Menu

БАШКАЛАР

УКМК: Кыргыз-тажик чек арасына жакын жерде баасы 1 млн сомдук 6000 даана энергетикалык суусундукту аткезчилик менен ташып бараткандар кармалды

КР УКМК аткезчилике каршы күрөшүү боюнча жүргүзүлүп жаткан иш-чаралардын алкагында, 2022-жылдын 8-майында Баткен районунун Жаңы-Жер айылынын аймагында, Сох анклавына жакын жерде, КР УКМК ЧК кызматкерлери менен биргеликте жалпы баасы 1 миллион сомдон ашык болгон 6060 банка энергетикалык суусундуктарды ташып бара жаткан “Мерседес Бенц Спринтер” жана “Фольксваген Крафтер” үлгүсүндөгү  автоуналардын айдоочулары Б.Н. жана С.М. менен кармалган.

Бул факты маалыматтарды каттоо журналына катталып, азыркы учурда тергөөгө чейинки текшерүү иштери жүрүп жатат.

Кыргызстан менен Казакстан чек арада жүк ташуучу унаалардын кезегин болтурбоо макулдашылды

Министрлер кабинетинин төрагасынын орун басары Арзыбек Кожошев менен Казакстандын соода жана интеграция министри Бахыт Султанов эки өлкөнүн чек арасынын жүктөрдү өткөрүүнүн абалын талкуулашты.

Бул тууралуу өкмөттүн маалымат кызматынан кабарлашты. Маалыматка ылайык, видео байланыш аркылуу сүйлөшүүдө быйыл январдагы эки өлкөнүн соода-экономикалык кызматташтык боюнча жумушчу тобу кабыл алган протоколдун аткарылышы талкууланды. Анын жыйынтыгында кыргыз-казак чек арасында жүк ташуучу унаалардын кезегин болтурбоо макулдашылды.

Кыргыз-казак чек арасындагы “Ак-Тилек” көзөмөл бекетинде Казакстандын аймагына кирүү үчүн кезек күткөн автоунаалар топтолгон учурлар буга чейин бир нече жолу болгон эле. Расмий бийлик мунун себеби катары айрым айдоочулар тийиштүү уруксат кагаздарын даярдабай барганын аташса, жүк ташыгандар казак тараптан бут тосуу бар экенин билдирген эле.

Акылбек Жапаров кайра иштетүүчү ишканалардын өкүлдөрү менен жолугушту

Кыргыз Республикасынын Министрлер Кабинетинин Төрагасы Акылбек Жапаров ата мекендик кайра иштетүүчү ишканалардын өкүлдөрү менен жолугушту.

Жолугушуунун жүрүшүндө азык-түлүк коопсуздугун камсыздоо, айыл чарба тармагына мамлекеттик колдоо көрсөтүү жана антикризистик чараларды иштеп чыгуу жаатындагы актуалдуу маселелер талкууланды.

Министрлер Кабинетинин башчысы өлкөнүн азык-түлүк коопсуздугун 9 кластер боюнча, анын ичинде эт продукциясы (бодо мал жана кой-эчки, канаттуулар, балык), сүт продукциясы, ун, кант, өсүмдүк майы, жашылча-жемиштер менен камсыздоо зарылдыгын белгиледи.

«Биз жеңилдетилген кредиттерди берүү жана каржылоо, лизинг аркылуу кластерлерди өнүктүрүү жолу менен агроөнөр жай комплексине зарыл колдоо көрсөтүүгө умтулуудабыз. Мамлекеттик банктар, Россия-Кыргыз өнүктүрүү фонду, «Кепилдик фонд» ачык акционердик коому өндүрүштүн көлөмүн көбөйтүү жана өлкөнүн тамак-аш азыктарынын негизги түрлөрүнө болгон муктаждыктарын камсыздоо максатында тийиштүү каржылоону сунуштайт. Мен жума сайын азык-түлүк коопсуздугу маселелерин чечүү иретинде жумушчу жолугушууларды өткөрүүгө даярмын», – деди Акылбек Жапаров.

Белгиленгендей, Министрлер Кабинетинин чечими менен «Агроөнөр жай комплексин насыялоо» долбоору бекитилген, ага ылайык, жеңилдетилген кредиттерди берүү жана каржылоо, анын ичинде каражатты ислам принциптерине ылайык сунуштоо үчүн «Айыл Банк» жана «РСК Банк» ачык акционердик коомдоруна 10 млрд сом бөлүнгөн.

