Башкы прокуратура Бишкекте кармалган жана саясий башпаанек сураган активист жана блогер Муратбек Тунгышбаевди Казакстанга өткөрүп берүүгө макул болду. Астана аны тыюу салынган “Казакстандын демократиялык тандоосу” кыймылын колдойт деп айыптоодо.
Тунгышбаевдин адвокаты Нурбек Токтакуновдун айтымына, Башкы прокуратура казак тараптын өтүнүчүн 21-майда канааттандырган. Ал бул чечимге макул болбой, доо арыз менен сотко кайрыларын билдирди.
Казакстанда кылмыштуу топту каржылоого, экстремисттик уюмдун ишмердүүлүгүнө катышууга айыпталган Тунгышбаев учурда Мамлекеттик улуттук коопсуздук комитетинин тергөө абагында отурат.
Кыргызстандын күч түзүм кызматкерлери 10-майда Тунгышбаев жашаган Бишкектеги батирди тинтүүгө алып, аны кармап кетишкен. Электрондук жабдууларын алып коюшкан.
Тинтүүгө жол берген документте Муратбек Тунгышбаев азыр Европада жашаган казакстандык экс-банкир, оппозициялык саясатчы Мухтар Аблязов негиздеген “Казакстандын демократиялык тандоосу” кыймылына маалымат берип турганы айтылган. Бул кыймыл Казакстанда экстермисттик уюм деп табылган.
Адвокат Нурбек Токтакунов казак бийлиги Муратбек Тунгышбаевге саясий себептерден улам кылыш ишин козгогон деп эсептейт. Анын маалыматы боюнча активист расмий Астананы сындап келгени үчүн куугунтуукка кабылган.
Токтакунов 15-майда Мамлекеттик миграциялык кызматка кайрылып, активистке саясий башпаанек берүүнү өтүнгөнүн билдирди.
Булак: Борбор Азия жанылыктар кызматы
КОММЕНТАРИЙ КАЛТЫРУУ