Бүгүн, 26-декабрда Бишкек шаардык сотунда экс-депутат Равшан Жээнбековдун баш коргоо чарасын өзгөртүү боюнча апелляциялык арызы каралып, шаардык сот райондук соттун өкүмүн күчүндө калтырды. Саясатчы 2020-жылдын 9-февралына чейин камакта калды.
Соттун мындай чечимине саясатчынын адвокаты Замир Жоошев негизсиз жана мыйзамсыз чечим болгонун баса белгилеп, нааразы болду. Ал эми айыпталып жаткан Равшан Жээнбеков өзүнө коюлган күнөөнү мойнуна албай турганын, бул бийликтин буюртмасы экенин айтты. Аны төмөндөгү видеодон көрүңүз:
Эске сала кетсек, 14-декабрда, Биринчи Май райондук сотунда Равшан Жээнбековдун баш коргоо чарасы каралып, 2020-жылдын 9-февралына чейин СИЗО-1де кармоо чечимин чыгарган.
Равшан Жээнбеков 12-декабрда ИИМге суракка чакырылып, ага Кой-Таш окуялары боюнча “Барымтага алуу” жана “Массалык башаламандыкты уюштуруу” беренелеринин негизинде шектүү катары камакка алынган. Дал ошол күнү Жогорку Кеңеште 7-8-августта Кой-Ташта болгон окуя боюнча мамлекеттик комиссиянын корутундусу угулуп, бир топ адамдын аты аталган. Алардын арасында Равшан Жээнбеков да бар болчу.
Равшан Жээнбеков 7-8-августта экс-президент Алмазбек Атамбаевди кармоо маалында Кой-Таш айылында болгон. Ал боюнча буга чейин ИИМге суракка чакырылган.
Булак: KyrgyzToday.kg
КОММЕНТАРИЙ КАЛТЫРУУ