Menu

БАШКАЛАР

Жаңы конституциянын долбооруна алдын ала маалыматтар боюнча шайлоочулардын 78,96% "макул" деп добуш беришти

Бүгүн, 11-апрелде «Кыргыз Республикасынын Конституциясы жөнүндө» Мыйзамдын долбооруна добуш берүү боюнча референдум аяктады. Кечки саат 20:20га карата алдын ала маалыматтар боюнча өлкөгө президенттик башкаруу формасын киргизген жаңы конституциянын долбооруна берилген 791 091 шайлоочунун добушун автоматтык эсептөөнүн жыйынтыгында 624 618 шайлоочу “макул” деп добуш беришкен. Бул добуш берген шайлоочулардын 78,96%ын түзөт.

Ал эми 107 438 шайлоочу “каршы” деп добуш беришкен, бул шайлоочулардын 13,58%ын түзөт.

Чүй облустук милициясы: Аламүдүндүн Таш-Дөбө айылында жайгашкан №7199 шайлоо комиссиясындагы мыйзам бузуу боюнча арыз иликтенүүгө алынды

Чүй облусунун Аламүдүн районундагы № 7199 шайлоо участкасында айрым партиялардын үгүтчүлөрү жергиликтүү кеңештерге шайлоодо добуш бериши керек талапкерлердин аты-жөнү жазылган тизмелерди таркатып жаткандыгына байланыштуу, төмөнкүлөрдү билдиребиз:

Чүй облусунун Аламүдүн районуна караштуу Таш-Дөбө айылында жайгашкан №7199 шайлоо комиссиянын  маалыматы боюнча райондук ички иштер бөлүмүнүн тергөө-ыкчам тобу чыгышкан. Аталган жерге келгенден кийин, ушул шайлоо участкасынын байкоочулары округдун депутаттыгына бир нече талапкерлердин үгүтчүлөрү кире бериште, добуш бериши керек болгон маалыматтарды камтыган тизмелерди таркатып жатат деген арыз келип түшкөн. Аталган факт Аламүдүн районунун ИИБ катталып.

Учурда тергөө-ыкчам тобу жеринде дагы текшерүүлөрдү жүргүзүп жатат.

ИИМ: Бир эле шайлоочу бир канча бюллетендерди электрондук кутучага салып жаткан видео боюнча

Бүгүн, 11-апрель күнү саат 13төр чамасында Клооп сайты өзүнүн фейсбук баракчасына референдум жана  жергиликтүү кеңештин депутаттарын шайлоодо №8077 шайлоо участкасынан 1 эле шайлоочу бир канча бюллетендерди электрондук кутучасына салып жаткан видеосу жарыялаган.
Бул факты Баткен РИИБнин маалыматтардын электрондук журналына катталып, текшерүү иштери жүрө баштаган. Текшерүү иштеринин жүрүшүндө бул видео Баткен районунун Бужум айылындагы №8077 шайлоо участкасында тартылгандыгы, электрондук кутуча шайлоо бюллетенин кабыл албай койгондо, экинчи шайлоочу кабыл алынбаган бюллетенди өзүнүн бюллетенине кошуп электрондук кутучага салып жаткандыгы белгилүү болду.
Азыркы учурда текшерүү иштери жүрүп жатат.

Ташкенттеги кыргыз элчилигинде жайгашкан № 9025 шайлоо участкасында добуш берүү башталды

«Кыргыз Республикасынын Конституциясы жөнүндө» Кыргыз Республикасынын Мыйзамынын долбоору боюнча Кыргыз Республикасынын референдумунун (жалпы элдик добуш берүүнүн) алкагында 2021-жылдын 11-апрелинде, жергиликтүү убакыт боюнча саат 08.00 дө Ташкент шаары, Ниёзбек юли көчөсү, 30 дареги боюнча Кыргыз Республикасынын Өзбекстан Республикасындагы Элчилигинин алдындагы № 9025 шайлоо участкасында добуш берүү башталды.

Шайлоо участкасы жергиликтүү убакыт боюнча саат 20.00гө чейин иштейт.

