Тажикстанда сот белгилүү диний ишмер Сирожиддин Абдурахмоновду (Сирожиддин Эшони) 5,5 жылга эркинен ажыратты. Өкүм 12-февралда чыккан.
Исмоили Сомони райондук соту «Озоди» радиосуна динаятчы экстремисттик уюмдун ишин уюштурууга айыпталганын билдирди. Бул арада «Азия-Плюс» басылмасынын өз булагы Сирожиддин Абдурахмонов өлкөдө тыюу салынган «Салафия» диний кыймылынын ишине катышуу боюнча күнөөлүү деп табылганын кабарлаган.
Тажикстанда салафиттердин бейрасмий лидери катары таанымал белгилүү дин кызматчысы Сирожиддин Эшони (Сирожиддин Абдурахманов) 2020-жылы ноябрда кармалган. Анын компьютери жана диний китептери конфискацияланган.
Сирожиддин Эшони 2009-жылы да камалып, жети жылга эркинен ажыратылган. Анда ага «улуттук, расалык жана диний кастыкты козуткан» деген айып тагылган. Ал абактан 2013-жылы мунапыс менен бошотулган.
2019-жылы апрелде Сирожиддин Эшони видеокайрылуу жасап, бийликтин мобилдик Интернетти кымбаттатканын кубаттаган жана Интернетти «кылымдын оорусу» деп атаган. Ошол эле маалда ал Интернетти такай колдонот жана соңку кездери «Ютуб» каналы аркылуу колдонуучулардын дин тууралуу суроолоруна жооп берип келген.
Булак: “Борбор Азия жаңылыктар кызматы”
КОММЕНТАРИЙ КАЛТЫРУУ