Казакстан президенти Нурсултан Назарбаев менен Өзбекстан президенти Шавкат Мирзиёевдин ортосундагы сүйлөшүүлөрдүн жыйынтыгы менен бүгүн Астанада бир катар документтерге кол коюлду.
«Казинформ» агенттигинин маалыматы боюнча, эки өлкөнүн мамлекет башчылары Казакстан менен Өзбекстандын ортосундагы стратегиялык өнөктөштүктү өнүктүрүү жана ынак коңшулукту бекемдөө тууралуу биргелешкен декларацияга кол коюшту.
Эки өлкөнүн өкмөт башчыларынын деңгээлинде Аймактар ортосундагы кызматташтык тууралуу келишимге, 2017-2019-жылдарга карата экономикалык кызматташтык стратегиясына, Кош салык салууну жоюу тууралуу макулдашууларга өзгөртүүлөрдү киргизүү тууралуу протоколго жана өлкөлөр ортосундагы аскердик кызматташтык сыяктуу бир канча документтерге кол коюлду.
«Өзбекстан – биздин стратегиялык өнөктөшүбүз, коңшубуз, бир тууган өлкө. Биздин эл гүлдөп өнүгүүнү, бейпилдикти каалайт», – деди Назарбаев.
Өзбекстан президенти Мирзиёев Астанага болгон сапарын жана андагы сүйлөшүүлөрдү «тарыхый» деп сыпаттады.
Бул Шавкат Мирзиёевдин мамлекет башчысы катары Казакстанга жасаган алгачкы сапары.
Булак: Борбор Азия жанылыктар кызматы
КОММЕНТАРИЙ КАЛТЫРУУ