Кыргыз Республикасынын Ташкент шаарындагы шайлоо участкасынын шайлоочулар тизмесинде 2450 Кыргыз Республикасынын жараны бар.

ИИМ: Каракчылык жана тоноо менен алектенген кылмыштуу топтун иштердүүлүгүнө бөгөт коюлду

ИИМдин КМКнын ыкчам кызматкерлери каракчылык жана тоноо менен алектенген кылмыштуу топтун иштердүүлүгүнө бөгөт коюшту. Бу тууралуу бүгүн, 5-апрелде ИИМдин басма сөз кызматы билдирди.

Бишкек шаарынын райондук ички иштер башкармалыгынын биринин Тергөө кызматы тарабынан Кыргыз Республикасынын Жазык кодексинин 202-беренесинин 2-бөлүмүнүн  2-пункту (Каракчылык) боюнча сотко чейинки өндүрүш жүрүп жатат.

Бул оор кылмыш иши боюнча  ыкчам-тергөө иш-чараларын ИИМдин КМКнын Үчүнчү башкармалыгынын ыкчам кызматкерлери жүргүзүшкөн.

2021-жылдын март айынын аягында “Асанбай” кичирайонунда бир нече белгисиз адамдар башка бирөөнүн мүлкүн ээлеп алуу максатында эки жаранга кол салышкан.

Жабырлануучулардын бири 20 жашта, ал эми экинчиси жашы жете элек өспүрүм болгон. Кылмышкерлер «Hyundai Sonata» үлгүсүндөгү  автоунааны жолдун жээгине кысып барып токтотушкан.  Жабырлануучулардын 25 000 сом өлчөмүндөгү акча каражатын ээлеп алышкан. Андан сырткары, эки жаранды адамдар жок жерде мыйзамсыз кармашып,  бирөөсүн кылмышкерлерге 2000 АКШ долларын карызмын деп тил кат жаздырууга мажбурлашкан. Андан соң физикалык күч колдонушуп, алардын автоунаасын 2000 АКШ долларына күрөөгө коюуга мажбур кылышкан.

Сотко чейинки өндүрүштүн алкагында  ИИМдин КМКнын Үчүнчү башкармалыгынын ыкчам кызматкерлери комплекстүү ыкчам иш-чараларды жүргүзүшүп, 2021-жылдын 31-март күнү жогорудагы кылмыш ишине тиешеси барлардын өздүгүн такташып кармашты.

Кармалган жарандар шаардагы жаңы конуштардын биринде жашаган 1996-жылы туулган С.И. менен Сокулук районунда жашаган 1998-жылы туулган Э.Б. болуп чыкты.

Азыркы учурда жогорудагы кылмыш ишине тиешеси бар башка жарандарды кармоо боюнча ыкчам-тергөө иш-чаралары жүрүп жатат.

"Silk Way" индустриалдык паркы Кыргызстандын жеңил өнөр жайы үчүн кандай мүмкүнчүлүктөрдү түзөт?

Кыргызстандын текстилдик жана тигүү тармагы бизнестин экспорттук дарамети олуттуу болгон чөйрөлөрүнүн бири болуп саналат. Бирок продукциялардын сапатынын жетиштүү деңгээлде жогорку эместиги, жаңы рынокторго чыгууда анча белгилүү болбогону, чыгарылган өндүрүмдүн анча көп эмес көлөмү белгилүү бир кыйынчылыктарды түзүүдө. 

Постсоветтик мейкиндикте атаандаштык күч алууда, индустриалдык тармактардын өнүгүү темпи заманбап, жогорку технологиялык кластерлердин зарылдыгын көрсөтүп жатат. 

Ааламдашуу жараянында жүйнө жүзү боюнча ири компаниялар байып, ал эми чакан ишканалар көлөмдүү буйрутмаларды кабыл алуу мүмкүнчүлүгүнүн жоктугунан зыян тартып жаткан тенденция байкалууда.

