт Октябрович Шаршеев бүтүп бараткан жылдын жетишкендиктери жана келечектеги пландары тууралуу маек курду. 

 – Бакыт Октябрович, 2021-жыл кандай жетишкендиктер менен жыйынтыкталып жатат?

   2020-жылы коронавирус инфекциясынын пандемиясы “Манас” эл аралык аэропортунун ишин солгундаткан. Бирок бул жылы биз алдыга жылып, бардык каттамдарды жандандырып, андан сырткары жаңы багыттарды жана жаңы каттамдарды ача алдык. Жаңы авиакомпаниялар менен кызматташа баштадык, бул өз кезегинде жүргүнчүлөрдү жана жүктөрдү ташуучу каттамдардын көбөйүшүнө жана албетте, ишкананын кирешесинин өсүүсүнө алып келди.  

Сан менен айта турган болсок, 2021-жылдын 10 айында “МЭА” ААКсы 3 миллион 240 миң 285 жүргүнчүнү тейлеген. Өткөн жылга салыштырмалуу жүргүнчүлөрдү ташуу 2,7 эсеге өскөн. 2021-жылдын 1-январынан 31-октябрына чейин 27 432 каттам аткарылган. Кошумчалай кетсек, 10 айда кайра иштетилген жүктүн көлөмү 19551,1 тоннаны түздү.

– Бүгүнкү күндө учуулардын географиясы канчалык кеңейди?

Жалпысынан “МЭА” ААК аэропортторунун каттамдарынын тармагы 25 багытты камтыйт: эл аралык авиалиниялар боюнча 19 багыт жана ички каттамдар боюнча 6 багыт.

Белгилей кетсек, бүгүнкү күндө биздин “Манас”, “Ош” жана “Ысык-Көл” аэропортторунан бүгүнкү күндө Россия багыты боюнча, анын ичинде миллиондогон эл жашаган чоң шаарлар – Москвага, Санкт-Петербург, Новосибирск, Пермге, Калуга, Оренбург, Самара, Казань, Нижний-Новгород, Кемерово, Минеральные воды, Тюмень жана башкаларга каттамдар аткарылып жатат.  Мындан тышкары республика ичиндеги ички каттамдардын саны көбөйтүлдү. Алсак, “Жалал-Абад”, “Баткен” жана “Исфана” аэропортторунан жумасына 3 каттамга чейин учат, муну менен жүргүнчүлөргө өлкөнүн алыскы аймактарынан Кыргызстандын борборуна 1 саатта жетүүгө мүмкүнчүлүк түзүлдү.

 – Кандай жаңы багыттар ачылды?

Мен жогоруда айткандай, бизде Россиянын көптөгөн шаарларына  каттамдар бар. Бирок биз пандемия учурунда токтотулган башка каттамдарды да жандандырдык. Маселен, Мешхедден (Иран), Кувейттен, Шарджадан (БАЭ) жана Делиден (Индия) алгачкы каттамдар “Манас” аэропортунан тосуп алынган. Ошондой эле, Минск-Бишкек багыттары боюнча дагы жаңы каттамды тейледик. “Ош” аэропортунда Красноярск жана Алматы (Казакстан) шаарларынан каттамдар жандандырылды. Ошондой эле 8 жылдык тыныгуудан кийин Стамбулдан (Түркия) жаңы каттам ачылды.

Бүгүнкү күндө биз төмөнкү авиакомпаниялар менен иштешип жатабыз: “Уральские авиалинии”, “Сибирь”, “Varesh Airlines”, “Jazeera Airways”, “Air Arabia”, “Икар”, “SCAT”, “Узбекские авиалинии”, “Аэрофлот”,  “Тез Джет”, “АвиаТраффик Компани”, “Эйр Манас”, “Северный ветер” (Nord Wind), “Россия”, “FlyArystan”, “Аэро Номад Эйрлайнс”. 

Жогоруда аталган авиакомпаниялардын бардыгы чартердик жана үзгүлтүксүз каттамдарды аткарышат. 

 – “Ысык-Көл” эл аралык аэропортунда каттамдар көбөйгөнүн да билебиз.  Кененирээк токтоло кетсеңиз.

Ооба, бул жылы “Ысык-Көл” эл аралык аэропортунун көрсөткүчтөрү жогорулады. Мурда ал туристтик сезондо гана иштесе, азыр учактар ​​жыл бою 24/7 режиминде учат. Жыл башында аэропорт жумасына бир гана каттамды аткарса, азыр Новосибирск, Москва, Санкт-Петербург, Екатеринбург, Ростов-на-Дону жана Россиянын башка шаарларына жумасына 36-37 каттамга чейин аткарат. Ошондой эле, жай мезгилинде Алматыга (Казакстан), Ташкентке (Өзбекстан) жана Ош шаарынан ички каттамдар аткарылган.

Кошумчалай кетсек, “Москва-Тамчы-Москва”  багыты боюнча “Аэрофлот” авиакомпаниясы жумасына 3 жолу үзгүлтүксүз уча баштады. Муну менен, эл аралык авиакомпаниялар “Ысык-Көл” эл аралык аэропортунда учуу коопсуздугунун бардык талаптары аткарыларын тастыкташты.

– Каржы көрсөткүчтөрү жөнүндө маалымат бере аласызбы?

 Каржы жагы албетте, көбөйдү. Мурдагы жылдар менен салыштырсак болот. Мисалы, 2019-жылы ишкананын тарыхында эң жакшы көрсөткүч болуп, туунду ишканаларды кошкондо 2 миллиард 100 миллион сом киреше тапкан. Быйыл биз бул көрсөткүчтөрдү пандемияга карабастан ашып өттүк, ишкананын кирешеси 2021-жылы туунду компанияларды эсепке албаганда 3 миллиард 21 миллион сомду, туунду компаниялар менен бирге 3 миллиард 136 миллион сомду түздү. Белгилей кетсек, жыл аягына чейин дагы бир ай бар жана сандар өзгөрүшү мүмкүн.

Каржы көрсөткүчтөр аба жүктөрүнүн эсебинен дагы өскөн. Пандемиядан улам унаа,  темир жол аркылуу келген жүктөргө чектөө киргизилгендиктен, жүк ташуучу каттамдар көбөйдү.

– Аэропорттун инфраструктура маселелерин кантип чечип жатасыздар? 

 Аэропортторду реконструкциялоо, жүргүнчүлөрдүн ыңгайлуулугу үчүн жана тейлөөнү жакшыртуу үчүн үзгүлтүксүз иштерди жүргүзүп келебиз. Пандемияга карабастан биз бир катар долбоорлорду ишке ашырдык. Маселен, “Ош” эл аралык аэропортунда перрондун жасалма жабуусун реконструкциялоо, аэродромдун коммуникацияларын кайра уюштуруу жана учуу зонасында жүргүнчүлөр залын кеңейтүү боюнча иштер аяктады.

“Ысык-Көл” эл аралык аэропортунун аэровокзалынын имараты кеңейтилди. Ошондой эле, аэропортко келген жүргүнчүлөргө жана конокторго ыңгайлуу шарттарды түзүү максатында өзүнчө күтүү залынын имаратын куруу иштери башталды. Долбоорду 2022-жылдын башында бүтүрүү пландалууда.

– Жакында эле дүйнөдөгү эң чоң учак Ан-225 “Мрия” аэропортко келип конгон. Кандай тосуп алдыңыздар?

Ооба, ноябрь айынын аягында украиналык өндүрүүчүнүн Ан-225 “Мрия” деп аталган, авиациянын тарыхындагы 600 тонна салмактагы эн ири самолёту бизге учуп келди.  “Техникалык конуу” деп коет – бул  экипажды алмаштырганда же эс алууга кеткенде, учакты текшерүүдө жана башка учурларда конот. Белгилей кетсек, дүйнөнүн бардык аэропорттору бул учакты кабыл ала албайт. Ал буга чейин бизге бир нече жолу учуп келген.

– Келерки жылга пландарыңыз менен бөлүшсөңүз. Алдыга кандай максаттарды коюп жатасыздар? 

Мен “МЭА” ААК Башкармалыгынын Төрагасынын кызматына киришкенде, Кыргыз Республикасынын Президенти Садыр Жапаров менин алдыма конкреттүү милдеттерди койду – кызматкерлердин эмгек акысын жана компаниянын финансылык көрсөткүчтөрүн жогорулатуу,  учуулардын географиясын кеңейтүү жана башка милдеттер бар эле. Жогоруда байкаган чыгарсыз, быйыл биз айтылган милдеттердин көбүн аткара алдык.

2022-жылы биз аэропорттордун инфраструктурасын жакшыртуу жана учуулардын географиясын кеңейтүү боюнча иштерди улантабыз.

Мисалы, Будапештке (Венгрия) түз авиакаттам ачууну пландап жатабыз. Биз Венгриянын “Wizz Air” авиакомпаниясы менен келишим түздүк жана бул биринчи европалык авиакомпания, буга чейин бизде Европа менен аба байланышы болгон эмес.

Мындан тышкары, жүргүнчүлөрдү ташууну ишке ашыруу максатында биздин “Эйр Кей Джи” туунду компаниясына учактарды сатып алууну пландап жатабыз. Аны ички жана эл аралык каттамдарда колдонуу пландалууда.

Ошондой эле пландарда үч аэропорт боюнча долбоорлор бар:

– “Каракол” аэропортун реконструкциялоо.

– Өлкөнүн башкы аба портунун учуп-конуу тилкесин капиталдык оңдоодон өткөрүү керек, себеби 47 жыл бою жалаң жамоо иштери жүргүзүлдү.

– “Ош” аэропортунда аба жүк ташуучу борборду ачуу.

 

УКМК: Сузак району боюнча калкты социалдык жактан тейлөө бөлүмүнүн башкы адиси пара алып жаткан жеринен кармалды

КР УКМК тарабынан мамлекеттик органдардагы коррупцияны аныктоо, алдын алуу жана бөгөт коюу иш-чараларынын алкагында, пара алып жаткан жеринен Жалал-Абад облусунун Сузак району боюнча калкты социалдык жактан тейлөө бөлүмүнүн башкы адиси кармалды.

2021-жылдын 6-декабрында Сузак районунун тургуну, Сузак райондук социалдык өнүктүрүү башкармалыгынын кызматкери жаш балдарга пособия алуу үчүн берилген арыздарды кароо жана каттоо үчүн акча каражатын опузалап талап кылып жатат делген арыз менен КР УКМК кайрылган.

Буга байланыштуу, Кыргыз Республикасынын Социалдык өнүктүрүү башкармалыгынын Сузак району боюнча башкармалыгында коррупциялык көрүнүштөргө бөгөт коюу максатында, арыздын материалдары КР Кылмыш-жаза кодексинин 343-беренесинин 1-бөлүмүндө (Опузалап пара алуу) каралган кылмыштын белгилери боюнча кылмыштардын жана жоруктардын бирдиктүү реестрине катталган.

2021-жылдын 7-декабрында жүргүзүлгөн ыкчам-иликтөө иш-чараларынын натыйжасында, пара алып жаткан жеринен Социалдык өнүктүрүү башкармалыгынын Сузак району боюнча калкты социалдык жактан тейлөө бөлүмүнүн башкы адиси “М.Э.С” кармалды.

Азыркы учурда тиешелүү тергөө амалдары жүргүзүлүп жатат.

УКМК: Чолпон-Ата райондук электр тармактарынын (РЭТ) башчысы криптовалюта өндүрүү үчүн майнинг ферма уюштурган

2021-жылдын 8-декабрында Ысык-Көл облусунун Чолпон-Ата шаарында УКМКнын жана Ысык-Көл облусунун ички иштер башкармалыгынын кызматкерлери тарабынан 1976-жылы туулган Ысык-Көл облусунун Чолпон-Ата райондук электр тармактарынын (РЭТ) башчысы “И.А.Дж.” жашаган жеринде криптовалютаны өндүрүү үчүн майнинг ферма уюштуруу фактысы аныкталды.

Кылмыштардын жана жоруктардын бирдиктүү реестрине катталган материалдын алкагында жана Ысык-Көл райондук сотунун 2021-жылдын 7-декабрындагы «Сотко чейинки өндүрүштүн материалдары боюнча тинтүү жүргүзүү жөнүндө» токтомунун негизинде иликтөө иш-чаралары жүргүзүлүп, анын жүрүшүндө аталган башчы “И.А.Дж.” жашаган жери Чолпон-Ата шаары, Ж.Акималиев көчөсү, №1 дареги боюнча көрсөтүлгөн майнинг ферма электр эсептегичти айланып туташтырылгандыктан, бир топ көлөмдө электр энергиясын уурдоо фактысы аныкталды.

Белгилей кетсек, “И.А.Дж.” узак убакыт бою Чолпон-Ата РЭТте ар кандай кызматтарда иштеп, 2021-жылдын 8-декабрынан тарта аталган уюмдун башчысы болуп дайындалган. Ал энергетика тармагында иштеп жатып, суунун аздыгынан улам республикада энергетикалык каатчылык болуп жатканына карабастан, кызматтык абалынан кыянаттык менен  пайдаланып, электр энергиясын уурдап, муну менен Кыргыз Республикасынын энергетикалык коопсуздугуна зыян келтирген.

