Кыргыз-тажик чек арасындагы жаңжал

Баткен облусунун Баткен жана Лейлек райондорунда 6-10 кВ аба чубалгыларынын 15 линиясы авариядан өчүрүлгөн. Бул тууралуу маалымат жыйында энергетика министринин милдетин аткаруучу Таалайбек Ибраев билдирди.

Анын айтымында 32 калктуу конуш (9609 үй) электр жарыгысыз калган, анын ичинен Баткен районунда 26, Лейлек районунда 6. Баткен электро тармагы ишканасы оңдоо иштерине 60 адам тартылган.

“Мындан тышкары республиканын башка областтарынын жана областтарынын энергетика ишканаларынын персоналынан 42 адам тартылган,” – деп билдирди Таалайбек Ибраев.

Бригадалар керектуу материалдар, куйуучу май, жабдуулар, запастык бөлүктөр жана транспорт менен жетиштуу өлчөмдө жабдылган.

Энергетика системасынын негизги жана стратегиялык объектилеринде эксплуатациялоочу-ремонттук жана инженердик персоналдын күзөтү күчөтүлдү. Жеринде түзүлгөн оор кырдаалдан улам оперативдүү топторго аскер күчтөрү тарабынан авариялык-калыбына келтирүү иштерин жүргүзүүгө уруксат бериле элек.

Келтирилген зыяндын көлөмү кийин аныкталат.

Кыргыз Республикасынын Министрлер Кабинетинин Төрагасы Акылбек Жапаров кыргыз-тажик мамлекеттик чек арасындагы куралдуу кагылышууларда жаракат алган балдардын жана жарандардын абалынан кабар алды.

Акылбек Жапаровго Эне жана баланы коргоо улуттук борборунда тийиштүү дарылануу жана психологиялык жардам алып жаткан 7 баланын абалы тууралуу маалымат берилди.

Андан соң Министрлер Кабинетинин башчысы Кыргыз Республикасынын Саламаттык сактоо министрлигинин Улуттук госпиталында дарыланып жаткан жарадар болгон жарандарга жана аскер кызматкерлерине барды. Учурда медициналык мекемеде 36 адам дарыланууда, жабыркагандардын абалы орто жана оор деп мүнөздөлөт.

Министрлер Кабинетинин Төрагасы бардык жабырлануучулар тийиштүү дарылануу жана андан ары ден соолугун калыбына келтирүү менен камсыздалаарын баса белгиледи.

Акылбек Жапаров жабыркагандардын тез арада сакайып кетишин каалады.

Кыргыз Республикасынын Финансы министрлиги маалымдайт.  2022-жылдын 17-сентябрында саат 15:30га карата Борбордук казыналыгы кыргыз-тажик мамлекеттик чек арасындагы чыр-чатактын жүрүшүндө калкты колдоо максатында Кыргыз Республикасынын жарандарынан акча каражаттары алынганын билдирет. Учурда Кыргыз Республикасынын жарандары жана башка ыктыярчылар жиберген сумма 3 598 430,23 сом болду.

Белгилей кетсек, атайын эсеп Баткен облусунун калкын колдоо, ошондой эле абийирсиз жарандардын каржылык көз боемочулугуна бөгөт коюу максатында ачылган.

Эскерте кетсек, акча каражаттарын “кайрымдуулук” негизде жөнөтүү үчүн 4409021103005073 – “КР Өкмөтүнүн Баткен облусундагы ыйгарым укуктуу өкүлүнүн аппараты” атайын эсеби ачылган.

Эсептин реквизиттери улуттук валютада (сомдо):

Бенефициар банк: Борбордук казыналык

БИК 440001 (банк аркылуу);

БИК 440902 (ВКП, МКП);

ИНН 01312199910086

Эсеп номери № 4409021103005073 «КРнын Баткен облусу боюнча ыйгарым укуктуу өкүлүнүн аппараты»

Төлөм коду 14411100 – “Учурдагы жардам”

«Айыл Банк» ААКсында улуттук валютадагы (сомдогу) эсептин реквизиттери:

Алуучу: ЭФКР Борбордук Комитети

Бенефициар банк: «Айыл Банк» ААК ИНН 01803199710084

БИК 135001

Эсептин номери № 1352119929762602 “2021-жылдын апрель айында Баткен окуясында жабыркаган калкка жардам көрсөтүү үчүн ЭФФКБ Борбордук Комитетинин транзиттик эсеби. (сомдо).

Төлөм коду 14411100 – “Учурдагы жардам”

Чет өлкөлүк валютадагы мультивалюталык эсептин реквизиттери (юридикалык жактар үчүн)

(АКШ доллары, евро, орус рубли, казак теңгеси менен):

“РСК Банк” ААКдагы эсептин реквизиттери АКШ долларында (жеке адамдар үчүн).

Баткен облусундагы кырдаал тууралуу  КР Транспорт жана коммуникациялар министрлиги 17-сентябрдын саат 15:00гө карата маалымат таратты;

2022-жылдын 17-сентябрынын 15:00гө Баткен облусунун Ош-Баткен-Исфана унаа жолунун 211-220 км (Развилка Чоң-Талаа) жабык,

265 км (Кара айыл бөлугү) жабык,

272 км (Төрт-Көчө бөлугү) жана Баткен-Кара-Бак, Баткен-Кызыл-Бел, Көк-Таш-Ак-Сай унаа жолунун 7 км аралыгындагы көпүрө минометтук аткылоодон жараксыз абалга келгендигине байланыштуу унаа жолдору каттам үчүн жабылган!