Жолугушуунун жыйынтыгында тармактык мамлекеттик органдарга агрардык секторго мындан ары мамлекеттик колдоо көрсөтүү маселелерин иштеп чыгуу боюнча бир катар тапшырмалар берилди.

Тоолордун экосистемасын жана климаттык туруктуулукту коргоо жылын өткөрүү боюнча Жол картасы бекитилди

Тоолордун экосистемасын жана климаттык туруктуулукту коргоо жылын өткөрүү боюнча Жол картасы бекитилди. Тийиштүү токтомго Кыргыз Республикасынын Министрлер Кабинетинин Төрагасы Акылбек Жапаров кол койгон.

Тоолордун экосистемасын жана климаттык туруктуулукту коргоо жылын өткөрүү боюнча Жол картасы Кыргыз Республикасынын Президентинин 2022-жылдын 31-январындагы № 17 «2022-жылды Тоолордун экосистемасын коргоо жана климаттык туруктуулук жылы деп жарыялоо жөнүндө» Жарлыгын ишке ашыруу максатында иштелип чыккан жана жактырылган.

Белгилүү болгондой, Кыргыз Республикасынын 2021-жылдын 16-декабрындагы демилгеси колдоого алынып, Бириккен Улуттар Уюмунун Башкы ассамблеясынын 76-сессиясынын катышуучулары тарабынан 2022-жылды «Тоолорду туруктуу ɵнүктүрүүнүн эл аралык жылы» деп жарыялоо жөнүндө резолюциясы бир добуштан жактырылган.

Кыргыз Республикасы 2019-жылы БУУнун климаттын өзгөрүшү жөнүндө Алкактык конвенциясын ишке ашыруу боюнча Париж макулдашуусуна кол койгон жана климаттык милдеттенмелерди өзүнө алган. Кыргыз Республикасынын милдеттенмелери 2021-жылы климаттын өзгөрүүсүнүн кесепеттери менен күрөшүү жана парник газдарынын эмиссиясын кыскартуу боюнча глобалдык аракеттер иретинде, Кыргыз Республикасынын “Улуттук деңгээлде жаңыланган салым” планы катары таризделген.

Жаңыланган климаттык милдеттенмелерге ылайык, Кыргыз Республикасы 2030-жылга карата парник газдарынын эмиссиясын “адаттагыдай эле бизнес” сценарийи боюнча – 15,97 %га жана эл аралык колдоо менен 43,62 %га кыскартуу милдетин алат.

Тоолордун экосистемасын коргоо боюнча жол картасы парник газдарын бөлүп чыгарууну азайтуу, тоолордун экосистемасын сактоо, Бишкек шаарындагы абанын булганышын азайтуу, климаттын өзгөрүүсү чөйрөсүндө саясатты иштеп чыгуу, климаттык каржылоону тартуу жана илимий практикалык конференцияларды, эл аралык иш-чараларды өткөрүүнү көздөйт.

Алматыда каза болгон кыргыз жараны Азиз Мусаевдин сөөгү туугандарына берилди

Казакстандагы тополоң учурунда Алматы шаарында каза болгон кыргызстандык жаран Азиз Мусаевдин сөөгүн апасы менен агасы Кыргызстанга алып кетти. Бул тууралуу Алматыдагы Кыргызстандын Башкы консулу Назарали Арипов билдирди.

Алматыда каза болгон дагы бир кыргызстандык Бахтияр Базарбаевдин сөөгүн алып кетүүгө дагы уруксат берилди. Консулдун айтымында, Базарбаевдин жакын туугандары келгенден кийин сөөгү берилет.

Алматыдагы башкы консул камакта жаткан төрт кыргызстандыкты бошотуу боюнча иштер жүрүп жатканын, 14-январда дагы тийиштүү органдын адамдары менен жолуга турганын билдирди.

33 жаштагы Азис Мусаев Алматынын борбордук аянтында жараат алгандардын бирине көмөк көрсөтүп жатып окко учканы маалымдалган. Ал 2016-жылдан бери коңшу өлкөдө фитнес-машыктыруучу болуп иштеп жаткан. Ал эми Бактияр Базарбаев боюнча маалымат жокко эсе. Анын Казакстанда жүргүнчү ташып иштеп жүргөнү айтылып жатат.