Азыркы учурда, бул иш боюнча сотко чейинки өндүрүштүн материалдарын тергөөнүн алкагында, келтирилген зыяндын өлчөмүн аныктоону камтыган зарыл болгон ыкчам-тергөө иш-чаралары жүргүзүлүүдө.

Башкы прокуратура: Парламент жоопко тартууга макул болбосо Асылбек Жээнбеков, Төрөбай Зулпукаров жана Бакыт Жетигенов абактан бошотулат

Эгер Жогорку Кеңеш жоопко тартууга макулдугун бербей турган болсо депутаттар Асылбек Жээнбеков, Төрөбай Зулпукаров жана Бакытбек Жетигенов камактан бошотулат. Бул тууралуу 7-декабрда Башкы прокуратура билдирди.

Мекеменин сайтына жарыяланган маалыматта айтылгандай, эгер Жогорку Кеңеш макулдук берсе алар кылмыш-жаза жообуна тартылат, ал эми макулдук берүүдөн баш тартуусу үч саясатчынын “камактан бошотулушуна негиз болот жана депутаттык ыйгарым укуктарынын мөөнөтү бүткөнчө аларга карата иш убактылуу токтотулат”.

Жээнбеков менен Зулпукаров “Кумтөр иши” боюнча коррупцияга шек саналып быйыл июнда Улуттук коопсуздук боюнча мамлекеттик комитеттин (УКМК) тергөө абагына камалган. Ал эми Жетигеновду УКМК “Бийликти курал колдонуп күч менен басып алууга даярдык көрүү” деген айыптын негизинде быйыл ноябрда кармаган.

1-декабрга чейин иштеген “Жазык-процесстик кодекстин” талаптарына ылайык үч депутатты жоопко тартууга макулдук алуу үчүн Башкы прокуратура 24 жана 29-ноябрда Жогорку Кеңешке тиешелүү сунуштамаларын жөнөткөн.

Бул маселени кароо үчүн 1-декабрда депутаттык комиссия түзүлгөн. Ал бир ай ичинде уруксат берер-бербесин аныктап, корутундусун жалпы палатага алып чыгары айтылган.

Жер участогуна укуктарды күбөлөндүрүүчү документтерди тариздөө жаатындагы процедуралар жөнөкөйлөштүрүлдү

Жер участогуна укуктарды күбөлөндүрүүчү документтерди тариздөө жана кыймылсыз мүлк бирдиктерине техникалык изилдөө жүргүзүү чөйрөсүндө физикалык жана юридикалык жактарга мамлекеттик кызмат көрсөтүү процедурасы жөнөкөйлөштүрүлдү. Тийиштүү чечимге Кыргыз Республикасынын Министрлер Кабинетинин Төрагасы Акылбек Жапаров кол койгон.

«Кыргыз Республикасынын Өкмөтүнүн жер участогуна укуктарды күбөлөндүрүүчү документтерди тариздөө жана кыймылсыз мүлк бирдиктерине техникалык изилдөө жүргүзүү чөйрөсүндө мамлекеттик кызмат көрсөтүү маселелери боюнча айрым чечимдерине өзгөртүүлөрдү киргизүү жөнүндө» Кыргыз Республикасынын Министрлер Кабинетинин аталган токтому Кыргыз Республикасынын ченемдик-укуктук актыларындагы мүчүлүштүктөрдү четтетүү максатында иштелип чыккан жана расмий жарыяланган күндөн тартып күчүнө кирет.

УКМК: $45000 пара алуу фактысы боюнча Бишкек шаарынын мэриясынын Капиталдык курулуш башкармалыгынын (ККБ) башчысынын орун басары кармалды

КР УКМК тарабынан жүргүзүлгөн иш-чаранын алкагында, Бишкек шаарынын мэриясынын ККБ башчысынын орун басары “У.У.К.” тарабынан Кыргыз Республикасынын Транспорт жана коммуникациялар министринин орун басарынын милдеттерин аткаруучу болуп иштеп турган кезде 45 миң АКШ доллары акча каражатын опузалап алуу фактысы аныкталды.  

2021-жылдын 6-декабрында бул факты боюнча сотко чейинки өндүрүштүн алкагында, “У.У.К.” КР Жазык-процесстик кодексинин 94-беренесине ылайык кармалып, КР УКМКнын тергөө камак жайынын убактылуу кармоочу жайына киргизилди.

УКМК: КР Жогорку Кеңешинин депутаттыгына талапкер Акбөкөн Таштанбеков УКМКнын убактылуу кармоочу жайына киргизилди

Мурдараак маалымдалгандай, УКМК КР Жогорку Кеңешинин депутаттыгына талапкер А.Таштанбековго карата улуттар аралык жана аймактар аралык кастыкты козутуу фактысы боюнча козголгон кылмыш ишин териштирип жатат.

2021-жылдын 6-декабрында КР БШК А.Таштанбековду Кыргыз Республикасынын Кылмыш-жаза кодексинин 330-беренесинин 2-бөлүгүнүн 1-пункту (Улуттар аралык жана аймактар аралык кастыкты козутуу) боюнча Кылмыш-жаза жоопкерчилигине тартууга макулдук берди.

Ошол эле күнү А.Таштанбеков айыпталуучу катары алынып келинип, Бишкек шаарынын Биринчи Май райондук соту ага тергөө мөөнөтү аяктаганча камакка алуу түрүндөгү баш коргоо чарасын тандады.

Азыркы учурда тергөө иштери жүрүп жатат.

Орусиянын Тажикстандагы аскердик базасына заманбап 30 танк жеткирилди

Орусиянын Тажикстандагы 201-аскердик базасына Т-72Б3М үлгүсүндөгү согуштук мүнөздөмөлөрү жакшыртылган 30 танк жеткирилди. Бул тууралуу ТАСС агенттиги орус Коргоо министрлигине шилтеме кылып кабарлады.

Орусиянын Борбодук аскердик округу эскирген техникалардын ордуна жеткирилген танктар “танк батальонунун согуштук мүмкүндүктөрүн кыйла жогорулата” турганын билдирди.

Орусиянын Коргоо министрлигинин маалыматына караганда, модернизацияланган Т-72Б3М танктары жаңы кыймылдаткычтар, пассивдүү жана активдүү коргонуу комплекстери, ошондой эле “Акведук” байланыш системасы жана көп каналдуу “Сосна-У” мээлегичи менен жабдылган.

Быйыл августта Ооганстандагы абалга байланыштуу Тажикстандагы Орусиянын аскердик базасына ракетага каршы “Корнет” деп аталган жаңы комплекстер жеткирилген. Бул комплекстер душмандын чопкутталган согуштук техникаларын, ошондой эле тик учактарын жана башка учкучсуз аппараттарын жок кылууга багытталган заманбап курал.

Ага чейин Орусиянын Борбордук аскердик округу Тажикстандагы базага “Верба” деп аталган көчмө зениттик-ракеталык комплекстер, “Калашников” АК-12 автоматтары жана заманбап снайпердик мылтыктар жеткирилгенин кабарлаган.

21-июлда Орусия Тажикстандагы аскердик базаны 17 даана БМП-2 автоунаалары менен күчтөндүрүү чечимин кабыл алганы белгилүү болгон.

Тажикстандын аймагында Орусиянын сыртындагы эң ири орусиялык аскердик база эсептелген 201-база жайгашкан. Анда 7,5 миңге жакын аскер кызматкери бар. Орус базасынын Тажикстандын аймагында жайгашуу мөөнөтү эки өлкө өкмөттөрүнүн макулдашуусу менен 2042-жылга чейин узартылган.

Коррупцияга каршы ишкердик кеңештин курамына өзгөртүү киргизилди

Кыргыз Республикасынын  Президенти Садыр Жапаров “Кыргыз Республикасынын Президентинин 2021-жылдын 21-октябрындагы № 475 “Кыргыз Республикасынын Президентине караштуу Антикоррупциялык ишкердик кеңештин курамын бекитүү жөнүндө” Жарлыгына өзгөртүүлөрдү киргизүү тууралуу” Жарлыкка кол койду.

Алсак, Антикоррупциялык ишкердик кеңештин курамынан төмөнкүлөр чыгарылды:

-Европа реконструкциялоо жана өнүктүрүү банкынын Борбордук Азия боюнча аймактык директору – Айтен Рустамова;

-Германия Федеративдүү Республикасынын Кыргыз Республикасындагы Атайын жана Ыйгарым укуктуу Элчиси – Габриэла Геллил;

-Швейцариянын Кыргызстандагы элчиси – Оливье Бангертер;

-АКШнын Эл аралык өнүктүрүү агенттигинин «Укук булагы» долбоорунун директору – Фред Хьюстон -.

Мамлекет башчысынын Жарлыгы менен Антикоррупциялык ишкердик кеңештин курамына төмөнкүлөр киргизилди:

-Кыргыз Республикасынын Министрлер Кабинетинин Төрагасынын орун басары – Кыргыз Республикасынын Улуттук коопсуздук мамлекеттик комитетинин төрагасы –Ташиев Камчыбек Кыдыршаевич;

-Кыргыз Республикасынын санариптик өнүктүрүү министри – Догоев Дастан Давлетович;

-Кыргыз Республикасынын энергетика министри – Бекмурзаев Доскул Джумагулович;

-Кыргыз Республикасынын айыл чарба министри – Джаныбеков Аскарбек Сапарбекович;

-Кыргыз-Россия өнүктүрүү фондунун башкармасынын төрагасы – Новиков Артем Эдуардович;

-Евразия өнүктүрүү банкынын директору – Акматов Нурлан Орозбаевич.

Чүйдө бойго жете элек кызды зордуктоого шектүү адам кармалды

Чүй облустук Ички иштер башкармалыгынын басма сөз кызматы кабарлагандай, 5-декабрда Сокулук райондук милициясына жергиликтүү тургун кайрылып, 16 жаштагы кызын белгисиз адам уруп, зордуктаганын билдирген.

Тергөөнүн баштапкы маалыматында “ал кызды Бишкек шаарына жумушка жеткирип коюуга убада кылып, жолдон күч колдонуп зордуктаганы” айтылат.

Жазык кодексинин 154-беренеси (Зордуктоо) менен сотко чейинки өндүрүш ачылып, 31 жаштагы эркек колго түшкөн жана убактылуу кармоочу жайга киргизилген.

5-декабрда Сокулук районунун 50дөй тургуну Ички иштер бөлүмүнүн алдында чогулуп, аталган фактыны калыс тергөөнү, күнөөлүүнү жазалоону талап кылышкан.

Бириккен Улуттар Уюмунун Өнүктүрүү программасынын 2020-жылдагы изилдөөсүнө ылайык, Кыргызстанда бир жылда “Зордуктоо” беренеси менен 250дөн ашуун иш козголуп, анын 17си гана сотко жеткен.

“Жашы жете электерге карата зомбулук аракеттер” беренеси боюнча 54 факты катталган.

Жазык кодексине ылайык жашы жете электерди зордуктагандар 15 жылдан 20 жылга чейин эркинен ажыратылат.

УКМК: Бишкек шаарынын Октябрь райондук ички иштер башкармалыгынын кызматкери издөөгө алынды

КР УКМК тарабынан мамлекеттик органдар системасында, өзгөчө укук коргоо системасында мыйзамсыз көрүнүштөрдүн алдын алуу жана бөгөт коюу боюнча системалуу иштер улантылууда.

УКМКга Кыргыз Республикасынын жараны “О.А.” Бишкек шаарынын Октябрь райондук ички иштер башкармалыгынын кызматкери “С.Р. кызматтык абалынан пайдаланып алдоо жолу менен, анын 135 000 АКШ доллары өлчөмүндөгү акча каражатын ээлеп алып, ар кандай шылтоолор менен кайтарып бербей жаткандыгы тууралуу арыз менен кайрылды.

Бул факты боюнча КР УКМК тарабынан КР Кылмыш-жаза кодексинин 209-беренесинин 4-бөлүгүнүн 1-пункту жана 4-пункту (кызматтык абалынан пайдаланып өзгөчө ири өлчөмдө жасалган алдамчылык) менен сотко чейинки өндүрүш иши башталган.

“С.Р.” издөөгө алынып, Бишкек шаарынын Биринчи Май райондук соту тарабынан камакка алуу түрүндөгү баш коргоо чарасы (сыртынан) тандалды.

Азыркы учурда тергөө иштери жүрүп жатат.

Кыргыз Республикасынын УКМКсы бул адамдан жабыркаган жарандар болсо (0312) 66-04-75 нөөмөт кызматынын телефонуна, 0702233243 WhatsApp номерине, ошондой эле күнү-түнү иштеген аймактык башкармалыктарга (ишеним телефондору) кайрылууларын өтүнөт:

  • Чүй областы: (0312) 54-07 19:
  • Жалал-Абад областы: (03722) 5-60-49;
  • Ош областы: (03222) 2-30-78;
  • Ысык-Көл областы: (03922) 5-11-80;
  • Талас областы: (03422) 5-20-43;
  • Нарын областы: (03522) 5-08-49;
  • Баткен областы: (03622) 5-00-33.

