“Жалал-Абад шаарында быйылкы жылдын биринчи кварталында ар кайсы себептер менен чыккан өрт кырсыктарынын саны өткөн жылдын ушул мезгилине салыштырмалуу эки эсе азайган. Бул тууралуу шаардык өрткө каршы мамлекеттик кызмат бөлүмүнөн кабарлашты” – дейт Жалал-Абад мэриясынын басма сөз кызматы.
Алынган маалыматтарга караганда, быйылкы жылдын биринчи чейрегинде шаар ичинде 8 өрт кырсыгы катталса, өткөн жылдын ушул мезгилинде өрт кырсыктарынын саны 16га жеткен эле. Ошондой эле, быйылкы жылы өрт кырсыган келип чыккан материалдык зыяндардын өлчөмү 114 миң 947 сомду түзсө, өткөн жылы ушул мезгилде зыяндын көлөмү 976 миң 747 сомго жеткен болчу. Шаардык өрткө каршы кызматтын өздүк курамынын аракети менен 2 миллион 650 миң сомдук материалдык баалуулуктар сакталып калынган.
Өрттүн чыгуу объектилерин алып караганда, быйылкы жылы турак үйлөрдө, мамлекеттик мекемелерде, унаа коюучу жайларда, жеке менчик ишканаларда, жол боюндагы же ачык жайда турган чөп үймөктөрүндө, таштандыларда өрт кырсыктары катталбады. Бирок, короо-жайдагы курулуш объекттеринде чыккан өрт кырсыгы өткөн жылга караганда эки эсе көп катталган.
КОММЕНТАРИЙ КАЛТЫРУУ