КРИМИНАЛДЫК ХРОНИКА ЖАНА ОКУЯЛАР

Москвада полиция Кыргызстандан барган 31 жаштагы адамды, жатаканада өз бөлмөсүндө уктап жаткан аялдын бутун жалагандыгы үчүн кармашты.

“Москва” агенттигинин укук коргоо органдарына шилтеме жасап берген маалыматына таянсак, полицияга Сельхозхозяйственная көчөсүндөгү куруучулардын жатаканасында жашаган 31 жаштагы аял телефон менен жардам сурап кайрылган. Анын айтымында, түндө бейтааныш адам, ал уктап жаткан бөлмөгө өзү кирип келип, бутун жалап жана өпкүлөгөн. Жабырлануучу аял ойгонуп кетип, полицияга телефон чалган.

Шектүү  жаран кармалып, ага карата азыр зордукчул сексуалдык мүнөздөгү аракет боюнча кылмыш иши козголуп, иш иликтенүүдө.

Ушундай эле окуя мурда дагы болгону айтылган. Анда полиция Өзбекстандын жараны Ойбежон Тураевди кармагандыгы белгиленген. Ал маньяк кыздардын беттерин жалаган.

Кечээ, 2-август күнү өткөн жылы түзүлүп, кыска аралыкта дүбүртү катуу чыккан «Элдик парламенттин» мүчөлөрүнө карата соттук өкүм чыкты. Ишти караган Биринчи Май райондук соту «Элдик парламенттин» анабашчылары Бекболот Талгарбеков менен Төрөбай Колубаевди 14 жылга күчөтүлгөн режимге, аталган топтун активдүү мүчөлөрү Бишкек шаардык сотунун мурдагы төрагасы Марат Султановду 10 жылга күчөтүлгөн режимге, ал эми экс-депутат Тойгонбай Калматов 5 жыл үй камагына, Александр Гусевди 6 жыл үй камагына кескен чечими чыкты.

Эсиңерде болсо, өткөн жылдын май айында «Элдик парламенттин» дал ушул өкүлдөрүнө карата бийликти күч менен басып алуу боюнча иш козголуп, дароо камакка алынышкан. Дээрлик 1 жыл 3 айдан бери УКМКнын абагында отурушкан саясатчыларга карата акыры бүгүнкүдөй адилетсиз өкүм чыкты. Муну менен өлкөбүздө сот адилеттүүлүгү канчалык деңгээлде экени дагы бир ирет далилденди.

Ошентип, кыргыз саясатында устатын сатпаган туруктуулук сапаты менен көптөргө үлгү болчу экс-аграрчы министр Бекболот Талгарбеков жана анын өнөктөштөрү кайдагы бир чет элдеги аферисттердин тилине кирип, жок жерден жалаага кабылуу менен адилетсиз соттордун айынан ондогон жыл жаза алып отурат. Фемида өкүлдөрүнүн буларга карата чыгарган чечимин угуп алып бир эсе күлкүң келет. Таңгаласың, россиялык аферисттер менен телефондон «шыңгыр» эте сүйлөшүп койгону үчүн кыргыздын жигиттерине 14 жыл жаза бергени, албетте, нонсенс! Бу жалганда адашпаган ким бар дейсиз? Каарманыбызды алтымыштан ашканда караңгы жайга камабастан, үй камагы менен жаза берсе болбойт беле? Атайын кызматтын жертөлөсүндөгү алардын буга чейинки отурганын эсептегенде деле Бекболот Талгарбеков баштаган мүчөлөрү эки жарым жылдык жаза мөөнөттөрүн өтөп коюшуптур. Калган жазасын үй камагында өтөшсө болбойт беле? Буга абийирсиз соттордун эрки жетпеди.

Бул күндөр дагы өтөт. Ошондо каармандарыбызга карата ашачапкан чечимди токуган судьялар Талгарбеков баштаган азаматтарыбыздын бетин кантип карашат? Кыргыз жамандык-жакшылыкта ар убак бет келишет. Эртең Бекболот Талгарбеков менен бир тасмалда бүгүн аларга карата көмүскөдөн отчет бергендер бет келишип калышсачы? Ойлонушпайбы? Бүгүнкү күн, учурдагы саясат менен күн бүтпөйт да, туурабы? Кандай болгон күндө да Бекболот Талгарбеков жана аны менен бирге айыпталган өнөктөштөрүнө карата жогорку инстанциялардан адилет чечим чыгарына үмүт кылып туралы.

Булак: “Азия Ньюс”

1-августта Москвада Өзбекстан менен Армениялык куруучу-мигранттардын ортосунда массалык уруш болду. Бул туурасында россиялык ММКлар маалымдашты.

Маалыматка ылайык, уруш Өзбекстан менен Армениянын куруучуларынан турган эки бригаданын ортосунда чыккан. Урушка 40ка жакын адам катышкан. Алар бири-бирин күрөк, балка, кувалдалар менен койгулашкан. Жыйынтыгында конфликттин алты катышуучусун ар кандай жаракаттар менен ооруканага жеткиришкен.

РЕН ТВнын маалыматына таянсак, конфликт, бир бригада имараттын чатырынан таштандыларды жерге ыргытышкан, ал эми бул нерсе экинчилердин жинине тийген. Башында куруучулар бири-бирин сөгүп башташкан, андан кийин оор инструменттерди колдоруна көтөрүшүп мушташып киришкен.

Учурда бул мушташ боюнча кылмыш иши козголуп, иш тыкыр изилденүүдө.

Баякы эле эски салт кайра өз нугунда. Дегеним, Кылмыш дүйнөсүндө “Карышкыр” деген каймана ат менен белгилүү кыргыз жараны Мурсалим Өмүрзаковду Россия ИИМи тарабынан депортациялоо боюнча чечим кабыл алган видео интернетке тарады.

Анда Орусиянын Ички иштер министрлиги 17-июлда кабыл алган чечим боюнча жазасын жаңы өтөп бүткөн Өмүрзаков ал өлкөнүн аймагынан чыгып кетүүсү керектиги, эгер ал аткарылбаса, анда ал Россияга өмүр бою кирүү укугунан ажырай тургандыгы эскертилет. 2013-жылы Өмүрзаков Москвада кылмыштуу топтордун бирин жетектейт деген айып менен кармалып, Кыргызстанга алынып келинген. Эки жылдан кийин бошонгон. «Мыйзамдагы ууру» деген статусун 2013-жылы август айында Россияда алган. Эскерте кетсек, мындан бир нече күн мурун Ош шаарында да абакта олтурган “Дженго” каймана аты бар криминалдык авторитет Кадырбек Досонов сот тарабынан акталса, ал эми кечээ, 31-июлда Бишкек шаарынын Свердлов райондук сотунун судьясы Дөөлөтбек Турдукожоев криминалдык чөйрөдө “Алтуха” деген ат менен кеңири белгилүү Алтынбек Ибраимов деген жарандын кылмыш ишин карап, аны актаган өкүм чыгарган. Көпчүлүк «каралардын» эркиндикке активдешип жатканын шайлоо менен байланыштырып, саясатчылар «каралардын» күчүнө таянат дешүүдө.

Булак: “Майдан.kg”