Аз камсыз болгон жарандар (үй-бүлөлөр) үчүн электр энергиясына тарифтер төмөндөдү

Кыргыз Республикасынын Президенти Садыр Жапаров «Аз камсыз болгон жарандарды (үй-бүлөлөрдү) электр энергиясы үчүн акы төлөөнүн өлчөмүн төмөндөтүү түрүндө колдоо чаралары жөнүндө» Жарлыкка кол койду.

Эске салсак, Кыргыз Республикасынын Президенти Садыр Жапаров буга чейин, үстүбүздөгү жылдын 26-ноябрында Кыргыз Республикасынын Коопсуздук кеңешинин жыйынында   аталган жарандарга электр энергиясы үчүн тарифтерди төмөндөтүүнүн механизмдерин иштеп чыгууну тапшырган.

Бул Жарлыктын максаты жана милдети 16 жашка чейинки балдары бар муктаж болгон жарандарга (үй-бүлөлөргө) социалдык маанидеги товарларга баалардын өсүшү шартында даректүү социалдык колдоо көрсөтүү болуп саналат.

Жарлыктын алкагында Кыргыз Республикасынын Министрлер Кабинетине токтом кылынат:

— 16 жашка чейинки балдары бар, «үй-бүлөгө көмөк» мамлекеттик жөлөкпулун алган муктаж жарандар (үй-бүлөлөр) үчүн электр энергиясына тариф 2022-жылдын 1-январынан тартып, айына 700 кВтс чейин керектегенде, 1 кВтс үчүн 50,0 тыйын өлчөмүндө аныкталсын;

— ушул Жарлыктан келип чыгуучу, анын ичинде Кыргыз Республикасынын ченемдик укуктук актыларына өзгөртүүлөрдү белгиленген тартипте киргизүү каралган чараларды көрсүн.

УКМК: Жогорку Кеңештин депутаттыгына талапкер Акбөкөн Таштанбековго карата кылмыш иши козголду

Социалдык тармактарда КР Жогорку Кеңешинин депутаттарын шайлоо учурунда №30 Ысык-Ата районунун депутаттыгына талапкер Акбөкөн Таштанбековдун катышуусунда видеотасма жарыяланган.

Бул чагымчыл видеодо А.Таштанбековдун коомчулукта терс пикир жараткан улуттар аралык жана аймактар аралык кастыкты козутууга багытталган аракеттери ачык эле көрүнүп турат.

2021-жылдын 4-декабрында А.Таштанбековдун аракеттеринде Кыргыз Республикасынын Кылмыш-жаза кодексинин 330-беренесинин 2-бөлүгүнүн 1-пунктунда (Улуттар аралык жана региондор аралык кастыкты козутуу) каралган кылмыштын белгилеринин бар экендигин эске алуу менен, кылмыш иши козголгон.

2021-жылдын 6-декабрында тергөө органдары тарабынан бул кылмышты жасагандыгы үчүн А.Таштанбековду кылмыш жоопкерчилигине тартууга макулдук берүү үчүн Шайлоо жана референдум өткөрүү боюнча борбордук комиссиясына кайрылуу жөнөтүлгөн.

Жогорудагы кайрылууну кароонун жыйынтыгы боюнча тергөө тарабынан тиешелүү процессуалдык чечим чыгарылып, А.Таштанбековдун аракеттерине юридикалык баа берилет.

Асейин Саралаев, Кочкордун тургуну: "Атамбаевдин "Апрель" телеканалынын Канат Каниметов деген журналист сөрөйү өзү сот, өзү бакшы болуп бир жактуу каралаган материалдарды чампалап чыгарып келет"

«КУЛ КАЗЫ БОЛСО КҮЛГӨ УБАЛ» болдубу же Медет Садыркуловдун өлүмү боюнча Жаныш Бакиевге жасалган каралоого качан чекит коюлат?
Өлкөбүздө чоң саясий окуя болуп, элибиз жакшынакай үмүт менен өлкөнүн Жогорку Кеңешине депутаттарды шайлашып жакшы жыйынтык күтүп жатышкан кезде, баягы эле Атамбаевдин Бакиевдерди каралоо үчүн гана түзүлгөндөй «Апрель» деген телеканалы 12 жыл мурда жол кырсыгынан каза болгон Медет Садыркуловдун арбагын козгошуп, калың элге генерал Жаныш Бакиев агабызды кайрадан бети жоктук менен каралаган жаңылыгын сенсация катары шардана кылды. Албетте алардын арам оюу боюнча, шайлоонун жыйынтыгын күтүп атышкан көп эл алардын салт болуп калган каралоосун көбүрөөк көрүшөт болчу. Өздөрүнүн жулмаланып, жарым атын тарттырып жиберишип «Социал-Демократтар» деген өлөсөлүү аты менен калган партиясы жеңилээрин билишип, өздөрүнүн жоготкон саясий упайларын жана элден кеткен ишеничин БАКИЕВДЕРДИ жамандасак эле кайтарып алабыз дегендей ыкмасын кайрадан бир колдонушуптур. Эххх, байкуштар дедим!!! «Жыгылган күрөшкө тойбойт» деген макал силер үчүн арналып айтылган экен деп да күлдүм…
Апрель телеканалы эмнеден чоочуп, кыштын чилдесинде ийининен тура качкан суурдай болушуп аңкыштап атышат десе, көрсө Медет Садыркуловдун өлүмүнө шектүү катары издөөдө жүргөн Санжар Сапарбеков деген жаран Кыргызстанга келип кармалган экен. Мындай жаңылыктарга атамбаевчилер уча тарткандай кубанышат эмеспи, айтор
Канат Каниметов деген журналист сөрөйү өзү сот, өзү бакшы, өзү ошол жерде Садыркуловду өлтүрүшүп жүргөн күбө сыяктуу бир жактуу каралаган материалды чампалап даярдап, генерал Жаныш БАКИЕВДИ болушунча шыбап, акырында «Эмки кезек Бакиевдердеби, бийлик Жаныш Бакиевди актаган жатабы?» деген калчылдап корккон жылымчы суроолор менен жаңылыгын жыйынттыктаган экен…
Албетте биздин эл аябай ишенчээк жана жакшы нерсеге караганда жаманды кулактарыбыз делдейгенче угуп, жөн укпай азоо аттай ала качырып кетет эмеспизби? Мен бул жаңылыкты 11 жылдан бери учугу үзүлбөгөн Бакиевдерге каршы каралоонун бири катары кабыл алдым. Эмнеге? Бул жерде катылып төөнүн тиштериндей орсойуп турган 6 учурду байкадым…
1- Жаңылыктын башкы каарманы болгон Санжар Сапарбеков Максим Бакиевдин жакыны болобу же башка болобу айырмасы жок, ал сот жообуна тартылып, күнөөсү далилденбегенден кийин аны «киши өлтүргүч, киллер» деп айтууга эч кимдин укугу жок болчу! Бирок Канат өзү кылмышка аралашып жүргөндөй, өзү сот болуп өкүм чыгаргандай Санжарды бир нече ирет уялбай туруп «киши өлтүргүч, кылмышкер, киллер» деп жарыя кылды. Анда ар кимибиз өзүбүзгө жакпаган четте жүргөн адамды «бул кылмышкер, бул киши өлтүргүч» деп жалаа жаба берсек боло береби? Мындай абийирсиздикке эч бир мыйзам жол бербейт! Менимче Санжар Сапарбековдун жакындары «Апрель» телеканалын доого жыгып сотко беришет деп ойлойм. Жеке менин оюмда Санжар деген жигит Атамбаев-Турганбаевдик репрессиядан жашырынып жүрүп, өзүнүн ак экенин далилдеп, чындыкка жетүү үчүн келгендей ой калтырды… Санжар өз акыйкатына жетет деп ишенем.
2- Журналист өзүнүн Жаныш Бакиевди башкы уюштуруучу катары сүрөттөп каралаган ушактарынын маалымат булагы катары «Вечерний Бишкек» гезитинин (2011-2013-жылдары чыккан сандары болсо керек) улам-улам белгилептир. 2010-жылдагы кандуу төңкөрүштөн кийин ал гезиттин чылбыры кимге өткөнүн жакшы билебиз. Албетте Атамбаевдин бийлигине кызмат кылган гезит алар каалагандай материалдарды 6 жыл бою байма-бай чагылдырып келгени жаңылык деле эмес. Бирок журналист калыстык иретинде ошол эле гезиттин жана башка оппозициялык маанайдагы басылмалардын 2009-жылдагы сандарына көз жүгүртсө Медет Садыркуловдун жөн гана шоопурдун калпыстыгы менен болгон жол кырсыгынан каза болгонун так жана бардык тиешелүү кызматтардан алынган факты-маалыматтары менен жазылганын көрмөк. Бул гана эмес Атамбаевдин маалымат каражаттары өздөрүнө пайдасы тийген жана керектүү болгон окуялар, маалыматтар жана адамдар жөнүндө бир да жолу унчукпай келишет. Андай учурда партиясы баш болуп, ушакчы журналисттери төш болуп ооздоруна бок толтуруп алышкансып унчукпай калышат. А эмне үчүн үч кишини өлтүрдү деген, атактуу полковник Чыныбек Алиевди атып өмүр бою кесилген Эркин Мамбеталиевди Атамбаев эркиндикке чыгарганын, транс улуттук саясий мафия уюштурушуп Атамбаев өзү жетектеп чуулгандуу «кылмыш аталыгы» Азиз Батукаевди бошотушканын такыр айтышпайт? Эмне үчүн? Көрдүңүздөрбү Атамбаевдин бийлиги Садыркуловдун өлүмүн Бакиевдерди каралоо максатында гана колдонушканын айдан ачык көрүнүп турат.
3- Казак элинде: «Кул казы болсо күлгө убал, уй казы болсо гүлгө убал, тул казы болсо күнгө убал» деген жакшы макал бар. Мен мурда бул макалга анчейин маани бербесем дагы Атамбаевдин бийлиги учурундагы кыйноо жолу менен алынган көрсөтмөлөр жана ойго келгис экспертизанын жыйынтыктарынан улам макалдын маанисине түшүндүм. Чын эле адамдын өрттөнүп күлү гана калган денесинен аны «кыйналып, сабалып, кордолуп, муунтулуп өлтүрүлгөн» деп төбө чачты тик тургузган криминалдык-экпертизалык чечимди ким чыгара алат эле? Андай күл менен арам иштерди жасоо кулдардын гана колунан келет эле… Мага азыркы күнгө чейин кантип күлдөн өлүмдүн келүү себептерин билип чыгышканы табышмак? Бул жерде дагы бир ШЕКТЕНҮҮ бар. Эгер чын эле Медет Садыркулов өлтүрүлгөн болсо, анда Бакиевдер эмес, Бакиевди элге жек көргөзөм дегендер өлтүргөн эмеспи? Садыркуловдун өлүмү 7-апрелдеги кан төгүүлөрдү жана Ош коогалаңын уюштурган чыныгы канкор топтун репетициясы болгондур балким?
4- Биз ошол 2005-2009-жылдары оппозициялык маанайдагы активдүү жаштардын катарында элек. Калп эле демократия, бактылуу жашоо, адилеттик деп кыйкырган саясатчыларды байма-бай көрүп турчубуз. Бир топ семинар, конференция, жыйын, съезддерге катышканбыз. Башкасын айтпай эле коёюн ошол кезде Медет Садыркуловду эң жек көргөн адам Алмазбек Атамбаев болчу. Ар бир жыйында дээрлик бардык саясатчылар Садыркуловду бүт өлкөнү кыйраткыч, бүт саясий оюндардын булагы, адилетсиздиктин символу катары сүрөттөшчү. Баарына Садыркулов күнөөлүү дешчү… Анан эле Садыркулов өлгөндөн кийин ал киши аппак, акыйкаттын символу, өлкөнүн Президенти болчу инсан сыяктуу сүрөттөлө баштады. Демек өздөрүнө керек эмес учурда ШАЙТАН, ал эми өздөрүнө керек учурда ПЕРИШТЕ дегендерге кантип ишенсе болот? Качанкыга чейин айткан сөздөрүнүн антонимин айтышып Садыркуловдун өлүмүн Бакиевдерге шыбай беришет?
5- Ошол 2009-жылдары Курманбек Бакиев Борбордук Азиядагы эң күчтүү Президент болчу. Бакиев менен Назарбаев, Рахмонов, Каримов гана эмес Путин дагы эсептешип, АКШ жана Кытай бийлиги менен тең ата мамиледе болчу. Эми ошондой күчтүү ПРЕЗИДЕНТ кантип эле оппозицияга кеткен Садыркуловдон коркуп калсын? Бакиевдерге Садыркуловдун бийликчилби же оппозиционерби маанилүү эмес болчу. Ал жөн гана катардагы киши эле. Эми өмүр бою ИИМдин, УКМКнын жетекчи кызматтарында иштеген генерал-лейтенант, чыгаан чекист Жаныш Бакиев кичинекей бала дагы ишенбей турган маңыроо киши өлтүрүүнү уюштурмак эле? Деги эле Бакиевдердин адамдык сапатында дагы, үй-бүлөлүк тарбиясында дагы, диний ишенимге бек жан дүйнөсүндө дагы АДАМ ӨЛТҮРҮҮ деген ойдун карааны да жашайбай турганын аларды жакын тааныгандар адамдар 11 жылдан бери айта беришип тилдери тешилгендей. Калпка качан чекит коюлат?
6- Кыргызстанда кылмыш хроникасын эң мыкты жана эркин чагылдырган «Дело №» деген гезит бар болчу. Мына ошол гезитте Атамбаевдин бийликке келиши менен мамлеттик канкор машина мурда болуп көрбөгөндөй иштеп: Бакиевдерди негизсиз каралоо, өч алуу жана көптөгөн кылмыштарды алардын атына жүзүкаралык менен чаптоо сыяктуу ири кампания жүргөнүн байма-бай жазышкан. Алардын бири катары Медет Садыркуловдун өлүмүн генерал Жаныш Бакиевге шылтоо максатында Атамбаев-Турганбаевдик сценарий түзүлүп чыгып, аны аткаруу Мелис Турганбаевге жүктөлгөнүн айтышкан болчу. Анан 2011-жылы СГО жана ИИМде иштеген, генерал Жаныш Бакиевдин жакын адамдары деген «клеймо» коюлган жазыксыз жигиттерди четинен кармашып 1937-жылдагыдай зомбулук жана зөөкүрдүк менен бир жыл кармашып, ойго келгис кыйноолор жана басым жасоо менен өздөрү каалаган көрсөтмөлөрдү алышкан. Алардын сценарийи: «Садыркуловду өлтүрүүгө отуздан ашык адам тартылган. Ал чек арадан өткөндө эле кармап алышкан болот. Анан дачага зордоп алып барып, Жаныш Бакиев өзү сабап, кыйнап, акырында «өчүргүлө» деп буйрук берип бирден муунтуп өлтүртөт. Акырында машинесин кулатып өрттөп салышат»,- деген күлкүлүү жомок болгон. Эң кызыгы ушунун баары күлдү текшергенде аныкталган… Мына ушул сценарийлерин ишке ашыруу үчүн: Эргешбек Маткаимовду, Марат Турдукулов, Бакыт Байжанов сыяктуу жигиттерди жана башка шектүүлөрдү акылга сыйгыс кыйноо жолу менен жасабаган кылмышты моюндарына алдырышканын сотто чыркырап айткандарына карабастан Атамбаевдик сот аларды күнөөлүү деп таап баарын темир тор артына жөнөткөн. Ал эми Жаныш Бакиевди үй-мүлкүн конфискациялоо менен өмүр бою эркиндигинен «сыртынан» ажыратышкан. Соттун бир жактуу болгонун, одоно мыйзамдар бузулганын, Бакиевдердин адамдык укуктары шылдыңдоо менен тепселгенин жана бийликтин өздөрү каалагандай өкүмгө жеткенин чындык өзү калыстык кылып айтып жаткандай… Чындык акыры жеңиши керек!
Акырында эмнени айтып, азыркы бийликтен эмнени сурангым келет?
1937-жылы 30- июлда СССРдин НКВДсынын комиссары Николай Ежов тарабынан №00447- жашыруун буйругу чыккан. Ага ылайык бүткүл союздун аймагында «Өзгөчө кырдаалдагы Үчтүк» түзүлүп коркунучтуу репрессиялар башталган. Жергиликтүү НКВДнын начальниги, прокурор жана обкомдун секретарынан түзүлгөн «үчтүктөргө» 200000 кишини камап, 70000 адамды атуу тапшырмасы берилген. Тарыхта «кандуу террор, чоң террор» деген бул кампаниянын жүрүшүндө камалгандарды эки категорияга бөлүп туруп, көпчүлүгүн алардын сөзүн укпастан, бир тараптуу тергөөнүн негизинде, көпчүлүгүн сыртынан өлүм жазасына кесишип аттыра берген. Мына Атамбаев дагы Ежов сыяктуу террор уюштургандай сезиле берет. Бирок анын эки категориясы тең Бакиевдерден жана алардын туугандары, жакындарынан өч алуу, каралоо, эркиндигинен ажыратуу жана мүлктөрүн тартып алуу болгон сыяктуу. Ал эми Садыркуловдун ишиндеги «Үчтүк» болсо: Атамбаев, Турганбаев жана соттон куралып, үчөөнүн бир гана максаты болгонун, ал болсо Президент Курманбек Бакиевди, генерал Жаныш Бакиевди жана Максим Бакиевди күнөөкөр катары каралоо жана кылмыш жоопкерчилине тартып, урук-туугандарын куугунттуктоо менен бирге тарых беттерине «Канкорлор» катары киргизүү болгондой…
Мына эми «Апрель» телеканалы айгайлап жаткандай МЕДЕТ САДЫРКУЛОВДУН ИШИ кайрадан ачыла турган кезең келгендей. Шектүү делген Санжар Сапарбеков дагы кармалыптыр. Эми Медет Садыркуловдун иши кайрадан ачылып анын өлүмүнүн себебинин чындыгы ордуна келе турган учурга жеткендей.
Качанкыга чейин генерал ЖАНЫШ БАКИЕВДИ Медет Садыркуловдун өлүмүнө күнөөлөй бересиңер?
Мына тарыхта «кандуу террор» уюштурган Ежов өзү атылып кетсе, Атамбаев камакта отурат.
Кайрадан МЕДЕТ САДЫРКУЛОВДУН иши ачылып, кайрадан адилеттүү тергөө жүрсө сот дагы баардык чындыкка чекит коёт болчу… Анткени Атамбаев сыяктуу кысып, басым көрсөтө турган бир дагы саясий фигура жок!
Мен Жаныш Бакиевдин күнөөлүү экенине, киши өлтүрүүнү уюштурганына ошол өкүм чыккан 2013-жылдардан бери ишенбейм! Генерал өзү дагы бир нече маектеринде күнөөсү жок экенин жана адилеттүү бийлик келсе сот аркылуу өз акыйкатына жетүүгө даяр экенин билдирип келет. Чындыгында Бакиевдер эч качан соттошуудан, акыйкатка жетүүдөн качпай турганын 11 жылдан бери айтып келе жатышат. Бирок негедир Бакиевди элге «Канкор» катары каралап таанытканга аракет кылган Атамбаевдер апрель окуясы боюнча да бир да жолу эл аралык Лондон сотуна беришкен эмес экен. Эмнеге? Анткени өздөрүнүн кылмышы ачылып калат деп коркушкандай…. Бир-эки жолу «Акча уурдап кетти» деп сотко бергенде өздөрүнүн калпы чыгып утулушканын билебиз… «Ак ийилет, бирок сынбайт»! Мен Медет Садыркуловдун өлүмү боюнча иштин кайрадан ачылышын талап кылат болчумун! Генерал-лейтенант Жаныш Бакиев акталышы керек!
Асейин Саралаев, Кочкордун тургуну

