Түркия президенти Режеп Тайип Эрдоган 16-апрелде өткөн референдумдагы жеңишинен кийин алдына койгон максаттарын ишке ашырууга киришти. Референдумдун жыйынтыгына ылайык, шайлоочулардын жарымынан көбү президенттик бийликтин бекемделишин жана өлкөнүн парламенттик башкаруудан президенттик башкарууга өтүшүн колдоп добуш беришкен.
Референдумдан кийин Эрдоган алгачкы кадамдарынын бири — кайрадан өлүм жазасын киргизүү болорун билдирди. Эгер президенттин бул аракети ишке ашса, анда Түркиянын Европа биримдигине кошулуу тууралуу сүйлөшүүлөрүн кыйла кыйындатышы мүмкүн. ЕБ өлкөлөрүндө өлүм жазасына тыюу салынган.
Түркиянын Борбордук шайлоо комиссиясы 16-апрель күнү кечинде добуш берген жарандардын 51,3 пайызы конституциялык өзгөртүүлөрдү колдогонун билдирген. Ага ылайык, 25 миллион шайлоочу президенттин реформасын колдосо, 24 миллионго жакын жаран ага каршы болушкан.
Булак: “Борбор Азия жаңылыктар кызматы”
КОММЕНТАРИЙ КАЛТЫРУУ