Путин: Москва элчи Карловду өлтүрүүнүн артында кимдин турарын билиши керек

Ал окуяга байланыштуу кылмыш иши козголуп, тергөө иштерине катышуу үчүн Анкарага орусиялык өкүлдөр жөнөтүлөрүн билдирди.

Путиндин басма сөз катчысы Дмитрий Песковдун айтымында, Орусия президенти атайын кеңешмеде элчи Карловдун өлтүрүлүшүн Сириядагы абалды жөнгө салуу аракеттерин үзгүлтүккө учуратууга багытталган чагым деп атады.

Буга чейин ТИМдин расмий өкүлү Мария Захарова Москва элчинин өлтүрүлүшүн теракт деп эсептей турганын билдирген. Түрк бийлиги элчиге карата ок чыгарган адамдын мурда полицияда иштегенин ырастады. Окуядан кийин ал өлтүрүлгөн.

Анкарадагы кол салуудан жаракат алган Андрей Карлов оор абалында ооруканага жеткирилип, көп өтпөй каза болгон. Окуя ал Заманбап искусство галереясындагы «Орусия түрктөрдүн көзү менен» аттуу көргөзмөдө сүйлөп жаткан маалда болгон.

Андан сырткары дагы үч адам жеңил жаракаттарды алышкан.

Булак: “Борбор Азия жаңылыктар кызматы”