Садыр Жапаров Текебаевди сабагандарга бийликтин тиешеси жок экенин айтты

Президент Садыр Жапаров aryba.kg сайтына курган маегинде “Ата Мекен” партиясынын лидери Өмүрбек Текебаевге болгон кол салуу тууралуу суроого да жооп берди.

Өлкө башчы шайлоого байланыштуу Борбордук шайлоо комиссиясында (БШК) ызы-чуу басылбай жатканда ага бул окуянын кереги жок экенин айтып, “саясатчыга кол салуунун артында бийлик турат” деген сөздөрдү четке какты.

“Текебаевди сабап, телефонун алып кетишкендер жөнөкөй эле карапайым балдар болуп чыгышты. Көп өтпөй муштаган бала кармалды. Камакка алынды. Текебаевдин телефону кайтарылды. “Жөн гана Текебаевге жинибиз келип, “сен тажаттың” деп митингден кубалаганы келген элек” деп көрсөтмө берип жатышат. Биз башында окуя болор замат “Текебаев өзү атайын уюштуруп жаткан жокпу?” деп ойлодук эле. Текебаев болсо “бийликтин заказы” деп чыкты. Бирок эки жактын тең тиешеси жок, жөн гана жек көрүүдөн улам “митингден кубалайбыз” деп келишкен тентектер болуп чыкты”, – деген президент.

Өмүрбек Текебаевге 1-декабрда Бишкекте албууттанган топ кол салып, уюк телефону менен көз айнегин алып кеткен.

2-декабрга караган түнү Бишкек шаардык милициясы кылмышка шектүүлөрдүн бирин кармап, убактылуу кармоочу жайга киргизди. Милиция шектүү өз каалоосу менен Текебаевдин телефонун тартип сакчыларына тапшырганын билдирди. Иш Жазык кодексинин “Адамдардын тобу же алдын ала сүйлөшүү боюнча адамдардын тобу тарабынан тоноо” беренеси менен иликтенип жатат.

Текебаев өзү бул окуяны “саясий террор” деп, ишмердиги жана шайлоого байланыштуу позициясы менен байланыштырды. “Ата Мекен” партиясы лидерине болгон кол салууну саясий репрессия жана оппозицияны коркутуп-үркүтүү катары кабыл алганын жарыялады.

Улуттук коопсуздук боюнча мамлекеттик комитеттин төрагасы Камчыбек Ташиев Өмүрбек Текебаевге кол салуу болбогонун, ал кимдир бөрөөлөр менен урушуп кеткенин айткан.

Президент Садыр Жапаровдун «Манас» эпосунун күнү менен куттуктоосу

Кыргыз Республикасынын Президенти Садыр Жапаров бүгүн, 4-декабрда кыргызстандыктарды «Манас» эпосунун күнү менен куттуктады.

Мамлекет башчысынын куттуктоосу:

«Урматтуу мекендештер!

Сиздерди улутубуздун улуу байлыгы жана дөөлөтү болгон „Манас“ эпосунун күнү менен чын дилимден куттуктайм!

Тарыхына сыймыктанган ар бир эл өзүнүн адабий жана маданий мурасын аздектеп, аны даңазалоонун жүгүн көтөрөт. Ошол мурас, ошол дөөлөт бара-бара ошол элдин улуттук ураанына, руханий эн тамгасына айланып, дүйнөгө таанылат. Кыргыз элинин маңдайына бүткөн, таалайына жаралган байыркы „Манас“ дастаны бүгүнкү күндө дал ошондой милдетти аркалап келет.

Чынында эле, ата-бабалардын көчмөн цивилизациясы доорундагы гимни, Евразия мейкиндигинде жаңырып турган ыры болгон „Манас“ эпосу кыргыз элинин тарыхын, каада-салтын, үрп-адатын, адеп-ахлактык жүрүм-турумун, жалпы эле рухий жана социалдык турмушун чагылдырган эң баалуу энциклопедиялык булак. Көлөмү эле эмес, көркөмдүгү менен да бүт адамзатты таң калтырган улуу эпосубуздун ЮНЕСКО тарабынан Дүйнөлүк маданий мурастардын тизмесине катталышы да тегин жерден эмес.

Элдик оозеки чыгармачылыктын уникалдуу үлгүсү саналган „Манас“ эпосуна бүгүнкү күнү дагы дүйнөлүк фольклор таануу илиминин кызыгуусу артууда. Ал  көптөгөн мамлекеттердин окумуштууларынын изилдөө объектисине айланып, жалпы адамзаттык маданияттын казынасына кирди.

Мен улуу дастаныбызды муундан муунга өткөрүп, сактап келген манасчыларыбызга, аны жыйнап, изилдеп, жайылтууда „акылын азык, каруусун казык“ кылып, мээнет тарткан изилдөөчүлөрүбүзгө башымды ийип, таазим этемин.

Ааламдашуу маалында улуу эпопеябызды жаңы шартта иликтеп-изилдеп, чечмелеп, элибиздин калың катмарына жеткирип, андагы түбөлүктүү көөнөрбөс идеалдарды, баалуулуктарды жаштарыбыздын аң-сезимине сиңирүүбүз зарыл. Тамырына жана дилине ата-бабаларынын демин каткан муун гана Мекен, эл-жер үчүн күйө билип, аны көздүн карегиндей сактоону ыйык парз деп билет. Бул улуу сезимди көкүрөгүнө уютуп алып жүрөт.

Өлкө тарыхында биринчи жолу „Кыргыз мамлекеттик ‚Манас‘ театрынын“ түптөлүшү мыкты саамалык болду. Бул театр „Манас“ дастаны менен катар башка кенже эпосторду жана айтуучулук өнөрдү сактоо, жайылтуу жана даңазалоо милдетин аркалоого бел байлап отурат.

Мындан сырткары, эпостун негизинде көп сериялуу кинофильмдерди, балдар үчүн анимациялык тасмаларды тартып, „Манастын“ ыр, кара сөз түрлөрүндөгү варианттарын түзүп, аларды дүйнөнүн негизги тилдерине которуп, таркатып, пропагандалоону колго алуу зарыл. „Илиада“ жана „Одиссея“, „Рамаяна“ жана „Махабхарата“ сыяктуу оозеки мурастардын керемет эстеликтериндей эле, биздин „Манас“ дагы дүйнөнүн бардык илимий мекемелеринин, окуу жайларынын китепканаларында турушу керек.

Урматтуу кыргызстандыктар!

