Алмазбек Атамбаев бүгүн медицина кызматкерин кесиптик майрамы менен куттуктады. Бул тууралуу президенттин басма сөз кызматы билдирди.
– Урматтуу Кыргызстандын саламаттык сактоо системасынын кызматкерлери!
Сиздерди медицина кызматкеринин күнү менен чын жүрөктөн куттуктайм!
“Дарыгерлик кесип – бул эрдик. Ал кайратмандуулукту, рухтун жана ниеттин тазалыгын талап кылат”, – деп жазган улуу орус жазуучусу А.П. Чехов. Дарыгерлик адам өмүрүнө өмүр, жашоосуна жашоо улаган дүйнөдөгү эң асыл, гумандуу жана ардактуу кесип. Кеселге кабылып, жаныбыз кыйналып турганда алар бизге жардамга келишет.
Биз дарыгерге ишенип, эң жакын адамыбызга гана айта турган жүрөк түпкүрүндөгү көйгөйүбүздү айтып, ден соолугубуздун сырларын ачып беребиз. Анын кеңештерин кунт коюп угуп, көрсөтмөлөрүн, рецепттерин кыйшаюусуз аткарабыз. Анткени биздин саламаттыгыбыз ушуга байланыштуу болот.
Жарандарыбыздын саламаттыгын сактоо мамлекеттик саясаттын эң негизги артыкчылыктарынын бири. Мамлекет калктын бардык катмарларынын жашаган жерине жана материалдык мүмкүнчүлүгүнө карабастанмедициналык жардамдан пайдалануусун камсыз кылуу үчүн чоң күч-аракет жумшоодо. Жаңы клиникалардын жана медициналык борборлордун курулушу башталды, алар сапаттуу жана заманбап жабдуулар менен камсыз болот.
Медициналык жардамдын сапатын арттырууга, дартты аныктоонун жана дарылоонун жогорку технологиялык ыкмаларын киргизүүгө, адистерди даярдоо жана алардын квалификациясын жогорулатуу системасын өркүндөтүүгө өзгөчө көңүл бурулууда.
Бүгүн биз өзүбүздүн жаш дарыгерлерибизди жана профилдик адистерди кармап калуу, айрыкча элет жериндекармап калуу тууралуу тереңирээк ойлонушубуз керек. Биринчи кезекте биз аларга татыктуу эмгек акы төлөшүбүз шарт, бул жакынкы келечектин иши. Дарыгердин эмгеги татыктуу бааланууга тийиш.
Дарыгер – бул адамзатка кызмат кылууга өзүн арнаган адам. Бүгүн ата-мекендик саламаттык сактоонун ардагерлерине, майрам күнү ооруканаларда, төрөт үйлөрүндө нөөмөттө турган, тез жардам бригадаларынын курамында чакырууларга чыгып, адамдардын дартына дабаа таап жүрүшкөн бардыкмедициналык кызматкерлерге өзгөчө ыраазычылык билдирем.
Бар болгула, доорубуздун Улукман акелери, көкүрөктөгү мээрим, жүрөктөгү касиет өчпөсүн!
Бардыгыңыздарга чың ден соолук, бакыт-таалай, жарык маанай, бакубат турмуш, маанилүү жана жооптуу ишиңиздерде албан ийгиликтерди каалайм!
КОММЕНТАРИЙ КАЛТЫРУУ