АКШнын Ташкенттеги элчилиги Өзбекстан түрмөлөрүнөн алты «абийир туткунунун» бошотулушун кубаттады.
«Кошмо Штаттар абийир туткундары деп аталган алты адамды — журналист Гайрат Михлибоевди, активисттер Юлдаш Расуловду, Чуян Маматкуловду, Кудрат Расуловду, ошондой эле эже-сиңдилер Мехринисо жана Зулхумор Хамдамоваларды эркиндикке чыгаруу боюнча Өзбекстан бийлигинин чечимин кубаттайт», – деп жазылган АКШ элчилигинин сайтында.
Гайрат Михлибоев 2002-жылы жайында кармалган. 2003-жылы февралда өлкөдө тыюу салынган «Хизб-ут-Тахрир» диний партиясынын мүчөсү деп айыпталып, жети жылга эркинен ажыратылган. Бирок 23 жылга соттолгон «Хуррият» гезитинин мурдагы кабарчысы он алты жыл өткөндөн кийин гана эркиндикке чыкты.
2002-жылы сентябрда кармалган Өзбекстандын адам укуктары биримдигинин өкүлү Юлдаш Расулов «Хизб-ут-Тахрирдин» мүчөсү болгон, аталган диний уюмдун катарына жаңы мүчөлөрдү азгырган жана өкмөткө каршы багытталган идеяларды жайылткан деп айыпталып, жети жылга эркинен ажыратылган. Бирок Расуловдун өзү эч качан «Хизб-ут-Тахрирдин» мүчөсү болбогонун, тескерисинче, адамдарды ал уюмдун катарынан чыгууга үндөгөнүн айтып келет.
Кашкардарья облусунун Касан районунда жашаган активист Чуян Маматкулов 2012-жылы августта кармалган. 2013-жылы февралда «конституциялык түзүлүшкө кол салуу», «адам уурдоо», «алдамчылык», «документ жасалмалоо» жана «жалган көрсөтмө берүү» беренелери боюнча күнөөлүү деп табылып, он жылга камалган.
2014-жылы намангандык зергер Кудрат Расулов интернеттен оппозициялык саясатчы Мухаммад Салих жөнүндөгү тасманы жүктөн алгандыгы үчүн сегиз жылга эркинен ажыратылган. Анда ал «конституциялык түзүлүшкө кол салган» деп айыпталган.
Булак: “Борбор Азия жаңылыктар кызматы”
КОММЕНТАРИЙ КАЛТЫРУУ