Ошондой эле, Лейлек районунун Кайрагач-Кулунду-Арка унаа жолу жабык.

Эски багыттагы Ош-Баткен-Исфана жолунун 340-346 км аралыгы жабылган.

Ал эми Төрт-Көл-Достук (Кара-Бак айылы), Ак-Сай-Рават, Миң-Булак-Чорго-Ак-Сай, Көк-Таш-Ак-Терек эвакуациялык жолдор ачык, каттамдар бар.

КР Президенти Садыр Жапаров кыргыз-тажик чек арасындагы акыркы кырдаалга байланыштуу социалдык тармактагы баракчасы аркылуу кайрылуу жасады:

Баткен облусундагы кыргыз-тажик чек арасынынын тилкесиндеги кырдаалдын курчушуна байланыштуу Бишкекте Медиа-штаб иш алып барууда ( https://t.me/media_shab).

Штабдын башкы милдети күч органдарынын, тармактык министрликтердин жана ведомстволордун расмий өкүлдөрү тарабынан тастыкталган, окуя болгон жерден маалыматтарды ыкчам берүү болуп саналат.

Чындыкка дал келбеген маалыматтарды аныктоо жана аларды четке кагуу максатында  маалымат талаасына туруктуу негизде мониторинг жүргүзүлүүдө.

Мындан тышкары, КР Президентинин Администрациясынын Маалыматтык саясат кызматынын жетекчилигинде иштеп жаткан Штабдын милдетине жакынкы жана алыскы өлкөлөрдүн ЖМКларына англис, түрк жана орус тилдериндеги расмий маалыматтарды даярдап, таркатуу кирет.

Иштин бир бөлүгү социалдык түйүндөрдөгү платформаларга ыкчам маалымдоону колдоого багытталат.

Көрүлүп жаткан күч-аракеттердин негизги максаты өз убагындагы жана ишенимдүү маалымдоону камсыз кылуу, борбордук жана жергиликтүү аткаруу бийлигинин мамлекеттик органдарынын, башка мамлекеттик органдардын, жергиликтүү өз алдынча башкаруу органдарынын алдындагы маалымат кызматтарды түзүү жана алардын ишин координациялоо болуп саналат.

Белгилүү болгондой, үстүбүздөгү жылдын 16-сентябрында Баткен облусунун кыргыз-тажик чек арасынын тилкесиндеги кырдаал чыңалган бойдон калууда.

Коңшу өлкөнүн аймагынан куралдуу топтордун массалык басып кирүүсүнүн натыйжасында курман болгондор жана жабыркагандар бар.

КР УКМКнын Чек ара кызматынын маалымат жана байланыш башкармалыгы билдирүүсү боюнча, 2022-жылдын 17-сентябрында саат 11:30да КР УКМКнын Чек ара кызматынын бөлүмдөрү Республика Тажикстандын аскер кызматкерлеринин Достук айылына минометтук чабуулун басышты.

Андан кийин саат 12:30дан 12:35ке чейин тажик тарап Баткен районунун Төрт-Көчө аймагында Кыргызстандын Ички иштер министрлигинин Ички аскерлеринин позицияларын жана бөлүктөрүн аткылашты.

Учурда атышуу токтотулду.

Окуя боюнча иликтөө иштери башталды.

Ок атышууну токтотуу келишимин бузуп, саат 12:37де тажик тарап Ош облусунун Чоң-Алай районундагы Тешик-Таш, Карамык жана Кароол-Дөбө кыргыз чек арачыларынын айылдагы позицияларын миномет жана артиллериялык түзүлүштөр менен аткылай баштады. КР УКМКнын Чек ара кызматынын Ош облусуна жайгаштырылган бөлүктөрү жооп иретинде ок атышты.

Бирок окуяны басаңдатуу үчүн Кыргызстандын аскер кызматкерлери биринчилерден болуп ок атууну бир тараптуу токтотушкан.

Кыргызстан менен Тажикстандын чек ара өкүлдөрүнүн сүйлөшүүлөрү күтүлүүдө.

Кыргыз-тажик мамлекеттик чек арасындагы куралдуу кагылыш болгон жерден эвакуацияланган жана Бишкек шаарында жүргөн Баткен облусунун тургундары борбордогу бир нече мейманканаларга убактылуу жайгаша алышат.

– “Достук” мейманканасы, Бишкек ш., Фрунзе көч., 429 «б» дарегинде жайгашкан, 10 жаранды кабыл алууга даяр. Кошумча орундар даярдалууда (байланыш телефону: 0500 61 18 06, Рустам).

– «Семетей» мейманканасы, Бишкек ш., Токтогул көч., 125, 20га чейин жаранды кабыл алууга даяр (байланыш телефону: 0555 65 22 22, Чыңгыз).

– «Ата-Түрк Ала-Тоо» мейманканасы, Бишкек ш., Исакеев көч. 2а/2, 15ке чейин жаранды кабыл алууга даяр (байланыш телефону: 0507 77 77 24, Өмүрбек).