2017-жылдын 22-ноябрь күнү Кыргыз Республикасынын ички иштер министринин орун басары Данияр Абдыкаров Жогорку Кеңеште Аида Салянованын иниси Улан Саляновдун өлүмүнө байланышкан кылмыш ишинин бетин ачууда бир катар коплекстүү иш-чаралар көрүлүп жатканын айтып, депуттардын суроолоруна жооп берген. Бул туурасында ИИМдин Басма сөз кызматы билдирет.
Ушул жылдын 6-ноябрь күнү түнкү саат 01:30 чамасында беткапчан белгисиз адамдар Чүй облусунун Аламүдүн районундагы Көк-Жар айылында жайгашкан үйгө кирип барышкан. Көк-Жар айылындагы үйүнөн Улан Саляновду кылмышкерлер атып кетишкен. Улан Салянов октон алган жаракатынан каза болгон. Ички иштер министрлиги бул факты боюнча Кыргыз Республикасынын кылмыш-жаза кодексинин 97-беренесинин (адам өлтүрүү) негизинде кылмыш ишин козгогон. Ушуга байланыштуу адам өлтүрүү фактысына шектелген адамдардын өздүгүн тактоо жана кылмыштын бетин ачуу максатында тергөө тобу түзүлүп, ага тажрыйбалуу ыкчам кызматкерлер, тергөөчүлөр жана криминалисттер кирген. Башынан баштап бул кылмыш ишинин иликтениши ички иштер министрлигинин жетекчилигинин көзөмөлүндө турат.
Ички иштер министринин орун басары Данияр Абдыкаров Жогорку Кеңештин депутаттарына жогорудагы кылмыш ишинин иликтениши тууралуу маалымат берген. Адам өлтүрүү фактысынын бетин ачуу боюнча комплекстүү чаралар көрүлүп жатканын белгилеп жатып, министрдин орун басары аталган кылмыш ишине шектүү катары мурда каракчылык менен соттолгон жарандар текшерилип жатканын билдирген. Үйдүн жанында жайгашкан 51 камера, ошондой эле окуя болгон күндөн 10 күн мурдагы видео- жазуулар текшерилүүдө.
Маалымат боюнча “Макаров” үлгүсүндөгү тапанчадан ок чыгарылган. Экспертизалар дайындалып, эксперттер тарабынан окуя болгон күнү жанына ок атуучу куралын алып жүргөн укук коргоо органдарынын кызматкерлери, сыйлык катары белекке алгандар жана жеке күзөт мекемелеринин тапанчалары текшерүүдөн өтүүдө. Улан Саляновко эки жолу ок атылган. Атылган экинчи ок изделүүдө.
Андан сырткары, министрдин орун басары кол салгандар акча каражатын талап кылгандыгы тууралуу протокол бар экендигин маалымдаган. Ушуга байланыштуу, ички иштер министрлиги жогорудагы кылмыш саясий мүнөздү камтыбайт деп билдирүү жасаган.
Бул кылмыш иши боюнча башка иликтөө иштерин тергөөнүн кызыкчылыгы үчүн маалымдаган жок. Бирок, министрдин орун басары тергөө амалдары толук жүрүп жатканын баса белгиледи.
КОММЕНТАРИЙ КАЛТЫРУУ