Бүгүн, 25-февралда КР Генералдык прокуратурасы Жогорку Кеңештин “Ата-Мекен” фракциясынын депутаты Өмүрбек Текебаевге каршы КР Кылмыш-жаза кодексинин 166-алдамчылык жана 303-коррупция беренелери боюнча кылмыш ишин козгоду. Бул тууралу КР Генпрокуратурасынын басма сөз кызматы билдирди.
Россиялык бизнесмен, Мамдуманын экс-депутаты Леонид Маевский КР Генпрокуратурасына арыз менен кайрылып, депутат Өмүрбек Текебаевге каршы чара көрүүнү суранган. Анын айтымында 2010-жылы КР Убактылуу Өкмөтүнүн төрайымынын орун басары Өмүрбек Текебаев “Мегаком” (“Альфа-Телеком”) компаниясын силерге алып берем деп андан 1 миллион АКШ долларын алып, бирок “Мегаком” компаниясын алып бере алган эмес. Убада кылган ишин аткара албай койгондон кийин 7 жылдан бери 1 миллион доллар акчасын да кайтарып бербей койгон. Акчаны кайтаруу боюнча талап кыла баштаганда коркутууга өткөн.
Бул окуяны бир нече жылдан бери атамекенчи экс-депутат Өмүрбек Абдрахманов массалык маалымат каражаттарында жарыялап жүрчү. Бирок укук коргоо органдары мурун кызыгышпай келишкен.
Кылмыш ишин иликтөөнүү Генпрокуратура УКМКнын тергөө бөлүмүнө тапшырып, тергөөчүлөр Леонид Маевскийден жана күбө Алексей Модинден видеокөрсөтмө да жаздырып алышкан.
Өмүрбек Текебаев азыр Австриянын Вена шаарында өткөн эл аралык парламенттик саясый жыйынга катышып жаткандыгы, бүгүн түндө учуп келери айтылууда.
Булак: Кyrgyztoday.kg
КОММЕНТАРИЙ КАЛТЫРУУ