Бүгүн 26-апрель күнү Талас шаарынын эс алуу паркындагы Баатырлар аллеясына орнотулган Чернобыль АЭСиндеги апаатты жоюуга катышкан жана андан радиоактивдүү нурлануу алып, айыккыс оорудан кайтыш болгон адамдарга арналып коюлган эстеликтин алдында Чернобыль АЭСиндеги кыйроонун 31 жылдыгына арналып митинг –реквием болуп өттү. Бул туурасында Өкмөттүн Талас облусундагы ыйгарым укуктуу өкүлүнүн басма сөз катчысы маалымдады.
Митинг реквиемдин башталышында курман болгондорго арналып коюлган эстеликке гүлчамбарлар коюлуп, алардын жаркын элестери бир минута унчукпай туруу менен эскрилди. Чернобыль апаатын жоюуга катышкандардын жана митинг-реквиемге келишкен коомчулук өкүлдөрүнүн алдында Кыргыз Республикасынын Өкмөтүнүн Талас облусундагы ыйгарым укуктуу өкүлү Дайыр Кенекеев сөз сүйлөп, мындан туура 31 жыл мурун 1986-жылдын 26-апрелинде Украина ССРинин аймагында жайгашкан Чернобыль Атомдук Электрстанциясынын төртүнчү энергоблогу күтүүсүздөн жарылып, чоң кыйроого учурагандыгын эскерүү иретинде айтып берди. Адам тарыхындагы мына ушундай кырсыктын зыяндарын жоюуга ошол кездеги Советтер Союзунун бардык республикаларынан, анын ичинен Кыргызстандан дагы миңдеген адамдар чакырылып, алар бул кырсыкты жоюуда чоң эрдик менен иштешишкен.
Талас шаардык бириккен аскер комиссариатынын маалыматына ылайык ошол кезде Талас облусунан жалпысы 101адам Мекендин чакырууcуна жооп кылып, өз ыктыярлары менен Чернобыль кырсыгын жоюуга жөнөп кетишкен. Азыр облус боюнча 58 адам эмгектенип, жашап жүрүшөт. Мына ушул адамдарга бүгүн облустун коомчулугунун атынан сый-урматтар көрсөтүлүп, Талас шаардык мэриясы Чернобыль кырсыгын жоюуга катышкан ардагерлерге 34 миң сом акчалай жардамдарды көрсөттү.
Ал эми облустагы Чернобыль коомдук бирикмесинин төрагасы Өмүрбек Чатаев жыл сайын чернобылчылар үчүн ушундай эскерүү митингин өткөрүп, моралдык жана материалдык жактан колдоо көрсөтүп келишкен облус, шаар-райондук жетекчилерге терең ыраазылык билдирди.
КОММЕНТАРИЙ КАЛТЫРУУ