Menu

Author Archives: admin_kyrgyztoda

Казак өкмөтү латын графикасына негизделген казак арибинин жаңы нускасын сунуштады

Казакстан өкмөтү 28-январда казак арибин латын графикасына которуу боюнча улуттук комиссиянын отурумун өткөрүп, латын алфавитинин жаңы үлгүсүн сунуштады.

Өкмөттүн маалыматына караганда, жаңы ариб 40тан ашуун нусканын ичинен тандалды. Жакшыртылган алфавитте 31 символ бар.

Жаңы арипте казак тилинин 28 тыбышы толугу менен камтылган. Азыркы ә(ä), ө(ö), ү(ü), ұ(ū) жана ғ(ğ), ш(ş) казак тамгалары диакритикалык символдор менен белгиленет. Казак өкмөтүнүн сайтында алфавит “бир тыбыш – бир тамга” принцибине толук шайкеш келери айтылган.

Казакстан жаңы арипке акырындык менен 2023-жылдан 2031-жылга чейин өтүүнү пландап жатат.

Өлкөнүн мурдагы президенти Нурсултан Назарбаев 2017-жылы казак арибин латынчага өткөрүүнү тапшырган. Бул өкмөт сунуштаган төртүнчү нуска болуп эсептелет. Мурдагы үч вариант коомчулуктун кеңири сынына кабылган.

Батыш басылмалары Казакстанда латын алфавитин киргизүүнү “Орусиянын таасиринен арылуу” катары баалашат.

Булак: “Борбор Азия жаңылыктар кызматы”

Вице-премьер-министрдин м.а. Эльвира Сурабалдиева № 21 атайы мекемеге барды

Кыргыз Республикасынын вице-премьер-министринин милдетин аткаруучу Эльвира Сурабалдиева Кыргыз Республикасынын Өкмөтүнө караштуу Жазаларды аткаруу мамлекеттик кызматынын № 21 (Бишкек шаардык СИЗО-1) мекемесине барды. Бул тууралуу өкмөтүн аппаратанын басма сөз кызматы билдирди.

Ал күзөт жана медико-санитардык бөлүгүн, атайы контингент үчүн ашкананы, тергөөдөгү, камакка алынган жактар кармалган камераларды, чарба-тейлөө жумуштарын аткаруу үчүн калтырылган соттолгондор жашаган жайды көрүп чыкты.

Белгиленгендей, өлкөдөгү түзүлгөн эпидемиологиялык абалга байланыштуу Кыргыз Республикасынын Башкы прокуратурасынын макулдугу боюнча, СИЗО-1 башка күч түзүмдөрүнүн убактылуу кармалуучу жайларынан тергөөдөгү, камакка алынган жактарды, ошондой эле мекемеге келген башка жактарды ПЧР-анализи терс чыккан маалымдамасы болгондо гана кабыл алат, мекемеге кирүүдө дене табы текшерилет.

Айыпталуучу менен жолугушуулар айнек тосмолор аркылуу жүрөт, сот жыйындары видеобайланыш форматына өткөрүлгөн. Дене табы көтөрүлгөн жана коронавирустук инфекцияга шектелген жактар үчүн карантиндик камералар даярдалган, ошондой эле кайрадан келген камалуучулар үчүн изоляцияланган пост бошотулуп, даярдалган, алар алгоритм боюнча милдеттүү түрдө 14 күндүк карантинден өтөт.

Атайы мекемеде жабдылган клинико-бактериологиялык лаборатория бар, медициналык кызматкерлер ПЧР-анализ өткөрүүгө үйрөтүлгөн.  Көптөгөн эл аралык бейөкмөт жана коомдук уюмдар мекемге коронавирустук инфекциянын жайылышына каршы турууга багытталган гуманитардык көмөк көрсөткөн.

Вице-премьер-министрдин м.а. COVID-19 жаңы штаммын алып кирүү жана анын жайылуу коркунучун эске алуу менен тийиштүү санитардык талаптарды тыкыр сактоонун маанилүүлүгүн белгиледи.