Мындан тышкары казак бийлиги тополоңдорго шек санап 1990-жылкы Закир Юбуров, 1991-жылкы Адан Хуров, 1987-жылкы Ильяс Мачо жана 2001-жылкы Абду-Рахим Жиншанлону камаганы белгилүү. Алар азыркы учурда Алматынын убактылуу кармоочу жайында камакта.

Буга чейин Казакстанда кармалган кыргызстандык музыкант Викрам Рузахунов кыргыз бийлигинин кийлигишүүсүнөн кийин бошотулуп, Кыргызстанга кайтарылган.

Акыркы маалыматтарга ылайык, Казакстанда тополоңго байланыштуу кармалгандардын саны 10 миңге чамалады. Кыргызстандын Тышкы иштер министрлиги алардын арасында дагы кыргыз жарандарынын бар же жогун текшерип жатат.

КР ТИМи РФ полициясы белгисиз жаранга карата күч колдонгону тууралуу видеоматериал боюнча билдирүү таратты

Кыргыз Республикасынын Россия Федерациясындагы Элчилиги социалдык тармактарда Россия Федерациясынын укук коргоо органдарынын кызматкерлеринин белгисиз жаранга карата күч колдонгону тууралуу видеоматериал боюнча төмөндөгүлөрдү билдирди.
Учурда Элчилик окуянын чоо-жайын тактоо боюнча тиешелүү иштерди жүргүзүүдө.
Ошондой эле Элчилик Кыргыз Республикасынын жарандарынан жана жалпыга маалымдоо каражаттарынан социалдык түйүндөрдө деструктивдүү мүнөздөгү такталбаган маалыматтарды жана комментарийлерди таркатпоого чакырат.
Ошол эле учурда бул иш боюнча кошумча маалымат берилерин белгилейбиз.

Эдил Байсалов: Жаңы Министрлер Кабинети жогорку квалификациялуу адистерди ишке тартат

Кыргыз Республикасынын Министрлер Кабинетинин Төрагасынын орун басары Эдил Байсалов Кыргыз Республикасындагы JICA Туруктуу өкүлү Немото Наоюки менен жолугушту.

Эдил Байсалов Япония Өкмөтүнө эки өлкө ортосундагы кызматташтык алкагында көрсөтүлгөн көмөгү үчүн ыраазычылык билдирди жана өнүктүрүү боюнча өнөктөштөр менен иш күчөтүлөөрүн белгиледи.

Тараптар мамлекеттик кызматкерлердин квалификациясын жогорулатуу маселесин талкуулады. Тактап айтканда, кеп Адам ресурстарын өнүктүрүү үчүн стипендиялар программасы (JDS) тууралуу жүрдү.

Өз кезегинде Министрлер Кабинетинин Төрагасынын орун басары белгилегендей, жаңы Министрлер Кабинети жогорку квалификациялуу адистерди ишке тартууга умтулууда.

«Сиздерге белгилүү болгондой, реформаларды ийгиликтүү ишке ашыруу үчүн күчтүү кадрлар керек. JDS програмасы боюнча билим алган мамлекеттик кызматкерлердин жумушчу орду гана сакталбастан, алар окуусун аяктаган соң карьералык өсүүсү камсыздалат. Биз аталган программа жана башка өнүктүрүү долбоорлору алкагында кызматташтыгыбызды күчтөндүрөбүз», – деди Министрлер Кабинетинин Төрагасынын орун басары.

Сот "Ата-Мекенчи" экс-премьер-министр Жоомарт Оторбаевди Кумтөрдөгү коррупция боюнча 30-сентябрга чейин камакка алды

Бүгүн, 18-сентябрда Бишкектин Биринчи май райондук соту “Кумтөр” алтын кениндеги коррупция фактылары боюнча козголгон кылмыш ишинин алкагында 16-сентябрда кармалган “Ата-Мекен” партиясыныны мүчөсү, экс-премьер-министр Жоомарт Оторбаевди 30-сентябрга чейин тергөө абагына камакка алды.

Жоомарт Оторбаев “Ата-Мекен” партиясынын Саясый кеңешинин мүчөсү катары 2010-жылдагы парламенттик шайлоого аталган партиянын тизмесинин курамында катышкан. Шайлоодон соң  жеңүүчү партиялардын бири катары “Ата-Мекен” партиясына бир нече министрлик жана вице-премьер-министрлик кызматтары бөлүнгөндө Жоомарт Оторбаев 2011-2012-жылдарда вице-премьер, биринчи вице-премьер кызматтарын аркалаган.

