Жол кырсыгы

Кечээ, 7-сентябрда Челябинск облусунун Златоуст шаарына жакын жердеги М-5 унаа жолунда Кыргыз Республикасынын жараны К.Ш.нын башкаруусундагы «Рено Логан» (жеңил унаа) каршы тилкеге чыгып кетип, натыйжада Volvo үлгүсүндөгү оор жүк ташуучу унаа менен кагышкан.

Унаанын ичинде алты адам болгон, баары бир үй-бүлө мүчөлөрү – ата-энеси жана алардын төрт баласы. Баары Кыргызстандын жарандары. Жүргүнчүлөрдү ташыган айдоочунун жубайы жана балдары Оштон Уфага учак менен келген. К.Ш. үй-бүлөсүн Уфанын аэропортунан тосуп алып, көрсөтүлгөн унаа менен Нижневартовск (ХМАО – Югра) шаарына бара жаткан.

Кырсыктан жабыркаган кыргызстандыктар тез жардам кызматы менен Златоуст шаарындагы шаардык клиникалык ооруканага жеткирилди.

7-сентябрда жергиликтүү убакыт боюнча саат 15:00дө К.Ш.нын кызы – З.Р. (12 жашта) операция болгон. Кыздын абалы оор. Калган үй-бүлө мүчөлөрүнүн абалы канааттандырарлык, алар учурда жогоруда аталган оорукананын травматология бөлүмүндө.

Бул окуя Башкы консулдуктун көзөмөлүндө, оорукананын кызматкерлери, МАИ кызматкерлери жана жабыркаган кыргызстандыктар менен байланыш түзүлүп жатат.

“Президент Жапаров ТИМ, ӨКМ, “Манас” эл аралык аэропортуна Россия Федерациясынын Ульяновск облусундагы жол кырсыгында каза болгон мекендештерибиздин сөөгүн Кыргызстанга жөнөтүү үчүн атайын борт уюштурууну тапшырды. Каза болгондордун жакындарына жана туугандарына терең кайгыруу менен көңүл айтабыз”,- деп билдирди Президенттин басма сөз катчысы Эрбол Султанбаев өзүнүн Фейсбуктагы баракчасы аркылуу.

Кыргыз Республикасынын Министрлер Кабинетинин Төрагасы Улукбек Марипов жол кыймылы коопсуздугун камсыздоо маселеси боюнча кеңешме өткөрдү. Кеңешменин жүрүшүндө Министрлер Кабинетинин Төрагасы жол кыймылы коопсуздугунун ар кыл аспектилерин жөнгө салуучу мыйзамдарды өркүндөтүү зарылдыгына басым жасады. Бул тууралу Министрлер кабинетинин басма сөз кызматы билдирет.

«Жол кырсыктарынын санынын өсүшү негизинен айдоочулардын каршы тилкеге чыгып кетишине жана мас абалда унаа башкаруусуна байланыштуу орун алууда. Айдоочуларды даярдоо сапатын да эстен чыгарбоо керек. Автомектептер акыркы ирет 2018-жылы текшерилген. Учурда автомектептерди текшерүү жүргүзүлө турген тутум жана критерийлерди кайрадан карап чыгуу зарыл. Белгиленген талаптарга жооп бербеген автомектептер лицензиядан биротоло ажыратылып, “кара тизмеге” киргизилиши керек. Ар бир айдоочу жол кыймылынын эрежелерин, жолдордогу сабаттуу жана тийиштүү жүрүм-турум эрежелерин так сактоосу жана өзүнүн өмүрү үчүн гана эмес, жол кыймылынын башка катышуучуларынын коопсуздугу үчүн да жооптуу экендигин түшүнүшү керек», – деди Улукбек Марипов.

Транспорт жана коммуникациялар министри Гүлмира Абдралиева жыл сайын унаалардын саны өсүп жаткандыгына көңүл бурду.

«Бул фактор жергиликтүү жана республикалык маанидеги унаа жолдордун абалына олуттуу таасирин тийгизүүдө. Айрым тилкелер пайдаланууга жараксыз абалга келген. Финансы каражаттырынын жетишсиздигинен улам капиталдык реконструкцияга муктаж болгон жерлерде жамаачылап жасап-түзөө иштери жүргүзүлөт. Бул жалпы жол кыймылынын катышуучулары үчүн белгилүү тобокелдиктерди жаратат», – деп маалымдады ал.

Өз кезегинде Министрлер Кабинетинин башчысы белгилегендей, акча каражатынын жоктугун айтып отурбастан, башка чараларды да ишке ашыруу керек.

«Айдоочулук маданиятты бала кезден эле калыптандырышыбыз керек. Мектептерде балдарга автоунаанын жана жолдо жүрүү коопсуздугунун принциптерин үйрөтө турган атайын курстарды киргизүү мүмкүнчүлүгүн иликтеп чыгуу керек», – деп белгиледи ал.

Министрлер Кабинетинин башчысы кошумчалагандай, Министрлер Кабинетинин ишиндеги башкы артыкчылыктардын катарына жол кыймылы коопсуздугун камсыздоо, биринчи кезекте жол кырсыгында жабыркаган жана курман болгондордун санын кыскартуу кирет.

«Жол кырсыктардын, анын ичинде оор кесепеттерге алып келген кырсыктардын себептерине жолдордун абалы гана кирбейт. Жол кырсыктарынын басымдуу бөлүгү жол эрежелерин одоно бузган айдоочулардын күнөөсүнөн улам келип чыгууда.

Тийиштүү мамлекеттик органдар жолдордогу кооптуу жана жоопкерчиликсиз жүрүм-турумдун алдын алуу үчүн бардык чараларды көрүшү керек», – деп жыйынтыктады Улукбек Марипов.

Кеңешменин жыйынтыгында тиешелүү министрликтер менен ведомстволорго тапшырмалар берилди. Тактап айтканда, иш-чаралардын жыйындысын жүргүзүү жана республикалык маанидеги автомобиль жолдоруна, анын ичинде Бишкек-Ош жана Бишкек – Чолпон-Ата жол тилкелеринде камераларды орнотуу менен «Коопсуз шаар» долбоорунун 2-баскычын тез арада ишке киргизүүсү, жол кыймылынын эрежелерин так сактоону кеңири жайылтууну активдештирүү жана жол кыймылы коопсуздугун, жарандардын, өзгөчө балдардын өмүрүн жана ден соолугун сактоону камсыздоого багытталган алдын алуу иш-чараларын күчтөндүрүү тапшырылды.