КРИМИНАЛДЫК ХРОНИКА ЖАНА ОКУЯЛАР

Кечээ, 31-июлда Бишкек шаарынын Свердлов райондук сотунун судьясы Дөөлөтбек Турдукожоев криминалдык чөйрөдө “Алтуха” деген ат менен кеңири белгилүү Алтынбек Ибраимов деген жарандын кылмыш ишин карап өкүм чыгарды.

2013-жылдын жайында жогоруда аталган кылмышка шектүү башка УКТнын мүчөлөрү менен борбордун бир тургунун “БМВ” үлгүсүндөгү автоунаага  салып, Аламедин районундагы тоолордун арасына алып барышып, физикалык күч колдонушуп, 80 000 АКШ долларын талап кылышкан. Андан кийин кылышкерлер жабырланган адамдын кыймылсыз мүлкүн – үйүн ээлеп алышкан.

2015-жылдын 16-апрелинде укук коргоо органдары тарабынан кылмышкер Алтынбек Ибраимов кармалып, чөнтөгүнөн 7 гр. гашиш алынган.

Судья айыпталуучуга карата сот чечимин окуп, ал айыпталып жаткан опузалап акча талап кылуу эпизоду далилденген жок жана уруп-сабоо фактысы такталган жок деп айыптардын бул бөлүгү боюнча аны актады.

Ал эми аны кармаган учурда жанында 7 гр. гашиш болгондугу үчүн 4 жылга эркинен ажыратылсын деп чечим чыгарып, бирок иликтөө убагындагы анын түрмөдө өткөргөн күндөрүн эсептеп сот залынан бошотуп жиберди.

Милициянын маалыматына ылайык, 1979-жылы туулган, мурда жети жолу соттолгон А. Ибраимов уюшулган кылмыштуу топтордун биринин мүчөсү жана криминалдык “смотрящий” деген статусу бар. Криминалдык чөйрөдө “Алтуха” деген каймана ат менен белгилүү.

Мындан бир нече күн мурун Ош шаарында да абакта олтурган “Дженго” каймана аты бар криминалдык авторитет Кадырбек Досонов сот тарабынан акталган.

Бул фактыларды коомчулук бийликтин шайлоого карата даярдыгы катары кабылдоодо жана социалдык тармактарда кызуу талкууларды жаратты.

Булак: Кyrgyztoday.kg

2017-жылдын 28-июль күнү болжол менен саат 11:30 чамасында Жайыл РИИБнин нөөмөт бөлүмүнө Ново-Николаевка айылындагы үйлөрдүн биринде киши өлтүрүү болгондугу тууралуу маалымат келип түшкөн. Бул маалыматтын негизинде Жайыл районунун ИИБнин ыкчам-тергөө тобу окуя болгон дарекке келишип, 50-55 жаштар чамасындагы европа улутундагы жарандын жансыз денесин табышкан. Бул туурасында Чүй ОИИББнын Басма сөз кызматы билдирет.

Тергөө учурунда анын өздүгү такталып, ал 53 жаштагы К.М. аттуу жаран экендиги такталган. 28-июль күнү саат болжол менен 07:00 чамасында 53 жаштагы К.М. жана анын 28 жаштагы уулу К.А. экөө мас абалында пикир келишпестиктен улам уруша кетишип, баласы атасын башка темир нерсе менен чаап жиберген. Атасы К.М. алган жаракатынан улам окуя болгон жерде көз жумган. Жайыл районунун ИИБнин кызматкерлери тарабынан изи сууй электе жогорудагы кылмышка шектүү делип, 28 жаштагы К.А. аттуу жаран кармалган. Жайыл РИИБнин тергөө бөлүмү тарабынан Кыргыз Республикасынын кылмыш-жаза кодексинин 97-беренеси (адам өлтүрүү) боюнча кылмыш иши козголуп, Жайыл райондук ИИБнин убактылуу кармоочу жайына камакка алынган. Учурда тиешелүү экспертиза дайындалып, тергөө иштери уланууда.

Соцтармакта 3 жигиттин араздашкан тасмасы тарады. Аны соцтүйүндүн колдонуучулары интернетке жарыялашкан. Тасмада көрүнүп тургандай, эки жаш жигит көптөп бир жигитти сабап салышкан.

https://www.youtube.com/watch?v=hqkcsym5GIA&feature=youtu.be

Булак: 5news.kg

Ушул жылдын июль айында Чүй облустук ИИББнин 10-Башкармалыгынын кызматкерлери тарабынан ок-дары жана экстремисттик мүнөздөгү маалыматтарды жайылтуу фактысы аныкталган. Бул туурасында ИИМдин Басма сөз кызматы билдирет.

Маалыматка ылайык, ыкчам-иликтөө иш-аракеттердин негизинде Ирак-Сирия аймагында куралдуу конфликтке катышуу үчүн чыгууга даярданып жаткан 36 жаштагы Ф.Р. аттуу жаран кармалган. Кылмышка шектүү адамдын жашаган жерин тинтүү учурунда эл аралык-террористтик уюмдарга таандык материалдар, ок-дарылар жана 9 мм калибрлүү ок табылган.

Аталган факт боюнча Чүй облусунун Аламүдүн райондук ИИБнин тергөө бөлүмү тарабынан кылмыш иши козголуп, шектүү камакка алынган. Учурда тергөө амалдары уланууда.

30-июль күнү эртең менен Филиппин полициясынын куралдуу операциясы наркотиктерди сатууда тиешеси бар делген 12 адамды өлтүргөн. Алардын ичинде Озамис шаарынын мэри Рейнальдо Пароджидонг жана анын аялы дагы бар. Бул туурасында Associated Press  полицияга шилтеме жасап билдирет.

Андан сырткары аталган шаардын вице-мэри, өлгөн мэрдин кызы Нова Пароджидонг жана анын үй бүлөсүнүн 3 мүчөсү дагы кармалышты.Өлгөндөрдүн арасында дагы бир жергиликтүү башкармалыктын өкүлү жана бир нече кароолчулар да бар. Азырынча алардын аты-жөнү тактала элек.

“Полицияны кароолчулар ок атуулар менен тосуп алышты, алар бизди киргизгилери келишкен жок”, – деп айтып берди полиция өкүлү Тимотео Плацеб ММКларга.

Полициянын маалыматына ылайык, Пароджидонгго тиешелүү 4 үйдөн ок атуучу куралдар жана  белгисиз өлчөмдөгү, арзан метамфетамин алынды.

Бир жыл ичинде Филиппинде “наркотиктерге каршы согушта” атышуулардын жана соттон тышкаркы өлтүрүүлөрдүн натыйжасында 9000ден ашык адам өлгөн. Ал эми түрмөлөр менен реабилитациялык борборлор наркомандар менен аны сатуучуларга толгон.