Сиздерди дагы бир жолу улуу „Манас“ дастаныбыздын күнү менен куттуктап, өлкөбүзгө өнүгүү, Мекенибизге тынчтык, элибизге биримдик каалайм! Манас бабабыздын арбагы ыраазы болуп, эркиндигибиздин туусу түбөлүк желбиресин!».

Бажы кызматкерлери бажы наркын жана бажы төлөмдөрүн аныктоо боюнча курстардан өтүштү

Үстүбүздөгү жылдын 10-23-ноябрларында бажы кызматынын 8 кызматкери “Бажы наркын жана бажы төлөмдөрдү аныктоо” темасы боюнча курстан өтүштү. Бул тууралу Бажы кызматынын басма сөз кызматы билдирет.

Окутуу Бишкек шаарындагы ЕККУнун программалык офисинин көмөгү менен Адистештирилген окутуу бажысынын базасында өттү. Семинарды өткөрүүдө РФнын Россия бажы академиясынын лектору –  Сокольникова Ольга Борисовна тартылган. Курсту аяктаганда бажы кызматынын кызматкерлерине тастыктамалар тапшырылды.

Министрлер Кабинети жогорку медициналык билим берүү программасы боюнча лицензия берүүгө убактылуу тыюу салды

Кыргыз Республикасынын Министрлер Кабинети билим берүү жана илим тармагындагы ыйгарым укуктуу орган тарабынан жогорку медициналык билим берүү программасы боюнча лицензия берилишине убактылуу мораторий киргизди. Тийиштүү чечимге Кыргыз Республикасынын Министрлер Кабинетинин Төрагасы Акылбек Жапаров кол койгон.

Кыргыз Республикасынын жогорку билим берүү чөйрөсүндөгү медициналык кадрларды даярдоо сапатын жогорулатуу максатында 2022-жылдын 1-январынан тартып 2023-жылдын 1-январына чейин жогорку медициналык билим берүү программалары боюнча билим берүү ишин лицензиялоого убактылуу тыюу салуу (мораторий) киргизилди.

Белгилей кетсек, акыркы жылдары Кыргыз Республикасында жогорку билимдүү медициналык кадрларды даярдоочу жогорку окуу жайларынын саны бир кыйла көбөйдү. Ошол эле учурда Кыргыз Республикасында жогорку билимдүү медициналык кадрларды 22 ЖОЖ даярдайт, анын 5и – мамлекеттик жана 17си – жеке менчик окуу жайлары.

Акыркы 5 жылдын ичинде (2016-жылдан 2021-жылга чейин) 12 жылдык билим базасында 5 жылдык окуу мөөнөтү менен, англис тилдүү чет элдик жарандар үчүн «Дарылоо иши» программасын ишке ашырган 10 жаңы ЖОЖ ачылды. Учурда медицина тармагына лицензия алуу үчүн арыздарды кабыл алуу уланууда (5 арыз кароодо), алардын бардыгы жетиштүү клиникалык база жана тийиштүү кадрлар менен камсыздалган эмес.

Жогорку окуу жайлары тиешелүү кадрдык, методикалык жана башка ресурстук камсыздоосу жок туруп, медициналык программаларга лицензия алууга аракет кылуу тенденциясы байкалууда. Бул жогорку медициналык билим берүүнүн сапатынын кескин төмөндөшүнө алып келген.

Руслан Казакбаев ЕБ эксперттерин Кыргызстанга келтирилген экологиялык зыяндарга баа берүүгө чакырды

Өлкөнүн тышкы иштер министри Руслан Казакбаев Кыргызстан көз карандысыздыкка ээ болгондон берки экологиялык зыяндарга баа берүү үчүн европалык эксперттерди жумушчу топ түзүүгө чакырды.

ТИМдин басма сөз кызматы билдиргендей, мындай сунуш Еврокомиссиянын тышкы саясат боюнча жогорку комиссары Жозеп Боррелдин “өлкөнүн тоо кен тармагындагы көйгөйлөргө тынчсыздануусуна” жооп иретинде айтылды.

Руслан Казакбаев менен Жозеп Боррель 22-ноябрда Душанбеде Европа Биримдигинин жана Борбор Азия мамлекеттеринин тышкы иштер министрлеринин 17-отурумунун алкагында жолугушту. Маалыматка караганда, Жозеп Боррель сүйлөшүү учурунда европалык инвесторлор кайра калыбына келе турган энергия булагы жана туруктуу өнүгүү тармагындагы долбоорлорго каражат салууга кызыктар экенин билдирди.

Буга чейин Кыргызстан алтын өндүргөн канадалык Centerra Gold Inc компаниясына кошумча экологиялык доо койгону белгилүү болгон.

Быйыл май айында парламент өкмөткө Кумтөр кенине тыштан башкаруу киргизүүнү тапшырган. Кумтөр ишин текшерген мамлекеттик комиссия канадалык компания Кыргызстанга салык жана экологиялык санкциялар үчүн 4 миллиард 252 миллион доллар карыз экенин билдирген. Ага чейин Октябрь райондук соту экологиялык нормаларды бузганы үчүн Centerra Gold компаниясын 261 млрд 719 млн 674 миң сом төлөөгө милдеттендирген.

Компания айыптоолорду четке кагып, кыргыз өкмөтүнө каршы эл аралык сотторго кайрылган.

Жогорку Кеңештин депутаттарын шайлоого даярдык көрүү жана өткөрүү боюнча республикалык штабдын кеңейтилген отуруму болду

Бүгүн, 23-ноябрда, Кыргыз Республикасынын Коопсуздук кеңешинин катчысы Марат Иманкуловдун төрагалыгында Жогорку Кеңештин депутаттарын шайлоого даярдык көрүү жана өткөрүүдө шайлоо комиссияларына уюштуруучулук-техникалык маселелерди чечүүдө көмөктөшүү боюнча республикалык штабдын кеңейтилген отуруму өттү.

Жыйынга ошондой эле Министрлер Кабинетинин Төрагасы Акылбек Жапаров, Мамлекеттик катчы Сүйүнбек Касмамбетов, Башкы прокурор Курманкул Зулушев катышты.

Коопсуздук кеңешинин катчысы 28-ноябрга пландалган Жогорку Кеңештин депутаттарын шайлоо өзгөчө болорун белгиледи. Анткени, эгемендүүлүктүн 30 жылдыгында биринчи жолу шайлоо жараяны мыйзамдуу, таза жана ачык-айкын өтөт.

Марат Иманкулов Кыргызстанда адилетсиз шайлоолорду өткөрүү үч жолу массалык толкундоолорго алып келгенин эске салды. Ал массалык түрдө административдик ресурс жана шайлоочуларды сатып алуу колдонулган өткөн жылдын октябрындагы шайлоо кампаниясын мисал катары келтирди. «Бул шылтоо болду. Чындыгында толкундоолорго себептер көп эле. Бул экономикалык кризис, пандемия, жакырчылык. Бул көйгөйлөр үйүлүп калган, анын үстүнө шайлоо маалында мамлекеттик органдар шайлоо мыйзамдарынын бузулушуна жол берип, шылтоого жол беришти», — деди ал.

Коопсуздук Кеңештин катчысы шайлоонун жүрүшүндө бир нече жылдан бери аныкталган мыйзам бузуулар улуттук коопсуздукка коркунуч келтирүүчү факторго айланганын баса белгиледи.

«Эгер мындан ары да ушундай жол менен кетип, шайлоо маалында мыйзамдуулукту камсыздабасак, анда түз эле туңгуюкка кептелебиз. Андыктан биз бул шайлоолорду сөз менен эмес, иш жүзүндө таза жана адилеттүү өткөрүүдөбүз», — деп түшүндүрдү ал.

Марат Иманкулов бул шайлоо жараянынын учурунда негативдүү көрүнүштөрдү сезилерлик төмөндөтүүгө мүмкүн болгонуна көңүл бурду. «Бүгүнкү күндө коркунучтуу жана токтоосуз түрдө Президенттин же Министрлер Кабинетинин кийлигишүүсүн талап кылган көрүнүштөр жок», — деди ал.

Мындан сырткары, Коопсуздук кеңешинин катчысы Кыргыз Республикасынын Президенти Садыр Жапаровдун «2021-жылдын 28-ноябрында Кыргыз Республикасынын Жогорку Кеңешинин депутаттарын шайлоону эркин, таза жана ачык-айкын өткөрүүнү камсыз кылуу боюнча чаралар жөнүндө» Жарлыгында жана Республикалык штабдын талаптарында мамлекеттик органдарга мыйзамдарды так сактоо жана буйруктарды кынтыксыз аткаруу боюнча так тапшырмалар берилгенин эске салды.

Жыйында ошондой эле Шайлоо жана референдум өткөрүү боюнча борбордук комиссиянын, Саламаттыкты сактоо, Энергетика, Тышкы иштер жана Ички иштер министрликтеринин жетекчилеринин, ошондой эле Президенттин облустардагы ыйгарым укуктуу өкүлдөрүнүн, Бишкек жана Ош шаарларынын мэрлеринин парламенттик шайлоого даярдыктары тууралуу баяндамалары угулду.

Жыйындын жыйынтыгы боюнча мамлекеттик жана жергиликтүү өз алдынча башкаруу органдарынын жетекчилерине КР Президентинин «2021-жылдын 28-ноябрында Кыргыз Республикасынын Жогорку Кеңешинин депутаттарын шайлоону эркин, таза жана ачык-айкын өткөрүүнү камсыз кылуу боюнча чаралар жөнүндө» Жарлыгына ылайык тийиштүү тапшырмалар берилди.

“Мекен таануу” предмети боюнча 3-класс үчүн жумушчу дептерде Баткен областынын контурларынын сүрөтүндөгү так эместиктер боюнча министрлик түшүндүрмө берди

Кыргыз Республикасынын Билим берүү жана илим министрлиги “Мекен таануу” предмети боюнча 3-класс үчүн жумушчу дептердеги Баткен областынын контурларынын сүрөтүндөгү так эместиктер боюнча төмөнкүлөрдү билдирет.

“Мекен таануу” предмети боюнча 3-класс үчүн окуу китеби 2014-жылы курамына Бухова Е.А., Солошенко О.В., Шаповалова Е.П. кирген автордук жамаат тарабынан «Аркус» басмасы» ЖЧК менен биргеликте иштелип чыккан.

Ошол эле жылы 3-класстын окууучулары үчүн “Мекен таануу” окуу китебинин предметтик стандартка ылайык келер-келбесин Кыргыз билим берүү академиясы карап чыккан. Аталган окуу китебине карата жумушчу дептер 2018-2019-жылдары ошонун негизинде иштелип чыккан.

«Аркус» басмасы» ЖЧКнын сүрөтчүсү жана дизайнери окуу китебинин текстин жасалгалоодо төмөнкү булактан алынган сүрөттү пайдаланышкан: https://ru.depositphotos.com/vector-images/карта-кыргызстана.html

Окуу-усулдук материалдардын сапатын жогорулатуу максатында 2020-жылы Билим берүү жана илим министрлигинин алдында “Окуу китеби” республикалык илимий-практикалык борбору түзүлгөн.

“Окуу китеби” борбору авторлор, илимпоздор жана басмалар менен иштешип, жаңы окуу китептеринин мазмунунун сапаты үчүн түздөн-түз жоопкерчилик тартат.

Авторлор басмалар менен чогуу даярдаган окуу китептери эми экспертизанын 4 түрүнөн: илимий экспертизадан, илимий-педагогикалык экспертизадан, антидискриминациялык жана гендердик экспертизадан өтүшөт, аталган үч экспертиза боюнча оң пикирлер алынган шартта окуу китептери практикалык-педагогикалык экспертизага (апробацияга) жөнөтүлөт.

Окуу китеби экспертизалардын бардык түрлөрүнөн өткөндөн кийин авторлор бардык сунуштарды эске алуу менен аны кайрадан иштеп чыгышат. Андан кийин “Кыргыз Республикасынын Билим берүү жана илим министрлиги тарабынан сунушталды” деген грифти алуу максатында коллегияда кароо үчүн окуу китеби министрликке жиберилет.

Окуу материалынын сапатын жогорулатуу жана мурда басылып чыккан окуу китептеринин каталарын жана так эместиктерин жоюу үчүн “Окуу китеби” борбору аларды кайра басып чыгарууда да экспертиза жүргүзөт.

Ушул тапта Кыргыз Республикасынын Айыл, суу чарба жана аймактарды өнүктүрүү министрлигинин алдындагы Жер ресурстары боюнча мамлекеттик агенттикке караштуу “Мамлекеттик картография” геодезия жана картография боюнча мамлекеттик мекемеси менен биргеликте кетирилген кемчиликтерди жоюу жана түзөтүүлөрдү киргизүү боюнча иштер жүргүзүлүп жатат.

Ошондой эле министрлик тарабынан колдонуудагы окуу китептеринде жайгаштырылган карталарга кайрадан экспертиза жүргүзүү демилгеленди.

Андан тышкары аталган окуу китебине жана жумушчу дептерге жүргүзүлгөн экспертизанын жагдайларын айкындоо боюнча кызматтык териштирүү жүргүзүлөт.