Эльвира Сурабалдиева аталган мекемедеги айыпталуучулардын кармалуу шарттары менен таанышты жана жарандар менен пикир алышты.

Ал атайы мекемени Бишкек шаарынын четине көчүрүү маселесин чечүү жана мекеме үчүн жаңы имаратты куруу зарылдыгын баса белгиледи.

«Жарандарды кармоо шарты абдан начар. Көп жылдардан бери имаратта капиталдык оңдоо жүргүзүлгөн эмес, инфраструктурасы эскирип, жараксыз абалга жеткен, бул айыпталган жарандардын жана кызматкерлердин мекемедеги шартынын начардыгына алып келүүдө. Камералардын абалы жакшы эмес. СИЗО-1ди дислокациялоо жана жаңы имаратты куруу боюнча ишти активдештирүү зарыл», – деди ал.

Мындан тышкары, вице-премьер-министрдин м.а. Саламаттык сактоо министрлигине мекемени Тез жардам унаасы менен камсыздоо маселесин чечүүнү, ошондой эле жазаларды аткаруу тутумунун медициналык кызматкерлеринин квалификациясын акысыз негизде жогорулатуу жана медициналык окуу жайлардын бүтүрүүчүлөрүн аталган тутумдун тийиштүү бөлүктөрүнө бөлүштүрүү маселесин иштеп чыгууну тапшырды.

Сокулук районунда милиция кызматкерлери алдын алуу иштерин улантышууда

27-январь күнү Сокулук районунун ички иштер бөлүмүнүн жетекчилигинин демилгеси менен Кызыл-Туу жана Малаводное айылдарында жергиликтүү бийлик өкүлдөрү менен биргеликте жашоочулар менен жолугушуу уюштурулду. Бул тууралуу Чүй ОИИББдин басма сөз кызматы билдирет.

Иш-чарага 50дөн ашуун тургундар катышып, жергиликтүү бийлик өкүлдөрүнө жана Сокулук РИИБдүн жетекчилигине көйгөйлөрүн жеткиришти. Жолугушуунун катышуучулары уурулук, мал уурулуктары, андан сырткары күнүмдүк тиричиликтерге байланыштуу бир катар көйгөйлөрүн айтышып,  алар Сокулук РИИБдүн жетекчилигинин жана жергиликтүү бийлик өкүлдөрүнүн көзөмөлүнө алынды.

Ошол эле учурда кылмыштуулукту алдын алуу жана аларды болтурбоо үчүн милиция кызматкерлери тарабынан түшүндүрүү иштери жүргүзүлүп, шектүү адамдарды же чоочун автоунаалрдын шек жараткан жагдайлары болсо аймактык тескөөчүгө, РИИБгө же 102 номерлерине билдирүүнү эскертишти.

Эске сала кетсек, Сокулук РИИБдүн кызматкерлери тарабынан өткөн 2020-жыл ичиинде 150дөн ашуун алдын алуу жана түшүндүрүү иштери жүргүзүлгөн. Алар көбүнчө калк арасында жугуштуу илдетти алдын алуу, үй-бүлөлүк зомбулуктарга жол бербөө, уурулуктарды жана мал уурулуктарын алдын алууга багытталган. Андан сырткары Соклурук РИИБү тарабынан 80 ден ашуун рейд иш-чаралары уюштурулуп, анын аркасында бир нече кылмыш иштеринин беттери ачылган.

Transparency International: Тажикстан коррупциялашкан өлкөлөрдүн катарында калды

Дүйнө өлкөлөрүндөгү коррупциянын деңгээлин изилдеген «Transparency International» эл аралык уюму жарыялаган жаңы баяндамага ылайык, Тажикстан былтыркыдай эле 25 балл алып, 180 өлкөнүн ичинен 149-орунду ээледи.

