Тажик өкмөтүнүн чечими менен ТВЕА кытай компаниясы алтын казуу үчүн керектүү жабдууларды, техникаларды алып кирүүдө кошумча нарк салыгынан жана бажы төлөмдөрүнөн бошотулду.
ТВЕА компаниясынын эсеби боюнча «Чыгыш Дуоба» жана «Жогорку Кумарг» кендеринде аныкталган алтындын кору 52 тоннага жакын, дагы 120 тоннага чукул алтындын запасы изилдене элек.
Душанбе карыздарынан кутулуу менен бирге инвестиция тартуу максатында пайдалуу жер казыналарын кытай компанияларына өткөрүп берген. Маселен, «Душанбе-2» жылуулук электр борборун куруу үчүн Кытай жогорудагы алтын кендерин алган.
Келишимге ылайык, ТВЕА «Чыгыш Дуоба» жана «Жогорку Кумарг» алтын кендерин «Душанбе-2» ЖЭБинин чыгымдарын жапканга чейин казат. Бул долбоордун жалпы наркы 349 миллион доллар, анын ичинен 17,4 миллионун гана тажик өкмөтү өз мойнуна алган.
Тажикстанда алтындын 80% кытай-тажик биргелешкен ишканалары казат. Алардын арасында Согдидеги «Зарафшон», Ромиттеги «Пакрут» кендери да бар.
Булак: “Борбор Азия жаңылыктар кызматы”
КОММЕНТАРИЙ КАЛТЫРУУ