 

1-декабрдан тартып Кыргызстан менен Орусиянын ортосундагы аба каттамдары көбөйөт

1-декабрдан тартып Кыргызстан менен Орусиянын ортосундагы туруктуу аба каттамдарынын саны көбөйөт. Бул тууралуу Москвага жумушчу сапары менен барган Министрлер кабинетинин төрагасы Акылбек Жапаров Орусиянын өкмөт башчысы Михаил Мишустин менен жолукканда белгилүү болду.

Кыргызстандын Министрлер кабинетинин басма сөз кызматы кабарлагандай, сүйлөшүүлөрдүн жүрүшүндө өкмөт башчылары соода-экономикалык, маданий-гуманитардык жана отун-энергетикалык тармактардагы эки тараптуу мамилелерди өнүктүрүүнүн маанилүү маселелерин да талкуулады.

Ошол эле маалда тараптар Кыргызстанга билим берүү мекемелерин куруу долбоорун эртерээк баштоо маселесин сүйлөштү. Быйыл февралда президент Садыр Жапаров Орусияга барганда Москва Кыргызстанга орусча окута турган 44 мектеп курууга убада берген.

Мындан тышкары эки өлкөнүн өкмөт башчылары салык жана бажы системаларын санариптештирүү, анын ичинде салык жана бажы жол-жоболорун фискалдаштыруу маселелерин талкуулап, Кыргызстанда маалыматтарды иштеп чыгуунун заманбап борборун түзүү зарылдыгын белгилешти. “Биз үчүн Орусиянын бул багыттагы тажрыйбасы өтө маанилүү”, — деди Жапаров.

Өз кезегинде Михаил Мишустин орус тарап “эки тараптуу кызматташтыкты биргелешкен долбоорлор менен толуктап, жаңы деңгээлге чыгарууга” кызыкдар экенин белгиледи.

Буга чейин “Азаттык” радиосу ишенимдүү булактарына таянып, Жапаров Мишустин менен жолугуп, кыргыз-орус кызматташтыгын, анын ичинде энергетика, күйүүчү май боюнча маселени талкуулай турганын кабарлаган.

Улуттук статистика комитетинин маалыматына караганда, 2020-жылдын октябрь айынан бери өлкөдө АИ-95 жана АИ-92 бензинин бир литри 25-27 сомго, дизель отуну 32-33 сомдон 54 сомго чейин кымбаттаган. Кыргызстан мунайдын 95% Орусиядан сатып алат.

Садыр Жапаров UFC боюнча дүйнө чемпиону Валентина Шевченко менен жолугушуп, 1 млн сом белек кылды

Кыргыз Республикасынын Президенти Садыр Жапаров бүгүн, 22-ноябрда, кечээ Кыргызстанга (Бишкек ш.) келген мушкерлердин абсолюттук чемпионатынын (UFC) аралаш таймаш боюнча дүйнө чемпиону Валентина Шевченко менен жолугушту.

Мамлекет башчысы спортчуну жылуу кабыл алып, Валентина Шевченкону алтынчы жолу жеңил салмак боюнча UFC чемпиону наамын коргоп калышы менен куттуктады.

Садыр Жапаров чемпиондун ата-энесине жана машыктыруучусуна спортчуларды даярдоодогу жогорку чеберчилиги, алардын жеңишке карата болгон эрки жана эң жогорку натыйжаларга жетишкендиктери үчүн ыраазычылык билдирди.

«Сиздер ийгиликтер, талыкпаган эмгегиңиздер менен Кыргызстанды даңазалап келесиздер, ал эми мамлекет өз кезегинде спортко, спортчуларга, машыктыруучуларга жана ошондой эле келечектеги улуу спортчуларды тарбиялап чоңойткон ата-энелерге көңүл бурууга милдеттүү. Биз мындан ары да спорт менен машыгууну каалаган жарандарыбызга шарт түзүп берүү үчүн бардык күч-аракетибизди жумшайбыз», – деп белгиледи Президент.

Валентина Шевченко Мамлекет башчысына жана бардык кыргызстандыктарга көрсөткөн колдоосу жана жылуу кабыл алуусу үчүн ыраазычылык билдирип, өз үйү – Кыргызстанга кайтып келгенине кубанычта экенин билдирди.

Баарлашуу учурунда ал Лас-Вегаста өткөн UFC 266 турнириндеги кезектеги жеңишинен кийин Садыр Жапаровдун жеке өзү телефон чалып куттуктаганына абдан кубанганын баса белгиледи.

Валентина Шевченко бул спортчу үчүн мындан да көп жана мыкты иштөөгө чоң мотивация берерин кошумчалады. Ал эми жердештеринин колдоосун дайым сезип турарын жана алардын колдоосу дагы да дем берип, жеңишке болгон ишенимин арттырарын билдирди.

Президент Садыр Жапаров Валентинанын Кыргызстанга келиши бардык кыргызстандыктар үчүн кубанычтуу окуя экенин, себеби бүтүндөй өлкө анын ийгиликке жетишин каалап, анын спорттук жетишкендиктерин колдой турганын белгиледи. Ал спортчу Валентина Шевченкого мындан ары да ийгиликтерди, бекем ден соолук жана бакубатчылык каалады.

Мамлекет башчысы ага 1 млн сомдук сертификат, ошондой эле анын машыктыруучусу Павел Федотов менен апасы Елена Шевченкого эстеликке белектерди тапшырды.

Өз кезегинде Валентина Шевченко Президент Садыр Жапаровго кепка, футболка, ошондой эле ал үстүбүздөгү жылдын сентябрында Лас-Вегастагы UFC 266 беттешинде чемпиондук наамын 6-жолу коргогон өзүнүн мушкерлик мээлейин белек кылды.

Бишкектин Октябрь райондук прокурорунун орун басары Алтынбек Айдаров пара алып жаткан жеринен кармалды

Кечээ, 17-ноябрда КР УКМК тарабынан Кыргыз Республикасынын Башкы прокуратурасы менен биргеликте жүргүзүлгөн ыкчам-тергөө иш-чараларынын натыйжасында, пара талап кылуу фактысы боюнча Бишкек шаарынын Октябрь районунун прокурорунун орун басары “А.А.Э.” кармалды.

“А.А.Э.” кылмыш жоопкерчилигине тартамын деп коркутуу жолу менен, укук коргоо кызматкерлеринен 5000 АКШ доллар акча каражатын талап кылган. Кармоо учурундагы жүргүзүлгөн тинтүү иштеринин натыйжасында прокуратуранын кызматкери тарабынан аталган сумманын 200 миң сомдон ашык бөлүгүн опузалап алгандыгы тууралуу материалдык жана документалдык далилдер табылып алынды.

“А.А.Э.” КР Жазык-процесстик кодексинин 98-беренесине ылайык КР УКМК тергөө камак жайынын убактылуу кармоочу жайына киргизилди.

Азыркы учурда кармалган жарандын ушул сыяктуу башка мыйзамсыз фактыларга катыштыгы бар экендигин аныктоо боюнча тиешелүү тергөө-ыкчам иш-чаралары жүргүзүлүүдө.

Акыйкатчынын Тажикстанда абакта отурган кыргыз жараны боюнча катына жооп келе элек

Кыргызстандын Акыйкатчысынын кеңсеси Тажикстанда абакта отурган кыргыз жараны боюнча тажик тарапка жолдогон катына жооп келе элек. Бул тууралуу 17-ноябрда Акыйкатчынын басма сөз кызматы билдирди.

Маалыматка караганда, расмий кат Тышкы иштер министрлигине жана Тажикстандын Омбудсменине 11-ноябрда жөнөтүлгөн, азырынча жооп боло элек.

Тажикстандын Жийделик айылында жашаган Кыргызстандын жараны Сайдахмет Артиков (Саидакмат Артыков) эки ай мурда кармалган. Жакындары аны бошотууга көмөктөшүүнү өтүнүп кыргыз бийлигине кайрылган жана ал абакта кыйноо көрүп, ооруканага жатып чыкканына кабатырлыгын билдирген. 44 жаштагы Артыков ушул жылдын 16-сентябрында “чек арадан мыйзамсыз өттү” деген кине менен кармалып, Тажикстандын Кожент шаарындагы тергөө абагына камакка алынган.

12-ноябрда Бишкекте Артыковду бошотууну суранып акцияга чыккандар менен жолугушууга Министрлер кабинетинин төрагасынын орун басары Эдил Байсалов чыгып, маселени тийиштүү органдарга жеткирип, кыргыз жарандарын чыгарууга көмөктөшөрүн айткан.

УКМК: КР ЖК депутаттыгына талапкерлердин биринин өкүлү добуштарды сатып алуу фактысы боюнча кармалды

Кыргыз Республикасынын УКМК Кыргыз Республикасынын Кылмыш-жаза кодексинин 192-беренесинин 2-бөлүгүндө каралган кылмыштын негизинде (Шайлоочуларды сатып алуу) фактысы боюнча кылмыштардын жана жоруктардын бирдиктүү реестрине катталган сотко чейинки өндүрүштүн алкагында, шайлоочулар арасында акча каражаттарын бөлүштүрүү учурунда Бишкек шаарынын бир мандаттуу округу боюнча Кыргыз Республикасынын Жогорку Кеңешинин депутаттыгына талапкерлердин биринин ишенимдүү адамы, Кыргыз Республикасынын жараны “С.М.О.” кармалды.

Такталгандай, КР ЖК депутаттыгына талапкердин жакын тууганы болгон “С.М.О.”, “Кыргыз Республикасынын Президентин жана Кыргыз Республикасынын Жогорку Кеңешинин депутаттарын шайлоо жөнүндө” Кыргыз Республикасынын конституциялык Мыйзамын бузуу менен, Бишкек шаарынын райондук жана үй комитеттеринин айрым төрагаларын мыйзамсыз үгүт иштерин жүргүзүүгө, шайлоочуларды акчалай сыйлык алуу үчүн сатып алууга көндүргөндүгү аныкталды.

Ыкчам-иликтөө иш-чараларын жүргүзүүнүн жүрүшүндө, соттун санкциясы менен 2021-жылдын 16-ноябрында акча каражатын бөлүштүрүү учурунда пара менен кармалган “С.М.О.нун” добуштарын сатып алуу боюнча төгүндөлгүс фактылар табылган. Ошол эле учурда “С.М.О.” жана анын унаасын тинтүүдө  шайлоочулардын дареги көрсөтүлгөн тизмеси менен ири суммадагы акча каражаты  табылган.

Сурактын жыйынтыгы менен кармалган “С.М.О.” Кыргыз Республикасынын Жазык-процесстик кодексинин 98-беренесине ылайык, КР УКМКнын убактылуу кармоочу жайына киргизилди.

Учурда жогорудагы фактыларды аныктоо жана документтештирүү, ошондой эле шайлоочуларды сатып алуунун жогорудагы мыйзамсыз схемасына тиешеси бар башка адамдарды аныктоого багытталган тергөө-ыкчам иш-чаралары жүргүзүлүүдө.

Кыргыз Республикасынын УКМК Кыргыз Республикасынын Жогорку Кеңешинин депутаттыгына талапкерлер учурдагы шайлоо мыйзамдарынын жана саясий партиялар тарабынан Кыргыз Республикасынын шайлоо мыйзамдары бузулган учурда, Кыргыз Республикасынын мыйзамдары алкагында катуу чаралар көрүлөрүн эскертет.

КР УКМК нөөмөт бөлүмүнүн телефону: (0312) 62-05-85 (Бишкек ш), ошондой эле күнү-түнү иштеген аймактык башкармалыктардагы ишеним телефондорго кайрылсаңыздар болот:

  • Чуйская область (0312) 54-07 19:
  • Жалал-Абадская область: (03722) 5-60-49;
  • Ошская область: (03222) 2-30-78;
  • Иссык-Кульская область: (03922) 5-11-80;
  • Таласская область: (03422) 5-20-43;
  • Нарынская область: (03522) 5-08-49;
  • Баткенская область: (03622) 5-00-33.

КР УКМК Басма-сөз борбору, тел. 661455

Багуучусунан айрылган балдарды пенсиялык камсыздоо деңгээли жогорулатылды

Багуучусунан айрылган балдарды пенсиялык камсыздоо деңгээли жогорулатылды. Тийиштүү чечимге Кыргыз Республикасынын Министрлер Кабинетинин Төрагасы Акылбек Жапаров кол койгон.

Аталган чечим Кыргыз Республикасынын Президентинин «Жарандардын айрым категорияларына ар айлык социалдык жөлөкпулдардын өлчөмдөрүн жогорулатуу жөнүндө» Жарлыгын ишке ашыруу максатында кабыл алынган.

Багуучусунан айрылгандыгы боюнча пенсия алуучу ар бир баланын пенсиясынын базалык бөлүгүнүн өлчөмү атасынан же энесинен, же экөөнөн тең айрылган учурда Кыргыз Республикасынын Министрлер Кабинети тарабынан балдарга белгиленүүчү ар айлык социалдык жөлөкпулдун өлчөмүнөн төмөн болбоого тийиш деп белгиленген.

Багуучусунун биринен айрылгандыгы боюнча пенсия алуучу ар бир баланын пенсиясынын базалык бөлүгүнүн өлчөмү 2021-жылдын 1-октябрынан тартып  – 1500 сомго, 2022-жылдын 1-январынан тартып 2000 сомго чейин жогорулатылат.

