Кыргызстандын саясый айдыңында бийлик менен оппозиция ит жыгылыш абалында турганда, маданиятыбызда көңүл көтөргөн окуя болду. Анткени өткөн жумада Россиянын кадыр-барктуу “Ника” киносыйлыгына кыргыз режиссеру Мирлан Абдыкалыковдун толук метраждуу алгачкы автордук тасмасы да татыктуу болду.
Буга чейин да аталган тасма эл аралык ондон ашык фестивалга катышып, жеңиштерге жеткен. “Ника” ошол сыйлыктардын ичинен эң бийиги болуп турат. “Сүтак” бул сынакта “КМШ жана Балтика мамлекеттеринин мыкты фильми” категориясы боюнча Грузиянын, Эстониянын, Украинанын жана Литванын режиссерлорунун эмгектеринин арасынан алдыга суурулуп чыкты. Демек, экономикалык кыйынчылыктан улам кризиске кабылган маданиятыбыз кайрадан жанданып, эл аралык деңгээлге көтөрүлүүдө. “Ника” Орусиянын улуттук киносыйлыгы катары Юлий Гусман тарабынан 1988-жылы негизделип, учурда алты жүздөн ашык академиктин башын бириктирген киноакадемияга айланган. 90-жылдан бери жеңүүчү жашыруун добуш берүүнүн жыйынтыгы боюнча аныкталып келатат. Жеңүүчүлөр канаттуу периштенин элеси чагылдырылган статуэткага ээ болушат. Бул сыйлыкты Орусиянын “Оскар” сыйлыгы деп да атап коюшат.
Булак: “Майдан.kg”
КОММЕНТАРИЙ КАЛТЫРУУ