Берлин шаарында Германиянын жаратылышты коргоо союзунун “Ак илбирс экспедициясы” көргөзмөсүнүн алкагында Кыргызстан тууралуу маданий кече өттү
2023-жылдын 30-мартында Кыргыз Республикасынын Германия Федеративдүү Республикасындагы Элчилиги Германиянын Тышкы иштер министрлигине караштуу «Willkommen in Berlin» («Берлинге кош келиңиздер») клубу менен биргеликте кыргыз маданий кечесин уюштурду. Кече Германиянын жаратылышты коргоо союзунун (Naturschutzbund Deutschland-NABU) “Ак илбирс экспедициясы” көргөзмөсүнүн алкагында болду.
Иш-чарага “Wilkommen in Berlin” клубунун “Элчиликтер жана Резиденциялар” тобунун мүчөлөрү, Берлиндеги кыргыз диаспорасынын өкүлдөрү катышты.
Кыргыз Республикасынын Германия Федеративдүү Республикасындагы Элчиси Өмүрбек Текебаев конокторго куттуктоо сөзүн сүйлөп, жогоруда аталган клубдун “Элчиликтер жана Резиденциялар” тобунун жетекчиси Тоне Корссунд-Айхингер айымга бул кечени чогуу өткөргөндүгү үчүн ыраазычылык билдирди. Элчи мындай кечелерди Германияда өткөрүү немис калкынын Кыргызстан менен жакындан таанышуусуна, эки өлкөнүн маданиятын жана элдерин жакындаштырууга жардам бере аларын белгиледи.
Кеченин жүрүшүндө конокторго Кыргызстан жана өлкөнүн туристтик мүмкүнчүлүктөрү тууралуу видеоролик көрсөтүлүп, немис жана кыргыз музыканттарынын жана артисттеринин аткаруусунда классикалык музыкалык номерлер тартууланды.
NABUнун өкүлү Екатерина Ковтун кеченин конокторуна ак илбирсти жана жапайы жаратылышты коргоо боюнча Кыргызстанда ийгиликтүү ишке ашырылып жаткан NABU долбоору тууралуу кеңири маалымат берди, ошондой эле Элчиликте NABUнун “Ак илбирсти экспедициясы” көргөзмөсүнө экскурсия өткөрдү. Бул көргөзмөнүн алкагында дагы бир кезектеги иш-чара болду.
Кеченин коноктору кыргыздын улуттук тамак-аштарынан даам татып, жылуу жана достук маанайда ɵз ара баарлаша алышты.
29-майда Германиянын Баден-Вюртемберг федералдык аймагындагы Вальдбрунн айылында жергиликтүү кыргыз диаспорасы тарабынан уюштурулган “Кымыз майрамы” болуп өттү.
Бул иш-чара Германиядагы кыргызстандыктардын “Данек” атуу коому тарабынан уюштурулду жана ага Кыргыз Республикасынын Германиядагы Элчиси Өмүрбек Текебаев катышты. Элчи майрамга келген кыргызстандыктарды жана жергиликтүү немис тургундарын “Кымыз майрамы” менен куттуктап сөз сүйлөдү.
Бул майрамга Германиядан, Австриядан, Чехиядан келген 200 гө жакын кыргызстандыктар катышты. Иш-чарада Германияда жана Австрияда жашап жаткан таланттуу музыканттардын аткаруусунда кыргыз элдик күүлөр жаңырып, кыргыз улуттук оюндар тартууланды. Майрамга келген конокторго кыргыз улуттук тамактары жана кымыз сунуш кылынды.
Мындай иш-чара Германиядагы жана Европадагы кыргызстандыктардын ынтымагын мындайн ары да бекемдеп, кыргыздын улуттук каада –салтын, маданиятын немец жергесинде жайылтууга салым кошот.
Кымыз майрамы Вальдбрунн айылында Цольманн аттуу үй-бүлөлүк жылкы чарбасында болуп өттү. Бул чарба көп жылдан бери кымыз жасап, бээнин сүтүнөн ар кандай косметикалык жана медициналык азыктарды чыгарып, немец калкына тартуулап келе жатат.
Андан тышкары Элчи Ө.Текебаев Кирхард шаарында жайгашкан “RID GmbH” компаниясына барып Башкы директору В.Редер мырза менен жолугуп, компаниянын ишмердүүлүгү менен таарышты.
Жолугушуу учурунда Элчи Ө.Текебаев Башкы директор В.Редер менен Кыргызстанда ишти кеңейтүү боюнча маселелерин талкуулады.
“RID GmbH” компаниясы электр генераторлорду чыгаруу жаатында иштейт жана 2019-жылы Кыргызстанда кыргыз-герман биргелешкен ишканасын ачып, азыркы тапта ийгиликтүү иштеп келүүдө.
Президент Садыр Жапаров Германия жетекчилигине суу каптоодо каза болгондорго байланыштуу көӊʏл айтты
Кыргыз Республикасынын Президенти Садыр Жапаров Германия Федеративдʏʏ Республикасынын Федералдык Канцлери Ангела Меркелге жана өлкө Президенти Франк-Вальтер Штайнмайерге Германиядагы суу каптоонун кесепеттеринен каза болгондорго байланыштуу көӊʏл айтты.
“Кыргыз Республикасынын элинин атынан жана өзүмдүн атымдан Түндүк Рейн-Вестфалия жана Рейнланд-Пфальц федералдык аймактарында суу каптап, анын кесепеттеринен көптөгөн адамдар каза болгондугуна байланыштуу тереӊ кайгыруу менен көӊʏл айтам. Бул кырсыкта каза болгондордун үй-бүлөлөрүнүн, жакындарынын аза кайгысын тең бөлүшөм. Жабыр тарткандардын тезирээк сакайып кетүүсүн каалайм”, – деп айтылат деп айтылат көңүл айтуу телеграммасында.