2020-жылы Тажикстан ушул эле көрсөтүч менен Мозамбик, Нигерия, Мадагаскар, Камерун жана Иран менен бир катардан орун алган.

Иликтөөдө укук коргоочулар COVID-19 пандемиясы маалында бийликтин аракети коррупцияга кандай таасир бергенин белгилешкен. Документте 180 өлкөнүн саламаттык сактоого салган инвестициялары жана демократиялык нормалар менен институттардын алсыроо деңгээли салыштырылган.

Борбор Азия өлкөлөрүндө укук коргоочулар Кыргызстанды өзүнчө белгилешкен: өлкө мүмкүн болгон 100 баллдан 31 балл алып, 124-орунун сактап калган. Кыргызстан 2012-жылдан бери өз позициясын жакшыртып, жети баллга жогорулаган. Ошол эле маалда коррупциянын кеңири жайылышы жана ачык-айкындуулуктун жоктугу пандемияга каршы күрөшүүдө жолтоо болгону айтылган.

Бул арада Казакстан 34 балл алып, 113-орундан 94-орунга көтөрүлдү. Өзбекстан да позициясын жа

Булак: “Борбор Азия жаңылыктар кызматы”

HRW Нур-Султандын көз карандысыз кесиптик кошуундардын ишин токтотуу аракетин сындады

Human Rights Watch (HRW) эл аралык укук коргоо уюму Казакстан бийлигин Жылуулук-электр комплексинин жумушчуларынын тармактык кесиптик кошуунунун ишин токтотконун айыптап, сотко берген арызын кайтарып алууга чакырды.

Ай башында жергиликтүү басылмалар Чымкент шаарынын акимчилиги Жылуулук-электр комплексинин жумушчуларынын тармактык кесиптик кошуунунун ишин күч менен токтотуу өтүнүчү менен сотко арыз жазганын кабарлашкан.

Арызда кесиптик кошуун мамлекеттик каттоо жөнүндө мыйзамды бузганы, курултайдын документтерине тиешелүү өзгөртүүлөр киргизилбегени айтылган.

Башкы кеңсеси Нью-Йоркто жайгашкан эл аралык укук коргоо уюму 27-январда жарыялаган маалыматта Чымкент акимчилиги берген арызда айтылган талаптар жөнсүз жана күчүн жоготкон мыйзамдарга негизделгини белгиленген.

Кесиптик кошуундар тууралуу мыйзамдын 2014-жылдагы редакциясында “тармактык кесиптик кошуундар республикалык бирикмелердин курамына кириши керек” деген талап жазылган. 2020-жылы майда бул берене жумшартылып, тармактык кесиптик кошуундар республикалык маанидеги бирикмелердин курамына кирүүгө укугу бар экени жазылган.

Жылуулук-электр комплексинин жумушчуларынын тармактык кесиптик кошуунунун төрагасы Куспан Косшыгулов бирикеменин филиалдары өлкөнүн жети аймагында жана Нур-Султанда каттоодон өткөнүн, мамлекеттик реестрде бар экенин билдирди.

Акимчиликтин арызы Чымкентте 1-февралда каралары күтүлүүдө.

Казакстанда көз карандысыз кесиптик кошуундардын ишине тоскоол жаратуу тажырыйбасы кеңири тараган.

Булак: “Борбор Азия жаңылыктар кызматы”

Өзбекстанда жеке ишке орноштуруу агенттигинин башчысы 9 жылга соттолду

Ташкентте сот “Recruit consulting work” ишке орноштуруу агенттигинин жетекчиси Жахонгир Аллабердиевди алдамчылыкка айыптап, 9 жылга эркинен ажыратты. Тергөө материалдарына караганда, ал 1087 жаранга 765 миң доллардын тегерегинде чыгым келтирген.

Аллабердиев 2020-жылы Корея, Жапония, Латвия, Литва, Чехия, Нидерланды, Германия, Швеция, Словакия өлкөлөрүнөн иш таап берүүгө убада кылып, миңден ашуун кишиден ири суммадагы акча алган. Бирок милдеттенмесин аткарган эмес.

