«Новая газетанын» өзбек кабарчысы Али Феруз (Худоберди Нурматов) чет өлкөлүк жарандарды убактылуу кармоочу жайга бараткан жолдо сот өкүлдөрү тарабынан сабалганын билдирди. Ага чейин сот журналистти Орусиядан чыгаруу чечимин кабыл алган.
Коомдук байкоочу комиссиянын мүчөсү Евгений Еникеев “Дождь” телеканалына Феруздун далысында кан шишиктери бар экени аныкталганын билдирди. Журналист ага каршы электрошокер колдонулганын, сабалганын айтты. Андан сырткары күзөтчүлөр кабарчыны кемсинтишкен.
Бүгүн москвалык журналисттер Али Ферузду колдоп Орусия президентинин администрация имаратынын алдында акция өткөргөнү жатышат.
Журналист шейшембиде редакция имаратынын алдында кармалган. Андан бир күн мурда ал ага Орусияда саясий башпаанек берүүдөн баш тартуу чечими боюнча сотко апелляциялык арыз менен кайрылган.1-августта Москванын Басман райондук соту миграциялык мыйзамдарды бузгандыгы үчүн деп Ферузду Өзбекстанга департациялоо жана беш миң рубль айыппул төлөтүү чечимин кабыл алган. Сот отурумунан кийин журналист өз жанын кыюуга аракет кылган.
2012-жылы Өзбекстандын жараны Худоберди Нурматовдун паспортун уурдап кетишкен. Ал документтерин калыбына келтирүү үчүн мекенине бара албайт. Айтымында, Өзбекстанда ага террордук уюмдар менен кызматташкан деген айып тагылышы мүмкүн.
Булак: “Борбор Азия жаңылыктар кызматы”
КОММЕНТАРИЙ КАЛТЫРУУ