Түркиядагы жер титирөө

Газиантеп шаарынан 17 кыргызстандыкты Казакстанга учак менен жөнөтүү маселеси чечилгени да маалыматта айтылат. Аларды Астанадан кыргыз элчиси тосуп алып, убактылуу жайга жайгаштырып, Кыргызстанга жөнөтөт.

Андан тышкары 20дан ашык кыргызстандык Газиантептен Анталияга, Аланияга жана Анкарага эвакуацияланат. Кыргызстандын Анталиядагы консулдугунун кызматкерлери Хатай провинциясынан ондой кыргызстандыкты коопсуз жерге көчүрүп жатат. Буга чейин Османийе жана Адана шаарларынан беш жаран эвакуацияланды.

Кахраманмараш шаарында жашаган, буга чейин дайынсыз болуп жаткан эки жаран байланышка чыгып, ал жерден үч жаран коопсуз жайга чыгарылды. Малатия шаарында он адамга жардам берилип, алардын ичинен эки бала жана кош бойлуу аял Түркиянын аскердик учагы менен Анкарага жеткирилди.

Буга чейин Тышкы иштер министрлиги Анкара жана Стамбул шаарларында гуманитардык жардам чогултуу пункттары иштеп жатканын, Кыргызстандан барган куткаруучулар тобу Кахраманмараш шаарында ишке киришкенин билдирген.

6-февралда Түркия менен Сирия чектешкен аймакта жер эки жолу катуу силкинип, күчү 7,5-7,8 баллга жеткен. Соңку маалыматка караганда, Түркия менен Сирияда мерт болгондор 11 миңден, жарадарлар 45 миңден ашты.

Ал Фейсбуктагы баракчасына банк эсептерин, акча которууга байланыштуу төмөнкү маалыматтарды жарыялады:

Банк: “Айыл Банк” ААК
ИНН 01803199710084
БИК 135001
ОКПО 30597768
Эсеп № 1350102119900169 “Финансы министрлигинин транзиттик эсеби (Түркия Республикасына жардам)” (сом, АКШ доллары, евро);
Төлөм коду 14411100 – “Учурдагы жардам”;
Максаты: Түркия Республикасына жарандардан жана юридикалык тараптардан жардам.

Султанбаев кандуу кырсыкка байланыштуу Өзгөчө кырдаалдар министрлигинин түз байланышы (112) жана президенттик администрациянын Кырдаалдык борбору (0312) 662292 иштеп жатканын маалымдап, президенттик администрацияда иштегендер бир күндүк маяналарын Түркияга жардам ирээтинде которгонун билдирди.

Мунун алдында Түркиянын Кыргызстандагы элчилиги жер титирөөдөн жабыркагандарга гуманитардык жардам бергиси келгендер Бишкектеги кеңсесине кайрылса болорун билдирген. Анда үй-жайсыз калгандарга керектүү, суукка ыңгайлуу кийим-кечелер жана чатыр, жууркан-төшөк, керебет өңдүү буюм-тайымдар жаңы болуп, жылтырык баштыктарга салынышы керектиги белгиленген. Андан сырткары көп убакытка сакталчу тамак-аштар да кабыл алынары жазылган.

Ошондой эле акчалай жардам берүүнү каалагандар үчүн банктык эсептерин көрсөткөн.

Буга чейин социалдык тармактарга Түркияда катуу жер титирөөдө жабыркагандарга гуманитардык жардам көрсөтүү демилгеси байма-бай көтөрүлүп жаткан.

“Анадолу” маалымат агенттиги Түркияда катуу жер титирөөдө каза болгондордун саны кеминде 3381ге жеткенин, дагы 20 миңден ашык адам жараат алганын жазды. Учурда урандыларды тазалоо, куткаруу иштери жүрүп жатат, мындан улам мерт болгондор дагы көбөйүшү ыктымал.

Коңшу мамлекет Сирияда 1,5 миңдей киши набыт болуп, дагы жүздөгөн тургун жабыркаганы кабарланууда.

Расмий Анкара үч миңдей имарат, турак жай кыйраганын билдирген. Түрк президенти Режеп Тайып Эрдоган кандуу кырсыктан улам өлкөдө бир жума аза күтүү жарыялады.

Эл аралык медиалар НАТОго, Европа Биримдигине мүчө жана башка ондогон мамлекет Түркияга жардам сунуштаганын жазды. Алардын арасында Кыргызстан да бар жана расмий Бишкек 60тан ашык адамдан турган куткаруучу топ жөнөткөн.

Түркия менен Сирия чектешкен аймакта 6-февралда таңга жуук күчү 7,8 баллга жеткен зилзала болгон. Түш оой аймакта күчү 7,5 баллга жеткен жер титирөө кайталанган.