Азыркы учурда Бишкектин жанында «Silk Way» индустриалдык паркынын курулушу жүрүүдө, ал жеңил өнөр жайынын жогоруда көрсөтүлгөн маселелерин чечүүгө багытталган жана текстилдик жана тигүү өндүрүшүн келечектүү өнүктүрүү үчүн бардык зарыл шарттарга ээ.

«Silk Way» индустриалдык паркы 70 гектар аянтта жайгашып өз ара байланыштагы бир нече секторго бөлүнгөн. Мында: өндүрүш сектору – «А» класстагы заманбап складдык имараттары бар 75 фабрика; Кеңири складдык имараттары менен даяр продукциянын, фурнитуранын жана кездемелердин соода-экспозициялык сектору жайгашат. Кубаттуулугу саатына 40 унаа өткөргөн бажы-логистикалык борбор индустриалдык парктын резиденттерине экспортко жөнөтүү үчүн товарларды ыкчам тариздөө мүмкүнчүлүгүн берет.

«Silk Way» индустриалдык паркы өзүнүн резиденттери үчүн баалуу болгон убакытты үнөмдөөгө, ири компаниялар менен кызматташтыкты түзүүгө, товарлардын сапатын жогорулатууга жана «Made in Kyrgyzstan» продукцияларын дүйнөлүк стандарттарга жооп берген жаңы деңгээлге чыгарууга шарт түзөт.

Бул жерден тигүү үчүн керектүү бардык нерсени: кездемелерди, бычуу, фурнитураны табууга болот. Индустриалдык парктын жайгашкан жеринин географиялык ыңгайлуулугу транспорттук чыгымдарды жана ташуу мөөнөттөрүн кыскартат.

Кызмат көрсөтүүлөрдүн кеңири түрүнүн бир жерде бириктирилиши, индустриалдык парктын терең ойлонуштурулган инфраструктурасы – бул бизнести жайгаштыруу үчүн эң ыңгайлуу жана мыкты жер.

Маанилүү бир учурлардын бири: инвестор парктын аймагынан аянтты бардык документтери менен жеке менчикке сатып алат, келишим Мамлекеттик каттоо кызматында катталат. Бул сиздердин инвестициялардын коопсуздугуна кепилдик берет.

Индустриалдык паркта соода аянтчасынын (бутиктин) жеке менчик ээси болуп туруп, сиз ижара акысы тууралуу ойлонбой эле койсоңуз болот. Сиздин өзүңүздүн өндүрүштүк базаңыз – фабрика болот, ал бизнести ийгиликтүү өнүктүрүү үчүн зарыл болгон товарлар менен камсыздап турат.

Парктын Бажы-логистикалык борбору документтештирүү, маркалоо жана тастыктоо боюнча кеңири кызматтарды көрсөтмөкчү, ал эми «Silk Way» транспорттук компаниясы өзүнүн автопаркы менен сиздин буйрутмаңыз боюнча жүгүңүздү белгиленген жерине мөөнөтүндө жана толук түрдө кепилдиги менен жеткирет.

Мындан тышкары «Silk Way» индустриалдык паркы резиденттердин ортосундагы келишим түзүүлөрдө кепилдик милдетин аткара алат, донор уюмдардан Кыргыз Республикасында жеңил өнөр жайды өнүктүрүүгө багытталган гранттарды алууга аракеттешет, чет элдик резиденттер үчүн визалык колдоо көрсөтөт, ошондой эле документтерди бухгалтердик, каржылык жана юридикалык коштоо боюнча кызматтарды сунуштайт. Индустриалдык парктын резиденттери үчүн маданий-тиричилик, социалдык-экономикалык мүнөздөгү башка бир катар артыкчылыктар каралган.

Күнү-түнү видеобайкоо, өрт коопсуздугунун заманбап системасы сиздин бизнесиңиздин коопсуздугун жана сакталышын камсыздайт.

