2-мартта Вашингтондун чалгын кызматтары орусиячыл активист Алексей Навальныйдын ууландыруунун артында Федералдык коопсуздук кызматынын (орусчасы – ФСБ) өкүлдөрү турган деген «ишенимдүү тыянакка келгенден» кийин Орусиянын жогорку даражалуу 7 аткаминерине санкция салганын жарыялады.
АКШнын «кара тизмесине» Федералдык коопсуздук кызматынын башчысы Александр Бортников, президент Владимир Путиндин администрация жетекчисинин орун басары Сергей Кириенко, коргоо министринин орун басары Алексей Криворучко, башкы прокурор Игорь Краснов, Федералдык жаза аткаруу кызматынын директору Александр Калашников жана башкалар илинди.
Жо Байдендин администрациясы билдиргендей, Вашингтон ошондой эле биологиялык жана химиялык өндүрүшкө тиешеси бар 14 тарапка, анын ичинде 9 коммерциялык ишканага экспорттук чектөөлөрдү киргизди. Ак үйдүн дагы бир өкүлү кийинчерек Кошмо Штаттар SolarWinds компаниясынын системасына жасалган кибер чабуул жана башка кыянатчылыктар үчүн Орусияга каршы кошумча чараларды киргизерин билдирди.
Орусиянын тышкы иштер министри Сергей Лавров Вашингтондун мындай кадамына Москва жооп кайтарарын эскертти. Вашингтон билдиргендей, азыркы президент Жо Байдендин администрациясынын Орусияга карата мамилеси Москва менен жакшы алака түзүүгө аракет кылган Трамптын администрациясынан кыйла айырмаланат.
Ошондой эле Вашингтон Москва менен кызыкчылыктары дал келген маселелер боюнча иштешүүгө даяр экени маалымдалды. Буга чейин Евробиримдик Алексей Навальныйдын камалышы боюнча жогорку даражалуу төрт орус аткаминерине санкция киргизгенин жарыялаган.
Алексей Навальный былтыр августта Омск шаарында ууландырылган соң, Германияда дарыланып аман калган. Ал өткөн айда Германиядан дарыланып келээри менен “Шереметьево” аба майданында камакка алынган.
2-февралда сот Навальныйды 2014-жылкы иши боюнча алдамчылыкка айыптап, буга чейинки шарттуу жазаны жабык мекемедеги жазага алмаштырып, 3 жыл 8 айга эркинен ажыраткан болчу. Кийин Москва шаардык соту ал мөөнөттү бир аз азайтуу менен күчүндө калтырган.
Өткөн аптада Москвадагы тергөө абагынан Навальный башка жабык мекемеге которулганы белгилүү болду. Расмий органдар анын кайсы абакка которулганын кабарлай элек, бирок айрым маалымат каражаттары Навальный Москвага жакын Владимир облусундагы түзөтүү колониясына жеткирилиши мүмкүн экенин жазышты.
Булак: “Борбор Азия жаңылыктар кызматы”
КОММЕНТАРИЙ КАЛТЫРУУ