КРнын вице-премьер-министри Равшанбек Сабиров кыргыз-казак мамлекеттик чек арасындагы «Ак-Жол – Автожол» көзөмөл-өткөрмө жайын реконструкциялоонун жана курулуш иштеринин жүрүшү менен таанышты. Бул тууралуу бүгүн, 4-декабрада өкмөттүн басма сөз кызматы билдирет.
КРнын Улуттук коопсуздук мамлекеттик комитетинин Чек ара кызматынын маалыматы боюнча, «Ак-Жол» көзөмөл-өткөрмө жайын реконструкциялоо иши 68% бүтүп калды.
Вице-премьер-министр «Ак-Жол» көзөмөл-өткөрмө жайын реконструкциялоо жарандарга ыңгайлуу шарттарды түзүүгө багытталганын белгиледи.
Ошондой эле мамлекеттин имиджи көзөмөл-өткөрмө жайларынын сырткы көрүнүшүнө көз каранды экенин айтып, модернизациялоо иштери сапаттуу жүргүзүлүүгө тийиш экенин кошумчалады.
«Кыргызстанга келип жаткан туристтердин жана ишкерлердин биздин өлкө тууралуу таасирлери чек арадан өтүүдө калыптанат. Ошондуктан аткарылып жаткан иштер эл аралык стандарттарга жооп берип, андагы имараттар жана курулмалар заман талабына жараша жасалгаланышы шарт», – деди Равшанбек Сабиров.
Вице-премьер-министр «Ак-Жол – Автожол» пункттун модернизациялоо ишин белгиленген мөөнөттө аяктоо тапшырмасын берди.
Белгилей кетүүчү жагдай, көзөмөл-өткөрмө жайын реконструкциялоодо комплекстин курулушу, инфраструктурасын модернизацияло, заманбап техника жана жабдуу менен камсыздоо каралган. Бул «Ак-Жол – Автожолдон» жарандардын өтүү жөндөмдүүлүгүн кеңейтип, аларга ыңгайлуу шарттарды түзүүнү камсыздайт. Өткөрмө жайын модернизациялоо иши республикалык бюджеттин эсебинен каржыланууда.
КОММЕНТАРИЙ КАЛТЫРУУ