Кыргыз Республикасынын вице-премьер-министри Дүйшөнбек Зилалиевге катуу сөгүш берилди. Тиешелүү буйрукка бүгүн, 4-октябрда, Кыргыз Республикасынын Премьер-министри Сапар Исаков кол койду. Бул туурасында өкмөттүн расмий сайты жарыялады.
Мындай дисциплинардык чара Кыргыз Республикасынын Шайлоо жана референдумдарды өткөрүү боюнча комиссиясынын чечиминин негизинде 2017-жылдын 24-сентябрында кабыл алынган.
Кыргыз Республикасынын Шайлоо жана референдумдарды өткөрүү боюнча комиссиясынын чечими боюнча Кыргыз Республикасынын Өкмөтүнө Кыргыз Республикасынын вице-премьер-министри Дүйшөнбек Зилалиевдин жоопкерчилигине карата көрүлгөн дисциплинардык чараны мындан да катуураак чарага өзгөртүү боюнча көрсөтмө берилген.
Эскерте кетсек буга чейин, 21-сентябрда, Кыргыз Республикасынын Премьер-министри Сапар Исаков вице-премьер-министр Дүйшөнбек Зилалиевге эскертүү берип, Кыргыз Республикасынын Президентин шайлоого карата уюштуруу, техникалык маселелерине жана шайлоо комиссияларынын даярдыгына көмөк көрсөтүү боюнча республикалык штабдын төрагасынын милдетин Кыргыз Республикасынын вице-премьер-министри Темир Жумакадыровго жүктөгөн.
Аталган чечим Премьер-министр тарабынан ЖМК Дүйшөнбек Зилалиев Кыргыз Республикасынын Президенттигине талапкерлердин бирине жеке көз карашын билдиргендигине байланыштуу кабыл алынган.
КОММЕНТАРИЙ КАЛТЫРУУ