АКШ мамлекеттик катчысы Рекс Тиллерсон менен Казакстандын тышкы иштер министри Кайрат Абдрахманов Нью-Йоркто өткөн жолугушууда кызматташуу маселелерин, Сирия жана Ооганстандагы абалды талкуулашты. Тараптар Корей жарым аралындагы кырдаал жана Ирандын өзөктүк программасы боюнча дагы пикир алышты.
Эл аралык коопсуздук маселелери Кайрат Абдрахмановдун БУУнун Баш катчысы Антониу Гутерриш менен кездешүүсүндө дагы талкууланды. Казакстан өкүлдөрү 28-апрелде БУУнун Коопсуздук Кеңешинин Түндүк Корея маселелери боюнча министрлик дебатына катышышты.
Эл аралык коомчулук Корей жарым аралындагы аскердик жаңжалдын тутанып кетүү тобокелчилигине кабатыр. Соңку жумаларда Түндүк Корея дээрлик күн сайын ядролук арсеналын көбөйтөрүн жана кыйратуучу куралдарын сыноону улантарын, аймактагы америкалык күчтөргө сокку урарын айтып, опузалап келет.
АКШ деңиз күчтөрү менен суу алдында жүрчү өзөктүк кайыгын Корей аралдарына жөнөттү жана жыл соңуна чейин Түштүк Кореяга рекетадан коргонуу системасын орнотууга сөз берди. Вашингтон БУУну Түндүк Кореяга каршы санкцияларды катаалдаштырууга үндөп келет.
Булак: “Борбор Азия жаңылыктар кызматы”
КОММЕНТАРИЙ КАЛТЫРУУ