ЕККУнун ММК эркиндиги маселелери боюнча өкүлү Арлем Дезир Казакстан сотунун Ratel.kz интернет-порталынын ишин токтотуу тууралуу чечимин басма сөз эркиндигин жөнсүз чектөө деп атады.
Арлем Дезир сот чечимине байланыштуу пикирин Твиттердеги баракчасына да жарыялады. Анын айтымында, бийлик сайттын жана журналисттердин ишине тоскоол болбошу керек.
Алматы шаарынын Медеу райондук сотунун судьясы Гулмира Бейсенова 28-майда шаардык прокуратуранын “Ratel.kz” сайтынын баш редакторунун үстүнөн жазган арызын канааттандырган.
– “Ratel.kz” аналитикалык интернет-порталынын кызматы токтотулсун, анын каттоосу жоюлсун жана анын домендерин колдонууга бир жылга тыюу салынсын, – деген судья Гүлмира Бейсенова.
Сот чечиминде дагы бир канча интернет сайтка “Ratel.kz” сайтынын материалдарын жарыялоого тыюу салынган.
Порталдын башы редактору Марат Асипов сот чечимин даттанарын билдирген.
“Ratel.kz” сайты жана анын редактору Марат Эсиповго байланыштуу иш Алматы сотунда апрелде карала баштаган. 2-апрелде полиция “Ratel.kz” сайтынын жана “Forbes Kazakhstan” журналынын жергиликтүү кеңсесинде тинтүү жүргүзүп, компьютер, документтерди алып кеткен. Кийин тартип коргоочулар тинтүү мурдагы министр Зейнулла Какимжановдун доо арызынын негизинде болгонун айтышкан. Экс-министр сөз болгон ресурстар анын беделине шек келтирген жалган маалымат жарыялашканын айтып келатат.
Булак: «Борбор Азия жаңылыктар кызматы»
КОММЕНТАРИЙ КАЛТЫРУУ