Казакстандын башкы прокурору Кайрат Кожамжаров кылмыш саясатын мындан ары дагы гумандаштыруу максатында түрмөдөн беш миңге чейинки кишини бошотуу пландалып жатканын айтты.
Кайрат Кожамжаровдун билдиришинче, прокурорлордун каршылыгы менен 200дөн ашуун адамдын жазасы жеңилдетилген. Өлкөдө кармалгандар менен камалгандардын саны азаюуда. Башкы прокурордун каршылыгы менен Казакстан Жогорку Соту 269 өкүмдү өзгөрткөн. Анын натыйжасында 12 киши акталып, 223 соттолуучунун жазасы жеңилдетилген.
«36 кылмыштын түрү боюнча эркиндигинен ажыратуу мөөнөтү азайып, коомдук жумушка тартуу, айыппулдарды төмөндөтүү киргизилүүдө. Азыр оор кылмыштар боюнча жоопко тартуунун эскирүү мөөнөтү беш жылга кыскарат. Анын натыйжасында беш миңге чейинки соттолуучу бошотулушу ыктымал», —деди башкы прокурор.
Ал кайсы кылмыштар боюнча жаза жеңилдетилерин так айткан жок. Тиешелүү мыйзамга казак президенти кол койгон.
Булак: “Борбор Азия жаңылыктар кызматы”
КОММЕНТАРИЙ КАЛТЫРУУ