Сабырбек Жумабвков, академик:
– Менин эсимде калган белек 101 роза келинчегим Розага арналган. Буга окшогон белектерди аял заты үчүн аябаш керек. Эртеңки 8-март майрамы менен апаларды, эжелерди, карындаштарды куттуктайм! Аял затынын көз жашы төгүлбөсүн. Элибизде, мамлекетибизде тынчтык орносун. Аял заты бактылуу болсун!
Мирлан Бакиров, ЖКнын депутаты:
– 8-март аял затынын эл аралык майрамы. Бул албетте өзгөчө майрам, аталган майрамдын өзгөчөлүгү жана кызыктуулугу мектеп курагындагы күндөрдө болгон десем жаңылышпайм. 23- февраль Советтик армиянын күнүнө карата классташ кыздардан чыдамсыздык менен белек күтүп, ар кандай белектерди алган соң, келээрки айдагы 8-март майрамына кызуу даярдыктар башталчу. Классташ балдардан каражат топтоп, классташым Зарыл деген жигит экөөбүз Базар-Коргон районунун борборунан атайын жалтырактар менен жасалган ичинде атыр, упа жана айымдарга тиешелүү болгон журналдар салынган белектерди алып келгенбиз. Кызыгы бир жумадан кийин классташ кыздарыбыз айтып жатпайбы, тиги журналдар “Кыргызстан аялдары”, “Ден соолук” сыяктуу, бир жыл мурун чыккан эски журналдар экендигин, менимче ал күндөгү белектердин маанилүүлүгү журналдардын эскилигинде эмес, чыныгы таза ниет, балалык сезимдер менен берилген белектерде го деп ойлойм. Мүмкүнчүлүктөн пайдаланып, жалпы кыргыз мамлекетинин айымдарын тирүүлүктүн учугу болгон кыз-келиндерди, үйдүн куту болгон энелерди жана эже-карындаштарды чын ыкласымдан куттуктайм! Азыркы заманда аял заты мамлекеттик кызматта, миграцияда жана дүйнөнүн булуң-бурчунда эмгектенип, үй-бүлөсүнө мээримин төгүп, коломтонун отун өчүрбөй жылуулук сактоого тынымсыз аракеттенип келүүдө. Бул жашоодо биздин ажырагыс ажарлуу айымдарыбыз, апаларыбыз бар болсун!
Балбак Түлөбаев, “Аю холдингдин” вице-президенти:
– Түркияда окуп жүргөндө, биринчи 1993-жылдары мектепте окуткан эжейиме ал жактан кат жазгам. Чет өлкөдөн кат жазганда өтө көп марка чаптачубуз. Ошондо тышында гүлү бар открытка таппай кыйналып араң тапкам, бул учур 8-март келген сайын эсиме келет. Түркияда майрамдык маанай ал убакта көп жок эле, комунисттик майрам деп. Алар пикет, митинг менен өткөрүшчү. Ал эми аял затына “Аю холдингдин” атынан бакыт, ырыс-кешик, жакшы жашоо, бакубат өмүр каалайм. Күнүгө кечинде күткөндөрү аман-эсен түгөл үйлөрүнө келип турсун. Аял заты бар биздин дүйнө жарык, жашоо жыргал!
Болсун Казаков, мамлекеттик кызматкер:
-Мектепте окуп жүргөн кезде кыздарыбызга белек бергенибиз эсимде! Биз берген белегибиз алардыкынан арзан болуп калып, бизге кайра берип салышкан эле. Бул күндөр эсимден кетпейт. Балалык баёо сезимдерге бөлөнгөн кез эле. Эртеңки 8-март майрамы менен бардык аял затын куттуктайм. Аял заты бул жашоо, бул сулуулук, бул боорукерлик жана үйдүн куту! Кудайдан аял затына эң бир чоң милдет берилген – бул эне болуу, ошондуктан баарыңыздарга эне болуу бактысын каалайм!
Узарбек Жылкыбаев, ЖКнын депутаты:
-8-мартка карата атайылап өз колум менен белек жасап көрө элекмин. Адатта даяр белекти, гүл жана парфюмерияларды сатып алып эле берем, апама, жубайыма жана кесиптештерге. Ал эми айымдардын эл аралык майрамында бардык аял затына бакыт каалайм. Жакындарынын курчоосунда аман болушсун. Жаз айынын башталышы айымдардын майрамы менен башталып калышынын да себеби бар. Жаз күнүндөй жаркылдаган айымдар аман болсун!
Максат Сабиров, ЖКнын депутаты:
– Эсимде калган белек – бул идиште өстүрүлгөн гүл болгон. Алгачкы белегим да ушул болгон. Ал гүл келинчегиме арналган. Идиште өстүрүлгөн гүл өсүп-өнөт, көпкө жашайт. Ал жылда көбөйүп турат. А каалоом бардык аял затына узун өмүр, ден соолук, чексиз бакыт жана калыстык. Эне калыс болбосо жер астын-үстү болот. Анан дайыма жүздөрүнөн күлкү кетпесин.
Азамат Байматов, “Кайрымдуу бол” фондунун негиз- дөөчүсү:
– Окуучулук күндөрдө 8-мартга акыга бир жерге иштеп, аябай кыйналганым эсимден эч кетпейт. Биринчи жолу өз мээнетим менен акча таап, апама ошол кезде мода болуп жаткан жоолук алып, 8-март майрамы менен куттуктагам. Ал эми азыр болсо апамды, жеңелеримди, келинчегимди кафеге алып барып, белегимди берип, сый-урматымды көрсөтүп турам. Бул жалган дүйнөгө келишибизге себепкер болгон энелерибизге ден соолук, узак өмүр, дөөлөттүү карылык каалайм. Дегеле бардык аял затын, биз силерди жакшы көрөбүз,сыйлайбыз деп айткым келет.
Булак: “Фабула”
КОММЕНТАРИЙ КАЛТЫРУУ