Жаңы даярдалып жаткан биометрикалык паспорттун электрондук үлгүсү жарандарды буга чейин орун алып келген ашыкча убаракерчиликтерден арылтат. “Анткени, анын көзгө көрүнбөгөн маалымат базасында ошол паспорт ээсинин улуту, жашаган жери, үй-бүлөлүк абалы тууралуу маалыматтар жайгашат. Ошондуктан, коомчулукта талаш-тартышты жараткан паспорттогу “улуту көрсөтүлбөйт экен” деген пикирлердин негизи жок”,- дейт өкмөткө караштуу Мамлекеттик каттоо кызматынын маалымат-катчысы Мелис Эржигитов бүгүн, 22-июнда “Парламент” радиосуна курган маегинде.
Ошондой эле ал, аталган электрондук паспортто айдоочулук күбөлүк, банктагы эсеп, пенсиялык китепче, медициналык карта сыяктуу керектүү пункттар дагы белгиленерин кошумчалады. “Бул биринчи кезекте жарандардын өзүнө эле ыңгайлуу боло турган нерсе. Анткени, биометрикалык паспорттун электрондук түрү – электрондук өкмөт түзүү планынын алгачкы кадамдарынын бири болуп саналат”,- дейт М.Эржигитов.
Паспорттун жасалмалуулугуна жол бербөө үчүн анын коргоо элементтери ар бир 5 жыл сайын күчөтүлүп туруш керек. Ал эми азыркы колдонуудагы ID-карт үлгүсүндөгү паспорттордун колдонулуп жаткандыгына 12 жыл болду. Андан бери анын эч кандай коргоо элементтери өзгөртүлгөн эмес. Бул тууралуу маалымат берген Мамлекеттик каттоо кызматынын өкүлү ошондой эле ички миграциянын абалына да токтолуп, 2014-жылдагы статистикалык көрсөткүчкө караганда 2015-жылдагы эсеп туруктуу катталган жерлерин өзгөрткөндөрдүн саны азайгандыгын ачыктады, – дейт.
Ал эми Жогорку Кеңештин Социалдык маселелер, билим берүү, илим, маданият жана саламаттык сактоо боюнча комитети 3-окууда жактырган «Ички жер которуу жөнүндөгү» мыйзамга кошумчаланып жаткан өзгөртүүлөрдө – “Эгер жаран өзүнүн расмий катталган жери башка болуп, бирок 45 күндөн ашык башка аймакта жашоого туура келсе 5 жумушчу күндүн ичинде белгиленген формадагы арызы менен ыйгарым укуктуу органга кайрыла алат. Болгону мында жарандын паспорту гана талап кылынат”,- деп көрсөтүлүүдө.
КОММЕНТАРИЙ КАЛТЫРУУ