Бүгүн, 30-мартта Жогорку Кеңештин жыйынында “КР айрым мыйзам актыларына өзгөртүүлөрдү киргизүү жөнүндө” мыйзам долбоору (“Электр жана почта байланышы жөнүндө”, “КРдагы лицензиялык-уруксат берүү тутуму жөнүндө”, “Телекөрсөтүү жана радиоуктуруу жөнүндө” мыйзамдарга) 3-окууда каралды. Демилгечилер – депутаттар Иса Өмүркулов, Наталья Никитенко, Дастан Бекешев. Бул тууралуу Жогорку Кеңештин Басма сөз кызматы маалымдады.
Мыйзам долбоору боюнча Транспорт, коммуникациялар, архитектура жана курулуш боюнча комитетинин төрагасы Марат Аманкулов баяндама жасады.
Мыйзам долбоорунун максаты санариптик көрсөтүүгө ийгиликтүү өтүү үчүн укуктук шарттарды түзүү, кызмат көрсөтүүлөрдү кеңейтүүгө жана алардын атаандаштыкка кудуреттүүлүгүн жогорулатууга мүмкүндүк бере турган жаңы технологияларды эске алуу менен санариптик берүү рыногун өнүктүрүү үчүн жагымдуу ченемдик укуктук базаны түзүү, телекоммуникация тармагында узак мөөнөттүү бизнести өнүктүрүү үчүн шарттарды түзүү болуп саналат.
Мыйзам долбоорундагы түзөтүүлөр радиожыштык спектрин пайдалануунун натыйжалуулугун жогорулатууга багытталган. Ошондой эле сунушталып жаткан өзгөртүүлөр колдонуу чөйрөсүн так аныктоо максатын көздөйт, бул Кыргыз Республикасында санариптик телекөрсөтүүнүн өнүгүшүн олуттуу тездешине мүмкүндүк берет. Андан тышкары, мыйзамда телерадиоберүү системасынын субъектилерин так чектөө сунушталууда. Бул алардын ишмердигин, ошондой эле жоопкерчилигин аныктоого мүмкүндүк берет. Демилгеленип жаткан өзгөртүүлөр телерадио уюмдарына улуттук аудиовизуалдуу продукцияларды чыгарган студия-өндүрүүчүлөргө, өз кезегинде жаңы индустриянын өнүгүү мүмкүнчүлүгүнө – көз карандысыз продакшн-студиялар даярдаган ата-мекендик өндүрүштөгү программа жана берүүлөрдүн көбөйүшүнө алып келет.
Мыйзам долбоору талкуусуз 3-окууда добуш берүүгө жолдонду.
КОММЕНТАРИЙ КАЛТЫРУУ