Багуучусунан айрылгандыгы боюнча пенсия алуучу ар бир баланын пенсиясынын базалык бөлүгүнүн өлчөмү атасынан жана энесинен айрылган учурда, 2021-жылдын 1-октябрынан тартып 3000 сомго, 2022-жылдын 1-январынан тартып 6000 сомго чейин жогорулатылат.

Бүгүнкү күндө Кыргыз Республикасынын Социалдык фондунун органдарында болжол менен багуучусунан айрылгандыгы боюнча пенсия алуучу 60 миң адам турат. Анын ичинде ата-энесинин бирин жоготкондугу боюнча – 58,8 миң адам, ал эми ата-энесинен бирдей айрылган 500 миң адам турат.

БШК электрондук капчык аркылуу добуш сатып алууга көзөмөл жүргүзөт

Борбордук шайлоо комиссиясы электрондук капчык аркылуу шайлоочулардын добушун сатып алуу коркунучун алдын алууга байланыштуу кеңешме өткөрдү.

Ага Улуттук банктын, коммерциялык банктардын жана Финансылык чалгындоо кызматынын өкүлдөрү катышты. Анда идентификацияланбаган төлөм тутумдары аркылуу аткарылчу төлөмдөргө байкоо жүргүзүү маселеси талкууланды.
Жыйынтыгында добуш сатып алуунун мүмкүн болуучу учурларын аныктоо боюнча төмөнкүдөй чечим кабыл алынды:

  • БШК, Улуттук банк, коммерциялык банктар жана Финансы чалгындоо мамлекеттик кызматы шайлоо мезгилинде, айрыкча шайлоо датасына чейинки эки жуманын ичинде (2021-жылдын 15-ноябрынан 28-ноябрына чейин) жана шайлоодон кийин (2021-жылдын 29-ноябрынан 18-декабрына чейин) банк төлөмдөрүнө, банк мекемелеринин жана мобилдик байланыш операторлорунун, төлөм тутумдарынын мобилдик тиркемелери аркылуу төлөмдөрүнө байкоо жүргүзүүнү жүзөгө ашырат.
  • Төлөмдөрдү колдонуунун массалык мүнөзү (кыска убакыттын ичинде бир түзүлмөдөн бирдей суммада кайталанган транзакциялар же убакыттын белгилүү бир тогошунда катары менен бир нече күн бою мезгил-мезгили менен кайталанган бирдей суммалар) күмөндүү төлөм деп эсептелсин.

Жазык кодексине ылайык шайлоочулардын добушун сатып алуу 260 миң сомго чейин айып пул салынуучу же 2 жыл 6 айга чейин эркиндиктен ажыратуучу жоопкерчиликке тартуучу жазык жактан жазалоочу кылмыш болуп саналат.
Кыргызстанда шайлоочулардын добушун сатып алуунун жаңы ыкмасы колдонулат деген коркунуч бар экенин буга чейин Жогорку Кеңештин жалпы жыйынында депутат Дастан Бекешев айтып чыккан. Ал парламенттик шайлоонун үгүт өнөктүгү учурунда айрым талапкерлер жана партиялар электрондук капчык аркылуу добуш сатып алышы мүмкүн экенин айткан.
28-ноябрда өтө турган шайлоонун жыйынтыгында Жогорку Кеңештин 90 депутатынын 54ү Кыргызстан боюнча бирдиктүү округдан партиялык тизме менен, ал эми 36сы бир мандаттуу округдардан шайланып келиши керек. Соңку парламенттик шайлоо Кыргызстанда 2020-жылдын 4-октябрында өткөн. Шайлоо өтө ыплас өткөнүнө нааразылар эртеси күнү Бишкекте митинг өткөрүп, өлкөдө бийлик алмашкан.

УКМК: Дастан Бекешевдин шайлоо штабынын үгүт иштерине орто мектептердин окуучуларын пайдалануу фактысы аныкталды

КР УКМК Кыргыз Республикасынын Жогорку Кеңешинин депутаттыгына талапкер тарабынан КР Жазык кодексинин 194-беренесинде каралган «Шайлоолорду же референдумдарды өткөрүүдө каражаттарды мыйзамсыз пайдалануу» боюнча, Кыргыз Республикасынын шайлоо мыйзамдарын бузуу фактысы боюнча катталган сотко чейинки өндүрүш иштерин териштирүү жүргүзүүдө.

Тактап айтканда, Кыргыз Республикасынын Жогорку Кеңешинин депутаттыгына талапкер Д.Бекешевдин шайлоо фондунун каражаттарынан тышкары келишим түзбөстөн, агитаторлорго финансылык каражаттар төлөнгөндүгү аныкталган.

Мындан тышкары, «Кыргыз Республикасынын Президентин жана Кыргыз Республикасынын Жогорку Кеңешинин депутаттарын шайлоо жөнүндө» Кыргыз Республикасынын Конституциялык Мыйзамынын 22-беренесинин 15-бөлүгүн бузуу менен, 18 жашка чейинки курактагы өспүрүмдөр Кыргыз Республикасынын Жогорку Кеңешинин депутаттыгына талапкер Д.Бекешевдин үгүт иштерин жүргүзүшкөн.

2021-жылдын 15-ноябрында талапкер Д.Бекешев иштин жагдайлары боюнча өз ыктыяры менен көрсөтмө берүү үчүн КР УКМК органдарына келген.

Азыркы учурда жогоруда аталган сотко чейинки өндүрүш боюнча иштин жагдайларын аныктоо боюнча бардык зарыл болгон тергөө амалдары жүргүзүлүүдө.

Ошол эле учурда сотко чейинки өндүрүштүн материалдарынын көчүрмөлөрү тиешелүү чечим кабыл алуу үчүн КР БШКга жиберилет.

КР УКМК Кыргыз Республикасынын шайлоо мыйзамдарын бузуунун алдын алууга көңүл бурат.

Мыйзам бузуулар тууралуу маалымат болсо, КР УКМКнын 0312 620585 телефонуна кайрылууңуздарды өтүнөбүз.

Садыр Жапаров: Жогорку Кеңештин жаңы курамына бизнестен жана жарандык коомдон социалдык заказды түзүү зарыл деп эсептейм

«Мен 28-ноябрда жаңы шайлана турган Жогорку Кеңештин жаңы курамына бизнестен жана жарандык коомдон социалдык заказды түзүү зарыл деп эсептейм», – деп белгиледи бүгүн, 16-ноябрда, Кыргыз Республикасынын Президенти Садыр Жапаров, Кыргыз Республикасынын Президентине караштуу Коррупцияга каршы ишкердик кеңештин жыйынында сүйлөгөн сөзүндө.

Анын айтымында, Бизнес менен мамлекеттик органдардын, коомчулук менен аткаруу бийлигинин ортосундагы эффективдүү диалогдун механизми катары Антикоррупциялык ишкердик кеңешин түзүү тууралуу демилгесин коомчулук, бизнес чөйрөсү, инвесторлор, илим жана билим берүү мекемелери жапырт колдоого алышты. Өлкөдө коррупцияга каршы күрөшүү боюнча мамлекеттик саясаттын негизги багыттарын бардык кызыкдар тараптардын түздөн-түз катышуусу менен иштеп чыгуучу орган түзүлдү. Ошону менен бирге, бир нече ведомстволордун коррупцияга каршы иш-аракеттерди координация кылуусу жана алардын бирин-бири кайталоосу жоюлуу алдында турат.

Президент өлкө жаңылануу жолунда тез ыргак менен кетип жатканын баса белгиледи. Чоң системалык өзгөрүүлөр жүзөгө ашырылып жатат. Биринчи жолу Конституцияга коррупцияга каршы күрөшүү ченемдери киргизилди. Конституциянын 4-беренеси аркылуу мамлекеттик жана муниципалдык кызматкерлердин коррупцияга шарт түзө турган аракеттерине тыюу салынды.

Мындан сырткары, Мамлекет башчысы мыйзамдарды инвентаризациялоо жүргүзүлүп, бири-бирине карама каршы келген мыйзамдар оңдолууда.

Президент Садыр Жапаров мамлекеттин коррупцияга каршы саясаты кыска мөөнөттөгү тактикалык маселелерди жүзөгө ашыруу системасын өзгөртүүгө багытталганнына көңүл бурду. Бизнес коомчулугу, жарандык коом, илим жана билим берүү мекемелери мүмкүн болушунча тезирээк чечүүнү талап кылган артыкчылыктуу иштерди сунушташууда.

Эркин Салымбеков бюджетке 100 миллион сом төлөп, үй камагына чыгарылды

КР УКМК ЕАЭБ өлкөлөрүнө мекендик айыл чарба азыктарын ташуудагы коррупция фактысы боюнча козголгон кылмыш ишин иликтөөнү улантууда.

Мурда маалымдалгандай, КР Айыл чарба министрлигинин айрым кызмат адамдары жеке бизнес өкүлдөрү менен алдын ала сүйлөшүп алып, ЕАЭБ өлкөлөрүнө азыктарды экспорттоого уруксат кагаздарын каттоо үчүн экспорттоочулардан мажбурлоо жолу менен акча чогултуп, мыйзамсыз киреше алуу боюнча туруктуу канал уюштурушкан.

Буга байланыштуу Кыргыз Республикасынын Айыл чарба министрлигинин ведомствосунун башчысынын орун басарларынын жана өз алдынча түзүмдүк бөлүмдөрдүн жетекчилеринин деңгээлиндеги кызмат адамдары жеке менчик ишканалардын биринин ээси “С.Э.”  менен бирдикте кармалып, сот жообуна тартылышкан.

Тергөөнүн жүрүшүндө бул коррупциялык схемага тиешеси бар айрым ишканалардын салык төлөөдөн качкан фактылары да аныкталган.

Иликтөө иштеринин жүрүшүндө кылмышка шектүү “С.Э.” келтирилген зыяндын ордун толтуруу үчүн УКМКнын депозиттик эсебине 100 миллион сом салган, келтирилген зыяндын толук көлөмү текшерүүнүн жыйынтыгы менен белгиленет. Муну эске алуу менен Бишкек шаарынын Биринчи Май райондук соту аны  эч жакка кетпөө боюнча баш коргоо чарасына өзгөрттү.

УКМК бул кылмыш иши боюнча мамлекеттик бюджетке келтирилген зыяндын ордун толтуруу жана ушул ишке тиешеси бар бардык адамдарды аныктоо жана жоопкерчиликке тартуу боюнча ишин улантууда.

УКМК: Аламүдүн райондук милициясынын тергөөчүлөрү опузалап пара алуу фактысы боюнча кармалды

2021-жылдын 13-ноябрында УКМК тарабынан КР Жазык кодексинин 326-беренесинин 1-бөлүгү (Опузалап пара алуу) боюнча кылмыштардын жана жоруктардын бирдиктүү реестрине катталган сотко чейинки өндүрүш ишинин алкагында, КР ИИМ ички иликтөө кызматы менен биргеликте жүргүзүлгөн ыкчам-иликтөө иш-чараларынын натыйжасында, Чүй облусунун ИИББнын Аламүдүн РИББ тергөөчүлөрү опузалап пара алуу фактысы боюнча кармалды.  

 Тергөөчүлөр КРнын “Н.Д.” аттуу  жаранынан алдамчылык фактысы боюнча сотко чейинки өндүрүштү токтотуу үчүн 70 миң сом өлчөмүндө акча талап кылышкан.

2021-жылдын 10-ноябрында тергөөчүлөр Бишкек шаарындагы банктардын биринен “Б.К.Н.” аттуу жарандын банк картасы аркылуу “Н.Д.” өкүлү “А.И.” жарандарынан 70 миң сом алышып, 2021-жылдын 12-ноябрында тергөөчү “Г.М.Ш.” жаран “Н.Д.”га карата алдамчылык фактысы боюнча сотко чейинки өндүрүштү токтотуу жөнүндө токтом чыгарганы аныкталды.

Кармалган Чүй облусунун ИИББнын Аламүдүн РИББ тергөөчүлөрүнүн бири, “Г.М.Ш.” КР Жазык-процесстик кодексинин 98-беренесине ылайык КР УКМК тергөө камак жайынын убактылуу кармоочу жайына киргизилди. 

Азыркы учурда тийиштүү тергөө иш-чаралары уланууда.

Элчибек Жантаев Мамлекеттик кызмат жана жергиликтүү өз алдынча башкаруу иштери боюнча мамлекеттик агенттиктин директору болуп дайындалды

Бүгүн, 15-ноябрда Кыргыз Республикасынын Президенти Садыр Жапаров кол койгон тескемеге ылайык, Жантаев Элчибек Нуржадыевич Кыргыз Республикасынын Министрлер Кабинетине караштуу Мамлекеттик кызмат жана жергиликтүү өз алдынча башкаруу иштери боюнча мамлекеттик агенттиктин директору болуп дайындалды.

Мамлекеттик кадр кызматынын директору Абдырахман Маматалиев ээлеген кызматынан бошотулду

Бүгүн, 15-ноябрда Кыргыз Республикасынын Президенти Садыр Жапаров кол койгон Жарлыкка ылайык, Кыргыз Республикасынын Мамлекеттик кадр кызматынын директору Маматалиев Абдырахман Мадакимович ээлеген кызматынан бошотулду.

