Тажик-кытай биргелешкен антитеррордук машыгуулар 20-октябрда Тоолуу-Бадахшан автономдуу облусунун Ишкашим районунда башталды. Алар Шитарв полигонунда өтүп, төрт күнгө созулат. Бул тууралуу өлкөнүн Коргоо министрлигинен кабарлашты.
Машыгуулар өлкө президенти тарабынан бекитилген пландын негизинде жүргүзүлүүдө. Максаты – акыркы эки жылдан бери тынч болбой жаткан Ооганстандын Бадахшан провинциясы менен чектешкен өлкө аймагын бекемдөө. Азырынча бийлик машыгууларга катышып жаткан аскерлердин саны жана пайдаланылып жаткан курал-жарактар тууралуу маалымат бере элек.
Тажикстан менен Ооганстандын чектеш аймактары 1300 чакырымга созулат. Акыркы жылдары Ооганстандын түндүгүндөгү абал курчуп, бир канча провинция Талибандардын көзөмөлүнө өткөн. Тажикстандын өкмөтү тажик-ооган чек арасындагы абал туруктуу жана эгер коркунуч жаралса душман чабуулунун мизин кайтарууга даяр экенин дайыма белгилеп келет.
Негизинен соода өнөктөштөр деп эсептелген Тажикстан менен Кытай акыркы убактарда коопсуздук тармагындагы кызматташтыкты бекемдөөдө. Ушул жылдын башында Кытай Шуроабад районунда курулган «Гулхан» чек ара бекетин пайдаланууга берген.
Булак: “Борбор Азия жаңылыктар кызматы”
КОММЕНТАРИЙ КАЛТЫРУУ