2014-2015-жылдары Жоомарт Оторбаев Ата-Мекен” партиясынын атынан КР Премьер-министри болуп шайланып, кыргыз өкмөтүн башкарган.

Ошол жылдары КСДП жана “Ата-Мекен” партияларынын тымызын колдоосу менен Канадалыктарга Кумтөрдөгү Лысый жана Давыдов мөңгүлөрүн талкалоого парламент аркылуу мыйзам өткөрүп, жол ачып беришкен.

Жусуп Абдрахмановго “Кыргыз Республикасынын Баатыры” эң жогорку артыкчылык даражасы ыйгарылды

Мамлекеттин жана Кыргызстан элинин алдында сиңирген көөнөрбөс эмгеги жана туулган күнүнүн 120 жылдыгына байланыштуу советтик мамлекеттик жана партиялык ишмер Жусуп Абдрахмановго “Ак Шумкар” өзгөчө белгисин тапшыруу менен “Кыргыз Республикасынын Баатыры” эң жогорку артыкчылык даражасы ыйгарылсын (каза болгондон кийин).

Тийиштүү Жарлыкка Кыргыз Республикасынын Президенти Садыр Жапаров кол койду.

2021-жыл 31-август

Баткен милициясы: Ак-Татыр айылынын 6 тургуну жолдон өткөн автоунааларды токтотуп, "тажиктерге алып баратасын" деген шылтоо менен бөтөн буюмдарды тартып алышып, жок кылышып келишкен

Баткен районунун Ак-Татыр айылында Ош-Исфана автожолунда элдик кошуундардан түзүлгөн топ 2021-жылдын 21-июль күнү болжол менен саат 13.30дар чамасында Исфана багытын көздөй бара жаткан “Спринтер”
үлгүсүндөгү автоунааны токтотушкан. Ал унаа токтобой кеткенде артынан “Ауди” үлгүсүндөгү  унаа менен Ак-Татыр айылынын 4 тургуну кууп барып, “Спринтер” үлгүсүндөгү  унааны кысып токтотушкан. “Спринтер” үлгүсүндөгү
унаада Бишкек шаарындагы Дордой базарынан Лейлек районуна алып бара жаткан кийим-кечелер болгон.
Бул факт Баткен РИИБнин КЖБРне Кыргыз Республикасынын Жоруктар жөнүндө кодексинин 119-беренеси (майда ээнбаштык) менен катталып, текшерүү иштери жүрүп жатат.
Ошондой эле Лейлек районунун Арка-2 айылынын 32 жаштагы К.А. аттуу тургуну 24-июль күнү өзүнүн “Спринтер”  үлгүсүндөгү унаасына 600 кг жүзүм, 600 кг алма жүктөп, Бишкек шаарына алып жөнөп болжол менен саат
23.30дар чамасында Ак-Татыр айылында турган элдик кошуундар  унааны токтотуп, жемиштер Тажик Республикасынан аткезчилик жол менен бара жатат деп айдоочуну тилдеп, уруп 600 кг жүзүмдү дарыяга агызып жиберишкен.
Бул факт Баткен РИИБнин КЖБРне Кыргыз Республикасынын Жоруктар жөнүндө кодексинин 119-беренеси (майда ээнбаштык) менен катталып, текшерүү иштери башталган.
Андан соң,  24-июлдан 25-июлга караган түнү Ош-Исфана унаажолундагы Ак-Татыр айылында элдик кошундар Лейлек районунун Маргун айылынын 35 жаштагы А.Ө. аттуу тургунун “Мерседец-Бенц Спринтер” үлгүсүндөгү
автоунаасын токтотуп, унаанын ичиндеги 2-2,5 тонна жүзүмүн аткезчилик жол менен келе жатасын дешип,  “Хундай-Портер”  үлгүсүндөгү 2 унаага жүктөп, жүзүмдөрдү жок кылышып жиберген.
Бул факты Баткен РИИБнин КЖБРне Кыргыз Республикасынын Жазык кодексинин 210-беренеси (бөтөн мүлктү жок кылуу) менен катталып, сотко чейинки өндүрүш иши башталган.
Жогорудагы фактылардын негизинде бүгүнкү күнү Ак-Татыр айылынын 6 тургуну Баткен РИИБне суракка чакыртылган.

Меню