Франциядагы парламенттик шайлоонун жыйынтыгында өлкө президенти Эммануэл Макрондун “Алга, республика” кыймылы Улуттук ассамблеядагы 577 орундун 400үн алуу менен абсолюттук көпчүлүккө ээ болушу мүмкүн. Мындай божомолдорду жекшембиде өткөн добуш берүүнүн биринчи айлампасынын жыйынтыгына таянып социологдор чыгарышууда.
Жалпы өлкө боюнча Макрон кыймылынын талапкерлери менен анын союздаштары добуштардын 32 пайыздан ашыгын алып, жакынкы атаандашы — оңчул «Республикачылар» партиясынан дээрлик эки эсеге озуп кетишти.
Францияда шайлоо партиялык тизме боюнча эмес, мажоритардык система боюнча өтүп жатат. «Алга, республика» кыймылынын талапкерлери 400дөн ашык округда экинчи турга өтүштү. Эксперттер алардын көбү экинчи айлампада жеңишке жетишет деп болжолдошууда. Чоңдугу жагынан экинчи орундагы фракцияны “Республикачылар” түзөт деп күтүлүүдө. Болгону 14 гана пайыз добушка ээ болгон ашкере оңчул «Улуттук фронттун» иши оңунан чыкпай калды, бирок анын лидери Марин Ле Пен округдардын биринде жеңишке жетүү мүмкүндүгүн сактап калууда. Парламенттин мурдагы чакырылышында көпчүлүктү түзгөн социалисттер андан да аз добуш алышты. Алар солчул «Багынбас Франция» кыймылы сыяктуу эле парламентке ондогон талапкерин өткөрүү мүмкүндүгүн сактап калышууда.
Шайлоонун биринчи айлампасында добуш берүү укугуна ээ жарандардын 50 гана пайызы катышты. Бул өлкө тарыхындагы эң төмөнкү көрсөткүч болгону айтылууда. Добуш берүүнүн экинчи айлампасы 18-июнда өтөт.
Булак: “Борбор Азия жаңылыктар кызматы”
КОММЕНТАРИЙ КАЛТЫРУУ