Бүгүн Кыргыз Улуттук илимдер академиясында Биология жана топурак таануу институту, КРнын Билим берүү жана илим министрлиги, КРнын Айыл чарба, тамак-аш өнөр жайы жана мелиорация министрлигинин Балык чарба департаменти жана КРнын Айлана-чөйрөнү коргоо жана токой чарбасы мамлекеттик агенттиги жана Econonomic Cooperation Organization илимий фонду биргелешип уюштурган ихтиология жана гидробиология көйгөйлөрү боюнча илимий конференция өз ишин баштады.
Иш-чарда билдирүү жасаган Жайыт, мал-чарба жана балык чарбасы департаментинин Аква маданият бөлүмүнүн башчысы Эдил Ниязов төмөнкүлөргө токтолду: «Кыргызстандагы балык чарбасынын абалы жакшы өнүгүүдө. Ага Өкмөт жана Айыл-чарба министрлиги жактан да көңүл бурулууда. Көйгөй жаратып жаткан нерсе айлана-чөйрөнүн булгануусу менен суулар булганып, балыктардын айрым түрлөрү жоголуп, алардын ордуна башка зарыл эмес балыктар пайда болушу мүмкүн. Анын алдын алуу үчүн сууларды туура пайдалануу керек. Биз балыктарды көбөйтүү максатында иш жүргүзүп, инкубация жолу менен өстүрүлгөн балыктарды көлмөлөргө, суу сактагычтарга коё беребиз. Мисалы, 2016-жылы 8 млн. 53миң балык салсак, быйыл 8 млн. 200 миң түрлүү балыктардын уругун салдык».
Деструктивдик антропогендик таасирлердин жана глобалдык климаттык өзгөрүүлөрдүн күчөшүнө байланыштуу гидробиология маселелеринин актуалдуулугу уламдан-улам жогорулоодо. Ал жаратылыштык өзгөрүүлөрдөн гана эмес, экономикалык факторлордон дагы көз каранды. Бул тууралуу “Казахрыбхоз” Ассоциациясы башкармалыгынын төрагасынын орун басары Серик Тимирханов мындай деген оюн билдирет:
“XXI-кылымда таза суу биологдордун гана эмес, экономисттердин дагы көңүл чордонунда болууда. Өзгөчө ал сууну өтө көп колдонгон Борбор Азия аймагына тиешелүү. Бул жерден балык чарбасын өнүктүрүү үчүн сууну үнөмдөөгө көмөкчү болуп жаткан жаңы технологиялар жөнүндө айта кетпесек болбос”.
Азербайжан Улуттук илимдер академиясынын Зоология институтунун директору, физика-математика илимдеринин кандидаты Элман Юсифов Кыргызстан менен кызматташуу ниети бар экендигин билдирди.
“Кыргыз Улуттук илимдер академиясынын тектеш институттары менен келишимдин негизинде кызматташуу сунушун киргизет элем. Тажрыйба алмашуу менен гана чектелбестен, адистерди, жаш окумуштууларды бири-бирибизге жиберип, илимий иштер, китепканалар, экспонаттар, коллекциялар жана музейлер аркылуу дагы байланышсак, эки тараптын илимий ишмердүүлүгүнө өтө чоң жардамы тиет деген ойдомун. Эгерде экспедициялар уюштурула турган болсо, биз кызматкерлердин экспедициялык чыгымдарын көтөрүүгө даярбыз” – деди Э. Юсифов.
Ошондой эле иш-чаранын алгачкы күнүндө ФАОнун өкүлү М.Сариева Кыргызстандагы аква маданияттын өнүгүүсүндөгү ФАО программасынын ролу тууралуу докладын окуду. Конференция 28-29-сентябрда Чолпон-Ата шаарында уланат.
КОММЕНТАРИЙ КАЛТЫРУУ