Түркмөнстандын президенти Гурбангулы Бердымухаммедов түркмөн аргымагынын күнүнө арналган 28-апрелдеги ат чабышта жеңишке жетти. Баш байгеге алган жолтандабас унаасын ал жылкычыларга берди.
Ат чабышка түркмөн лидеринен башка өлкөнүн беш дубаны жана борбор калаа Ашхабаддан келген алты тажрыбайлуу чабандес катышты. Президент Мирас деген күлүгү менен биринчи келип, жолтандабас автоунаага ээ болгонун мамлекеттик телеканалдар байма-бай көрсөтүштү. Бул күлүктү ат чабышка Бердымухамедовдун небереси Керимгулы таптаган.
Байгеге алган жолтандабастын ачкычын Гурбангулы Бердымухаммедов айыл чарба боюнча вице-премьерге берип, аны өлкөдөгү жылкы баккандардын керегине жаратууну тапшырды.
Түркмөнстанда апрел айынын акыркы жекшембиси ахалтекин аргымагынын күнү катары белгиленет. Бул майрам жыл сайын өтө шаң менен майрамдалат.
Бердымухамедов Түркмөнстандын президенти болуп 2007-жылы шайланган. Ага чейин ал Түркмөнбашы Сапармурат Ниязовдун “жеке дарыгери” деген атка ээ болгон. Президент Бердымухаммедов аргымактар тууралуу бир нече китеп жазып, өзү да ат чабыштарга катышып жүрөт. Өлкөсүндө спортчу, ырчы катары дагы белгилүү.
Булак: “Борбор Азия жаңылыктар кызматы”
КОММЕНТАРИЙ КАЛТЫРУУ