Эске сала кетсек, долбоорду ишке ашырууга тартылган каржылык каражаттар – ата мекендик ишкерлердин инвестициялары. Ал эми долбоордун негиздөөчүсү – Евразия экономикалык бирлигинин өлкөлөрүнө кыргыз текстилдик жана тигүү продукцияларын экспорттоо боюнча лидер «Alpha Cargo» компаниясы болуп саналат.

Фото - Жалал-Абадда баңгизаттарды сатуу менен алектенген туруктуу каналга бөгөт коюлду

ИИМдин Баңгизаттарды мыйзамсыз жүгүртүүгө каршы күрөшү кызматынын Мобилдик ыкчам бөлүмдөрдүн башкармалыгынын
кызматкерлери тарабынан баңгизаттарды сатуу менен алектенген туруктуу каналын аныктоо жана алардын ишмердүүлүгүнө бөгөт коюу боюнча атайын операциясын ийгиликтүү аякташты. Бул тууралуу бүгүн, 30-мартта ИИМдин басма сөз кызматы билдирди.

Иш-чара баңгизаттарды жасоо жана сатуу менен алектенген топтун бетин ачуу боюнча  жүрүп, 2021-жылдын 25-мартында кечинде  Жалал-Абад облусунун Базар-Коргон районунда БМЖКККнын башкармалыгынын кызматкерлери ИИМдин “Шумкар” АБПнын атайын операциялар отрядынын кызматкерлеринин колдоосу менен  баңги кылмышына шектүү катары жергиликтүү үч жаранды кармашты.

КР Жазык кодексинин 267-беренесинин (Баңгизат каражаттарын, психотроптук заттарды жана алардын аналогдорун сатып өткөрүү максатында мыйзамсыз даярдоо) белгилери менен каралган сотко чейинки өндүрүш ишинин алкагында жүргүзүлгөн тинтүү иш-чараларынын натыйжасында 1979-жылы туулган К.И. аттуу жарандын жашаган үйүнүн короосунан капка салынган кара-күрөң түстөгү, өзгөчө кендир жытына ээ болгон зат табылып алынган. Соттук-химиялык изилдөөнүн корутундусуна ылайык табылып алынган зат 2 кг  080 граммды түзгөн марихуана баңгизаты деп аныкталган.

Мындан тышкары ыкчам иш-чаралардын жүрүшүндө аталган даректен дагы башка эки шектүү кармалган. Кармалгандар убактылуу кармоочу жайга киргизилип, аталган кылмышка тиешеси бар башка жактарды аныктоо боюнча тергөө-ыкчам иш-чаралары улантылууда.

 

Аламүдүн районунда уурулукка шектүүлөр кармалышты

Аламүдүн районунда уурулукка шектүүлөр кармалышты. Бул тууралуу бүгүн, 29-мартта Чүй ОИИБнин басма сөз кызматы билдирди.

Алардын айтымында, 13-март күнү Аламүдүн районунун ички иштер бөлүмүнө 54 жаштагы В.С. аттуу жшоочу арыз менен кайрылып, Аламүдүн районундагы айылдарынын биринен асфальт жаткырган тракторун белгисиз бирөөлөр уурдап кетишкенин билдирген. Келтирилген материалдык чыгым 7 миң АКШ долларын түзгөн.

Бул окуя кылмыштардын жана жоруктардын бирдиктүү реестрине Кыргыз Республикасынын Жазык кодексинин 200-беренеси (Уурдоо) боюнча катталып, сотко чейинки өндүрүш иштери башталган.

Чүй облусунун ИИББнын жана Аламүдүн РИИБдүн криминалдык милиция кызматы тарабынан жүргүзүлгөн ыкчам издөө иш-амалдарынын натыйжасында жогорудагы кылмышка шектелип, буга чейин соттолгон 34 жаштагы К.М. жана 18 жаштагы Э.Э. аттуу жарандар кармалышкан.  Шектүүлөр убактылуу кармоочу жайга камакка алынган. Сотко чейинки өндүрүш иштери улантылууда.

