Калининград шаарында экстремисттик уюмдарга катышы бар деген шек менен 12 борборазиялык жаран кармалды. Бул тууралуу 26-апрелде Орусиянын Федералдык коопсуздук кызматы билдирди.
Ушул эле күнү “Ислам мамлекети” экстремисттик тобунун жактоочусу делген эки кишинин кармалганын кабарлаган. ФСБнын ырасташынча, алар Ыраакы Чыгышта ири кол салуу уюштурууну пландап жатышкан.
Маалыматтарга караганда, кармалган 12 шектүү жаран “Ислам жихады – жамаат муджахидин” тобу менен байланышта болгон жана жоочуларды азгырууга тиешелери бар. ФСБнин билдирүүсүндө бул топтун лидери экстремизмге шектелип, өзбек бийлиги тарабынан издөөгө алынган. Кармалгандарды терроризм айыбы боюнча жоопкерчиликке тартуу үчүн депортациялоо пландалууда.
Орусия ушуну менен үчүнчү жолу Борбор Азиядан чыккан жарандарды террордук ишмердүүлүккө айыптоодо. 3-апрелде Санкт-Петербургдун метросундагы жардыруудан 15 адам өлүп, элүүдөн ашууну жарадар болушкан. Жардырууну Кыргызстандан барган Акбаржон Жалилов аттуу Орусия жараны жасаганын тергөө органдары маалымдашкан. Бул окуядан кийин жардырууга тиешеси бар деген шек менен борборазиялык ондой киши кармалган.
Булак: “Борбор Азия жаңылыктар кызматы”
КОММЕНТАРИЙ КАЛТЫРУУ