Орусия кайрадан Тажикстандын «Сомон Эйр» авиакомпаниясынын Дүйшөмбү жана Худжант шаарларынан Орусияга каттамдарды аткаруусуна чектөөлөрдү киргизди. Бул тууралуу орус маалымат каражаттары өлкөнүн Транспорт министрлигинин басма сөз кызматына шилтеме кылып билдиришти.
Орусиянын Транспорт министрлиги тажик авиакомпаниясынын 3-апрелдеги учууларына чектөөлөрдү киргизди. Орус тарап бул кадамын тажик бийлиги буга чейинки макулдашууларга карабастан орусиялык «Ямал» авиакомпаниясынын «Жуковский» аэропортунан Дүйшөмбүгө жана Худжантка учуу тууралуу билдирмесин ырастабагандыгы менен түшүндүрүүдө.
«Сомон Эйр» авиакомпаниясынан учууларга чектөө киргизилгендигин жана 3-апрелде алгачкы каттам аткарылбаганын билдиришти. Жаңы чектөөлөр киргизилгенге чейин «Сомон Эйр» Дүйшөмбүдөн жумасына төрт, Худжанттан үч каттам аткарып турган.
Буга чейин Орусиянын транспорт министри Максим Соколов Москва каттамдардын жайкы ырааттамасын макулдашуу боюнча тажик тараптан расмий жооп ала электигин билдирген. 31-мартта Тажикстандын Транспорт министрлиги «Ямал» авиакомпаниясынын учууларына уруксат берилгенин маалымдаган, бирок анда каттамдардын ырааттамасы түзүлбөгөндүгү айтылган.
Москва каттамдардын жайкы ырааттамасынын жоктугу тажик тараптын жетишилген макулдашуулардан баш тартып жаткандыгын түшүндүрөт деп эсептөөдө. Январда эки өлкөнүн ортосундагы экономикалык кызматташтык боюнча өкмөттөр аралык комиссиянын жыйынында тажик тарап «Ямал» авиакомпаниясынын «Жуковский» аба майданынан Дүйшөмбү менен Худжантка 2017-жылдын июлунан тарта каттамдарды жасап башташына макул болгондугун кабарлаган.
Булак: “Борбор Азия жаңылыктар кызматы”
КОММЕНТАРИЙ КАЛТЫРУУ