Буга чейин Өзбекстандагы бир катар жеке ишке орноштуруу агенттиктеринин жетекчилерине жана кызматкерлерине кылмыш иши козголгону кабарланган.

Былтыр октябрда Самарканд шаарынын соту “Amilee Bahora” агенттигинин жетекчилери Жахонгир Тахировду жети жылга, Бахор Рауповду беш жылга эркинен ажыраткан.

Мындан тышкары ушул эле агенттиктин башка облустардагы 12 өкүлү 6 жылдан 9 жылга чейин соттолгон. Сот агенттик 300дөн ашуун кишиден акча алып, бирок аларды жумуш үчүн чет өлкөгө жөнөтпөнү жөнүндө токтом чыгарган.

Булак: “Борбор Азия жаңылыктар кызматы”

Өлкөдө дагы 74 адамдан коронавирус жана пневмония табылды, 1 бейтап каза болду

Бүгүн, 29-январга карата өлкөдө коронавирус жана пневмония илдетинин жаңы 74 учуру аныкталды. Бул тууралуу коронавируска каршы күрөшүү боюнча республикалык штаб билдирди.

Жаңы учурлар: Бишкек шаарынан – 53, Ош шаарынан – 1, Чүй облусунан – 11, Ош облусунан – 5, Талас облусунан – 1, Нарын облусунан – 1, Жалал-Абад облусунан – 2 катталды. Ошентип, өлкөдө жалпысынан 84 377 адам ооруга чалдыккан.

Өткөн сутка ичинде 162 адам оорудан айыгып ооруканадан чыгарылган. Алардын жалпы саны 80 643 жетти.

Оорудан айыккандар: Бишкек шаарынан – 69, Ош шаарынан – 1, Чүй облусунан – 51, Ош облусунан – 3, Талас облусунан – 2, Ысык-Көл облусунан – 22, Жалал-Абад облусунан – 7, Баткен облусунан – 1, Нарын облусунан – 6.

Акыркы бир сутка ичинде коронавирустан Ысык-Көл облусунан 1 бейтап каза болду. Алардын жалпы саны 1409га жетти.

Министр Руслан Казакбаев Түрк Кеңешинин Башкы катчысы Багдад Амреев менен жолугушту

Кечээ, 28-январда Кыргыз Республикасынын Тышкы иштер министрлигинде Министр Р.Казакбаев Түрк Кеңешинин (Түрк тилдүү мамлекеттердин кызматташтык кеңеши / ТТМКК) Башкы катчысы Б.Амреев менен жолугушту. Бул тууралуу ТИМдин басма сөз кызматы билдирди.

Жолугушуунун жүрүшүндө, Түрк Кеңешинин жакынкы арадагы өнүгүү келечеги жана бул эл аралык уюмдун алкагында ушул жылы пландаштырылган иш-чаралар талкууланды.

Министр ички саясий кырдаал, өлкөдөгү маанилүү саясий процесстер жөнүндө айтып берди жана Түрк Кеңешине Кыргызстандын ар тараптуу колдоосу үчүн ыраазычылык билдирди. Р.Казакбаев Түрк тилдүү мамлекеттердин ортосундагы боордоштукту жана биримдикти чыңдоо боюнча ТТМККнын активдүү көп кырдуу ишмердүүлүгүн жогору баалады.

ТТМККнын Башкы катчысы Катчылык тарабынан Бүткүл дүйнөлүк саламаттык сактоо уюмунун Европадагы Аймактык бюросу менен биргеликте мүчө-мамлекеттерге жана байкоочу-мамлекеттерге коронавирус пандемиясына каршы күрөшүү боюнча көрүлүп жаткан чаралар жөнүндө маалымдады.

