Акыркы кезде И.Ахунбаев атындагы Кыргыз мамлекеттик медициналык академиясындагы жаңы ректор Индира Кудайбергенованын келиши менен ишке аша баштаган келечектүү кадамдарга каршы чыгып, окуу жайда төңкөрүш жасоого даяр топ пайда болду. Бүт дүйнөнү тозоктун отуна салгысы келген радикал террорчуларды тергеп атагандай эле, азыр Медакадемияга чуу салган айрым мурдунун учунан алысты көрө албаган кемчонтой адамдардын бирикмесин “зурдиновчулар” деп атасак эч жаңылган болбойбуз.
Булардын максаты башынан белгилүү – Индира Кудайбергенованын мыкты адис, окутуучулар, окумуштуулар кеңеши, студенттер жакындан билип, колдоого аларын билишкендиктен, арга кетип, аны жаманатты кылып, ага Ж.Баласагын атындагы КМУ ректору Ч.Адамкулованыкындай тагдырды тушуктуруу. “Зурдиновчулар” даярдап, элди окууга жайгаштырып, диплом жазып тапкан арам акчаларынын эсебинен төлөнүп гезиттерге жарыялана баштаган тексттеринде дал ушундай дымак даана сезилет – алар Медакадемияда да Улуттук университеттегидей абал түзүлгөндөй коомдук пикир жаратууну көздөшүүдө. Бирок, Улуттук университетте чыр аттестациянын айынан чыккан. А Медакадемияда эч нерсе боло элек, жада калса бир да адамды иштен алуу боюнча кеп козголгон жок. Кайра тескерисинче, айрым Зурдиновдун командасындагы адамдар кетерин билдирсе, И.Кудайбергеновада кек, өчөшүү деген жок да, ал чын-дилинен жалдырап, калып, иштей берүүлөрүн өтүнүп жатат. “Улуттук университетте утулуп калган талапкер ректор болуп, чыр чыкты. Медакадемияга да утуп чыккан Ишен Сатылганов дайындалышы керек эле”,- деп булар өздөрү түпкү максаттарын ачыктап да ийишти. Ушунун өзүнөн эле булар Зурдинов доорун узартууну каалап, май талкандан түшкүсү келбегенин байкоого болот. Ишенди проректорлуктан деле кетирген адам жок. Бирок ал мурункудай кенен дем ала албай калды. Себеби И.Кудайбергенова жумушка талапты катуу койгону менен айырмаланат жана кызматын арам жолго пайдалангандарды аябайт. Мына алардын корккону.
Биз “зурдиновчулар” деп даана байкадык. Анткени, коомдук пикир жаратууга ашыгып жатышып, акыры экс-ректор А.Зурдинов өзү да ачыкка чыгып, ордуна келген ректорду жамандап маек берди. Аксакал болуп калды. Элге окшоп жакшы картайса болбойт беле? Ошончо жыл ректор болуп олтурду, кеңири мыйзам бузууларына карабай жоопкерчиликке тартылбады, камалбады, ошого каниет кылып, өзүнүн колунан келбеген ишти башкалардын жасашына жол бербейби эми!
“Көрө албастык кылган адам Алла Тааланын тагдырына каршы чыгат. Көрө албастык кылган адам мусулман тууганына көрө албастык кылуусу менен Алла Тааланын өлчөп, белгилеп койгон тагдырына, Анын өкүмүнө жана пенделерине бөлүп берген ырыскыларына каршы чыгып, Алла Таала менен тирешкен болот. Алла Таала адамдардын кээ бирин бай кылып, кээ бирин зээндүү, кээ бирин илимдүү кылып жараткан. Кээ бирине байлык берген, кээ бирине үй-бүлө бала-чака берген… Ошентип баардык нерсени Өзүнүн чексиз даанышмандыгы менен өлчөп белгилеп тагдыр кылып койгон”,- делет Исламда. Ушуну көкүрөгүңүзгө бек тутуп алыңыз, Ашыралы мырза!
Кошумчалап кете турган нерсе – Медакадемиядагы азыркы кырдаал тууралуу объективдүү аңгемебизди кийинки сандан окуйсуз!
Булак:“Майдан.kg”
КОММЕНТАРИЙ КАЛТЫРУУ