“Ведомости” басылмасы кабарлагандай, Орусия Украинаны диверсияга айыптап, ага жооп берүү үчүн Коопсуздук кеңешинин жыйынын курду. Отурумдун жыйынтыгында Украинага каршы көрүлө турган чаралар так иштелип чыккан эмес. Бул милдет профилдик мекемелерге жүктөлдү.
Өзүн өзү жарыялап алган Донецк элдик республикасынын бийлигине жакын адамдын айтымында, Москва Киевге кубаттуу согуштук соккуларды уруу маселесин караган жок. Бирок Украина чыгышындагы жикчилдердин аракетин мындан ары ооздуктабай, эркин кое бериши мүмкүн.
10-августта Орусия Крымда террордук актыларды уюштурмак болгон украиналык чалгынчыларды кармаганын, алар менен атышуу учурунда эки кызматкери өлгөнүн билдирген.
Диверсанттар кармалганы тууралуу билдирүүдөн кийин Орусия менен Украинанын мамилеси кескин курчуган. Орусия президенти Путин Украина бийлиги террор чарасына өткөнүн айтып айыптаган. 11-августта Орусия ТИМи Крымдагы окуя натыйжасыз калбай турганын эскерткен.
Өткөн жумада премьер-министр Дмитрий Медведев Орусия Украина менен дипломатиялык мамилени үзүүсү мүмкүн экенин четке каккан эмес.
Киев диверсияга катышы бар экенин моюнга алган жок. Украина муну аймакта репрессиялык иштерди жүргүзүүгө жол ачкан чагымчылдык катары баалоодо.
Булак: “Борбор Азия жаңылыктар кызматы”
КОММЕНТАРИЙ КАЛТЫРУУ