ММКларда Асан Токтосунов деген «шүдүңгүт» тууралуу кызык кептер айтылууда. Атап айтсак Эл аралык «Манас аба майданы» ачык акционердик коомунун карамагындагы «Манас менеджмент компаниясы» жабык акционердик коомунун директорлор кеңешинин чечими менен анын президенти Асан Токтосунов кызматынан алынып, директорлор кеңеши анын ордуна Мурат Примбердиевди дайындады. Буга чейин «Манас Менеджмент» компаниясынын президенти Асан Токтосунов мамлекеттик ишкананын эсебинен 2 миллион сом чыгым кылып, эмгек жамаатына жаңы жылдык шаан-шөөкөт өткөргөнү боюнча видео материалдар интернетке тараган болчу. Мындан сырткары директорлор кеңешинин чечими менен мамлекеттик үлүшү бар компаниянын эсебинен Асан Токтосуновго айлыгынан сырткары жыл сайын ири өлчөмдө сый акы чегерилип турган фактыларды ырастоочу финансылык документтердин көчүрмөсү интернетке чыккан эле. Директорлор кеңеши тарабынан 2012-жылы компаниянын президенти Асан Токтосуновго 6 454 402 сом, 2013-жылы 10 967 281 сом, 2014-жылы 11 271 484 сом, 2015-жылы 4 092 987 сом, жалпы 32 миллион сомдон ашык сый акы берилгени көрсөтүлгөн. Мына окурман. Бул эмне деген шумдук? Сый акы үчүн олчойгон каражаттарды алган Асан Токтосунов ушунчалык кол тийгизби? Мынча сый акы алгыдай ал эмне кызмат өтөдү? Колу жооруп, бели бекчейгенче кетмен чаап кыйналып атабы? Токтосунов Кудайдын чүчкүрүгүнөн түшсө дагы жазасын тартыш керек го…
Булак: «Мантыш»
КОММЕНТАРИЙ КАЛТЫРУУ