Тажикстанда Конституцияга өзгөртүүлөрдү киргизүү боюнча жалпы элдик референдумда 68 шайлоо тилкеси уюштурулат.
Бүгүнкү күндө парламенттин төмөнкү палатасынын депутаттарынан турган жумушчу топтор жер-жерлерде калк арасында түшүндүрүү иштерин жүргүзүшүүдө.
Жалпы элдик добуш берүүлөр 22-майга белгиленген.
Парламент төрагасы Шукуржон Зухуров шайлоо бюллетенинде “”Конституцияга киргизилип жаткан өзгөртүүлөр менен толуктоолорду колдойсузбу?” деген суроо гана жазыла турганын билдирди.
Баш мыйзамга киргизиле турган өзгөртүүлөрдүн толук тексти 41 беренеден турат. Анын 65-беренесинде президентти шайлоо эрежелери аныкталган. Өзгөртүүлөргө ылайык, депутаттар өлкө башчы Эмомали Рахмонго бийликте өмүр бою калууга мүмкүнчүлүк берүүдө.
“Бул берененин 4-бөлүгүндө жазылган чектөөлөр улуттук биримдик жана тынчтыкты орнотуучу, улут көсөмү Рахмонго тиешеси жок”, – деп жазылган документте.
Тажикстанда кийинки президенттик шайлоо 2020-жылы өтөт. Өлкөнү 1992-жылдан бери башкарып келаткан Рахмон былтыр улут көсөмү деген макамга ээ болгон. Мыйзам боюнча анын кийинки шайлоого катышууга укугу жок эле. Анткени эки жолку саясий жарышта утуп чыккан. Жалпы элдик добуш менен Башкы мыйзамга өзгөртүүлөр кирсе, Рахмон өзүнүн талапкерлигин чектөөсүз коюп, бийлигин чыңдай турганы күтүлүүдө.
КОММЕНТАРИЙ КАЛТЫРУУ