 

Видео - Умар Анарбаев, Апрель баатыры: "2010-жылдагы Текебаев жазган конституция өзүн актабады, ошондуктан мен президенттик башкаруу формасына ылайыктап жазылган жаңы конституцияны колдойм"

Бүгүн, 25-мартта Талас шаарында жаңы конституциянынын долбоорун талкуу боюнча жыйын болуп өттү. Ага шаардык коомчулук менен конституцияны колдоо тобунун өкүлдөрү катышты. Бул тууралу бизге Апрель баатыры Умар Анарбаев өзү билдлирди.

Жыйында чыгып сүйлөгөн Апрель баатыры Умар Анарбаев 2010-жылы кабыл алынган “Текебаевдик” конституция өзүн актабагандыгын белгилеп, 10-январдагы референдумда президенттик башкаруу формасына добуш бергенин жарыя кылган.

Ал эми алдыдагы, 11-апрелдеги референдумда жаңы жазылган конституциянын долбоорун колдоп добуш берерин айтты.

Андан сырткары Японияда парламенттин депутаттыгына негизинен 60 жаштан өткөн, турмушту көргөн, тажрыйбалуу адамдар шайланарын белгилеп, бизде да мындай тажрыйбаны пайдаланууну сунуш кылды.

Акырында өлкөдө түзүлгөн саясый тандем – Садыр Жапаров менен Камчыбек Ташиевдин тандемин колдого чакырды.

Орусия Түркиядан Алеппону аткылаган жоочуларды издөөгө жардам берүүнү өтүндү

Орусия Сириянын Алеппо шаарын аткылаган жоочуларды издөөгө жардам берүү өтүнүчү менен Түркияга кайрылды. Бул тууралуу 24-мартта Сирияда согушуп жаткан тараптарды жараштыруу боюнча борбордун жетекчисинин орун басары, контр-адмирал Александр Карпов билдирди.

Анын айтымында, 21-мартта жоочулар Кафр-Ханни калктуу конушунан Алеппону алты реактивдүү ракеталык система менен аткылаган. Жыйынтыгында эки киши каза болуп, 17 жай тургун жаракат алган.

«Жалпысынан Сириядагы ок атууну токтотуу режими сакталууда. Бирок күн ара «Жебхат ан-Нусра» террордук тобу тараптан аткылоо фактылары катталууда», — деди Карпов.

Буга чейин Түркиянын Тышкы иштер министрлиги (ТИМ) Сириянын Идлиб провинциясы менен түрк аскерлери жайгашкан райондору аткыланып жатканына байланыштуу Орусиянын Анкарадагы элчиси Алексей Ерховго тынчсыздануусун билдирген. Түрк тарап бул чабуулдар түрк-орус сүйлөшүүсүндө деэскалация аймагы катары аныкталган райондордун коопсуздугуна коркунуч жарата турганын белгилеген.

Апта башында батыш маалымат каражаттары Сириянын куралдуу оппозициясындагы өз булактарына шилтеме кылып, Идлиб жана Алеппо провинцияларындагы соккуларды Сирия өкмөтү менен Орусиянын авиациясы жасаганын кабарлашкан. Маалыматка ылайык, алардын Алепподогу Аль-Атареб ооруканасына багытталган артиллериялык аткылоосунан бир нече бейтап каза болуп, ондон ашык медицина кызматкери жаракат алган. Мындан тышкары Орусия авиациясы Идлибдеги Баб Эль-Хав чек ара өтмөгүнө сокку уруп, гуманитардык жүк жеткирүүнү үзгүлтүккө учуратуу коркунучу жаралган.

Александр Карпов 22-марттагы брифингде Алепподогу жай тургундар жоочулардын реактивдүү снаряддар менен аткылоосунан жабыркаганын билдирген.

Сириядагы согушта Түркия менен Орусия эки башка тарапты колдошот. Москва президент Башар Асадды өнөктөш деп эсептеп, ага террордук топторго каршы күрөшүүгө жардам берип жатканын билдирип келет. Анкара болсо Асаддын отставкасын талап кылып жүргөн оппозициянын бир бөлүгүн колдойт.

 Булак: “Борбор Азия жаңылыктар кызматы”

Меню