Тажикстандын Жогорку соту Коррупцияга каршы күрөшүү агенттигинин дагы бир мурдагы кызматкери Хуршед Жабборзоданы 7 жылга эркинен ажыратты. Ал өлкөнүн антикоррупциялык мекемесинин мурдагы кызматкерлерине карата козголгон кылмыш ишинде айыпталуучу катары өтүп жаткан.
Булактын маалыматына караганда, антикоррупциялык мекеменин мурдагы кызматкерлери ири өлчөмдө пара алууга, кызмат абалын кыянат пайдаланууга, алдамчылыкка барууга жана документтерди жасалмалоого айыпталышууда.
Өлкөнүн Башкы прокуратурасынан билдиришкендей, Хуршед Жабборзода антикоррупциялык мекеменин мурдараак камалган кызматкерлеринин көрсөтмөсүнүн негизинде ушул жылы июнда кармалган.
Хуршед Жабборзода документтерди жасалмалаган деп күнөөлөнүүдө. Ал соттогу акыркы сөзүндө айыптоолорду толугу менен четке кагып, аны бошотууну талап кылды.
Тажикстанда апрелдин аягынан бери антикоррупциялык мекеменин бир канча мурдагы кызматкери камакка алынган.
Булак: “Борбор Азия жаңылыктар кызматы”
КОММЕНТАРИЙ КАЛТЫРУУ