Эдил Байсалов, вице-премьер: "Өмүрбек Текебаев, сиз кеңеш берип жүрүп акыркы он жылда көрдүк, мамлекет кандай абалга кептелгенин"

КР Министрлер кабинетинин вице-премьери Эдил Байсалов өзүнүн facebook социалдык тармагындагы баракчасында атамекенчи Өмүрбек Текебаевди сынга алды:
Текебаевге жооп:
Президенттин Министрлерди чогултуп чогулуш өткөргөнүн көрө элекмин дейт. Эл көрүп туруш керек дейт. Биринчиден президент эл көрсүн деп популисттик менен силер окшоп иш кылбайт.
Экинчиден керек учурда министрлерге күн-түнү, керек болсо түнкү саат 3-4 төрдө телефон чалып же смс менен тапшырмаларды берип турат.
Ыкчам чечүүчү маселелер чыгып калганда тиешелүү министрлерди үйүнө да чогултат. Муну көп эле жолу көрүп жүрөбүз. Министрлер калп айттырбайт. Негизги министрлерди бир жумада бир эки жолу эмес, күндө чогултат.
Ал эми министрлер кабинетинин төрагасын күн сайын чакырып, ал аркылуу да бир топ тапшырмаларды берип турат.
Андыктан сиздин болжолдоп айткан акылыңыздын президентке кереги жок. Сиз кеңеш берип жүрүп акыркы он жылда көрдүк мамлекет кандай абалга кептелгенин.
Силер бийликке келгениңерден кийин өлкөнү башкарууга дараметиңер жетпегенин далилдегенсиңер. Ошондуктан, башка адамдарга акыл үйрөтүп, ооз ачканга акыңар жок. Болду эми, жетишет да! Эл дагы баарын көрүп, билип турат. Бийликти жөнү жок сындай берүүгө эч кандай олуттуу жүйөө жок. Негизгиси эл, мамлекет үчүн иш жүрүп жатат. Буйруса, Кыргызстан силердин популисттик кеп-кеңешиңерсиз деле гүлдөгөн мамлекеттердин бирине айланат.
Кыргыз элибиз айкөл, кечиримдүү элбиз да.
Ошол үчүн сиз бүгүн эл аралап талапкер болуп эл алдында сүйлөп жүрөсүз.
Сиз азыр элдин таразасына туруп атасыз. Президент толук мурун болбогондой таза жана айкын шайлоо өткөзүү боюнча тапшырма берди. Эл күбө: эч кымындай административдик ресурс бир да тарапка иштетилбей, кийлигишүү жок эсе! Эл аралык коомчулук да көрүп турат. Бирок, президент жооп бербейт деп эле, аны бир тараптуу каралоого да жол бербейбиз. Түзүлгөн жаңы Өкмөт конституциялык мандатка ээ. Толук кандуу иштеп атат. Конструктивдүү сын айтылсын. Азыркы абалга кимдер жооптуу экенин Элибиз жакшы билет! Акыйнек айтышып, муруңкуларга шылтай бергенге азыр бир мүнөт убакыт да жок. Ошондой болсо дагы, биз жоопсуз калтырбайбыз ар кандай асылууларды. Эл чечсин кимдики чын. Шайлоонун максаты ошондо эмеспи!

Манас Осмон, журналист: "Биздей, баарына эле ызылдай берген элге башчы болгон адам бактысыз"

2006-жылда Нахчеван шаарында түзүлүп, бирок, ошондон бери АКШ, Орусия жана Кытайга жалтактаган бир уюм бар эле. Муну түрк мамлекеттеринин кызматташтык уюму деп атап алганыбыз менен дүнүйөнүн булуң- бурчтарында азап тарткан, кырылган, түрмөлөрдө чириген кандаштарыбыз толтура. Арийне, биз сөз кылып жаткан уюм буларга билдирүү таратып гана чектелет. Анан, кызмат ордулары да, саясий. Бир саясатчы жумушсуз калганда бара турган жери Түрк Кеңеши же, анын курамындагы Түрксой, ТүркПА сыяктуу уюмдар.
Белгилүү драматург, Кыргыз эл жазуучусу Султан Раев Түрк Кеңешинде төрага орун басарлык кызматында отурат. Сөзүбүз ал кишиге эмес, системага.
Ушул жумада кыргыз ажосу да, Түрк тилдүү мамлекеттердин президенттеринин жыйынына жөнөп кетти. Жупуну бир учактан кол булгаламыш болду. Жакшына учак менен уят болбой баралы десе, ага да ызылдайт экенбиз. Эл аралык мамилелерди түзүү үчүн баратканда түзүгүрөөк барыш керек. Бирок, арга жок, биздей элге башчы болгон адам бактысыз. Ошентип, Түркчө сүйлөгөн элдердин ажолору кеңешме куруп, кызматташтык деген сөздүн башын шылкыйта чаап, түрк мамлекеттердин уюму деп өзгөртүп коюшту. Ажону коштоп баргандар ушул боюнча кеңири маалымат да, бералышкан жок. Эми бул уюмдун колунан эмне келет, эмне келбейт көрө жатаарбыз.
Мени таң калтырганы: Уюмдун ичинде “аксакалдар кеңеши” деген бир уюм пайда болуп, ага Бинали Йылдырым деген жашы 70 ти таяп калган бирок, сакалы жок карыя аксакалдар кеңешинин аксакалдыгына дайындалды. Бул киши Улуу Түрк парламентинин жыйынында депутат, көп жыл транспорт министри жана Түрк өкмөтүнүн премьер-министри кызматтарын аркалады. Р. Т. Эрдогандын курдашы, Адилеттүүлүк жана Өнүгүү партиясын кургандардын бириси эле. Өзү жана баласы жөнүндө түрк коомчулугунда ар кандай аңыздар бар. “Аксакалдар Кеңешинин аксакалы” деген ардактуу орун саясатта болбогон, Түрк дүйнөсү тегиз сүйгөн, дүйнөлүк кадыр баркы бар кишилердин орду эле. Мисалы, Чыңгыз Айтматов. Бүгүн ал киши жок бирок, Олжас Сулейманов, Мухтар Шаханов бар. Мындай кадырлуу инсандар башка Түрк тилдүү өлкөлөрдө аябай көп эле. Менимче, издеген жана сунуштаган адам болбоду!

Садыр Жапаров: "Шайлоодо добушун саткан да, сатып алып жаткан жарандар да жоопко тартыласыңар"

Бүгүн, 14-ноябрда кыргыз президенти Садыр Жапаров Facebook социалдык тармагындагы өз баракчасында жаңы пост жарыялаган
Урматтуу Кыргызстандыктар!
Шайлоодо добушун саткан да, сатып алып жаткан жарандар да жоопко тартыласыңар. Бир жарым жылдан эки жарым жылга чейин соттолуп кетесиңер. Жазык кодексинде ушундай берене бар. Ошондуктан, шайлоочулар добушуңарды сатпагыла, талапкерлер сатып албагыла. Эгер ушундай көрүнүштөр боло турган болсо, укук коргоо органдары катуу чара көргүлө! Мындан ары Кыргызстанда таза шайлоо салтын орнотобуз. Буга чейинки шайлоолор тарых болуп кала берсин.
Кыргыз Республикасынын Жазык Кодекси.
192-берене. Шайлоочуларды сатып алуу
1. Шайлоо өткөрүү мезгилинде акчалай каражаттарды төлөп берүү, же болбосо таратуу, материалдык баалуулуктарды тапшыруу же кандайдыр-бир кызматты же башка байгерчиликти алууга өбөлгө түзүү жолу менен шайлоочуларды сатып алуу IV категориядагы айып пул салууга жазаланат.
2. Кыргыз Республикасынын Президенттигине талапкер, Кыргыз Республикасынын Жогорку Кеңешинин же жергиликтүү кеңештин депутаттыгына талапкер, мамлекеттик бийликтин шайлануучу башка органдарына жана жергиликтүү өз алдынча башкаруу органдарына талапкер, ошого тете талапкердин жубайы, жакын туугандары жана ыйгарым укуктуу өкүлдөрү, ишенимдүү адамдары тарабынан жасалган ошол эле жосун V категориядагы айып пул салууга же
1-категориядагы эркиндигинен ажыратууга жазаланат.
1-категория. Эркиндигинен ажыратууга
(жашы жете электер – 1 жыл, 6 айга, башка адамдар – 2 жыл 6 айга чейин) жазаланат.

УКМК: Кыргыз жаранын коркутуп, 2 млн сом талап кылган уюшкан кылмыштуу топтун активдүү мүчөсү кармалды

Кечээ, 12-ноябрда Кыргыз Республикасынын УКМК тарабынан өзгөчө ири өлчөмдө пара талап кылуу фактысы боюнча жүргүзүлгөн Кыргыз Республикасынын Жазык проссесттик кодексинин 203-беренесинин 3-бөлүгүнүн 2-пункту (Опузалап талап кылуу) боюнча кылмыштардын жана жоруктардын бирдиктүү реестрине катталган сотко чейинки өндүрүш ишинин алкагында, акча каражатын алып жаткан жеринен уюшкан кылмыштуу тобтун активдүү мүчөсү “З.Б.” жана “С.А.” аттуу Кыргыз Республиксынын жараны кармалды.

Кармалган жаран “Б.И.” аттуу КР жаранынан күч колдонуу жолу менен коркутуп 2 миллион сом акча каражатын опузалап талап кылганы аныкталды.

Кармалган “З.Б.” Кыргыз Республикасынын УКМК тергөө камак жайынын убактылуу кармоочу жайына киргизилди.

Азыркы учурда бул кылмышка тиешеси бар башка адамдарды аныктоо боюнча ыкчам-тергөө иш-чаралары улантылып жүрүп жатат.

Президент Садыр Жапаровдун Түркияга болгон жумушчу сапары аяктады

Кыргыз Республикасынын Президенти Садыр Жапаровдун 11-12-ноябрь күндөрү Түркия Республикасынын Стамбул шаарына болгон жумушчу сапары аяктады.

Сапардын биринчи күнүндө мамлекет башчысы түркиялык ири бизнес өкүлдөрү менен жолугушуп, анда инвестициялык жана өндүрүштүк кызматташтыктын келечеги, мамлекеттик-жеке өнөктөштүктү өнүктүрүү, айыл чарба, тоо-кен жана жеңил өнөр жай, гидроэнергетика жана башка тармактарда өз ара аракеттенүү талкууланды.

Жумушчу сапарын улантып, Садыр Жапаров Түрк Кеңешинин башка лидерлери менен бирге Стамбул шаарында ТМКК Катчылыгынын жаңы штаб-квартирасынын ачылыш аземине катышты.

ТМККнын сегизинчи саммитинин жүрүшүндө Мамлекет башчысы сөз сүйлөп, анда уюмдун эл аралык аренадагы маанилүү ролун, ошондой эле Кыргызстандын мындан ары да түрк дүйнөсүнүн мамилелерине жана боордоштугуна активдүү катышууга, түрк мамлекеттеринин интеграциялык процесстерин өнүктүрүүгө олуттуу  салым кошууга даярдыгын белгиледи.

Ал ТМККга мүчө мамлекеттерди биримдикке жана кызматташтыктын бардык тармактарында өз ара аракеттенүүнү шайкеш келтирүүгө чакырды.

Садыр Жапаров ошондой эле Түрк Кеңешине мүчө-өлкөлөрдүн бардык лидерлери менен ТМККнын атын Түрк мамлекеттер уюмуна өзгөртүү жана макамын жогорулатуу боюнча бирдиктүү пикирин билдирди.

Саммиттин жыйынтыгында мамлекет башчылары бир катар документтерге кол коюшту, атап айтканда Түрк тилдүү мамлекеттердин кызматташтык кеңешинин атын Түрк мамлекеттер уюму деп өзгөртүү, Түркмөнстанга Түрк мамлекеттер уюмуна байкоочу макамын берүү, Түрк мамлекеттер уюмунун сегизинчи саммитинин декларациясы, «Түрк дүйнөсүнүн көз караштары 2040» стратегиялык документин кабыл алуу чечими, Түрк фондун түзүүнү аяктоо ж. б.

Саммиттин аянтчасында Президент Садыр Жапаров Азербайжан Республикасынын Президенти Ильхам Алиев, Өзбекстан Республикасынын Президенти Шавкат Мирзиёев, Венгриянын Премьер-министри Виктор Орбан, Түркмөнстандын Президенти Гурбангулы Бердымухамедов жана Түркия Республикасынын Президенти Режеп Тайып Эрдоган менен эки тараптуу сүйлөшүүлөрдү өткөрдү.

Сүйлөшүүлөрдүн жүрүшүндө тараптар саясий, соода-экономикалык жана маданий-гуманитардык чөйрөлөрдө кызматташууну чыңдоонун актуалдуу маселелерин талкуулашып, жакынкы келечекте кызматташуунун пландарын белгилешти.

Президент Садыр Жапаров иш сапарын аяктаган соң, 13-ноябрь күнү эртең менен Бишкекке кайтып келди.

Меню