Жалал-Абад шаарындагы ар кайсы окуу жайлары кары-картаңдарга сый-урмат, колдоо көрсөтүү боюнча түрдүү иш-чараларды уюштуруп жатышат. Бул иш-чаралар шаар бийликтери тарабынан жарыяланган улгайган кишилерге камкордук көрүүнүн бир айлыгынын алкагында өткөрүлмөкчү. Бул тууралуу шаар мэриясынан билдиришти.
Мисалы, шаарда жайгашкан Педагогикалык колледжинин мугалимдери карыялар күнүнө карата өз каражаттарынын эсебинен сый тамак уюштурушуп, аларга кеңири программадагы концерт тартуулашмакчы. Аталган окуу жайдын гуманитардык илимдер усулдук бирикмесинин жетекчиси Сапаргүл Төлөнбаеванын айтымында, эмгек жамаатынын бардык мүчөлөрү ушул демилгени колдоп чыгышкан.
-Биздин мугалимдербиз карылар күнүнө карата өз ара макулдашып, арабыздагы жашы улгайып калган коллегаларыбызга майрамдык сый тамак уюштуруп берүүнү чечишкен. Алар ушул тармакта иштеп, жашы 60тан жогорулагандарды сыйлоону эп көрүштү. Андан сырткары, студенттер тарабынан концерттик программалар да уюштурулуп, маанайларын көтөрүүнү ниет кылып турабыз. Буюрса, ушундай жакшы саамалык ар жылы кайталанып, алардын батасын алып турсак дейбиз. Бул баарыдан мурда жаштарды туура тарбиялоого жакшы мисал, өрнөк болот, – дейт ал.
Алынган маалыматка караганда, колледждин студенттери шаардагы жалгыз бой кары-картаңдардын үйлөрүнө барып, турмуш-тиричилигине каралашышмакчы. Аны үчүн атайын студенттик топтор түзүлүүдө.
Эскерте кетсек, Жалал-Абад шаарынын мэриясынын атайын буйругу менен 15- сентябрь – 15-октябрь мезгилинде карыларга камкордук көрүүнүн айлыгы өтүп, менчигинин түрүнө карабастан бардык юридикалык жактар жашы улгайгандарга камкордук чараларын уюштурушат.
КОММЕНТАРИЙ КАЛТЫРУУ