Мындан тышкары, Б.Амреев Кыргыз Республикасынын Тышкы иштер министрлигинин башчысына жакынкы жыйырма жылдыкта кызматташтыктын артыкчылыктуу багыттарын чагылдырган ТТМККнын өнүктүрүүнүн жол картасы болуучу «Түрк дүйнөсүнүн көз карашы – 2040» жана Түрк Кеңешинин 2020-2025-жылдарына Стратегиясы» документинин долбоорун тапшырды.

Ошону менен бирге, тараптар Түрк Кеңешинин күн тартибиндеги актуалдуу маселелер боюнча пикир алмашышты жана ТТМКК алкагында Кыргызстандын ортосундагы кызматташтыкты мындан ары тереңдетүүгө эки тарап тең кызыкдар экендигин билдиришти.

Түркмөнстан «Transparency International» уюмунун коррупция тизмесинде 165-орунга жайгашты

Transparency International уюмунун коррупция боюнча жаңы баяндамасында Түркмөнстан 180 өлкөнүн ичинен 165-орунга жайгашты.

Түркмөнстан 100 баллдан 16 балл алып, Чыгыш Европа жана Борбор Азия аймагында коррупциянын деңгээли боюнча биринчи орунду алды.

Уюм чөлкөмдөгү «авторитардык жана коррупциялашкан лидерлер» пандемия учурунда мамлекеттик чыгымдарды көзөмөлдөөнү жана жарандык эркиндикти чектөөнү күчөтүшкөнүн белгилеген.

Баяндамада айрым саясий лидерлер кризисти бийлигин күчтөндүрүү үчүн колдонушканы, маалымат алууга чектөө киргизилип, мамлекеттик сатып алуулардын эрежелери бузулганы айтылат. Буга байланыштуу пандемия учурунда чет өлкөдөн келген жардамдардын бөлүштүрүлүшүн көзөмөлдөө ачык-айкын болгон эмес.

Түркмөнстан жыл сайын коррупция индексинде алдыңкы орунду алып, өлкөдө жемкорлук менен күрөшүүдө жылыш байкалбай келет.

Булак: “Борбор Азия жаңылыктар кызматы”

Сот Атамбаевди үй камагына чыгарган жок

Биринчи май райондук соту 28-январда кримтөбөл Азиз Батукаевдин түрмөдөн мыйзамсыз бошотулушу боюнча ишти кароону улантты.

Андагы башкы айыпталуучу, мурдагы президент Алмазбек Атамбаевди үй камагына чыгарууну адвокаттары Сергей Слесарев менен Замир Жоошев өтүндү. Сот аны канааттандырган жок.

Бул тууралуу Биринчи май райондук соту билдирүү таратты.

Сот бул иш боюнча 2020-жылдын июнь айында Атамбаевди 11 жыл 12 айга кескен. 30-ноябрда Жогорку сот ишти кайра кароого жөнөткөн.

Атамбаев ушул тапта Бишкектеги №47 колонияда отурат. Ал 28-январдагы сот прецессине барган жок. Ошондой эле айыпталуучу гематолог-дарыгер Абдухалим Раимжанов да барбагандыктан соттук отурум 3-февралга жылды.

Алмазбек Атамбаев саламаттыгынан улам мындан мурунку соттук отурумдарга да катышкан эмес. Анын адвокаты Замир Жоошев мурдагы президенттин омурткасынан эки грыжа табылгандыктан, көпкө чейин отура албай турганын, ошондой эле жүрөк жана башка оорулардан жабыркап жатканын айтып, соттон Атамбаевдин бөгөт чарасын өзгөртүүнү өтүнгөн.

Атамбаевге карата козголгон бир нече кылмыш иши ноябрдан бери Бишкектин Биринчи май райондук сотунда бириктирилип каралууда. Алар – Кой-Таш окуясы, Кой-Таштагы жер тилкеси, Бишкек ЖЭБиндеги жемкорлук, «Терек» сурма кениндеги коррупция боюнча кылмыш иштери.

Булак: “Борбор Азия жаңылыктар кызматы”

Меню