Кыргыз Республикасынын Министрлер Кабинетинин Төрагасы Акылбек Жапаров Кыргыз Республикасынын Ички иштер министрлигинде болуп, анда жарандардын коопсуздугун камсыздоо жана коомдук тартипти сактоо боюнча Ыкчам башкаруу борборунун иши менен таанышты.
Ички иштер министри Улан Ниязбеков жарандардын коопсуздугун камсыздоо үчүн зарыл болгон камералардын санын көбөйтүү боюнча мурда берилген тапшырма аткарылгандыгын билдирди.
«Камералардын саны эки эсеге көбөйдү. Эми бардык райондук ички иштер бөлүмдөрү күнү-түнү 24/7 режиминде иштеген көзөмөл камералары менен жабдылып, камералардын санын дагы көбөйтүү пландалууда», – деди ал.
Андан соң Министрлер Кабинетинин Төрагасы «Ураган» фото/видео жазуу аппараттык-программалык комплексинин иштөө принциби менен таанышты. Бул комплекстер автотранспорт каражаттарынын мамлекеттик катталган белгилерин автоматтык түрдө таануу жана эреже бузууларды фиксациялоо аркылуу жол кыймылынын эрежелерин бузууга бөгөт коюунун жана жолдордогу кырсыктардын санын азайтуунун натыйжалуу каражаттарынын бири болуп саналат.
Ошондой эле Министрлер Кабинетинин башчысына Бишкек шаарында жана республиканын аймактарында милициянын участкалык кызматкерлери жабдылган кызматтык планшеттер жана жеке камералар кызматтык максатта кандай колдонулуп жаткандыгы тууралуу маалымат берилди.
Акылбек Жапаров Ички иштер министрлиги тарабынан борбор шаарды жана аймактарды видеокөзөмөл камералары менен жабдуу боюнча көрүлүп жаткан аракеттерге оң баасын берип, ал ошондой эле контрабандалык жана эсепке алынбаган товарларды алып кирүүгө жана ташып чыгууга жол бербөө максатында иштелип чыккан программалык камсыздоо интерфейсин жакшыртуу зарылдыгын белгиледи.
КОММЕНТАРИЙ КАЛТЫРУУ